Motra dhe vëllezër të mij,
Populli im i dashur i Tiranës.

Jam shumë i gëzuar që po ju dërgoj këtë përshëndetje, por jam dhe shumë i pezmatuar që detyrimet e mija nuk më lejuan të vij sot tek Ju. Është një gëzim i madh për mua, Mbretin e Shqiptarëve, nënën Mbretëreshë Geraldina, Mretëreshën Susan dhe Princin Leka, që ju keni organizuar ceremoninë për vendosjen e emrit Bulevardi Ahmet "ZOGU I" në Tiranë.

Ky vendim i Bashkisë së Tiranës është shenja e parë për nderimin që Ju i bëni Mbretit të shqiptarëve Ahmet Zogu I. Ishte pikërisht ai që e filloj ndërtimin e Tiranës si Kryeqytet i Mbretërisë Shqiptare. Rruga që nisi Mbreti Zog ishte rruga e shtetit ligjor dhe e drejtësisë për të gjithë Shqiptarët. Por fatkeqësisht ajo u ndërpreh nga pushtimi fashist dhe regjimi komunist. Historia këtë e di më mirë.

Në këtë ditë feste kam dëshirë që t'ju përshëndes dhe të gëzohem me Ju. Motra dhe vëllezër të Tiranës.

Unë ruaj kujtimet më të mira nga Takimet që pata me Ju në vitin 1997. Siç ju kam thënë dhe unë jam një qytetar i Tiranës, sepse kam lindur në Tiranë. Për mua Tirana dhe Mati janë vendet më të dashura për zemrën time të mbushur me mallë Shqipërie.

Unë e di se Tirana dhe e gjithë Shqipëria po kalojnë ditë të vështira. Këto kanë ardhur si pasojë e politikës së keqe të partive politike. Por siç e kam thënë që kur erdha në Rinas, përsëri vendi ynë ka nevojë vetëm për : "PAQE-BASHKIM-VL-LAZËRIM".

Shqipërinë tonë, që ende është në rrezik, që vuan nga problemet e mëdha ekonomike, edhe pse është një vend shumë i pasur, që nuk ka rend dhe siguri, edhe pse ka patur dikur një shembull të madh rendi dhe sigurie, mund ta shpëtojë patriotizmi dhe atdhedashuria.

Motoja "Atdheu mbi të gjitha" është e vetmja që na duhet në këto kohë të vështira. Ju falenderoj të gjithëve. Gëzuar festën e Bulevardit Ahmet Zogu I.

LEKA I  Mbret i Shqiptarëve.

Johanesburg, 24 qershor 2000.