Gjyqtari Ilir Çeliku e zbuti dje vendimin për Zogun. Prokuroria kërkoi dënimin e tij me 3 vjet burg 
Mbreti Zog, 2 vjet burg me kusht

Leka Zogu është i lirë të kthehet në Shqipëri pas më shumë se 4 vjetësh
Nga Alma Çuka
TIRANË - Gjykata e Tiranës deklaroi dje fajtor të pandehurin Leka Zogu, trashëgimtar i fronit mbretëror, dhe vendosi dënimin e tij me dy vjet heqje lirie me kusht. Tashmë Leka Zogu është i lirë të kthehet në Shqipëri, por me një kusht që brenda dy vjetëve të mos kryejë asnjë vepër tjetër penale. Gjykata tha dje se i pandehuri nuk mund të dënohet për grusht shteti apo për kryengritje në 3 korrik, pasi një akuzë e tillë nuk është vërtetuar. Leka Zogu u dënua për akuzën e manifestimit të turmave të armatosura në 3 korrik të vitit 1997. Ky manifestim u organizua nga legalistët kundër Komisionit Qëndror të Zgjedhjeve që sipas tyre kishte manipuluar me votat e referendumit në 29 qershor.
Vendimi
Një javë më parë, avokati Vladimir Germenji kërkoi nga gjykata pafajësinë e të pandehurit. Dje avokati tha se ishte i kënaqur me vendimin e dhënë nga gjyqtari Ilir Çeliku. Ndryshe u shpreh prokurori Ylli Basha. Ai tha se vendimin e dhënë nga gjykata do ta apeloj, pasi nuk ishte dakord. Prokurori Basha kërkoi nga gjykata dënimin e të pandehurit me 3 vjet heqje lirie. "Leka Zogu ka dalë përpara turmës, ka qenë i armatosur, ka udhëhequr turmën, është ndeshur i pari me policinë. Duke parë gjithë këto elementë nuk më mbetet gjë tjetër vetëm t'i kërkoj gjykatës dënimin e tij me tre vjet burg, për akuzën e organizimit, të grumbullimit dhe manifestimeve të paligjshme me pjesëmarrje të personave të armatosur". Kjo ishte fjali e vetme me të cilën përmblodhi gjithë konkluzionet përfundimtare prokurori Ylli Basha. Por konkluzionet e tij nuk u morën të mirëqëna nga gjykata, e cila e dënoi të pandehurin me dy vjet burg me kusht.
3 korriku
Më 3 korrik të vitit 1997, Leka Zogu, së bashku me Abedin Mulosmanin, i cili tashmë ka vdekur, kanë organizuar një tubim të madh proteste në sheshin kryesor të kryeqytetit me simpatizantë të legalitetit dhe mbështetës të monarkisë. Më pas turma, në krye të së cilës ishin Leka Zogu dhe Mulosmani, është drejtuar për në Pallatin e Kongreseve ku ishte i vendosur Komisioni Qëndror i Zgjedhjeve. Gjykata  tha se kanë qenë rreth 500 veta të grumbulluar dhe rreth tyre në një distancë të largët, kanë qenë edhe 300 forca policie. Sipas gjykatës, në turmë kishte edhe shumë persona të armatosur. Gjykata tha se Leka Zogu ka tentuar të futet brenda në pallat, por ka hasur me gatishmërinë e policisë. Para turmës, Leka Zogu,  ka deklaruar se monarkia në referendum ka fituar dhe se votat janë manipuluar. Më tej  Leka Zogu është shprehur se do të mbrojë me çdo kusht verdiktin e shqiptarëve. Thirrja që Leka ka bërë në shesh ka qenë "do t'i mbroni votat apo jo". Kjo thirrje ka irrituar turmën, e cila është nisur drejt Pallatit të Kongreseve, ku si pasojë e plumbave të gjuajtura pa një drejtim të caktuar, gjeti vdekjen shtetasi Agim Gjonpali. Sipas vendimit të dhënë nga gjykata, pjesëmarrjen e Leka Zogut në tubimin e 3 korrikut e kanë pohuar edhe dëshmitarët, shumica e të cilëve kanë qenë nga radhët e policisë. Por vendimi i djeshëm i gjykatës i ka krijuar mundësinë Leka Zogut që të rikthehet në Shqipëri pas më shumë se 4  vjetësh. Tashmë ai nuk ka ndonjë pengesë nga policia për të hyrë në Shqipëri, me përjashtim të faktit se nuk duhet të kryejë një vepër penale të dytë, pasi rrezikon të marrë dy dënime njëherësh.