GAZETA55 - 01/04/2003

PLL mban pezull punën e komisionit hetimor për fajdet

Puna e komisionit hetimor parlamentar për transparencën e firmave piramidale dhe të grupit mbikqyrës ngritur për to, është bllokuar prej dy javësh nga pretendimet e opozitës, është shprehur  nismëtari i kësaj kërkese për ngritjen e këtij komisioni, deputet i PAD-së, Preç Zogaj. Z.Zogaj pohoi se "këtë radhë është vetë opozita që po e mban pezull fillimin e veprimtarisë normale të komisionit hetimor për fajdet, ku Partia Lëvizja e Legalitetit kërkon medoemos të ketë përfaqësuesin e saj në komision". Kuvendi miratoi në 20 mars ngritjen e komisionit, përbërjen e tij prej 11 anëtarësh, objektin e hetimit, afatin e punës prej 3 muajsh, si dhe detyrimet e kryetarit të Kuvendit për mbarëvajtjen e punës. Por nuk u miratuan 11 emrat konkretë të anëtarëve të komisionit, (6 përfaqësues të mazhorancës dhe 5 të opozitës), pasi deputetët e PLL‑së paraqitën kërkesën për t'u përfaqësuar në këtë komision. Sipas ndarjes aktuale, opozita përfaqësohet në komision me 2 anëtarë të PD‑së, 2 të PAD‑së dhe 1 i Partisë Demokrate (PDr).

Sipas z.Zogaj, edhe propozimi i PD‑së për rritjen e numrit të anëtarëve nga 11 në 13 nuk është pranuar nga Partia Socialiste (PS) me arsyetimin se "numri i anëtarëve është votuar nga Kuvendi tashmë". PAD dorëzoi në byronë parlamentare në 31 janar, një kërkesë të firmosur nga 37 deputetë të opozitës për ngritjen e një komisioni hetimor parlamentar për procesin e transparencës së firmave piramidale dhe punën e grupit mbikqyrës, ngritur nga qeveria në vitin 1997 për këtë çështje. Po ashtu, synohet edhe identifikimi i rasteve të mundshme të implikimit të zyrtarëve të lartë në këto aktivitete.

e.gj