ar. ço

Partia Demokratike ka filluar tratativat për të marrë mazhorancën në pjesën më të madhe të këshillave bashkiakë. Por një gjë të tillë mund ta bëjë vetëm duke riaktivizuar koalicionin.

LAJMI

TIRANE

Partia Demokratike kërkon të rivërë në punë koalicionin opozitar për konstituimin e këshillave bashkiakë në degët lokale. Lajmin e konfirmoi ditën e djeshme, për Gazetën, nënkryetari i kësaj partie, Bamir Topi. "Ne kemi marrë kontakte me partitë e djathta për të bashkëpunuar në rang këshillash", konfirmoi dje Topi, duke nënkuptuar se do të ketë një koalicion opozitar ndaj këshilltarëve socialistë. Ndërsa Njazi Kosovrasti, sekretar i pushtetit vendor në PD, shton më tej se partitë e vogla kanë marrë këshilltarë në të gjitha këshillat, ndaj është shumë i nevojshëm bashkëpunimi. Ndërsa demokratët shprehen se kanë marrë kontakte me të gjitha partitë, këtë e mohon kryetari i grupit parlametar të reformatorëve, Nard Ndoka. "Ne nuk kemi marrë asnjëlloj kontakti për çështjen e bashkëpunimit në nivel lokal", konfirmoi Ndoka për Gazetën. "Megjithatë, edhe nëse do të kishte një bashkëpunim të tillë, ne do të ishim të hapur", vazhdoi më tej ai.
Ndërsa legalistët e Ekrem Spahisë tashmë e kanë marrë ofertën e bashkëpunimit nga PD-ja, pavarësisht se ata dolën të vetëm në zgjedhje. "Ne kemi marrë në të gjitha zonat këshilltarë. Ne u kemi kërkuar të gjithë këshilltarëve tanë në nivel lokal për të parë mundësitë e bashkëpunimit, pa u ndikuar nga lart. Pra, ne u kemi lënë hapësirën e duhur degëve lokale të shprehen për këtë çështje", tha Ekrem Spahia dje për Gazetën.
Ofertën për bashkëpunim me PD-në në nivel lokal e ka pranuar edhe ballisti Shpëtim Rroqi. "Besoj se kjo është gjëja më e mirë për të pasur një opozitë reale të bashkuar. Me këtë bashkëpunim besojmë se opozita do të ketë mazhorancën në këshillat bashkiakë", tha Rroqi.
Pritet që këtë radhë të funksionojë më së miri ideja e bashkëpunimit të opozitës kundrejt Partisë Socialiste.

PBDNJ e paqartë për qëndrimin. Priten forumet

Dule: Bashkëpunim me shumicën
"U kam lënë dorë të lirë strukturave lokale"
Kryetari i Partisë së të Drejtave të Njeriut, Vangjel Dule, tha dje për "Gazetën Shqiptare" se ende nuk është vendosur në linjë partiake se si do të procedohet me koalicionet lokale në pushtetin vendor. "Aty ku ne kemi bashkëpunuar në nivel lokal për kandidatët, patjetër që do të ketë një bashkëpunim të këshilltarëve. Ndërsa për rastet e tjera, ku nuk kemi bashkëpunuar, do të jenë degët lokale që do të përcaktojnë strate-gjinë", tha dje Vangjel Dule. Duket se PBDNJ-ja ende nuk e ka përcaktuar linjën e saj politike. Vetë Dule tha se pas zgjedhjeve do të mbledhë strukturat partiake për të parë rezultatet përfundimtare dhe për të vendosur për linjën. Ai u ka lënë dorë të lirë degëve lokale të bashkëpunojnë me ata kandidatë që për elektoratin kanë qenë më të mirët. "Do të thërrasim të gjithë të zgjedhurit për të përcaktuar edhe një herë pas zgjedhjeve në mënyrë të prerë prioritetet në bazë të kërkesave të elektoratit. Ne nga këto zgjedhje dolëm shumë të kënaqur dhe patëm një rritje në elektorat", tha dje Dule për Gazetën.
PBDNJ-ja ende nuk e ka përcaktuar qartë se si do të bashkëpunojë me dy forcat më të mëdha. Kjo parti vazhdon të jetë në qeverisje me PS-në, ndërsa në pushtetin lokal do të vazhdojë bashkëpunimin me PD-në.