3 Maj, 2003 Copyright 2003 Shekulli

TIRANE-Kryeministri Fatos Nano nuk ka harruar dje për asnjë çast që pas deklaratave publike për forcim të partneritetit strategjik me SHBA të shtonte se në të njëjtën kohë, marrëveshja e firmosur me Pauell për mosdorëzim të shtetasve amerikanë në Gjykatën Penale Ndërkombëtare është një hap i ri edhe drejt Europës dhe standardeve e institucioneve europiane dhe euroatlantike.
Pas një takimi kokë më kokë 30 minutësh në zyrën e kryeministrit shqiptar, Nano dhe Pauell nënshkruan para gazetarëve marrëveshjen për mosndjekjen e shtetasve amerikanë nga Gjykata Penale Ndërkombëtare.
Sekretari amerikan i Shtetit vlerësoi përkrahjen e Shqipërisë për Shtetet e Bashkuara. "Nënshkrimi i Kartës së Adriatikut dhe mbështetja që kemi marrë, sidomos nga Shqipëria, në luftën kundër terrorizmit dhe përpjekjet tona për të çliruar popullin irakian, ushtarët shqiptarë në terren në Irak që na ndihmojnë ashtu si dhe në Afganistan, e gjithë kjo është tregues i drejtimit në të cilin Shqipëria dëshiron të shkojë, të jetë pjesë e kësaj Evrope të integruar, të tërë në liri dhe në paqe dhe pjesë e partneritetit euroatlantik", - tha Pauell.
Kryeministri i Shqipërisë Fatos Nano tha se bashkë me sekretarin Pauell kishin këmbyer qëndrimet mbi prioritetet që ka Shqipëria dhe rajoni. "Politika më e mirë që mund ta kemi të përbashkët me SHBA-në dhe partnerët e tjerë globalë, është një politikë e fuqishme e brendshme e orientuar drejt reformave euroatlantike", - tha Nano.
"Ne ramë dakord që duhet të vazhdojmë përshkallëzimin e luftës kundër korrupsionit, krimit të organizuar, dhe trafikut të jashtëligjshëm që edhe më tej kalon nëpër Shqipëri dhe rajon. Unë i garantova sekretarit Pauell se politika shqiptare, qeveria dhe shoqëria shikojnë me simpatinë e duhur praninë, ndihmën e vazhdueshme dhe monitorimin e shtuar nga agjencitë amerikane dhe qeveria amerikane në arritjen e këtyre objektivave të përbashkët", -tha kryeministri shqiptar.

Sekretari shpjegon arsyet e ndërrimit të planit. “Kam dashur prej kohësh të vizitoj Shqipërinë”

Pauell: Pse e ndryshova udhëtimin për të ardhur në Tiranë

TIRANE- “Nuk besoj se vendimi për të firmosur marrëveshjen në Tiranë do të shkaktojë ndonjë përplasje mes tre Ministrave të Jashtëm”,-tha dje sekretari amerikan i Shtetit Kolin Pauell duke qeshur, ndërsa i përgjigjej një gazetari kroat për arsyen e zgjedhjes së kryeqytetit shqiptar mes Shkupit dhe Zagerbit. Ndërsa tre pyetje që iu drejtuan sekretarit Pauell, dy kishin të bënin me vendin e takimit, Tiranën. Vendimi për të ardhur në Shqipëri për të sigluar marrëveshjen që ishte paracaktuar në Uashington sipas sekretarit të Shtetit erdhi pasi Departamentit të Shetit iu duk se ishte vendi dhe momenti i përshtatshëm për ta bërë një gjë të tillë. “Unë jam duke bërë një udhëtim i cili mbulon Evropën dhe sot në mbrëmje do të shkoj në Siri. Kjo ishte diçka që kam dashur ta bëj prej kohësh, pra të vizitoj Shqipërinë”,-tha Pauell në konferencën e përbashkët për shtyp me kryeministrin Nano. Ai sqaroi më tej se “Ne e dinim se Karta ishte gati dhe, se të gjitha dallimet, që ishin diskutuar gjatë muajve të kaluar, ishin zgjidhur. Eshtë një dokument i shkëlqyer dhe nuk besoj se mund të gjendej një vend më i mirë se Shqipëria për ta nënshkruar atë, pra e ndryshova të gjithë udhëtimin tim që të vij këtu dhe bashkë me udhëheqësit e Kroacisë dhe Maqedonisë të nënshkruajmë këtu Kartën. Mendoj se kjo është një shprehje e miqësisë ndaj Shqipërisë si edhe ndaj Kroacisë dhe Maqedonisë”.
Ndërsa komentet e shefit të diplomacisë amerikane u dukën më të zbutura për këtë çështje pas firmosjes së “Kartës së Adriaktikut” kur ai kishte në krah jo vetëm ministrin e Jashtëm shqiptar por edhe atë maqedonas Mitreve dhe kroatin Picula. “"Ku ka një partneritet mes disa vendeve, një konkurrencë e tillë nuk ekziston", -duke shtuar se, prej kohësh kishte pasur një dëshirë për të vizituar Tiranën.
A. S