02092003pll

Faqja 4 - POLITIKE 2 Shtator

Shtator 2, 2003

Shën Naumi, zëdhënësi i Lekës replikon me Milon: Eshtë historian i komunizmit

Zëdhënësi i oborrit mbretëror në Tiranë, Fluturak Gërmenji, reagoi dje pas deklaratës së historianit Paskal Milo se "Ahmet Zogu i dhuroi në vitin '25 Shën Naumin Serbisë, pasi Pashiqi e mbështeti atë të rikthehej në pushtet". Sipas Gërmenjit, kjo tezë e Milos është e nxjerrë nga tekstet e vjetra të diktaturës komuniste. "Kjo nuk është gjë tjetër, sesa mendësia për të politizuar sipas kuzhinës së vjetëruar", deklaroi Gërmenji. Ai shpjegoi se Shqipëria bëri asokohe shkëmbim tokash me Serbisë, pasi i leverdiste kështu. "Në mbledhjen e 19 tetorit 1925 të dy dhomat e Parlamentit miratuan me vota unanime marrëveshjen mes qeverisë shqiptare dhe asaj jugosllave, sipas propozimit transaksional të Konferencës së Ambasadorëve, ku Shqipëria, përkundër ndërtesës së Shën Naumit që nuk kishte asnjë banor, merrte katundin e Peshkëpisë me 60 shtëpi dhe 300 frymë, kodrën e Çërravës, kishën e Ajazmës, kodrat strategjike të Shën Naumit, me karakollin e Serbisë duke fituar një tokë prej 22 kilometrash katrorë", thuhet në replikën e Gërmenjit.

Faqe 22 - Rajon & Bota http://www.panorama.com.al/

2Shtator 2003

Ushtria dhe policia maqedonase vazhdon aksionin për kapjen e Avdil Jakupit

Banorët e Kumanovës lënë shtëpitë

AKSH, ultimatum: “Ikni për 24 orë, ndryshe luftë”

Më shumë se njëmijë banorë të fshatrat Vaksincë dhe Llojan të Kumanovës i kanë braktisur deri tani shtëpitë nga frika se do të hasin në një zjarr të kryqëzuar mes grupeve ekstremiste dhe forcave maqedonase të sigurisë, të cilat vazhdojnë operacionin për arrestimin e Avdil Jakupit, të njohur si komandant “Çakalla”.

Fshati Vaksincë i Kumanovës u shpërngul tërësisht gjatë fundjavës, ndërsa vazhdon edhe shpërngulja e fshatit fqinj kufitar Llojan - konfirmuan burime të sigurisë nga terreni. Rreth 400 familje që jetojnë në Vaksincë, sipas pohimeve të tyre, në frikë dhe panik për shkak të pranisë së rritur të policisë, por edhe të grupeve të armatosura të uniformuara, e braktisën fshatin. Popullata shqiptare nga ky fshat niset për në Kumanovë, Likovë, ndërsa një pjesë edhe te farefisi në Kosovë. Sipas informatave të një banori të Vaksincës, ata janë të frikësuar për shkak të asaj që në një kohë të caktuar në Vaksincë operon një grup më i madh i armatosur nga Haraçina dhe Kosova, e cila ka bashkëpunuar me individë nga fshati, mirë të njohur te popullata lokale pas sjelljes ekstreme dhe kriminale. Shumica, gra dhe fëmijë, kanë kërkuar strehë në fshatrat e Luginës së Preshevës. “Brenda 24 orëve të gjitha forcat ushtarake, policore me gjithë armatimin e tyre të madh të tërhiqen plotësisht nga Kumanova dhe të gjitha rrethinat shqiptare”, thuhet në një komunikatë për shtyp të Shtabit të Përgjithshëm të Armatës Kombëtare Shqiptare. “Në rast se gjatë këtij afati kohor këto forca ushtarako-policore sllavomaqedone nuk tërhiqen për t’i lënë të qetë shqiptarët në truallin e tyre, Shtabi i Përgjithshëm i AKSH legjitimohet të urdhërojë forcat e saj të veprojnë për ta realizuar me çdo mjet këtë obligim atdhetar, qytetar dhe demokratik”, thuhet ndër të tjera në këtë ultimatum. “Apelojmë para faktorit ndërkombëtar veprues në Maqedoni, që të ndikojë urgjentisht për t’u plotësuar shqiptarëve autoktonë këtë të drejtë demokratike dhe të ligjshme, të drejtën për të mos patur kolonizator të armatosur në trojet dhe shtëpitë e tyre”, thuhet në komunikatën e AKSH-së.