I pozicionuar kundër kryeministrit aktual Fatos Nano dhe idesë së propozuar prej tij për rikompozim të qeverisë, kryetari i PSD-së Gjinushi, deklaron se partia e tij do të jetë e gatshme të bashkëpunojë vetëm me atë palë në PS që është për bashkimin e së majtës.

Ai vlerëson të vonuar rikompozimin e qeverisë dhe që duhet të ishte bërë menjëherë pas zgjedhjeve lokale. Gjinushi e ka quajtur mbledhjen e fundit të grupit parlamentar socialist, si një parodi dhe një lojë të Nanos për të treguar se gjoja është i shqetësuar bashkë me grupin e tij mbështetës për zgjidhjen e krizës qeveritare. Kreu i socialdemokratëve gjithashtu, ka quajtur servile, qëndrimet e anëtarëve të kryesisë së PS-së, ndaj kryetarit Nano në mbështetjen e idesë për atë që, kryeministri e ka quajtur rifreskim të qeverisë. Një ndër pikat e dobëta të marrëdhënieve të Gjinushit me socialistët, mbetet ajo e aleancave me partitë e majta.

Sa mendoni se mund të funksionojë propozimi i Nanos për rikompozim të qeverisë momentalisht?
Koha për rikompozim ishte menjëherë pas zgjedhjeve, qoftë për problemet e brendshme në PS, qoftë për rikrijimin dhe konsiderimin e aleancave, pasi kryeministri duhet të jepte patjetër, mesazhin se ai e ka përsëri mazhorancën parlamentare dhe shumicën elektorale pas zgjedhjeve të 12-tetorit. Këto duhet t´i rikonfirmonte me anë të rikompozimit që duhet të kishte të bënte me mënyrat e qeverisjes dhe me mënyrën e programit të qeverisjes, aq më shumë që kjo periudhë lidhej edhe me përgatitjen e buxhetit të 2004-ës.

Çfarë roli do të ketë mbledhja e fundit të grupit parlamentar socialist në krizën qeveritare?
Kjo mbledhje e grupit dëshmoi se nuk ka asnjë ndryshim para kongresit, kryeministri e pa edhe një herë që është i bllokuar për të arritur një gjë të tillë. Ndërkohë, edhe kryesia e kësaj partie dëshmoi që bëri një mbështetje servile, ndaj kryeministrit dhe siç u pa, ajo ishte një parodi, pra ishte një mbledhje vetëm për të fituar kohë dhe për të krijuar idenë se të gjithë janë të shqetësuar për zgjidhjen e krizës.

Aty është folur edhe për cështjen e aleancave?
Ne do të presim zhvillimet e kongresit dhe do të bashkpunojmë me ato pjesë që janë për ribashkimin e së majtës dhe me ata që mendojnë që e majta të mos ta dorëzojë pushtetin, një të djathtë shumë më të çarë, apo dhe një të djathtë tepër destruktive.

Fatmir Mediu
“Jo në Qeveri me të majtën”

Kreu i republikanëve u shpreh dje prerë se nuk mund të flitet për bashkëpunim me të majtët, për situatën aktuale, e cila ka vetëm një zgjidhje, zhvillimin e zgjedhjeve të parakohshme. “Qytetarët shqiptarë përjetojnë krizën më të rëndë social-ekonomike, e cila ka vetëm një fajtor, qeverinë socialiste. Por, këtë krizë, e cila po shkatërron vendin, është dënuar dhe njohur edhe nga faktori ndërkombëtar”, tha ai. Mediu shtoi se është detyrë e opozitës të krijojë një platformë të qartë për të realizuar fitoren e së djathtës.

Rroqi: S’bëhemi bashkëfajtorë me PS

Kreu i Ballit Kombëtar, Roqi, deklaroi dje se thirrja e dalë nga drejtuesit e PS për një bashkëpunim me forcat e djathta, përjashtuar PD-në, është absurde. “Kjo kërkesë është e pakuptimtë dhe nuk i shërben aspak zgjidhjes së krizës. Ne nuk mund të pranojmë të jemi bashkëfajtorë në këtë situatë, e cila, ka vetëm një zgjidhje, zgjedhje të parakohshme”.

Spahia: Kemi program të kundërt

Kryetari i PLL, Spahia hodhi poshtë dje, kërkesën e mazhorancës mbi një bashkëpunim me opozitën, për një rikompozim të Qeverisë. “Kjo është qesharake për faktin e thjeshtë se ne si parti kemi qenë dhe do të jemi një parti me programe dhe platformë të kundërt me socialistët. S’ka bashkëpunim, kur kjo mazhorancë tashmë, është e dështuar.

Pollo reagon pas vendimit të Nanos
“Në qeveri, me kusht zgjedhje të parakohshme“

Kryetari i reformatorëve ka ripërsëritur qëndrimin e tij se është i gatshëm të jetë pjesë e qeverisjes në koalicion me PS-në, në rast se do të përgatitet situata për zgjedhje të parakohshme parlamentare.

Si i shikoni zhvillimet më të fundit mes grupeve në PS?
PS është në krizë të plotë dhe për mendimin tim të pakthyeshëm. Nuk më duket se kongresi i tyre mund të sjellë ndonjë mrekulli e të shpëtojë partinë nga situata e krizës së fortë që mbizotëron sot brenda saj.

Cili do të jetë qëndrimi juaj në rast të përsëritjes së kërkesës nga ana e Nanos?
PS e bashkuar, ose e përçarë, me grup deputetësh në njësh apo në dysh, me pak Gjinush, apo me shumë Gjinush, ka humbur forcën politiko-morale, por edhe numerike për të mbajtur Qeverinë.

Pra, vendit i duhen formula politike që të risjellin ekuilibrin politik dhe këto janë zgjedhjet e parakohshme. Zgjatja e jetës së qeverisë socialiste, apo ndryshe tmerrit të pafund, është një ushtrim i pakuptimtë. Në këtë sens, ia vlen të veprosh po qe se del nevoja dhe dikton aritmetika. Por, për këto do të shohim udheheqjen ( një por ndoshta dhe dy) e PS që do të dalë në mes të dhjetorit, por kuptohet edhe faktorë të tjerë në opozitë.

Pjesëmarrja, për herë të parë së bashku
Nano dhe Rama sot përballë në konferencën e Shkodrës

Për herë të parë në fushatën parakongresuale, Nano dhe Rama sot, do të përplasen në konferencën e PS-së së Shkodrës. Në pozicionin e kandidatëve për kryetar të PS-së Edi Rama dhe Fatos Nano, do t´i drejtohen sot, socialistëve shkodranë me alternativat e tyre për kreun e PS-së. Ndërkohë që Nano e ka të sigurtë pritjen e tij në këtë konferencë, nuk dihet nëse socialistët shkodranë do të pranojnë në konferencën e tyre, kandidatin për kryetar të kësaj partie Edi Rama, edhe pse në momente të caktuara, shkodranët kanë shprehur simpatinë e tyre për Ramën, si një drejtues i suksesshëm i pushtetit vendor. Sidoqoftë, pritet që sot, të ketë përplasje mes dy figurave të PS-së, që kohët e fundit kanë shfaqur kundërshti të hapura mes tyre. Ndërkohë që Nano do të vazhdojë turin e tij pas Shkodrës, në Kukës dhe Vlorë, mund të ndodhë që në këto rrethe, apo edhe në të tjerë të përplaset sërish me Ramën, ndërsa Meidani do të vazhdojë fushatën e tij në bazë, jashtë konferencave të partisë. Ndërsa, pritet që tre kandidatët për kreun e PS-së të përplasen në konferencën e socialistëve të Tiranës. Konferenca e PS-së Tiranë, do të ketë brenda saj alternativën për drejtimin e PS-së, të anëtarit më të ri të saj Edi Rama, të ish-presidentit Meidani, anëtar i PS-së së këtij rrethi dhe të kryeministrit Fatos Nano. Pritet që në këtë konferencë, të ketë debat të ashpër pasi prania e tre kandidatëve do të jetë e sigurtë, pasi Rama nuk mund të mos pranohet nga socialistët e Tiranës, të cilët dhe e kanë mbështetur fuqishëm në kandidimin për postin e kryetarit të Bashkisë, ndërkohë që Nano dhe Meidani e kanë fituar këtë të drejtë sipas rregullave statuore.