• Adili, në kërkim ndërkombëtar
  
  Prej dy vjetësh, Gafurr Adili ka qenë në ndjekje, këmba-këmbës, nga agjentët e huaj. Ai ishte kreu politik i Armatës Kombëtare Shqiptare, që propagandonte idenë e bashkimit të territoreve shqiptare dhe krijimin e Shqipërisë së Madhe. Menjëherë, pas investigimeve të kryera, CIA e shpalli person të rrezikshëm dhe në kërkim ndërkombëtar. Edhe autoriteteve shqiptare iu kërkua arrestimi i tij, megjithëse ishte shqiptar. Madje, amerikanët, kanë kërkuar që shqiptarët të zbatojnë Kushtetutën që mohon kufijtë e Shqipërisë së Madhe. Pra, akuza e parë, është shkelja e rendit kushtetues dhe e dyta, e konventave ndërkombëtare. Sipas informacionit zyrtar, Adili “ka nxitur urrejtjen nacionale dhe ka tentuar krijimin e organizatave terroriste, brenda kufijve shqiptarë”. Më datë 10 qershor, kishte nisur procedimi penal, që është pak a shumë, edhe koha kur, 54- vjeçari ka hyrë në Shqipëri, prej Durrësit. Dhe vetëm pas dy vjetësh “gjuetie”, Adili ka rënë në qeli, e kjo, vetëm nga dora e bashkatdhetarëve të tij. Ndërsa u fal, 6 marsin e kaluar, mbrëmjen e së martës, kjo falje nuk është përsëritur.

Urdhrin për arrestimin e kreut politik të Armatës Kombëtare Shqiptare, e dha Shërbimi Inteligjent Amerikan. Gafur Adili është kapur rreth mesnatës të së martës, në hyrje të rrethin verior të Dibrës, së bashku me mbështetësin e tij, Taip Mustafai, nga Gostivari i Maqedonisë, i njohur edhe me pseudonimin Liguri.

Një sërë dokumentacionesh të falsifikuara si, pasaporta e çertifikata, u janë gjetur gjatë kontrollit, në një bar-restorant-motel, të ngritur 3 km para se të hyje në qytetin e Peshkopisë. Aksioni është thurrur me kujdes, nga zyra e Antiterrorit në ministrinë e Rendit Publik, e cila, pas arrestimit, i ka sjellë dy personalitetet e AKSH-së në ambientet e Drejtorisë së Policisë së Tiranës. Për të kurorëzuar operacionin, janë grumbulluar të gjitha të dhënat e sakta. Akuzat, sipas burimeve zyrtare, janë shkelje e rendit kushtetues, me anë të organizatave terroriste, për nacionalizëm dhe shkelje e Konventave Ndërkombëtare. Burime policore, thanë se, 54- vjeçari Adili, kishte depërtuar në Dibër prej fundjavës së kaluar. Ai ka qenë i kërkuar ndërkombëtar në mbi 100 vende të botës, dhe shumë i kërkuar nga CIA amerikane, që e ka përfshirë në listat e zeza. Mes letrave të kapura, figurojnë edhe ato që vërtetojnë se Adili ishte drejtues i AKSH-së dhe Mustafai, pjestar i saj. Adili, bashkë me shokun e tij Taip Mustafai, ka hyrë në territorin shqiptar, për t’u strehuar. Por, agjentët, nuk hedhin poshtë edhe faktin se, ata kanë dashur të kryejnë veprimtari të fshehtë në territorin tonë, duke qenë se ishin më të sigurt. Amerikanët insistuan që, Gafurr Adili, të arrestohej sa më parë, dhe e kanë renditur atë në listat e zeza. Madje, marsin e kaluar, pati një qejfmbetje, pse ai, nuk u ndalua nga autoritetet shqiptare. Por, sipas burimeve policore, Adili ka qenë me dokumentacione tepër të rregullta dhe udhëtonte në rrugë ligjore, me një nga avionët e linjës Zyrih-Tiranë. Ai është edhe rezident në Zvicër, ndërsa ka kombësinë shqiptaro-maqedonase. Agjentët e hodhën poshtë faktin, që komandanti politik i AKSH-së, prej dy vjetësh, të kishte krijuar ndonjë bazë. Ai është strehuar në Dibër, për të qenë më afër territorit maqedonas. Adili, ka arritur që në tentativën e dytë, të hyjë në Shqipëri nëpërmjet kufirit ujor dhe më pas, atij tokësor. Aventura e komandantit të AKSH-së, ka nisur një muaj më parë, kur, me një nga linjat e trageteve Bari-Durrës, ka zbritur në qytetin bregdetar. Kontrollorët, nuk kanë kuptuar gjë, pasi kishte emër e mbiemër tjetër me fotografinë e tij. Pasaporta ka qenë sllovene. Nga Durrësi, 54- vjeçari, ka kapërcyer në kryeqytetin kosovar të Prishtinës. Aty do të qëndronte disa javë dhe, vetëm pesë ditë më parë, i shoqëruar nga Mustafaj, i është afruar kufirit shqiptar, nga pjesa verilindore. Në Morinë, ka kaluar përsëri me dokumentacione të falsifikuara, ndërsa shoku i tij, pa probleme, sepse nuk ka qenë me precedentë. Të dy kanë hyrë të qetë në rrethin e Dibrës, fundjavën e kaluar, ndërsa udhëtonin me autoveturë. Mbrëmjen e së martës, godina- vilë tre katëshe, është rrethuar dhe Antiterrori, pak minuta më vonë, vuri në pranga dy shqiptaro-maqedonasit që nuk kanë reaguar.

AKUZA
Prokuroria fillon hetimet

Prokuroria e Tiranës, deklaroi dje, se ka filluar procedimin penal ndaj Gafur Adilit dhe Taip Mustafaj, dy drejtuesit e AKSH-së, arrestuar vetëm një natë më parë, nga Antiterrori, në Peshkopi. Burime zyrtare, nga organi i akuzës, bënë të ditur se, ndaj dy shtetasve maqedonas, por me kombësi shqiptare, ende nuk është ngritur ndonjë akuzë tjetër, përveç asaj, e falsifikimit të dokumenteve. Sot, pritet që organi i akuzës, t’i kërkojë Gjykatës së Shkallës së Parë në Tiranë, vendosjen e masës së sigurisë, ndaj Adilit dhe Mustafajt.

“Qëllimi ynë është bashkimi i trojeve shqiptare”
Beqiri: Arrestimi i Adilit fyes dhe tronditës

Menjëherë pas publikimit të lajmit për arrestimin e kreut të AKSH-së, ka reaguar edhe një nga drejtuesit politik të kësaj organizate. Ish-kryetari i partisë së Unitetit Kombëtar, Idajet Beqiri, e ka cilësuar si fyes dhe tronditës arrestimin e Adilit dhe bashkëpunëtorit të tij Mustafaj, dy ditë më parë në Peshkopi. Beqiri, duke mos bërë të ditur vendëqëndrimin e tij, ka deklaruar se lajmin e ka mësuar nga agjensitë e lajmeve jugosllave dhe për këtë ai ka reaguar mjft ashpër. Deklarata e tij është bërë publike në disa media të vendit, reagim i cili është shoqëruar edhe me deklarimin e se organizata në fjalë, është tashmë akive edhe në Shqipëri. Sipas Beqirit, arrestimi i Adilit nuk duhej të ndodhte dhe kjo është fyese për ato struktura që synojnë bashkimin e trojeve shqiptare, misioni i cili është edhe detyra kryesore e AKSH-së. “Qëllimi ynë është bashkimi i të gjithë shiptareve në një shtet të vetëm”, është shprehur në reagimin e tij Idajet Beqiri.

Për falsifikim dokumentesh
Prangoset drejtori i Agjencisë Doganore

Arrestohet për falsifikim dokumentesh dhe kontrabandë, shefi i Agjencisë Doganore “Ekspres Albania”, me qendër në kryeqytet, si edhe dy persona të tjerë që i përkisnin stafit të tij bashkëpunëtor. Sipas burimeve, sektori i Antikrimit Ekonomik, arrestoi Jorgo Naumin, 38 vjeç, banues në Tiranë, drejtor i Agjencisë Doganore “Ekspres Albania”, Bedri Sulaj, 49 vjeç, lindur në Vlorë e banues në Tiranë dhe Erion Haxhia, 39 vjeç, banues në Tiranë, punonjës i Agjencisë Doganore “Ekspres Albania”. Arrestimi i tyre u bë, pasi ata dyshohen se kryenin falsifikimin e dokumenteve dhe subjekteve të ndryshme private, me qëllim, ushtrimin e veprimtarisë së paligjshme. Të njëjtat burime, saktësuan se tre të arrestuarit, akuzohen se kanë falsifikuar dokumentet e firmës “DRI-OLIM”, me të cilat, më pas, kanë kryer zhdoganimet në doganën e Tiranës. Ndërkohë, nga kontrolli i ushtruar në magazinën e Bedri Sulës, në Vaqarr, ku gjithashtu, kryheshin zhdoganime të mallrave me dokumente të falsifikuara, të subjekteve të ndryshme, u gjet dhe u bllokua një maune, me materiale të pa zhdoganuara, kryesisht, pajisje elektrike dhe shtëpiake. Vlera e përgjithshme e mallrave arrinte në 150 mijë euro,ndërsa evazioni fiskal, llogaritet në rreth 600 milionë lekë të vjetra. Policia bëri të ditur se, si prova materiale, arriti të bllokojë dhe 6 praktika të falsifikuara të firmës “DRI-OLIM”. Këto veprime doganore, janë kryer nëpërmjet Agjencisë Doganore “Ekspres Albania”, me drejtor Jorgo Naumin dhe punonjës Erjon Hoxha. Por, hetimet kanë arritur në përfundimin se, i dyshuari Sula, gjatë vitit të kaluar dhe në vazhdim, të gjitha zhdoganimet në doganën e Tiranës, i ka kryer me dokumente të falsifikuara, në emër të subjekteve të ndryshme.