Shtator 3, 2003  http://www.balkanweb.com/gazeta/gazeta.htm

PLL hap fushatën: Papa si Rama e Ngjela
Partia Lëvizja e Legalitetit hap sot zyrtarisht fushatën elektorale për zgjedhjet lokale të 12 tetorit. Aktiviteti i tyre zhvillohet në mesditë në hotel "Tirana International". Spahia në emër të legalistëve kërkoi nga mediat, si të shkruarat dhe ato elektroniket që t'i japin hapësirë në pasqyrimin e programit dhe fushatës elektorale. "Kërkoj nga televizionet dhe gazetat që hapësira për Robert Papën të jetë e barabartë me atë të Ramës, kandidatit socialist dhe Ngjelës, kandidatit demokrat. Spahia vuri në dukje se nuk do të ketë akuza për kandidatët kundërshtarë, veçanërisht ata të djathtë.

 

Faqja 19 - RAJON & BOTE

Shtator 3, 2003

SHKARKOHEN DY KOMANDANTE

AKSH fund ultimatumit, maqedonasit në llogore

Tensionet janë rritur sërish dje në zonën e Kumanovës, në veri të Maqedonisë, e cila është rrethuar prej tre ditësh nga forcat e ushtrisë maqedonase që janë në kërkim të guerilasve shqiptarë. Dje pasdite ka skaduar edhe ultimatumi i Armatës Kombëtare Shqiptare, e cila ka njoftuar nëpërmjet internetit se trupat e saj ndodhen në gjendje gatishmërie numër një në këtë zonë. Duke marrë masa urgjente për situatën AKSH ka shkarkuar edhe dy komandantë të batalioneve dhe njësive speciale të saj, të cilat ishin tërhequr dje nga pozicionet e luftimit. Komandanti i batalionit "Hamz Berami" është shkarkuar nga detyra mbasi ka lënë vendqendrimin në zonën 2. Ndërsa komandanti i forcave speciale Leopardët, është shkarkuar pasi trupat e tij nuk kanë mbërritur në vendqëndrimin e caktuar. Trupat e ushtrisë dhe policisë maqedonase vazhdojnë të mbajnë të rrethuara fshatrat Vaksincë dhe Lojanë, ndërsa sipas dëshmitarëve okularë në këto fshatra janë parë grupe të ish-luftëtarëve të UÇK-së, të armatosur dhe gati për luftë. Sipas Ministrisë së Brendshme maqedonase, operacioni në fshatrat shqiptare do të vazhdojë deri në arrestimin e grupeve kriminale apo asgjësimin e tyre. Shkupi ka theksuar se nuk do të bëjë negociata me ekstremistët. Situata e rënduar nuk ka gjetur zgjidhje as pas mbledhjes disaorëshe të kryetarit të komunës së Likovës, Hysamedin Halili, deputetëve shqiptarë dhe komandantëve të grupeve të armatosura, që operojnë në rajonin e Kumanovë-Likovës. Në këtë takim u kërkua amnisti e pjesëtarëve të mëparshëm të ish-UÇK-së, ndërrim i forcave speciale të policisë në rajonin e Likovës me forca të rregullta të policisë të përbërjes shumëetnike si dhe lirimi i personave të dyshimtë, Sulejman Sulejmani dhe Avni Ajeti.

3 Shtator, 2003 Copyright 2002 Shekulli

Mbetet e tensionuar situata në rajonin e Likovës dhe të Kumanovës. Shtohen përforcimet maqedonase

Trupat maqedonase përballë AKSH-së

Kanë vazhduar largimet e popullatës. Përpjekje për zgjidhjen me dialog të situatës së krijuar

Nga Ylber Lili

Rajoni i Likovës dhe i Kumanovës edhe dje u zgjua i rrethuar nga mijëra forca policore maqedonase. Gjendja në ish-zonat e krizës, konkretisht në atë të Likovës është mjaft e nderë, për të mos thënë alarmante. Sipas burimeve nga terreni, nga njëra anë ndodhen përforcimet e mëdha të forcave qeveritare të Maqedonisë, të pajisur me autoblinda dhe helikopterë luftarake dhe nga ana tjetër është pozicionuar AKSH-ja. Kryetari i komunës së Likovës Hysamedin Halili i tha dje “Shekullit” se “kemi të bëjmë me një gjendje të pandryshueshme nga ditët e mëparshme. Në terren është e njëjta pamje- zona të rrethuara nga të katër anët, e ndërsa nga ana tjetër popullata e tmerruar”. Sipas Halilit, banorët e Vakcincës, Llojanit por dhe të disa fshatrave të tjera kanë vazhduar të largohen nga shtëpitë e tyre për shkak të atmosferës së zymtë që mbretëron në këto anë. Një gjendje e tillë thotë Halili vazhdon edhe pas ultimatumit të lëshuar nga ana e AKSH-së. “Ne për të parandaluar këtë situatë, e cila nga momenti në moment mund të shpërthejë, kemi kërkuar nga autoritetet ndërkombëtare që të bëjnë të mundur të hiqet shtetrrethimi dhe të largohen forcat policore ushtarake”,- shtoi ai. Ndërkaq burimet tona të sigurta bënë të ditur se dje paradite banorët të ndodhur në një gjendje psikologjike të rënduar kanë lënë shtëpitë e tyre për të kërkuar vendstrehime të sigurta. Pavarësisht nga situata e tensionuar, autoritetet qeveritare maqedone nuk kanë kursyer akuzat ndaj shqiptarëve. Zëdhënësi i qeverisë tha dje se nga ana e qeverisë nuk do të ketë asnjë lloj negociate dhe marrëveshje me terroristët, ekstremistët, grupet kriminele. Ndërsa nga ana tjetër, ai theksoi se policia do të vazhdojë të jetë e përqëndruar rreth Likovës. Ndërkohë rreth orës 15 00 të ditës së djeshme, Shtabi i Përgjithshëm i AKSH-së ka urdhëruar mobilizim urgjent dhe vendosje të anëtarëve të saj në pozicionet e luftimit në fshatrat kufitare të rajonit të Kumanovës e Likovës. Ky urdhër është publikuar edhe në faqen e internetit të kësaj organizate. Shtabi i Përgjithshëm njofton për gjendje gatishmërie numër një. Sot në orën 16.00 skadon ultimatumi për tërheqjen e forcave policore maqedonase nga kjo zonë, në të kundërt AKSH ka deklaruar se do të nisë sulmin.

Takimi
Ndërsa minutat e ultimatumit nga ana e AKSH-së po shënonin orën 16 00, në fshatin Vakcincë kanë mbërritur disa deputetë shqiptare të Parlamentit të Maqedonisë. Ata janë takuar më kryengritësit duke diskutuar rreth gjetjes së një modusi për të kapërcyer situatën e rënduar. Burimet e “Shekullit” në takim konfirmojnë se debati ka qenë mjaft i ashpër, duke u kërkuar llogari deputetëve, përse nuk kanë bërë asgjë në dobi të banorëve. Po sipas këtij burimi, nga kryengritësit janë shtruar disa kërkesa për t’u realizuar nga pushteti. Ata kanë kërkuar që: menjëherë të largohet policia speciale, nga rajoni i Likovës; të tërhiqen të gjitha fletarrestet, që rëndojnë në kurriz të banorëve të asaj ane; të fillojë sa më shpejt procesi i risocializimit të ish- ushtarëve të UÇK-së. Gjithashtu ata kanë pranuar se nuk do ta pengojnë patrullimin e policisë multietnike në ato zona, por kanë kërkuar njëkohësisht të mos tejkalohen kompetencat. Nga ana tjetër burimet qeveritare kanë vazhduar deklarimet provokative, sipas të cilave situata është nën kontrollin e forcave policore. Kështu sipas qeverisë maqedonase forcat e sigurimit të Maqedonisë vazhdojnë aksionin për arrestimin e grupit ekstremist të Avdyl Jakupit - Çakallës në rajonin Kumanovë-Karadakas”. "Operacioni policor është në rrjedhë dhe do të zgjasë deri në izolimin dhe eliminimin e grupeve ekstremiste-radikale në rajonin e Kumanovës" – thonë burime zyrtare qeveritare.

Box/Qëndrimi
Moisiu dënon veprimet e ekstremistëve në Maqedoni
TIRANË - Presidenti i Republikës së Shqipërisë, Alfred Moisiu ka dënuar dje veprimet e grupeve ekstremiste në Maqedoni dhe ka bërë thirrje për realizimin e plotë të Marrëveshjes së Ohrit. Këto deklarime presidenti i Shqipërisë i ka bërë gjatë një bisede telefonike me presidentin maqedonas Boris Trajkovski. Sipas një njoftimi për shtyp nga Presidenca, gjatë kësaj telefonate, të kërkuar nga Trajkovski, ky i fundit bëri përgjegjës grupet ekstremiste që veprojnë në Maqedoni. Presidenti maqedonas e informoi presidentin Moisiu për veprimet e shtetit të tij ndaj këtyre elementëve ekstremistë, duke thënë se qeveria po përpiqet për të normalizuar situatën. Nga ana e tij, Moisiu, pasi u bashkua me shqetësimin për ngjarjet e fundit, i dënoi ato duke i cilësuar si veprime ekstremistësh, që synojnë të destabilizojë situatën dhe arritjet pozitive të shënuara në stabilitetin e Maqedonisë në frymën e Marrëveshjes së Ohrit. Presidenti theksoi se ngjarje të tilla nuk kanë dhe nuk do të kenë ndikim në marrëdhëniet midis dy vendeve, si dhe në frymën tonë të mirëkuptimit e të miqësisë. Ai shtoi se veprimet e grupeve ekstremiste nuk i shërbejnë dhe nuk përkrahen nga shqiptarët. Njëkohësisht presidenti Moisiu i kërkoi homologut maqedonas që patrullat e policisë apo të ushtrisë në terren të veprojnë me qetësi dhe konform ligjit, si dhe të mos frikësojnë popullatën e zonës, pasi në rast të kundërt ekstremistët do të mund të marrin inkurajim të panevojshëm.

_______________________________________________________

Me birrë turke në Evropë

Nga VETON SURROI

1.
Turqia më së lehti kuptohet me birrën e saj. Fillimisht ngase është vendi me popullatë myslimane që më së shumti prodhon, dhe konsumon birrë, një legatë që nga kohët e Ataturkut dhe vendosmërisë së tij që këtë vend ta largojë nga Lindja e Mesme dhe ta afrojë kah Evropa. Por, pastaj, edhe në lojën metaforike që ka tashmë njëri prej produkteve më të njohura turke, birra Efes Pilsen. «Nomen est omen», kanë thënë latinët e vjetër. Fati gjendet në emër. Një pjesë e identitetit historik të Turqisë është në këtë birrë. Emri Efes rrjedh prej vendit me emër të njëjtë, siç e njohin edhe sot, ndërsa dikur kishte qenë Efessos, koloni e rëndësishme greke në Azinë e vogël. Prej kohës kur, në shekullin XX, Turqia moderne dhe Greqia moderne shkëmbyen popullatat (emër diplomatik për marrëveshje të ndërsjellë spastrimi etnik), Efesi mbetet me emër të pandryshuar e emri paraardhës, Efessos, ka mbetur në libra të historisë. Po, pastaj, me lojë ironike fati vjen fjala Pilsen, që karakterizon llojin e birrës, ngjyrën e vet të artë dhe teksturën specifike. Në formën e vet Pilsen, apo Pilsener, fjala që denominon mënyrën e bërjes së birrës rrjedh nga qyteti i sotëm çek, Plzen. Çekët e sotëm do të thonë me krenari se këtu bëhet birra më e mirë, bile prej shekujsh, dhe do të demonstrojnë jo vetëm me dokumente historike, por edhe me konsumin prej gjeneratash. Por, njëkohësisht, sikur edhe te Efesi, do ta tejkalojnë një detaj me rëndësi, e ai është se birra Plzen për çekët është Pilsen për gjermanët. Të pranishëm në Çekosllovaki prej shekujsh, as gjermanët nuk jetojnë sot në Çeki, që prej fundit të Luftës së Dytë Botërore. Gjurmët e tyre, në mos kurrgjë, kanë mbetur në birrë, dhe në një kontest, prapë për emër. Ajo që njihej si birrë Budweiser, qe transportuar në Amerikë në fund të shekullit XIX dhe kishte filluar të prodhohet atje, duke arritur të jetë birra numër një në Amerikë në fund të shekullit të kaluar. Pas rënies së komunizmit, fabrika çeke „Budvar“ (versioni çek i emrit Budweiser) fitoi kontestin gjyqësor për të drejtën e emrit. Me ironinë e fatit, natyrisht, se po trashëgonte emrin e gjermanëve që më nuk ishin duke jetuar aty.
2.
Nëse birra turke bart në emër simbolet e Evropës së shekullit XX, kur popujt zhvendoseshin andej e këndej, dhe prej dominuesve shndërroheshin në të dominuar dhe anasjelltas, shpresa e garniturës së tanishme duket se është bërja e Turqisë Evropë të tanishme. Një pjesë bukur e mirë e ndryshimeve radikale në politikën turke, me zgjedhjen e kryeministrit Erdogan, rrodhi mu në sajë të retorikës proevropiane. Erdogani, i cilësuar si islamist nga kundërshtarët e tij, madje u tregua edhe më inventiv. Politikanëve evropianë u shpjegoi se partia e tij ka lidhje me islamin si demokristianët gjermanë me katolicizmin. Sot Turqia po kalon nëpër një reformë serioze proevropiane, madje edhe në çështje deri dje ta paparamenduara, siç është legalizimi faktik i gjuhës kurde në transmetimet radiotelevizive. Dhe, për herë të parë po krijohet, në njëqind vitet e fundit, një masë kritike proevropiane, dhe befasisht, antiamerikane. Në anketat e fundit, 70 për qind të të anketuarve ishin në favor të anëtarësimit në BE, ndërsa mbi 70 për qind kishin mendim negativ për SHBA-të. Ata që gjatë shekullit XX u konsideruan si kundërshtarët natyrorë të Turqisë sot janë në krye të listës së simpatisë, ata që ndihmuan modernizimin e Turqisë, dhe shndërrimin e saj në një fuqi ushtarake e ekonomike, sot trajtohen me antipati. Sikur fabrika „Budvar“, një herë e çliruar nga diktatura falë konsekuencës amerikane gjatë luftës së ftohtë, u kthye mu kundër amerikanëve për kontest gjyqësor komercial.
3.
Që paradoksi të jetë më i madh, fuqia e vetme serioze botërore që e përkrah integrimin e Turqisë në BE janë SHBA-të. Mes të tjerash, edhe për shkak të faktit se ky është vendi më i madh me popullsi myslimane e që mban një rend sekular. Për Amerikën, modeli i Turqisë në BE është sinjal i fortë properëndimor për vendet myslimane të Lindjes së Mesme. Por, për shumë vende të BE-së, ky është edhe një problem doktrinar. A mund të jetë vend anëtar një shtet që lerë që nuk është në kontinentin evropian (pos një rrypi të ngushtë prej Stambollit deri në kufirin bullgar/grek) por është me shumicë myslimane, madje, trashëgues i një vendi që njihej si prishës i rendit evropian përgjatë pesë shekujve? Kjo është çështje sa e psikologjisë së një Evrope kryesisht të krishtere (ndonëse po ashtu kryesisht agnostike, të shkëputur nga kleri), aq edhe e gjeopolitikës: a është Evropa e gatshme, që me Turqinë, t'i vizatojë kufijtë e vet lindorë në lumin Tigris, bashkë me Irakun, apo në jug me Sirinë?
4.
Viti që vjen do të jetë determinues për vlerësimin se me cilën shpejtësi e afërsi do të zhvillohen marrëdhëniet mes BE-së dhe Turqisë. Atëherë, Turqisë do t'i ofrohet një "road-map", hartë udhëtimi, evropiane. Dhe gjasat janë, sipas disponimit të tanishëm, që të mos jetë as mish, as peshk, gjegjësisht, që Turqisë të mos i ofrohet as perspektiva e qartë e anëtarësimit, e as përjashtimi nga kjo mundësi në të ardhmen. Ndërsa mendoja për këtë dje në Stamboll, po ashtu mendoja se çka kanë shqiptarët nga ky debat doktrinar mes ish -kolonizuesit tonë dhe Evropës së cilës i synojmë, ngase diçka gjithnjë u ndodh shqiptarëve kur Evropa merret me Turqinë. Mes të tjerash, më brofi një konkludim i thjeshtë: nëse çështja e integrimit të Turqisë ka mbërritur në fazat e veta serioze të debatit doktrinar, a dikund ndonjë intermexo në debat për të shikuar mundësia se si mund të shpejtohet integrimi i shqiptarëve në Evropë? As nuk jemi shumë popullatë sa turqit e as kemi ndonjë historiat konflikti me popujt në Perëndim. Fundja, birrat tona janë birra, jo simbole historike. Me e pa birrë, më duket se viti i ardhshëm, me çështjen turke, nxjerr si rëndom kur janë marrëdhëniet Turqi-Evropë, një sfidë plotësuese për shqiptarët: nëse te Turqia puna e integrimit është punë doktrine, pse të mos trajtohet ndërkohë, me shpejtësi prioritare, një çështje jodoktrinare çfarë është integrimi i shoqërive shqiptare në Evropë?