Aleatët kanë reaguar dje ndaj deklaratave të kreut demokrat Berisha për bashkëpunim, jo vetëm me aleatët e tij, por me të gjitha partitë e djathta. “PD-ja nuk ka ndërmarrë asnjë dialog konstruktiv me aleatët, se si mund të shkohet drejt një fitoreje të sigurt në zgjedhje. Kjo arrihet me gjetjen e gjuhës së përbashkët dhe marrjen parasysh të interesave të të vegjëlve, ndërkohë që selia blu i dëmtoi ato me hartimin dhe miratimin e Kodit Zgjedhor”, tha Mediu. Edhe lideri i Ballit Kombëtar, Shpëtim Roqi, i ka cilësuar thjeshtë fjalë, por jo angazhim deklarimet e liderit demokrat. “Deri tani kemi degjuar vetëm fjalë të bukura, apo thirrje për bashkëpunim real, ndërkohë që deri tani nuk kemi parë asnjë veprim konkret”, u shpreh ai. Ndërsa kryelegalisti Spahia, shtoi se nuk mund të ketë një parti si PD-ja, e cila bashkëpunon me partinë kundërshtare politike, atë Socialiste, në dëm të partive të djathta më të vogla. Nga ana e tyre, reformatorët janë shprehur të gatshëm të bashkëpunojnë me selinë blu, por nëse ai bashkëpunim do të ngrihet mbi kritere të qarta. Pa dyshim që ne jemi për të shtrirë marrëdhëniet me çdo parti të djathtë, ku pa dyshim PD-ja zë vend primar si më e madhja, por aleancat do të ngrihen vetëm nëse ka vërtet vullnet politik nga drejtuesit e selisë blu.