Kumanovë

Ish-komandanti i Ushtrisë Çlirimtare Kombëtare (UÇK) dhe tani AKSH, Avdil Jakupi, i njohur ndryshme me emrin “Çakalla” është shprehur se një sulm i ri maqedonas me helikopter është shënuar dje, rreth mesditës, në rrethinat e fshatit të Vaksincës.

Mësohet se këtij sulmi, që ka zgjatur deri në orën 19:00 të pasdites i janë kundërpërgjigjur forcat e ish-UÇK-së. Ndërkohë, Ministria e Brendshme e Maqedonisë ka mohuar kategorisht që të ketë patur një sulm të tillë në këto rrethina. Ndërsa është pakësuar numri i forcave të policisë dhe trupave speciale, që mbanin të rrethuara fshatrat e Kumanovës, gjitashtu po dje është rishfaqur publikisht i shumëkërkuari, Avdil Jakupi me një deklaratë kërcënuese. I ashtuquajturi “Komandant i AKSH-së, Avdil Jakupi, kërcënoi dje në një intervistë për televizionin bullgar “BTV” se do të fillonte një luftë për shpërbërjen e Maqedonisë. “Maqedonia nuk mund të jetë një shtet, pasi Kryeministri Branko Cërvenkovski është një kriminel i implikuar në atentatin kundër Zoran Gjingjiç”, ish-shefit të qeverisë serbe, i vrarë në mars në Beograd. “Prandaj ne jemi të revoltuar dhe do të fillojmë një luftë”, deklaroi Avdil Jakupi, në një intervistë telefonike. “Maqedonia duhet të bëhet një protektorat nën kujdesin e Evropës dhe Shteteve të Bashkuara”, vlerësoi udhëheqësi, i cili kërkohet nga policia maqedonase. Nga ana tjetër, Jakupi vlerësoi se “nuk ka vend” për politikanë në Armatën Kombëtare Shqiptare dhe se “Ali Ahmeti ka degraduar”. “Jam unë komandanti i ushtrisë që vepron në territorin maqedonas”, konfirmoi Avdil Jakupi. Ndërkaq, zvogëlimi i numrit të forcave të sigurisë maqedonase nga rajoni i krizës është bërë dje realitet. Për përfaqësuesit shqiptarë, kjo ka ardhur si rezultat i kompromisit në takimin e Kumanovës, ndërsa për Ministrinë e Mbrojtjes si një lëvizje normale e planifikuar më parë. Sidoqoftë, edhe zëdhënësja e përfaqësisë së Bashkimit Evropian në Shkup, Irena Gjyzelova konfirmon faktin se forcat policore janë në numër më të vogël. Megjithatë vazhdon rrethimi për kapjen e Jakupit dhe disa të tjerëve që e shoqërojnë.

Reagimi
“U parandalua konflikti eventual”

Zëvendësministri i brendshëm i Maqedonisë, Hazbi Lika, në një intervistë për VOA, lidhur me zhvillimet e fundit në Maqedoni, tha se deri tani, disa takime që janë bërë në frymën e dialogut kanë rezultuar të suksesesshme, sepse kanë parandaluar një konflikt eventual, të cilin nuk e dëshiron askush këtu në Maqedoni: as shqiptarët, as maqedonasit, as institucionet e shtetit. Momentalisht, ekziston një gjendje e rëndë, por në këto situata, sigurisht, ka edhe dezinformata, të llojeve të ndryshme”. Më tej ai theksoi se “situata ndryshon herë pas here në mënyrë intesive, mirëpo sido që të jetë, policia nuk ka të drejtë të futet nëpër vendbanimet, nuk ka të drejtë të gjuajë, vetëm në rast sulmi, mund të vetëmbrohet, që është diçka normale. Ne, momentalisht, jemi në përpjekje për ta zgjidhur këtë situatë, për ta tejkaluar atë pa pasoja”, tha zoti Lika.