Berisha deklaroi dje se reforma agrare e bërë në kohën e regjimit të diktaturës komuniste të drejtuar nga Enver Hoxha, ishte një reformë e drejtë.

Kryetari i Partisë Demokratike, Sali Berisha, pasi ka dhënë dje aprovimin ndaj projektdraftit të OSBE-së për pronat, si një draft që përfshin të drejtat e pronarit tha se, mosmarrëveshjet me partitë opozitare për këtë problem do të zgjidhen.

Berisha pro Hoxhës
“Në qoftë se ndokush më kërkon mua që unë t’i bie vizë reformës agrare të vitit 1945, nuk e kam atë predispozitë. Reforma agrare është reformë e kryer në të gjitha vendet kapitaliste”. Kështu u shpreh Berisha lidhur me kontestimet e ardhura nga partitë e opozitës se, drafti i OSBE-së merr parasysh reformën agrare dhe përjashton një numër të madh pronarësh të periudhës së mëpardhme, përfshi edhe qeverisjen e mbretit Zog. Pavarësisht nga notat pozitive ndaj kësaj reforme të kontestuar për vite me radhë nga opozita, Berisha u shpreh se, Partia Demokratike do të dijë të mbajë një qëndrim të drejtë ndaj pronarëve të ligjshëm, qëndrim, i cili është në të njëjtën linjë që nga vitet e ardhjes së pluralizmit në Shqipëri. “Dua t’u kujtoj vetëm një moment në vitin 1991, PPSH-ja e kryesuar në atë kohe nga Ramiz Alia dhe Fatos Nano, solli ligjin për t’i lënë shtetit në pronësi tokën dhe në përdorim fermerëve. PD-ja u angazhua në një betejë për të shndërruar tokën në pronësi. Por tani nuk është forcë politike serioze ajo e cila bën dhe ç’bën vendimet e saj themelore”, tha ai. Pavarësisht nga qëndrimi për të mbështetur një reformë, e cila kishte në qendër parrullën “toka i takon atij që e punon”, Berisha ka theksuar se selia blu i mbetet mendimit për një njohje të pronës pa kufizime.

Qëndrimi i PD
“Së pari, ligji i propozuar nga OSBE-ja dhe i mbështetur nga ne njeh pronën pa kufizime. Së dyti, kthen pronën dhe e kompenson atë me vlerën e tregut. Mendoj se të gjitha parimet e mishëruara në programin e shpallur publikisht nga PD-ja, për zgjidhjet e problemit të pronave, janë të sanksionuara në këtë ligj”, tha ai. Berisha shtoi se deputetët demokratë janë të vendosur të mbështesin draftin, sikundër janë të vendosur të paraqesin propozime për përmirësimin e tij. “Ne jemi të hapur të dëgjojmë të gjitha propozimet e ardhura nga partitë e opozitës që i shërbejnë përmirësimit të draftit”, tha ai.

Mediu kundër Berishës
“Po cënon interesat e pronarëve legjitimë

Kryetari i Partisë Republikane ka cilësuar si paradoksale dhe absurde deklaratën e kreut të selisë blu, për të mbështetur reformën agrare të bërë nga regjimi i Enver Hoxhës. “Nuk mund të ketë një ligj për pronën dhe drejtësi ndaj pronarit të ligjshëm, në një kohë që kreu i partisë më të madhe mbështet pikërisht atë reformë, të cilën, tashmë edhe vetë komunistët dhe socialistët nuk e aprovojnë”, tha ai. Sipas kreut republikan, qëndrimi i PD-së bie ndesh me interesat e pronarëve të ligjshëm, interesa të cilat preken me draftin e OSBE-së që merr si pikënisje këtë reformë. “Nuk mund të ketë pronë të ligjshme përsa kohë që me draftin e paraqitur nga OSBE-ja kemi pronarë të paligjshëm. Konkretisht kemi banesa, të cilat janë marrë në pronësi gjatë diktaturës komuniste, të cilat, sipas këtij drafti duhet t’i gëzojë jo pronari i ligjshëm, por ai që po qëndron sipas ligjit aktual me qira”. Lideri i PR-së shtoi se ky draft po bllokon edhe turizmin shqiptar, pasi asnjë i huaj nuk investon në një pronë, e cila ka pronarë jo legjitimë.