Artemida Çollaku

Do të vazhdojë lufta për kushtetuetshmërinë në parlament nga Partia Demokratike por kësaj radhe me më shumë përforcime. Kështu krerët e opozitës u shprehën për Gazetën se janë të vendosur për të mbështetur protestën për mbrojtjen e kushtetutës.

LAJMI

Opozita duket e bashkuar në protestën "për mbrojtjen e Kushtetutës", nisur nga Partia Demokratike në Parlament. Kështu nënkryetari të Partisë Demokratike dhe njëkohësisht edhe kryetari i grupit parlamentar, Bamir Topi u shpreh dje për Gazetën se deputetët e PD-së kanë mbështetjen e të të gjitha grupeve të tjera parlamentare të opozitës. Këtë gjë e konfirmuan edhe krerët e tjerë të partive më të vogla opozitare.
Kryetari Partisë Lëvizja e Legalitetit Eqrem Spahia u shpreh për Gazetën se ai dhe deputetët e tij janë të vendosur që të mbështesin protestën e iniciuar nga PD-ja "deri në vendosjen e të drejtës kushtetuese". "Ne jemi të vendosur për të kërkuar të drejtën tonë për të folur dhe për të diskutuar jo vetëm për projektligjet, të cilat duhet të miratohen, por edhe për krizën që ka mbërthyer vendin dhe institucionet", tha Spahia. Ndërkohë që për mënyrën se si u miratuan projektligjet e ditës së enjte kreu i legalisëtve u shpreh se "mënyra e veprimit nga Pëllumbi i dha një nga goditjet më të forta parlamentarizmit në Shqipëri. Po kështu kreu i Ballit Kombëtar, Shpëtim Rroqi u shpreh për Gazetën se ai dhe deputetët e kësaj partie do të jenë të vendosur për të debatuar për krizën që ka përfshirë jo vetëm qeverinë por tashmë edhe parlamentin. Sipas tij, kjo gjë do të vazhdojë deri në momentin që në parlament dhe në shetin shqiptar të kthehet kushtetuetshmëria. Ndërkohë reformatorët shprehen disi më të matur. Sipas kreut të grupit parlamentar të PDR-së Nard Ndoka më e rëndësishmja pas gjithë asaj që ndodhi është qetësimi i situatës së krijuar në parlament duhet të realizohet me kontributin të të dyja palëve si Partisë Demokratike ashtu dhe kryetarit të Parlamentit, Servet Pëllumbi. Sipas mënyra se si u votua ditën e enjte nuk ishte aspak e drejtë pasi "nuk u realizuan porcedurat që duhet ishin ndjekur".

Protesta: KQZ është komitet qendror

Berisha i kërkon Lipponenit ribërjen e listave në Tiranë
"Vendosmëria për të ripërjashtuar për së dyti dhjetra dhe mijëra qytetarë nga e drejta e votës në Tiranë është dëshmia më e qartë e karakterit politik të këtij përjashtimi". Kështu deklaroi dje kryetari i Partisë Demokartike Sali Berisha gjatë një takimi që pati dje me Ambasadorin e OSBE-së në Tiranë, Osmo Lipponen. Kreu i opozitës e siguroi Lipponen se Partia Demokratike mbetet e angazhuar për shqyrtimin e problemeve zgjedhore të pazgjidhura por që janë të sanksionuara në marrëveshjen ndërpartiake. Ndërkohë sekretari për çështjet ligjore në PD Ilir Rusmaili e quajti kryetarin e Komisionit Qendror të Zgjedhjeve Ilirjan Celibashin si personi kryesor i cili ka dhunuar listat e zgjedhësve. Ai u shpreh se ligji e ngarkon KQZ-në me detyrën për të nxjerrë akte nënligjore për rreguillimin e procesit të rregjistrimit të votuesve. "Ky akt do të detyrojë strukturat përgjegjëse për hartimin e listave të vihen menjëherë në punë dhe të realizojnë korrigjimin e tyre", tha Rusmajli. Sipas tij KQZ-ja duhet tu kërkojë KZQV-ve që të pranojnë kërkesat e subjekteve politike për korrigjimet e nevojshme. Ndërpritet faza e dytë e protestave të Partisë Demokratike, për të rinisur me një tjetër faza ditën e mërkurë të javës që vjen. Edhe dje protesta e demokratëve u përqëndrua para Komisionit Qëndror të Zgjedhjeve. "Kjo ndërtesë do të kthehet në karton për ne, në rast se KQZ-ja do të provojë të shkelë sërisht të drejtën e votës së lirë". Ky ishte kërcënimi i radhës i shprehur dje nga kandidati i PD-së për kryebashkik Spartak Ngjela në mitingun e organizuar para selisë së KQZ-së. Ngjela u shpreh se nuk është turp për qytetarët e Tiranës që të kërkojnë dorëheqjen e Celibashit por "turp duhet tu vijë atyre që e emëruan në këtë post". Ngjela u shpreh se në rats se do të përsëritet situatat e 12 tetorit atëherë "ata që janë brenda kësaj ndërtese nuk do të jenë njerëz për ne dhe këta që po i ruajnë do të jenë lepuj para protestuesve tanë". Ndërkohë që deputeti i PD-së njëkohësisht ish-bashkëkryetari i Komisiont Bipartizan i cili hartoi Kodin Zgjedhor, Jemin Gjana u shpreh se veprimet e kryera nga KQZ-ja e kanë kthyer atë nga KQZ në një "Komitet Qëndror të Zgjedhjeve". Ai u shpreh se nuk do të lejohet më që "Celibashi të vendosë për ata që duhet të votojnë". Gjana i kërkoi kryetarit të KQZ-së që të jo vetëm të japë dorëheqjen por ai duhet të kërkojë edh efalje publike për krimin që ka bërë me të drejtën e votës së lirë. Ai u bëri thirrje qytetarëve të Tiranës që të jenë të vendosur në luftën për "rikthimin e votës së lirë".

Vendimi i KQZ

Në 28 dhjetor zgjedhjet në Tiranë
Komisioni Qendror i Zgjedhjeve vendosi ditën e djeshme të shpallë zgjedhjet në qytetin e Tiranës në 130 qendra votimi. Tre ditë para se tiranasit të festojnë ndërrimin e viteve do të duhet të shkojnë përpara kutive të votimit. Data 28 dhjetor është vendosur si data kur do të mbahen zgjedhjet në kryeqytet.
Sipas një njoftimi për shtyp të Komisionit Qendror të Zgjedhjeve, ky komision do të marrë të gjitha masat organizative të nevojshme për administrimin e këtij procesi zgjedhor të përsëritur. Ndërkohë që KQZ i ka dërguar një kërkesë zyrtare Kolegjit Zgjedhor për të marrë në dorëzim vendimin e arsyetuar të datës 2.12.2003. "Deri tani Komisioni Qendror i Zgjedhjeve ka marrë vetëm shkurtimin e vendimit të kolegjit zgjedhor. Sipas Kodit Zgjedhor zgjedhjet duhet të përsëriten brenda katër javësh nga shpallja e pavlefshmërisë së tyre", thuhet në njoftimin për shtyp të Komisionit Qendror të Zgjedhjeve.
Madje ky komision ka bërë të qartë se në numër votuesish, zgjedhjet do të përsëriten për rreth një të tretën e votuesve. "Numri i zgjedhësve i përfshirë në qendrat e votimit ku do të përsëriten zgjedhjet është 136.432 nga totali i zgjedhësve të përfshirë në të gjithë njësinë zgjedhore të Bashkisë Tiranë ku janë 371.329 zgjedhës", thuhet në shkresën zyrtare të Komisionit Qendror të Zgjedhjeve.