PLL mbështet Moisiun

TIRANË-Legalistët me anë të një konference për shtyp kanë vlerësuar qëndrimet e mbajtura kohët e fundit nga presidenti Alfred Moisiu se “do të jetë garant i zgjedhjeve”. Kreu i PLL-së, Eqerem Spahia tha se “vlerëson qëndrimin e kreut të shtetit z.Moisiu për deklarimin e tij se do të jetë garant i zgjedhjeve të lira në Shqipëri, dhe pikërisht për këtë qendrim duhet të mbështetet nga të gjitha partitë politike që kërkojnë zgjedhje të lira, të ndershme sipas standardeve demokratike duke hedhur poshtë imazhin e keq të zgjedhjeve të deritanishme”. “Në këtë kontekst mbështesim vendosmërinë e z.Moisiu për të gjetur rrugëdalje nga kriza e KQZ-së, shkaktuar nga maxhoranca e majtë, nëpërmjet KLD-së. Edhe PD-ja në marrëveshjet e saj me PS-në (derivat i PKSH) ka rezultuar se gjithmonë ka dalë e humbur, sepse PS nuk është një parti që respekton rregullat e lojës demokratike, ligjet dhe marrëveshjet partiake, por ajo është e vendosur në rrugën e saj pa kthim për të realizuar qëllimet e veta, të cilat finalizohen vetëm me marrjen dhe mbajtjen e pushtetit me çdo kusht”,-theksoi Spahia. PLL kërkon shqyrtimin dhe miratimin e projektligjit të paraqitur nga 53 deputetët që është i mbështetur nga shoqatat e ish -të burgosurve dhe të përndjekurve politikë. PLL ringre edhe njëherë shqetësimin e saj për KZQV-të, të cilat nuk po funksionojnë normalisht dhe afati i fundit i regjistrimit të kandidatëve dhe partive, data 10 shtator, skadon pas 4 ditësh, ndërkohë që në shumë njësi vendore KZQV-të nuk kanë filluar ende nga puna.