Ish-Presidenti Meidani dhe kryebashkiaku Rama kanë triumfuar në listën e delegatëve të zgjedhur në qytetin e Tiranës, për Kongresin e PS-së.

Pjesa më e madhe e delegatëve që do të përfaqësojnë kryeqytetin në Kongres, janë njerëz që përkrahin kandidaturat e Meidanit dhe të Ramës, gjë që konfirmohet edhe nga shumica e votave që të dy këta kandidatë morën në konferencën e Tiranës. Lista prej 54 delegatësh që u zgjodhën në konferencën e kryeqytetit, mbizotërohet nga njerëz që përkrahin ish-kryeministrin Meta dhe për pasojë edhe kandidatët që do të mbështeten nga ai. Mendohet se janë mbi 45 delegatë që janë kundër Nanos në listën e Tiranës, ndërkohë që vetëm disa emra në këtë listë janë përkrahës “të flaktë” të kryeministrit. Ndryshe nga konferencat e rretheve, ku nuk kanë arritur të zgjidhen jo vetëm deputetë kundërshtarë të Nanos, por madje në disa rrethe nuk janë zgjedhur as vetë kryetarët e partive që dyshohej nga stafi i Nanos se ishin kundërshtarë, konferenca e Tiranës ka paraqitur një tablo krejt tjetër. Ndryshimi nuk ka qenë vetëm përsa i përket zhvillimit të konferencës, që ishte një proces mjaft i qytetëruar, ku janë dëgjuar të shpalosin alternativat e tyre të tre kandidatët për kryetar të PS. Por, ndryshimi për më tepër ka qenë në përzgjedhjen e delegatëve, që ndryshe nga rrethet ku kanë mbizotëruar delegatët pro Nanos, delegatët e konferencës së Tiranës mbizotërohen nga delegatë kundërshtarë të kryeministrit dhe që përkrahin kandidaturat e tjera.

Përbërja e listës
Në listën fituese të delegatëve të kryeqytetit që do të jenë në Kongres, kanë qenë edhe ish-Presidenti Meidani, por edhe kryebashkiaku aktual Edi Rama. Ndërkaq në këtë listë nuk ka munguar edhe emri i njërit prej “legjendave” të socialistëve, Dritëro Agolli, por gjithashtu në listë dhe madje me një sasi të konsiderueshme votash është fitues edhe ish-shefi i SHISH-it, Fatos Klosi. Gjithashtu, do të jenë në Kongres edhe disa prej anëtarëve të strukturave drejtuese të Forumit të Rinisë Eurosocialiste të Shqipërisë (FRESSH), të kryesuar nga kryetarja e FRESSH për Tiranën, Monika Kryemadhi. Lista ka patur mjaft gra në përbërje të saj, të cilat tashmë, ndryshe nga rrethet të cilët kanë zgjedhur kryesisht delegatë burra, do të jenë delegate të kryeqytetit në Kongres. Ndërkaq lista e quajtur mjaft cilësore dhe e larmishme nga kryetari i PS-së së Tiranës, Musa Ulqini, ka brenda edhe njerëz përkrahës të kryeministrit Nano, siç është zëvendësministri i Industrisë, Arben Ahmetaj, si dhe biznesmenia Shefikat Ngjela. Lista e delegatëve të kryeqytetit ka lënë jashtë shefin e kabinetit të Nanos në PS, Emin Barçi si dhe drejtorin aktual të KESH-it, Andis Harasani, të cilët nuk kanë mundur të marrin votat e mjaftueshme nga socialistët kryeqytetas për të qenë pjesëmarrës në Kongres si delegatë.

Meidani e Rama në krye të listës
Dy kandidatët për kreun e PS-së, kanë qenë të zgjedhurit kryesorë nga socialistët e Tiranës. Rama duket se ka marrë një pjesë të mirë të votave, gjë që i dedikohet jo vetëm fjalimit mjaft të fortë të tij gjatë ditës së konferencës, por edhe se një pjesë e mirë e delegatëve kanë qenë edhe pjesëtarë në stafet elektorale gjatë kohës së fushatës për zgjedhjen e Ramës si kryebashkiak. Ndërsa ish-Presidenti Meidani ka arritur të marrë një sasi të konsiderueshme votash, jo vetëm që mbështetet fuqishëm nga njerëzit e ish-kryeministrit Meta në konferencën e Tiranës, por edhe si rrjedhojë e një fjalimi mjaft të matur, ku ndryshe nga kandidatët e tjerë duke përfshirë edhe kryeministrin Nano, evidentoi një platformë dhe një program të qartë për të qenë në krye të Partisë Socialiste.

Kryetari i socialistëve të Tiranës
Ulqini: Lista e delegatëve është mjaft cilësore

Kryetari i PS-së së Tiranës Musa Ulqini, ka vlerësuar mjaft pozitive listën e delegatëve të Tiranës për në kongresin e 12 dhjetorit:”është shumë interesante, është shumë cilësore, janë zgjedhur emrat e personaliteteve më të spikatura të PS-së, ka numër rekord shoqesh, është një numër i konsiderueshëm i FRESSH, sepse është shumë e rëndësishme. Delegatët me votën e tyre kanë sjellë atë përfaqësim që duhet në kongresin e 12 dhjetorit”, tha Ulqini. Ai ka vlerësuar si një proces model për konferencat e tjera të socialistëve në rrethe: ”Gjithçka është zhvilluar pa tension me mirëkuptim në përputhje me të gjitha procedurat dhe në mënyrë që PS e Tiranës përmes shembullit që dha dje duke ftuar në podiumin e kësaj konference, tre kandidatë sëbashku përmes cilësisë së diskutimeve dhe alternativave që paraqitën, skandidatët për kryetar partie, përmes procesit transparent të votimit, i cili u zhvillua në sy të gjithë delegatëve, unë besoj se ne e kemi bërë më së miri detyren. Ishte një model sesi socialistët duhet t´i organizojnë takimet e tyre ku në vend të emocionit, duhet të ketë argument, të ketë logjikë, të ketë solidaritet”, tha Ulqini menjëherë pas përfundimit të procesit të votimit. Ai nuk ka komentuar faktin se Barçi dhe Harasani të njohur si mbështetës të Nanos, nuk janë zgjedhur delegat në kongres: ”Unë s´kam asnjë koment sepse ky ishte verdikti i 390 delegatëve të konferencës së Tiranës, ato përzgjodhën nga lista nga konferenca nga të gjitha strukturat e partisë dhe nga 108 emra kanë dalë 54” tha Ulqini.

Berisha: Bandat në PS, përcaktojnë zgjedhjet

Në votimin e djeshëm të socialistëve, 40 përqind të fletëve të votimit ishin të pavlefshme, ç´ka do të thotë se banda dhe vetëm banda brenda dhe jashtë kësaj selie, janë ato që duan të përcaktojnë të zgjedhurin. Ky është një shembull i antivlerave që mbart udhëheqja socialiste në vetvete.

54 delegatet e Tiranës

Dritëro Agolli
Rexhep Meidani
Edi Rama
Musa Ulqini
Monika Kryemadhi
Leonidha Toska
Besnik Bare
Anastas Angjeli
Fatmira Veizi
Ilir Kokona
Irfan Dashi
Jeta Seitaj
Luan Zhegu
Fatos Klosi
Luan Shahollari
Luzhiana Abazi
Lili Nushi
Petrit Bare
Përparim Bodinaku
Pandi Sara
Rexhep Çuko
Adnan Qatipi
Roland Çelmeta
Afërdita Stefani
Ahmet Ceni
Aziz Tahiri
Arjan Kokona
Anita Zaimi
Arben Ahmetaj
Bledar Doracaj
Eva Allushi
Elidiana Canaj
Elvis Mataj
Etleva Bisha
Fatri Sinani
Hysen Binjaku
Laureta Omeri
Harilla Kola
Lumturi Xhezo
Mirela Meko
Saemira Pino
Suzana Akrama
Sherif Bundo
Tatjana Selenica
Vjollca Ibro
Vaid Kalaja
Blendi Marikaj
Edmond Hoxha
Fatbardha Toto
Shefikat Ngjela
Mirvjena Xhema
Maksim Zano
Natasha Toska
Jahe Fida