Shefi i UNMIK-ut, Hari Holkeri, u ka dërguar ftesat për të marrë pjesë në takimin e Vjenës Presidentit Ibrahin Rugova, Kryeministrit Bajram Rexhepi, kryeparlamentarit Nexhat Daci, koordinatorit ndërministror Millorad Todoroviq, ministres së Shëndetësisë, Resmie Mumxhiu, si përfaqësuese e pakicave joserbe.

Hashim Thaçi e Ramush Haradinaj kanë marrë nga një ftesë për të emëruar nga një ministër nga partitë e tyre që do të merrte pjesë në bisedime, por pa mundësinë që në këto bisedime të marrin pjesë vetë Thaçi apo Haradinaj. Holkeri u ka dërguar ftesë edhe zyrtarëve të Unioni serbo-malazez Svetozar Maroviq, Goran Svillanoviq, Zoran Zhivkoviq dhe Nebojsha Çoviq. Zëdhënësi i UNMIK-ut, Sunil Narula, ka bërë të ditur se Holkeri ka ftuar edhe qeveritë e vendeve anëtare të Grupit të Kontaktit, Shtetet e Bashkuara të Amerikës, Britaninë e Madhe, Francën, Gjermaninë, Italinë dhe Federatën Ruse, që të marrin pjesë gjatë këtyre bisedimeve. Pjesëmarrjen e tyre në bisedime e ka konfirmuar Sekretari i Përgjithshëm i NATO-s, Lordi Xhorxh Robertson, përfaqësuesi i lartë i BE-së për Politikë të Jashtme e Siguri, Havier Solana dhe drejtori i përgjithshëm i OSBE-së, Xhep Shefer. Holkeri, nëpërmjet një deklarate për opinionin, shpjegoi konceptin, arsyeshmërinë dhe rëndësinë e dialogut midis Prishtinës e Beogradit. "Ekzistojnë shumë keqkuptime lidhur me atë se çka do të thotë dialog i drejtpërdrejtë ndërmjet Prishtinës e Beogradit. Dialogu nuk është koncept i ri. Të gjithë miqtë e Kosovës, të cilët kanë intervenuar më 1999 dhe e kanë marrë përsipër punën e rindërtimit të Kosovës, e kanë ditur gjithmonë që dialogu me Beogradin do të ishte një hap vendimtar që duhej bërë. Të biseduarit me Beogradin ishte njëri nga tetë standardet e miratuara nga bashkësia ndërkombëtare, duke përfshirë Këshillin e Sigurimit të Kombeve të Bashkuara, NATO-n, Shtetet e Bashkuara dhe Bashkimin Evropian. Të gjitha këto institucione e kanë miratuar në mënyrë të posaçme procesin e dialogut që është planifikuar të fillojë javën e ardhshme në Austri: Këshilli i Sigurimit të Kombeve të Bashkuara, NATO, Bashkimi Evropian, OSBE-ja dhe Shtetet e Bashkuara të Amerikës, në mesin e të tjerëve. Përfaqësuesit e tyre do të marrin pjesë në dialog. Liderët e Kosovës janë angazhuar për dialog në samitin e Selanikut, në qershor. Prej se kam ardhur këtu, unë e kam diskutuar këtë çështje gjerësisht me udhëheqësit e Kosovës. Të gjithë e dimë që dialogu ndërmjet Prishtinës e Beogradit është në interesin e drejtpërdrejtë të popullit dhe të institucioneve të Kosovës. Çështjet që do të diskutohen janë çështje që kanë rëndësi për jetën e përditshme të kosovarëve. Nëse, edhe vetëm bisedojmë, mund të bëjmë përparim në zgjidhjen e fatit të personave të zhdukur. Nëse, edhe vetëm bisedojmë, mund t'i ndihmojmë ekonomisë së Kosovës duke i zgjidhur problemet e pazgjidhura në sektorin e energjetikës, të transportit dhe të komunikimit - tha Holkeri.

Busek: Dialogu rrezikon të dështojë

Koordinatori i Paktit të Stabilitetit për Evropën Juglindore, Erhard Busek, ka vlerësuar se në dialogun ndërmjet Prishtinës e Beogradit duhet të përfshihen diplomatë të jashtëm me përvojë. Në një tekst autorial në të përditshmen vjeneze "Kurir", zoti Busek ka vlerësuar se zgjedhjet e ardhshme i pengojnë autoritetet serbe që të bëjnë koncesione, ndërsa qëndrimet krejtësisht të ndryshme të Prishtinës dhe të Beogradit flasin në favor të dështimit të dialogut. Erhard Busek më tutje ka shkruar se gjendja e tashme në Kosovë nuk mund të zgjasë shumë, pasi shqiptarët nuk janë të kënaqur me formulën "standardet para statusit", bashkësisë ndërkombëtare kjo situatë po i kushton shumë ndërsa unionin Serbi - Mali i Zi e pengon në rrugën drejt Bashkimit Evropian. Ndërkohë, Kryeministri i Kosovës, Bajram Rexhepi, dje, ka përsëritur qëndrimin se ai nuk do të shkoj në bisedimet e Vjenës nëse nuk do të ketë konsensus në Kuvend.

Serbia, fond për të blerë Kosovën

Serbia do të formojë "Fondin për Kosovën", nga i cili do t'u jepen kreditë firmave lokale serbe dhe individëve serb në Kosovë, për blerjen e ndërmarrjeve shtetërore, të cilat janë në shënjestër të Agjencisë për privatizim në Kosovë, ka deklaruar dje kryetari i Kuvendit komunal në Shtërpcë, Sladan Iliq. "Themelimi i Fondit për Kosovën ka qenë përgjigjja e vetme e vërtetë në procesin e privatizimit, të cilin e ka filluar agjencia e Kosovës", tha Iliq. Në Shtërpcë ekzistojnë 18 ndërmarrje, nga të cilat për mbijetesën e popullit serb në këto hapësira më e rëndësishmja është Qendra për skijim në Brezovicë, reparti i Fabrikës "Ivo Lola Ribar" dhe Kooperetiva bujqësore e cila ka, ndër të tjera, edhe 600 hektarë në rajonin e komunës së Ferizajit. Iliq ka shtuar se idenë e kanë mbështetur edhe Qendra koordinuese për Kosovën edhe Ministria për Privatizim e Serbisë dhe që fondi do të themelohet vitin e ardhshëm Kryeministri i Kosovës, Bajram Rexhepi, është shprehur i pakënaqur me ndërprerjen e procesit të privatizimit, që, sipas tij, është bërë me kërkesën e autoriteteve të Beogradit, i cili dëshiron të pengojë çdo proces pozitiv në Kosovë. Javën që shkoi autoritetet e UNMIK-ut vendosën që të ndërpresin procesin e privatizimit në Kosovë, i cili kishte filluar në verë.