Deklaron zëvendëskryeministri dhe ministri i Jashtëm Meta në një intervistë dhënë Agjensisë "Beta"

Zëvendëskryeministri e ministër i Punëve të Jashtme Ilir Meta, i cili ndodhet në Beograd për të marrë pjesë në Samitin e nesërm të Procesit të Bashkepunimit të Europës Juglindore, deklaroi të martën se, për Statusin përfundimtar të Kosovës "duhet në fillim të vendosin qytetarët e saj, pa marrë parasysh përkatësinë etnike".

Në nje intervistë dhënë Agjensisë "Beta", Meta deklaroi se është gjithashtu e rëndësishme që për të arritur Statusin përfundimtar, "duhet një bashkëpunim i afërt me bashkësinë ndërkombëtare dhe vendosja e stabilitetit në Kosovë dhe në rajon".

Meta vuri në dukje se lufta kundër krimit të organizuar është një nga prioritetet e bashkëpunimit rajonal "në mënyrë qe të përmirësohet imazhi i rajonit, të forcohet siguria në vendet tona dhe të krijohet një klimë mirëbesimi për investime te huaja dhe biznesin".

Z.Meta deklaroi se vrasja e kryeministrit të Serbisë, Zoran Xhinxhiç është "një ngjarje tragjike", që tregon se krimi i organizuar "është një provokim i madh" për vendet e rajonit, por forcat demokratike, qeveria dhe populli i Serbisë "reagoi me shumë guxim dhe u dha dënimin e drejtë kriminelëve".

Ai shtoi se shpreson nga Samiti i nesërm i procesit te bashkëpunimit të Europës Juglindore një forcim të metejshëm të bashkëpunimit në kuadrin e inisiativës, duke theksuar edhe nje herë prioritetin e përbashkët, bashkëpunimin rajonal dhe luftën kundër krimit të organizuar.

"Lufta kundër krimit të organizuar është e një rëndësie thelbësore për përmirësimin e imazhit të rajonit, forcimin e sigurimit në vendet tona dhe krijimin e një klime mirebesimi për investime të huaja dhe biznes", tha ministri shqiptar.

"Më pas shpresojmë në vazhdimin e bashkëpunimit të suksesshëm në planin e energjetikës, gjithashtu në arritjen e marrëveshjeve të frytshme për një Tregti të Lirë mes vendeve të rajonit. Shpresojmë që këto marrëveshje të jenë efektive dhe produktive, derisa ne të shikojmë që po përparon integrimi ynë në Bashkimin Europian, përmes procesit të asocim‑stabilizimit".

I pyetur se kur shpreson të nënshkruhet marrëveshja për Tregtinë e Lirë mes Shqipërisë dhe Serbi‑Mali i Zi, Meta iu përgjigj se "ne jemi gati në çdo moment, pasi të përfundojë gjithçka, pra vetë problemi i procedurave të brendshme të bashkimit Serbi‑Mali i Zi".

Pyetjes se si e vlerëson luftën kundër krimit të organizuar në rajon, veçanërisht pas vrasjes së kryeministrit të Serbisë, Zoran Xhinxhiç, Meta tha se Shqipëria e konsideron këtë "si prioritetin më të madh". "Ky është prioritet shumë i madh për sigurinë e vendeve tona, për forcimin e kontrollit të kufinjve dhe shumë e rëndësishme për krijimin e një imazhi më të mirë te vendeve tona dhe rajonit para bashkësisë ndërkombëtare dhe investitorëve të huaj", shton Meta.

Sipas vlerësimeve të ministrit shqiptar "është shumë e rëndësishme krijimi i një mjedisi të sigurt për biznesin në vend si dhe për bashkëpunimin ekonomik të vendeve të rajonit".  Gjithashtu, është "një prioritet kyç" edhe vazhdimi më tej i liberalizimit të regjimit të vizave dhe lehtësimit të lëvizjes së njerëve dhe mallrave. "Sa më shumë që të jetë e mundur të luftojmë kundër krimit të organizuar, aq më shumë forcojnë sigurinë e kufinjve tanë, dhe arrijmë lehtësira për lëvizjen e njerëzve, jo vetëm në vendet e rajonit, por edhe në Bashkimin Europian", shtoi z.Meta.

Zoti Meta vuri në dukje se krimi i organizuar mbetet akoma një "provokim i rëndë" për gjithë rajonin dhe "për fat të keq para një muaji, pamë sulmin kundër njërit prej liderëve më të shquar në rajon dhe Serbi".

Meta vlerësoi se kryeministri Zoran Xhinxhiç, "bëri sa mundi për të reformuar vendin e tij, duke të çuar përpara marrëdhëniet rajonale dhe punoi për integrimin e Serbisë në rajon dhe BE".

"Kjo ngjarje tragjike dhe një provokim i tillë i krimit të organizuar, siç ishte vrasja e kryeministrit Xhinxhiç, është një tregues tjetër se krimi i organizuar është provokim i madh. Për fat të mirë, ne vumë re se stabiliteti i vendit tuaj nuk u vu në dyshim dhe forcat tuaja demokratike, qeveria dhe populli i Serbisë, reaguan me shumë guxim dhe i dhanë ndëshkimin e drejtë kriminelëve", vijoi Meta.

Z.Meta vuri në dukje se sot (e Martë) në Beograd u zhvillua një mbledhje "shumë e suksesshme" e ministrave të Punëve të Jashtme të vendeve të rajonit, në kuadër të procesit të bashkëpunimit mes vendeve të Europës Juglindore dhe takimit të nesërm të kryetarëve të këtyre shteteve. Sipas tij, është hera e parë që ministrat e Jashtëm takohen në nivel dypalësh.

"Dëshirojmë të forcojmë bashkëpunimin me Serbinë e Malin e Zi në luftën kundër krimit të organizuar", vuri theksin ai.

Zoti Meta përshëndeti pranimin e Serbisë e Malit të Zi si anëtare e Këshillit të Europës dhe uroi suksese në marrëdhëniet me Bashkimin Europian. "Eshtë thelbësore që demokracia, forcat dhe reformat demokratike në Serbi e Malin e Zi do të përkrahen fort nga bashkësia ndërkombëtare", vlerësoi ai.

"Shqipëria është shumë e interesuar që vendet fqinjë të përparojnë në proceset e integrimit në të gjitha këto institucione, gjë që është qëllimi ynë i përbashkët", shtoi z.Meta.

Në pyetjen si e komenton çuarjen përpara të dialogut për Statusin përfundimtar të Kosovës, Meta u përgjigj se "është një arsye shumë e rëndësishme për të pasur një Kosovë stabël dhe rajon stabël, pasi stabiliteti i Kosovës është i rëndësishëm për stabilitetin rajonal".

Ai vuri në dukje se para një muaji dialogu mes Beogradit dhe Prishtinës ishte gati për të filluar, por vrasja e kryeministrit Xhinxhiç e shtyu këtë dialog, për të cilin ishte i angazhuar gjithashtu edhe Shefi i UNMIK‑ut në Kosovë, Michael Steiner.

"Dialogu kishte për qëllim, jo vetëm të zgjidhte probleme dhe çështje praktike, por edhe disa shqetësime të shqiptarëve dhe serbëve në Kosovë rreth marrëdhënieve të tyre, dialog i cili do të ndihmonte në krijimin e një klime të re bashkëpunimi dhe mirëkutimi", tha z.Meta.

"Përsa i përket Statusit, dëshirojmë të theksojmë se është e rëndësishme, jo vetëm të kemi një standard të mirë në Kosovë, por do të ishte shumë më e rëndësisme të kemi një klimë të favorshme ndërkombëtare dhe rajonale. Kjo është ajo që kërkohet nga të gjithë ne, veçanërisht nga Shqipëria dhe Serbia, t'i inkurajojmë të dy këto bashkësi të punojmë së bashku në institucione dhe të mos i bojkojtojnë ato". Pala shqiptare në Kosovë duhet të bëjë më shumë përpjekje të punojë me përfaqësuesit serbë në institucione, kurse pala serbe të shprehë më shumë dëshirë për t'u integruar në institucionet e reja", shtoi Meta.

"Ne mendojmë se në këtë rrugë të përcaktimit të Statusit të ardhshëm të Kosovës, më e rëndësishme është që Kosova të jetë pjesë e BE-së. E rëndësishme është që Kosova të jetë e inkurajuar se do të përfshihet në Procesin e stabilizim‑asociimit, pa marrë parasysh përcaktimin e Statusit përfundimtar në të ardhmen", tha Meta.

Sipas z.Meta, ajo që do të ndihmonte për një mirëkuptim më të madh në Kosovë, është nxitja e vet qytetarëve të saj për të arritur standardet europiane dhe për të kontribuar, jo vetëm në stabilitetin e Kosovës, por edhe në gjithë rajonin, si dhe në marrëdhëniet me të gjithë fqinjët.

"Kjo është thelbësisht e rëndësishme për integrimin e Kosovës dhe gjithë rajonit në BE", tha Meta.

Sipas vlerësimit të Metës, për statusin përfundimtar të Kosovës, "do të duhej të vendosnin më parë qytetarët e tij, pa marrë parasysh përkatësinë etnike. E rëndësishme është gjithashtu që për arritjen e statusit final, duhet një bashkëpunim i ngushtë me bashkësinë ndërkombëtare dhe vendosjen e një stabiliteti në Kosovë e rajon.

"Të gjithë në këtë rajon mund të ndihmojnë që një proces i tillë të ndodhë në mënyrë të natyrshme dhe të jetë edhe një faktor më tepër për stabilitetin e rajonit dhe marrëdhëniet mes dy vendeve tona, përfundoi Meta intevistën dhënë për Agjensinë "Beta".