Baza amerikane, Ramsfeld merr ofertën

Sekretari amerikan i Mbrojtjes falenderon Shqipërinë për mbështetjen gjatë luftës në Irak

Baza amerikane, Ramsfeld merr ofertën

Në takimet me Nanon dhe Majkon propozohen dy zona për vendosjen e trupave amerikane

TIRANË-Shqipëria i ofron SHBA-së dy zona të lira për ndërtimin e bazës ushtarake amerikane. Burime të sigurta treguan dje se kryeministri Fatos Nano dhe ministri i Mbrojtjes, gjatë takimit me sekretarin amerikan të Mbrojtjes, Donald Ramsfeld i kanë paraqitur atij “ofertën” e palës shqiptare për ndërtimin e bazës ushtarake amerikane. Sipas burimeve të sigurta mësohet se në këtë takim mes Nanos, Majkos dhe Ramsfeld është prezantuar edhe propozimi i qeverisë shqiptare për ndërtimin e një baze ushtarake amerikane nëse pala amerikane mund ta gjykojë të nevojshme. Sipas burimeve qeveritare, mësohet se çështja e krijimit të bazës ushtarake amerikane i përket tashmë SHBA-së të vendosë dhe është në diskutim. Dy zonat kryesore të ofruara nga qeveria, mësohet se janë Gjadri i Lezhës dhe një në jug të Shqipërisë, një zonë në afërsi të Lushnjës.
Ramsfeld
Sekretari amerikan i Mbrojtjes, Ramsfeld gjatë konferencës së përbashkët për shtyp me ministrin e Mbrojtjes, Pandeli Majko në aeroportin e Rinasit, nuk ka përcaktuar qartë qëndrimin e SHBA-së për krijimin e bazës ushtarake, por ka bërë të ditur se bashkëpunimi me Shqipërinë në fushën ushtarake pritet të thellohet akoma më tej. “SHBA presin me dëshirë që të punojnë së bashku me Shqipërinë në fushën ushtarake dhe në arritjen e anëtarësimit në NATO. Ne nuk diskutuam përtej kësaj pike (ngritjes së bazës ushtarake). Diskutuam mundësinë e stërvitjeve të ndryshme, por nuk u futëm më tej në detaje përtej kësaj pike”,-iu përgjigj Ramsfeld pyetjes së gazetarëve për mundësinë e krijimit të një baze ushtarake amerikane. SHBA, sipas Ramsfeld do të punojë me qeverinë shqiptare në fushën ushtarake, si dhe në anëtarësimin e Shqipërisë në NATO. Sekretari amerikan i Mbrojtjes tha se arsyeja e vizitës së tij nuk ishte panjohur, pasi ishte i ftuar zyrtarisht, duke e cilësuar si mundësi për t’u njohur me drejtuesit e shtetit shqiptar, si dhe për të vazhduar marrëdhëniet e mira që ekzistojnë mes dy vendeve. Duke u ndalur në angazhimin e Shqipërisë në luftën kundër terrorizmit global, Ramsfeld vlerësoi "ndihmën konkrete të shtetit shqiptar, dhënë në krizat e Afganistanit dhe të Irakut". Ramsfeld përmendi si të rëndësishme nënshkrimin nga Shqipëria të deklaratës së vendeve të Vilnusit 10, si dhe nënshkrimin e Marrëveshjes së Gjykatës Ndërkombëtare Penale. Më tej, sekretari amerikan bëri të ditur se, në takimet me personalitetet shqiptare si Moisiu, Nano dhe Majko u fol edhe “për pjesëmarrjen e Shqipërisë në planin e veprimit për anëtarësim në NATO dhe për lëvizjet e saj për një anëtarësim të plotë në vitet që vijnë”. Ndërsa ministri i Mbrojtjes, Pandeli Majko gjatë konferencës për shtyp i ka cilësuar si të shkëlqyera marrëdhëniet me SHBA-në. “Vizita e zotit Ramsfeld është dëshmi e marrëdhënieve të shkëlqyera që ekzistojnë mes dy vendeve tona”,-tha Majko. Ministri i Mbrojtjes theksoi se objektivi kryesor i qeverisë është anëtarësimi i Shqipërisë në NATO.
Bledar Hoti

Moisiu: Ushtarakët amerikanë, e nevojshme në Ballkan

TIRANE- Presidenti Alfred Moisiu dhe sekretari amerikan i Mbrojtjes Donald Ramsfeld zhvilluan dje mbasdite një takim ku vunë në dukje mendimin e përbashkët për nivelin e mirë të marrëdhënieve dypalëshe. Gjatë takimit, presidenti Moisiu theksoi domosdoshmërinë për vazhdimësinë e pranisë së trupave amerikane në rajonin e Ballkanit. Ai shprehu mirënjohjen gjithë shqiptare për kontributin vendimtar të trupave amerikane në fundin e konfliktit në Kosovë, për rolin e tyre në Bosnje, Maqedoni etj. “Pa këtë ndihmë - tha presidenti – situata në Ballkan nuk do të ish si kjo e sotmja. Megjithëse shumë ndryshime kanë ndodhur në rajon, prania ushtarake amerikane është akoma e nevojshme”. Presidenti Moisiu vlerësoi aksionin luftarak amerikan kundër terrorizmit ndërkombëtar si një ndërhyrje në kohën e duhur. Për këtë çështje, presidenti theksoi se mbështetja, që vendi ynë i dha aleatit më të madh strategjik të tij, SHBA-së, bazohej në bindjen e tij se, ky fenomen është kërcënimi më serioz i shekullit. Ndërsa sekretari amerikan i Mbrojtjes, Donald Ramsfeld theksoi se “administrata e presidentit Bush vlerëson shumë mbështetjen e tuaj të vazhdueshme për vlerat, që ne besojmë” dhe falenderoi presidentin Moisiu për kontributin konkret në luftën kundër terrorizmit ndërkombëtar, ndihmën me paqeruajtës në Agfanistan dhe në Irak, si dhe nënshkrimin e marrëveshjes “Adriatik 3”. Ai shtoi se, këto probleme asnjë vend nuk mund t’i përballojë vetëm, por ka nevojë për ndihmë, prandaj “do të vazhdojmë të punojmë së bashku në luftën globale kundër terrorizmit”. Ramsfeld siguroi presidentin për ndihmë në integrimin në strukturat euroatlantike, vlerësoi arritjet në kuadër të reformave në të gjitha fushat, sidomos në atë ushtarake, dhe shprehu kënaqësinë për faktin që, Shqipëria është anëtare e planit të veprimit, në kuadër të integrimit në NATO.
N.Perndoj

Zoti Ministër, a pritet që Shqipëria të përfitojë nga rirreshtimi global i forcave që duket se do të përfshijë zhvendosjen e trupave amerikane të periudhës së Luftës së Ftohtë në vendet e ish-bllokut komunist.
Unë mendoj se përfitimet do të jenë shumëpalëshe. Në radhë të parë kjo nuk duhet parë thjesht në një kuotim financiar, dhe nuk mendoj se gjithçka do të jetë e lidhur me logjikën e pagesave apo kundërpagesave. Në radhë të parë, ajo që është më e rëndësishmja, Shqipëria doli nga balanca e Jalës e pas Luftës së Dytë Botërore. Në radhë të dytë, mendoj që me reshtimin e saj në luftën kundër terrorizmit, ajo largoi sidomos një perceptim që një pjesë e mediave jo shumë pozitive karshi Shqipërisë dhe faktorit shqiptar, donin të orientonin opinionin për gjoja ekzistencën e fondamentalizmit deri dhe bazave të Bin Ladenit në Shqipëri, gjë që tani duket gjithçka krejtësisht qesharake. Por nga ana tjetër mendoj se ky lobizmi i Shteteve të Bashkuara pro Shqipërisë dhe anasjelltas mendoj që faktorizon edhe më rolin e Shqipërisë rishtas në skenën e Ballkanit, pse të mos themi edhe më gjerë.
Kohët e fundit është folur për ngritjen e një baze ushtarake amerikane në Shqipëri, a do të jetë kjo temë e bisedës me zotin Ramsfeld?
Gjithsesi, nuk mund të thuash se gjithçka e kësaj vizite do të jetë pjesë e diskutimit edhe publik, deri diku, për arsye të caktuara të vendosjes ose jo të një baze të Shteteve të Bashkuara të Amerikës. Unë dëshiroj të theksoj faktin që marrëdhëniet ushtarake aktualisht janë kaq cilësore, konfidenca është kaq e madhe sa problemi i bazës, po ose jo , nuk besoj se përbën thelbin e problematikës. Aktualisht në Shqipëri stërviten trupa elitë të Shteteve të Bashkuara të Amerikës, siç ishte stërvitja e fundit, një nga më të mëdhatë dhe më të gjërat, dhe mendoj se të tilla do të kemi edhe në vazhdim. Kështu që për mua theksi bazë ose jo është një problem krejtësisht teknik. Sigurisht kjo ka qenë një temë e diskutuar në kuadrin e menaxhimit të strukturës së bazave amerikane në Evropë, Shqipëria do të jetë e hapur në këtë pikë