11112003osce

Faqja 6 - POLITIKE

Nentor 11, 2003

SOT DISKUTMI NE KUVEND

Pronat do ndahen sipas OSBE

PS e PD marrëveshje për projektligjin

Artemida Çollaku

Sot komisioni i Bujqësisë do të votojë dy projektligjet atë të OSBE-së si dhe Cako-Mediu pas një shqyrtimi të bërë dje. Mediu kërkoi që të votohet projketi Cako-Mediu për shkak të kostos të ulët që ai parashikon në kompensimin që do të bëhet. Ndërsa nënkryetari i komisionit Zyhdi Pepa u shpreh se kostoja financiare është e njëjtë në të dyja projektet e paraqitura.

LAJMI

Deputetët e komisionit parlamentar të bujqësisë shqyrtuan dje projektligjet e pronave, Cako-Mediu, si dhe atë të OSBE-së. Kreu i republikanëve Fatmir Mediu dhe deputeti i PBK-së Alfred Cako të cilët ishin të pranishëm gjatë shqyrtimit të këtyre projekteve u shprehën se projekligji i OSBE-së është antikushtetues. Ata i kërkuan anëtarëve të komisionit që ta rrëzojnë këtë projektligj në votimin që do të bëhet sot, për t'i dhënë kështu hapësirë projektligjit të hartuar prej tyre. Kreu i republikanëve, Mediu theksoi se aryeja e kërkesës për të votuar variantin e opozitës është ajo e zbatimit real të tij pas miratimit. Ai nënvizoi se një gjë e tillë do të jetë shumë e vështirë për t'u bërë me projektin e OSBE-së, pasi "vetë qeveria nuk ka bërë publike faturën e kompensimit". "Qëllimi nuk është vetëm rregullimi i një padrejtësie, por rregullimi i një konflikti social dhe me një kosto financiare shumë më të ulët në krahasim me atë që parashikohet të jetë në draftin e OSBE-së", tha Mediu. Nënkryetari i këtij komisioni, Zyhdi Pepa, përfaqesues i PS-së, tha se vullneti i forcës poltike që ai përfaqëson është kundër projektligjit Cako-Mediu, dhe se deputëtët socialistë do të votojnë kundër këtij projektligji. Ai u shpreh se projekti i OSBE-së parashikon një kosto sociale dhe politike më të ulët, kurse kostoja financiare është e njëjtë në të dyja projektet e paraqitura. "Kostoja financiare do të jetë e njëjtë, pasi në rast se do të abrogohet 7501, atëherë do të na duhet të kompensojmë atyre që do tu hiqet kjo pronë", tha Pepa. Një mënyrë e tillë veprimi, sipas Mediut nuk do të zgjidhë kurrë çështjen e pronave. "Dua të theksoj se jo gjithmonë qëndrimet politike përputhen me të drejtën e pronës private", tha Mediu. Komisioni vendosi që sot do të hidhen në votë të dy projektligjet nga ku ventëm njëri do të kalojë për miratim në parlament.

Deklarata e Klosit

Qeveria: Para ish-të burgosurve
"Qeveria do të dëmshpërblejë të gjithë ish të përndjekurit dhe të burgosurit politikë për vitet e kaluara në burgjet e diktaturës". Kjo ishte përgjigjja e kërkesës së bërë nga kryetari i PLL-së Eqrem Spahia në lidhje me nismat e ndërmarra deri tani nga qeveria shqiptare për dëmshpërblimin e ish të përndjekurve politikë. Ministri i Shtetit pranë Kryeministrit, Blendi Klosi i cili ishte i pranishëm në mbledhjen e Byrosë u shpreh se për herë të parë do të vihet në buxhetin e shtetit një shumë e caktuar e cila do të jetë garant për fillimin e kompensimit të ish të përndjekurve politikë. "Kjo shumë do të variojë në varësi të mundësive që do të ketë buxheti i shtetit dhe do të jetë e konsiderueshme, e cila do të hapë rrugën për kompensimin e mëtejshëm të ish të përndjekurve politikë", tha Klosi. Në mbledhjen e djeshme të Byrosë Parlamentare u shqyrtua gjithashtu edhe çështja e pronave.

Berisha: Ne e hartuam ligjin 7501 për pronat

Kryetari i Partisë Demokratike konfirmoi dje mbështetjen e plotë për draftin e pronave të paraqitur nga OSBE-ja. Duke e konsideruar draftin e OSBE-së si zgjidhjen më të mirë për çështjne e pronave, Berisha dha edhe arsyet për një konsiderate të tillë. "Projektligji njeh pa kufizim pronën e pronarit, përcakton kthimin dhe kompensimin e saj me vlerën e tregut, por tani jo më me arap të zi apo me qeverinë e Nanos, por ngre nga Parlamenti me balancë të plotë një komitet të kthimit të pronave", tha Berisha. Kreu i demokratëve u shpreh edhe për arsyet që PD-ja nuk mbështet projektin Cako-Mediu. "Ne nuk mund të mbështesim variantin e aleatit sepse ai kërkon dy gjëra kundër të cilave ne nuk kemi ndërmend të ngrihemi", tha Berisha. Sipas tij PD-ja nuk mund të pranojë abrogimin e ligjit 7501, pasi ajo ishte forca politike, e cila ia ka imponuar këtë ligji PPSH-së në vitin '91. "PR kërkon anullimin e ligjit 7501, ligj në të cilin ne iu imponuam Partisë së Punës në vitin '91 për pronësinë e tokës, kur ajo ishte kundër pronësisë, si dhe kërkon anullimin e ligjit të viti '94, në të cilin ne shpallëm pronarë fermerët në tokën e fermave, iu falëm tokën e shtetit rreth 200 mijë hektarë tokë, këtë nuk mund ta bëjmë", tha Berisha në fund të fjalës së tij. Ai i siguroi të gjithë pronarët e ligjshmë se me projketin e OSBE-së bëhet zgjidhja më e drejtë e problemit të tyre.

Faqe 6 - Politikë

11Nentor 2003

Kreu demokrat rivlerëson reformën agrare të ‘45 dhe ligjin 7051 dhe kundërshton partitë aleate të tij

“Reforma na ndau nga feudalizmi”

Berisha: S’pranojmë draftin e Mediut dhe qeverisë, por të OSBE

Agim Haxhiu

Berisha cilësoi dje si të drejtë reformën agrare të 1945-ës, sikurse nuk do të hedhë poshtë Ligjin 7501 për Pronat, të përfoluar nga të gjitha partitë e tjera opozitare.

Kryetari i Partisë Demokratike kundërshtoi dje draftin e paraqitur nga aleati i tij republikan, Fatmir Mediu, i cili hedh poshtë Ligjin 7501, ku pronarë njihen ata të cilët përfituan nga ndarja e tokës së fermave, sikurse hedh poshtë edhe reformën agrare. Berisha hodhi poshtë edhe draftin e qeverisë, pasi nuk njeh të drejtën e pronës pa kufizim, sikurse edhe kompensimin me vlerë reale të tokës, ndërkohë që u shpreh se drafti i OSBE-së ka mbështetjen e plotë të PD-së.

Reforma agrare
«Reforma agrare nuk mund të them se nuk ka patur absurditete, por është një proces që u zhvillua për të shkëputur vendin nga feudalizmi. Një reformë të tillë e kanë zhvilluar edhe vende të tjera që nuk kanë pësuar diktatura komuniste», u shpreh Berisha. Ai shtoi se selia blu do të japë gjatë ditëve të ardhshme sugjerimet, të cilat ndihmojnë në përmirësimin e Ligjit për Pronat, i cili nuk ka si bazë vetëm reformën agrare, por edhe të Ligjit 7501, të hartuar nga demokratët që në vitin 1991.

Mbështetja e 7051
Pavarësisht nga kontestimet e partitë e opozitës për këtë ligj, që njeh si pronarë ata të cilët përfituan nga shpërbërja e fermave, Berisha tha se ky ligj është i drejtë dhe jo vetëm për atë kohë. «Nuk mund të mbështesim variantin e Mediut, pasi kërkon anulimin e Ligjit 7501, ligj të cilin ne ia imponuam Partisë së Punës në vitin ’91. Ne shpallëm pronarë fermerët në tokën e fermave, duke falur tokën e shtetit për rreth 200 mijë hektarë dhe ne nuk tërhiqemi nga vendimi i marrë në atë kohë», tha ai. Berisha, pasi ka hedhur poshtë draftin e qeverisë, pasi nuk njeh pronën e pakufizuar, sikurse edhe nuk pranon kompensimin me vlerën e tregut, dha mbështetjen e plotë për draftin e paraqitur nga OSBE-ja.

Pronarët e Jugut, letër Berishës

Ish-pronarët në Jug të vendit, njëkohësisht anëtarë dhe simpatizantë të PD-së, i kanë drejtuar një peticion Sali Berishës, ku i kërkojnë që të mos miratojnë projektligjin e OSBE-së për pronat. Në të kundërt, ata paralajmërojnë protesta kundër PD-së, ashtu sikundër OSBE-së.

Fatmir Mediu
“Berisha kundër pronarëve”

Kryetari i Partisë Republikane, Fatmir Mediu tha se, qëndrimi i Berishës për të mbrojtuar reformën agrare të 1945-ës si dhe Ligjin 7501, është një pozicionim i kreut demokrat në kundërshtim me ato të pronarëve të ligjshëm. «Mbështetja për një reformë, sikurse ajo agrare e bërë nga Enver Hoxha, duke e vlerësuar si një hap pozitiv në historinë e vendit, është një qëndrim aspak i motivuar për të mos thënë një lajthitje politike», u shpreh kreu republikan. Po ashtu, ai kundërshtoi edhe mbështetjen që Berisha ka dhënë ndaj Ligjit 7501. «Është absurde të mendosh që një fermer të bëhet pronar, kur kjo e fundit u ngrit mbi tokën e një pronari të ligjshëm, apo edhe në prona të shtetit.

Shpëtim Roqi
“PD po mbron Hoxhën”

Kryetari i Partisë Balli Kombëtar, Shpëtim Roqi, deklaroi dje se mbrojtja e Berishës për një periudhë tepër të errët të historisë, si ajo e reformës agrare të vitit 1945, flet për një politikë që ky i fundit po ndjek në mbrojtje të së majtës. «Edhe vetë deputetët socialistë nuk kanë dalë deri tani në mbrojtje të një reforme famëkeqe, si ajo agrare e bërë nga diktatori Enver Hoxha. Ndaj është një turp që një veprim të tillë e merr vetë kreu i partisë më të madhe opozitare, Sali Berisha», tha ai. Sipas Roqit, nuk mund të flitet për një ligj transparent mbi pronat, në një kohë kur flitet për kompensim të pronave, por në anën tjetër, u mohohet kjo pronë personave legjitimë. «Si mund të flitet për kompensim, kur askujt nuk i njihet prona, apo t’i vlerësohet ajo», tha ai.

Deputeti Pjetër Arbnori, merr pjesë në kongresin ndërkombëtar "Memento Gulag", i thirrur nga Komitetet për Liritë

Kongresi ndërkombëtar Memento Gulag, i thirrur nga Komitetet për Liritë, i përbërë nga delegatë disidentë nga shumica e vendeve komuniste, ose ish‑komuniste, me në krye disidentin e njohur rus Valeri Bukovski, disidentin kuban, Armando Valladarës, etj, u mbajt në Romë në 7 shtator të vitit 2003. Në kongres morën pjesë edhe historianët Stephane Cortois, Roberto Mattei, Vittorio Strada.

Gjatë tij, senatori Gustavo Selva, paraqiti propozimin e ligjit për vendosjen e një dite "Memento Gulag", (Kujtimi i Kampeve të Përqendrimit).

Këtë kongres e përshëndeti ambasadori i Ukrainës dhe u shfaq filmi "Uria e vitit 1933", për genocidin e popullit ukrainas. Në kongres u paraqitën dëshmi nga të mbijetuarit e burgjeve e kampeve: Pjetër Arbnori, Bujval, Jin Sheng, Pazhnjak, Valladares dhe u dhanë edhe mocionet e Komiteteve të Lirisë.

Deputeti Pjetër Arbnori, në fjalën e tij nënvizoi veçanërisht përndjekjet që pësojnë ish‑të burgosurit politikë të Shqipërisë, për mosmiratimin e një projektligji për dëmshpërblimin e ish‑të burgosurve, familjeve të të pushkatuarve, për të internuarit politikë. Pjetër Arbnori tha se çdo javë bëheshin demonstrata para parlamentit, para kryeministrisë, para presidencës, ku kërkohej zbatimi i Kushtetutës dhe nenit 57 të "Kodit Penal", që parashikon dëmshpërblimin e të gjithë atyre që kanë marrë pafajësinë me ligj të posaçëm nga Kuvendi i Shqipërisë. Të gjithë të burgosurit e të gjitha shoqatave, kanë bërë protesta, greva urie, peticione për dëmshpërblimin e këtyre njerëzve të persekutuar edhe sot, që janë pa punë, pa shtëpi. Në gjashtë vjet, pushteti demokratik bëri përpjekje për t'i shpërblyer pjesërisht, por jo sa duhet. Ndihmat u prenë pas rebelimit mafioz‑komunist të pas-1997-ës. Deputeti Pjetër Arbnori mblodhi 53 firma deputetësh demokratë, socialistë, republikanë, ballistë, legalistë dhe çdo seancë bën thirrje në Kuvend për dhënien e dëmshpërblimit të merituar e të ligjshëm.

Kongresi e dëgjoi me vëmendje fjalën e deputetit shqiptar, i cili foli edhe më gjatë për jetën e vështirë nëpër kampet e burgjet komuniste. Ai shpërndau falas librin e tij "10360 ditë e netë në burgjet komuniste" dhe broshurat me të njëjtin titull anglisht, italisht, gjermanisht dhe frëngjisht. Rai Uno, Rai Due dhe Rai Tre, i morën intervista të gjata të mbijetuarit të kampeve e burgjeve shqiptare, pas më tepër se 28 vjetëve. Atë e pyetën hollësisht edhe për kujtimet që kishte për martirët e kishës katolike, që ka njohur që në fëmini, ka pasur mësues, ka dëgjuar gjyqet, ose i ka njohur nëpër burgje, si Kardinal Koliqin, at Pjetër Mëshkalla, at Anton Kuli, at Xhovan Faust, at Daniel Dajani, dom Nikollë Mazreku, at Konrad Gjolaj, dom Martin Trushi, dom Ndoc Vogaj, imzot Zef Simoni, at Mark Harapi, dom Ndoc Ndoja, etj. Kuvendi vazhdon punimet dhe do të ketë edhe një seancë në Milano.