12042003kosovo

Meta, Statusi final i Kosovës, kërkon kohën e tij

TIRANË- “Çështja e statusit final të Kosovës kërkon kohën e tij”. Zëvendëskryeministri dhe ministër i Punëve të Jashtme, Ilir Meta ka mbajtur dje këtë qëndrim, duke anatemuar idetë e hedhura nga politikanët kosovarë për pavarësinë e Kosovës, ku ndër to, spikat ai i kreut të PDK-së, Hashim Thaçi, i cili është për moratorium të kësaj treve shqiptare nën administirmin e OKB-së. “Përsa i takon çështjes së Kosovës, propozimit të zotit Thaçi dhe qëndrimit më të fundit që kemi gjetur tek udhëheqësit e rinj në Beograd, dua të theksoj se çështja e statusit final të Kosovës do të kërkonte jo vetëm kushte të brendshme më të mira, pra, një funksionim më të mirë të institucioneve, një bashkëjetesë më të qëndrueshme midis shqiptarëve, serbëve dhe grupeve të tjera etnike atje, por do të kërkonte gjithashtu edhe një angazhim më të madh të komunitetit ndërkombëtar për definimin përfundimtar të kësaj çështjeje, ashtu sikurse do të kërkonte edhe rrethana më të mira rajonale”,-deklaroi dje Meta. Sipas tij, “parësore në përcaktimin e statusit final të Kosovës, duhet të jetë e drejta e gjithë qytetarëve të Kosovës, pa dallim etnik për t'u shprehur për të ardhmen e saj dhe kjo shprehje e vullnetit të tyre, duhet të bëhet në bashkëpunim të ngushtë me Komunitetin Ndërkombëtar”. Më tej, ministri i Jashtëm shtoi se "kemi vlerësuar vendosjen e një mekanizmi të ri në kuadër të Stabilizim-Asociimit mes Komisionit Evropian dhe autoriteteve të Kosovës"."Duhet të hidhen hapa më të vendosur përmes pjesëmarrjes institucionale, në përfshirjen e Kosovës në procesin e Stabilizim-Asociimit. Kosova duhet të jetë pjesëmarrëse edhe në shumë forume dhe institucione të tjera, që do të jepnin mundësinë që të mos ndihej e izoluar, për shkak të mospërcaktimit të statusit të saj",-tha Meta. Sipas tij, "edhe udhëheqja e re në Beograd, synon hapjen e një dialogu sa më të shpejtë, për zgjidhjen e çështjes së statusit të Kosovës”.
B.Hoti

12/04/2003

Per statusin e Kosoves, kushte me te mira
Ministri Meta tha se statusi final i Kosoves kerkon, jo vetem kushte te brendshme me te mira, nje funksionim me te mire te institucioneve, nje bashkejetese me te qendrueshme midis shqiptareve, serbeve dhe grupeve te tjera etnike atje, por gjithashtu edhe nje angazhim me te madh te komunitetit nderkombetar per percaktimin perfundimtar te kesaj ceshtjeje, si dhe rrethana me te mira rajonale. "Paresore ne percaktimin e statusit final te Kosoves duhet te jete e drejta e te gjithe qytetareve te Kosoves pa dallime etnike". Persa i perket udheheqjes se re te Beogradit, shtoi ai, duket se synon hapjen e nje dialogu sa me te shpejte per zgjidhjen e statusit te Kosoves. "Megjithate, - shtoi Meta, - kjo eshte nje ceshtje qe kerkon kohen e saj. Mendojme se Kosova duhet te jete pjesemarrese edhe ne forume dhe institucione te tjera, qe do t'i jepnin mundesine te mos ndihej e izoluar per shkak te mospercaktimit te statusit".