Rezarta Delisula

TIRANE

Rruga "Hoxha Tahsim", një nga akset më kryesore të qytetit, ka nisur të zgjerohet në vitin 1927, ndërsa pjesa e parë e punimeve ka përfunduar më 1937. Kjo rrugë dikur fillonte nga Pazari i Ri, apo siç njihej ndryshe sheshi "Partheni" (markatës), dhe mbaronte te varrezat e bardha. Sipas të dhënave të asaj kohe, kjo rrugë ka pasur drejtim shumë të bukur që shkonte gati paralel me rrugën "Kotta". Përgjatë rrugës "Hoxha Tahsim" ngriheshin vila dy-trikatëshe me oborre të gjelbëruara përpara dhe, po në këtë kohë ky segment i rëndësishëm i qytetit u pajis edhe me ndriçimin rrugor. Punimet u ndanë në dy faza për shkak të pamjaftueshmërisë së fondeve. "Hoxha Tahsim" u hap nga fillimi dhe konsiderohet si një nga rrugët e pajisura më mirë me infrastrukturën inxhinierike të nevojshme sipas parametrave bashkohorë. Ndërtimi nisi me shpronësimin e disa shtëpive dhe kopshteve përgjatë aksit, ndërsa punimet e para të kryera lidhen me vendosjen e kanalizimeve të ujërave të zeza e të bardha, për të përfunduar më pas me asfaltin e trotuarët. Pjesa e parë e "Hoxha Tahsimit" niste me Pazarin e Ri, apo sheshin "Partheni" ku ishin vendosur disa vila të bukura me një stil të veçantë arkitektonik. Vila e Kërçikëve që ekziston edhe sot por që është zënë nga tregu i parë i fruta-perimeve te sheshi "Avni Rustemi", ka qenë ndërtesë madhështore dhe e veçantë. Në ballë të sheshit është vila 4-katëshe në pronë të Xhelo Dibrës që shërbente si Drejtori e Përgjithëshme e Post-Telegrafëve. Po kështu ngjitur me të ndodhet një vilë tjetër trikatëshe me arkitekturë të veçantë në pronë të Banush Hamdiut. E si fillonte sheshi para rrugës "Hoxha Tahsim" ashtu vijonte me vila të vogla e të gjelbëruara. Tashmë pamja e rrugës ka ndryshuar pak a shumë. Në fillim të rrugës vazhdojnë të mbahen vilat e vogla, ndërsa pjesa tjetër është ndërtuar me pallate të larta duke prishur harmoninë e lartësisë. Kjo është një nga akset e rralla që nuk ka ndryshuar emërtimin përgjatë ndryshimit të sistemeve.

INFRASTRUKTURA NE KOHEN E ZOGUT

- Viti i nisjes së punimeve, 1929
- Gjatësia e rrugës, 1050 metra linearë
- Gjerësia e aksit, 15 metra
- Shpronësimi, 48967 franga ari
- Ndërtimi, 47000 franga ari
- Trotuarët e pjesës së parë kanë kushtuar 2,100 franga ari, ndërsa ndërtimi i kanalizimeve, 3500 franga ari
- Shuma totale e ndërtimit të rrugës "Hoxha Tahsim" ka kushtuar 191567 franga ari