Deputetët e PS-së e PD-së rrëzojnë projektligjin e Mediut dhe Çakos

Nevila Perndoj

TIRANE - Projektligji i përgatitur nga republikanët për kthimin dhe kompensimin e pronave nuk do të votohet në Kuvend, pas rrëzimit nga komisioni parlamentar i Bujqësisë dhe Ushqimit. Në datën 20 nëntor, në seancë plenare do të votohet vetëm varianti i OSBE-së për kthimin dhe kompensimin e pronave, pas shqyrtimit që do të bëhet në komisionet parlamentare. Komisioni parlamentar i Bujqësisë dhe Ushqimit nisi dje shqyrtimin e projektligjit të hartuar nga OSBE për kthimin dhe kompensimin e pronave. Nga ana tjetër, ky komision u njoh edhe me draftin e hartuar nga deputetët e opozitës, Fatmir Mediu dhe Alfred Çako, për këtë çështje, por nuk ra dakord ta marrë në diskutim atë me pesë vota pro dhe dy kundër. Një prej deputetëve republikanë që votoi kundër Maksim Begeja, deklaroi dje se “fatkeqësia më e madhe në këtë vend është që dy forcat politike, elemente të veçantë të këtyre forcave politike bëjnë atë çka nuk duhet që të bëjnë, njerëz pa pronë, njerëz që nuk kanë pasur historikisht prona as të trashëguara, as të dhuruara dhe as të blera që konform ligjeve ato po bëjnë edhe ndarjen e pronës. Janë ata që po vendosin se kujt po i jepet prona, se kush duhet ta marrë pronën dhe mos ta marrë pronari i ligjshëm”. Ndërsa mosmarrjen parasysh të draftit të dy deputetëve të opozitës, kryetari i komisionit dhe deputeti demokrat Jemin Gjana e argumentoi me faktin se, "ky variant kërkon anulimin e ligjit 7501 të miratuar në vitin 1994 nga qeverisja e Partisë Demokratike". Gjana, vlerësoi se "projektligji i hartuar nga Grupi i Ekspertëve të OSBE-së ka qartësuar disa pika në çështjen e pronës që kanë qenë të debatueshme". Sipas këtij projektligji, "çdo subjekti të shpronësuar pas vitit 1944 i njihet e drejta e pronësisë, element ky që njeh kthimin dhe kompensimin pa kufizim të pronave", -tha Gjana. Ai shtoi se, "vlerësimi për këtë proces, do të bazohet mbi çmimin e tregut". Lidhur me çështjen e kompensimit financiar të ish-pronarëve, e parashikuar dhe në projektligjin e OSBE-së, Gjana tha se "kostoja financiare do të përllogaritet nga qeveria pas miratimit të tij në Kuvend". Varianti i paraqitur nga OSBE për kthimin dhe kompensimin synon t'u japë fund kontestimeve të shumta për variantet e paraqitura deri tani, si nga qeveria, ashtu edhe partitë politike për këtë çështje. Ai është mbështetur nga dy partitë kryesore politike PS dhe PD dhe është kontestuar nga disa parti të vogla opozitare, Partia Lëvizja e Legalitetit, Partia e Ballit Kombetar dhe Partia Republikane. Drafti i përgatitur nga OSBE do të shqyrtohet nga komisionet parlamentare në formën e një projektligji që është firmosur tashmë nga 12 deputetë të pozitës dhe opozitës. Pavarësisht nga mbështetja që demokratët i kanë dhënë projektligjit, ata nuk kanë shpjeguar ende firmën e tyre në mbështetje të projektligjit të republikanëve në muajin prill të këtij viti.



Mediu: Ishte vendim politik

TIRANE - Kryerepublikani Fatmir Mediu dhe një prej hartuesve të projektligjit të përgatitur për pronat, Fatmir Mediu deklaroi dje se vendimi që u mor në komisionin parlamentar të Bujqësisë dhe Ushqimit ishte tërësisht politik. “Unë mendoj se ka qenë një vendim dhe një diskutim tërësisht politik pa parë realisht problemet apo zgjidhjet që ofronte drafti që ne kemi kohë që ne e kemi çuar në Kuvendin shqiptar”, -tha Mediu. Republikanët kanë kundërshtuar me forcë lënin në fuqi të ligjit 7501 si dhe reformën agrare të vititt 1945.


Gazmir Bizhga
Komiteti i Përgjithshëm Drejtues i hap hapësirë jo vetëm z. Rama, apo edhe Meidanit por edhe kujtdo tjetër që dëshiron të kandidojë. Unë personalisht jam shprehur se PS ka pasur dhe vazhdon ta ketë kryetarin e saj që është kryetari i PS-së, Fatos Nano

Mustafa Muçi
Besoj që strukturat e PS-së të qytetit të Beratit do të më japin mundësinë për të qenë delegat i Kongresit, dhe nëse do të jem i tillë e kam shprehur qëndrimin tim edhe publikisht më parë se vlerësoj kandidaturën e Meidanit si një kandidaturë tepër serioze dhe e vlerësoj atë si një kandidaturë shumë cilësore dhe si një kandidaturë që i tejkalon PS-së të gjithë problemet që aktualisht ka, po sigurisht ka kohë për të marrë një vendim përfundimtar.

Bardhyl Agasi
KPD i lejon edhe Edi Ramës edhe kujtdo tjetër që ka një jetëgjatësi në postet drejtuese jo vetëm të partisë por edhe të ekzekutivit, t’i krijojë të gjitha mundësitë për të kandiduar.

Marko Bello
Ai ka marrë më shumë vota se PS. Ka marrë 8% thuhet apo jo. Pra 48% janë të PS. Të shohim se sa mbështetje ka tek ky 48%.

Gramoz Ruçi
Më lejoni që të përmbush detyrat e mia institucionale pas vendimeve të Komitetit të Përgjithshëm Drejtues. Sekretari i përgjithshëm i PS-së ende nuk ka asnjë kandidat zyrtar për kryetar të PS-së.

Spartak Braho
Padyshim që është një figurë brilante dhe që z. Rama pasi të mësojë mirë teorinë e socialdemokracisë do të jetë edhe një lider i fuqishëm i të majtës socialiste. Padyshim që do ta mbështes Edi Ramën.

Lekë Çukaj
Unë kam mendimin që është gjëja më e mirë që do të bëhet në këtë garë dhe unë nuk jam për firmat. Le të konkurrojnë të gjithë, të dalin të shpalosin idetë për opsionet që kanë për programet dhe të ndihmojnë për zhvillimin demokratik të kësaj force të madhe.