LDK e AAK hedhin poshtë një moratorium për statusin e Kosovës, të mbështetur nga Shtajner

Partitë e Kosovës, kundër idesë së Thaçit

Juristi Hasani: Moratoriumi legalizon gjendjen aktuale në Kosovë dhe shtyn pambarimisht pavarësinë

PRISHTINË - Ideja e njërit prej liderve politikë të Kosovës për një moratorium rreth statusit të vendit, që është përkrahur edhe nga UNMIK-u, është hedhur poshtë dje nga gjithë partitë e tjera të Kosovës. Sipas tyre, kjo ide e re konsiderohet si e dëmshme, një eksperiment i panevojshëm dhe që i ndihmon gjendjes së “status quos” që është krijuar pas lufte. Kryetari i Aleancës për Ardhmërinë e Kosovës (AAK), Ramush Haradinaj, e cilësoi propozimin “një eksperiment të panevojshëm, të padobishëm dhe jashtë logjikës”.
“Vullneti i popullit të Kosovës është shpallja e Kosovës shtet sovran dhe i pavarur dhe institucionet e Kosovës kanë për detyrë të jetësojnë këtë. Politika e pritjes na ka sjellë vazhdimisht pasoja për procesin politik”,- tha Haradinaj, i cili shtoi se ky është qëndrimi që ka dalë nga mbledhja e Kryesisë dhe e kryetarëve të degëve të kësaj partie, që të premten kanë diskutuar për idenë. Ndërkaq Alush Gashi, anëtar i Kryesisë së Lidhjes Demokratike të Kosovës, duke komentuar propozimin e liderit të PDK-së, ka thënë se “ky nuk është vizioni i LDK-së, e cila angazhohet për njohjen formale të pavarësisë së Kosovës, tani”. “Ne nuk mund të shkojmë në Evropë pa adresë, ne dëshirojmë dhe angazhohemi fuqimisht që adresa jonë të jetë pavarësia e Kosovës dhe si Kosovë, shtet sovran dhe i pavarur- anëtar i Kombeve të Bashkuara”, -është shprehur Gashi. Ai shtoi se “një entuziazëm i tillë, që një Kosovë pa pavarësi, pa qenë anëtare e OKB-së dhe të integrohet në Unionin Evropian nuk është mision i LDK-së”.
Shefi i UNMIK-ut, Mihail Shtajner e ka mbështetur publikisht një ditë më parë shpalljen e një moratoriumi për një kohë të caktuar për statusin e Kosovës, duke e cilësuar atë si në përputhje me vijën politike të tij për “standardet para statusit”. Ndërsa vetë kryetari i Partisë Demokratike të Kosovës (PDK), Hashim Thaçi e ka shpjeguar idenë si mekanizëm që do të bëjë më dinamike “zhvillimet e gjithanshme” në Kosovë dhe se propozimi është rrjedhojë e “pozitës vendnumëro” të Kosovës, që sipas tij ka ardhur nga pasiviteti i UNMIK-ut, por edhe i institucioneve të Kosovës.
Moratoriumi vonon pavarësinë
Profesori i të drejtës ndërkombëtare në Universitetin e Prishtinës, Enver Hasani vlerëson se propozimi i Thaçit për një moratorium për çështjen e zgjidhjes së statusit të Kosovës synon të legalizojë një gjendje e cila “de facto” ekziston, gjegjësisht t’i përshtatet një pjese të bashkësisë ndërkombëtare, e cila synon me çdo kusht ta mbajë këtë “status quo” dhe ta shtyjë pambarimisht, për një kohë shumë të pacaktuar, zgjidhjen e statusit përfundimtar të Kosovës.
Hasani thotë se statusi i Kosovës është duke u zgjidhur hap pas hapi në dëm të shumicës shqiptare të Kosovës. Ai përmend marrëveshjen për krijimin e Bashkimit Serbi dhe Mali i Zi, (në Kartën Kushtetuese të të cilës krijesë është përfshirë edhe Kosova) dhe së fundi pranimin e këtij unioni në Këshillin e Evropës, që “objektivisht po e kornizon në mënyrë të pashmangshme përfshirjen e Kosovës në kuadër të këtij entiteti”.
“Për këtë arsye, moratoriumi nuk ka kuptim, nuk ka sens në status, përkatësisht do ta neutralizonte palën shqiptare për t'u marrë me këtë çështje… Shihet qartë se kjo po vlen vetëm ndaj palës kosovare, përkatësisht shumicës shqiptare”, -theksoi Hasani.
Sipas tij, çështja e statusit të Kosovës nuk mund të vendoset me akte dhe veprime të njëanshme dhe përcaktimi i këtij problemi sipas tij, nuk mund të bëhet në një klimë të pasigurisë, e cila ekziston sot në Kosovë. Ai u sugjeron politikanëve kosovarë që “për të dalë fitimtarë, ose “për të mos dalë të humbur” duhet të përgatisin një platformë të përbashkët, e cila do të përcaktonte modalitetet dhe dinamikën e dialogut për statusin dhe eliminimin e pengesave, të cilat objektivisht ekzistojnë.
Çështja e moratoriumit duket se nuk do të gjejë përkrahje te asnjë parti tjetër politike dhe as tek institucionet kosovare. Madje edhe disa deputetë të PDK-së në Kuvendin e Kosovës të premten nuk deshën të komentojnë idenë e liderit të tyre me arsyetimin se nuk janë shumë në dijeni se çka përmban propozimi.
Kryeministri i Kosovës, Bajram Rexhepi i pyetur nga gazetarët, gjithashtu, nuk e ka komentuar idenë e moratoriumit, meqë ajo nuk është diskutuar ende në partinë prej nga vjen kryeministri.
Sidoqoftë edhe Thaçi thotë se “moratoriumi është vetëm projekt që është duke u diskutuar”. Ai shtoi se modalitetet e tjera janë duke u studiuar dhe do të realizohen në të ardhmen nga vendorët dhe ndërkombëtarët, kur të arrihet edhe një qëndrim unanim nga institucionet e vendit. Kohëzgjatja e moratoriumit, gjatë së cilës as Kosova dhe as Serbia nuk do të kërkonin hapjen e çështjes së statusit, mbetet gjithashtu të diskutohet.
Profesori i të drejtës ndërkombëtare, Enver Hasani thotë se ruajtja e kësaj “status quo”-je që është krijuar është e pamundur edhe për një kohë të gjatë, nëse nuk punohet, nëse jo në zgjidhjen e statusit, në segmentet e tjera, të kulturës, artit, infrastrukturës, ekonomisë, mirëqënies për ta “kompensuar” mbajtjen e kësaj gjendje. Faton Osmani

Brajshou: Kosova është duke arritur standardet evropiane
Zv/kryeadministratori i Kosovës, Çarlls Brajshou në një ceremoni me rastin e diplomimit të kadetëve të rinj të SHPK-së, tha se Kosova është duke arritur gradualisht standardet evropiane dhe kjo është mënyra më e mirë për të ardhmen e Kosovës që e synon aq shumë populli i saj. Brajshou vuri në pah se policia e Kosovës do të ndihmojë në vendosjen e rendit dhe ligjit, në mënyrë që popullit të Kosovës t'i garantohen të drejtat e tij në një ambient të sigurt, të mbrojtur nga kriminelët dhe kjo përbën një nga standardet e kërkuara nga komuniteti ndërkombëtar. Ai tha se ka zëra që thonë se standardet janë një lloj mashtrimi i krijuar, që të mbajnë qytetarët jashtë ambicjeve për Kosovën, mirëpo ata zëra e kanë gabim, tha Brajshou. Populli i Kosovës dëshiron të jetojë në një ambient tolerant e demokratik, të mbrojtur vetëm nga ligjet dhe me punën e policëve të Kosovës, të cilët do të krijojnë një të ardhme më të mirë për qytetarët e saj.