Copyright 2002 Shekulli 14 Maj, 2003

http://www.shekulli.com.al/

Intervistë/

Flet për “Shekulli”-n lideri i partisë në pushtet, Bashkimi Demokratik për Integrim në Maqedoni, Ali Ahmeti

Ahmeti: Marrëveshja e Ohrit nuk ka vdekur

Pas takimit ndëretnik, të zhvilluar dje në Mavrovë, në bashkëpunim me ambasadën zviceriane, udhëheqësit kryesorë të Maqedonisë si dhe diplomatët ndërkombëtarë, ku për dy ditë u diskutua mbi zbatimin e Marrëveshjes së Ohrit, kryetari i Bashkimit Demokratik për Integrim, Ali Ahmeti, dha për “Shekulli”-n, këtë intervistë.
Z. Ahmeti, si ka funksionuar Marrëveshja e Ohrit dhe koaliconi qeveritar për 6 muajt e parë?
Unë jam shumë i hapur. Siç kam ritheksuar dhe ripërsëritur, vlerësimi ynë, si parti pjesëmarrëse në qeveri, është: deri në zbatimin e plotë të Marrëveshjes së Ohrit ende ka shumë punë për të bërë, por unë nuk pajtohem me memorandumin si dhe shpalljen e Marrëveshjes së Ohrit si të vdekur. Kjo marrëveshje nuk mund të quhet e vdekur dhe unë i kam nxjerrë argumentat përse. Kjo marrëveshje quhet “e Ohrit”, sepse takimi është mbajtur në Ohër, por ajo ka karakter ndërkombëtar, si dhe marrëveshjet e tjera të janë mbajtura në Dejton, në Rambuje apo në Uashington. Në parim, pas kësaj marrëveshjeje qëndron SHBA-ja, Bashkimi Evropian dhe NATO-ja dhe, nëse do të shpallet e vdekur Marrëveshja e Ohrit, atëherë për ne janë të vdekura SHBA-ja, Bashkimi Evropian e NATO-ja. Unë jam optimist për Marrëveshjen e Ohrit. Për mua, problemi kombëtar i shqiptarëve është i zgjidhur, sepse këtë situatë në Maqedoni e menaxhon faktori ndërkombëtar dhe tri qendra të mëdha kryesore. Kjo marrëveshje do të jetë e realizuar pikë për pikë në datën 23 shkurt 2004, i cili është edhe afati i fundit që ajo të jetë jetësuar dhe materializuar.
Zoti Ahmeti, çfarë është zbatuar nga Marrëveshja e Ohrit deri tani?
Po. Deri më datën 20 maj të këtij viti do të jetë përfunduar marrëveshja politike e koalicionit qeveritar. Deri më 20 maj do të jenë ndarë të gjitha postet si nëpër ministri, edhe në rajone, por edhe në angazhimet e udhëheqëse në vende të ndryshme, nëpër ndërmarrjet publike dhe institucionet.
Zoti Ahmeti, cili është komenti juaj për problemin e arsimit të lartë, ende të pazgjidhur?
Për legalizimin e Universitetit të Tetovës ekziston vullneti i të gjitha palëve brenda koalicionit qeverisës, për ta materializuar. Kjo na takon të gjithëve, që të mos mbetet vetëm vullnet, por edhe të jetësohet. Hapat e hedhur dhe ecuria e mëtejshme janë premtuese.

Arsimi
Kumanovë: 5000 nxënës shqiptarë në protesta
Nxënësit e shkollave të mesme të Kumanovës dje filluan protestat masive, duke kërkuar nga Ministria e Arsimit që urgjentisht të zbatojë vendimin e saj për zgjidhjen e çështjes së shkollave për nxënësit shqiptarë të Kumanovës. Burharedin Xhemaili, anëtar i Këshillit Koordinues të prindërve dhe të profesorëve, tha për gazetën “Shekulli” se Ministria e Arsimit më në fund duhet të krijojë kushte për zhvillimin e procesit mësimor për nxënësit shqiptarë të shkollave të mesme në Kumanovë. Protesta u zhvillua dje përpara shkollës fillore “Naim Frashëri”. “Për çdo protestë ndaj qeverisë, nuk duhet të pritet të arrijë në nivelin vandal që ajo të merret me çështjet problematike”,- u shpreh për gazetën kryetari. “Ahmeti edhe faktori ndërkombëtar duhet të ndërhyjë në 18 paralele të gjimnazit dhe 25 paralele të shkollës së mesme të teknikës dhe të ekonomisë, të cilat ndjekin mësimin në dy shkolla fillore, me orar të shkurtuar. Janë 5 miijë nxënës të shkollave të mesme që kanë mbetur në udhëkryq. Në rast se deri në datën 15 maj Ministria e Arsimit nuk e zbaton vendimin, këshilli i grevës u tha gazetarëve se do të shkallëzohen protestat, duke bllokuar rrugën kryesore të Kumanovës”,- ka deklaruar këshilli i prindërve. Këshilli i prindërve theksoi se kjo situatë ka ardhur ngaqë nxënësit joshqiptarë të Kumanovës nuk duan të bashkëjetojnë me nxënësit shqiptarë. Edhe kjo zgjidhje e Ministria e Arsimit është e përkohshme.
B. Berberi