Drejtuesit Legaliste por edhe te partive te tjera të vogla  vazhdojnë të këmbëngulin në kërkesën e tyre për te bere ndryshime në kodin zgjedhor. Sërisht dje ne një konferencë për shtyp legalistët  janë shprehur se partitë e vogla të të gjithë spektrit politik janë të vendosura të vazhdojnë kontestimet e tyre rreth Kodit të ri Zgjedhor. Dy të mëdhenjtë që kanë qeverisur këtë vend gjatë këtyre 13 viteve kanë kuptuar se tashmë nuk ia dalin dot të marrin mazhorancë qeverisëse, kanë kuptuar se nuk mund të shfrytëzojnë më forma banale të manipulimit të zgjedhjeve duke përdorur policinë, SHISH, burimet financiare, materiale e njerëzore të dikastereve dhe institucioneve të tjera të shtetit, etj. Ndaj janë mirëkuptuar për të fituar pozita dominuese në zgjedhje nëpërmjet aspekteve tekniko-ligjore. Ne nuk mund të pranojmë formimin e maxhorancave fiktive qeverisëse, në kundërshtim të hapur me parimet e Kushtetutës së Republikës së Shqipërisë. Duam të theksojmë se ne nuk kemi keqkuptuar askënd, përkundrazi kemi kuptuar se dy të mëdhenjtë kanë synim të qartë që aleatët të mos i konsiderojnë si partnerë por si vasalë. Ata kërkojnë që në qeverisje të krijojnë “koalicione” për konsum politik ku partitë e vogla pjesëmarrëse të mos kenë asnjë mundësi për të ndikuar në politikat qeverisëse. Ne ndajmë koncepte të ndryshme me dy të mëdhenjtë e politikës përsa i përket stabilitetit të qeverisjes dhe demokracisë në përgjithësi. Në emër të stabilitetit të qeverisjes, demek se përgjërohen për stabilitetin e vendit, ata kërkojnë pozita dominuese në qeverisje, çka do të thotë të qeverisin vetëm. Ky koncept egoist i tyre gjatë këtyre viteve ka prodhuar veçse arbitraritet dhe është shkaku kryesor që ka çuar në destabilizimin e situatës në vend, duke na lënë në bisht të vendeve të Ballkanit për pjesëmarrje në BE dhe në NATO. Ne jemi për koalicione reale në qeverisje, pasi mendojmë se pjesëmarrja e të vegjëlve në qeverisje moderon qëndrimet e më të mëdhenjve dhe i mbyll rrugën arbitraritetit në vendimmarrje e për pasojë prodhon stabilitet.Ne mendojmë se një dimension mjaft i rëndësishëm i demokracisë është respekti dhe përfillja e të vegjëlve, ndërsa dy të mëdhenjt e politikës me sa duket nuk e marrin fare në konsideratë këtë dimension. Ata duhet të kuptojnë se ne do ti kundërshtojmë synimet e tyre me të gjitha format dhe mjetet demokratike, pa kurrfarë kompleksi inferioriteti pasiqë jemi të bindur që i bëjmë një shërbim të madh demokracisë dhe stabilitetit të vendit. Ata duhet të kuptojnë përfundimisht se nuk janë pronarë të këtij vendi, madje duhet ta kishin kuptuar se ka ikur koha kur mund të marrin vendime sipas qejfit dhe oreksit të tyre. Ne nuk mund t’i pranojmë marrëveshjet dhe vendimet e tyre pa pjesëmarrjen tonë.  e.gj

Nga Pranvera Xhafaj