15102003elections

Partite e vogla, te kenaqura me rezultatin
Pas betejes se dy te medhenjve, partite e tjera deklarojne rezultate pozitive ne zgjedhjet e 12 tetorit. Pollo, Spahiu, Mediu e Lesi ne kampin e djathte dhe Gjinushi, Xhuveli e Milo te te majtet shprehen per shtim te elektoratit

TIRANE- Partite e vogla kane vleresuar ne vija te pergjithshme rezultatin e arritur ne zgjedhjet vendore te 12 tetorit. Sipas drejtuesve me te larte te reformatoreve, legalisteve dhe republikaneve, rezultati i arritur deshmoi qarte se elektorati nuk ka prirje per te shkuar drejt nje skeme politike bipolare, ose per nje monopolizim te opozites. Kryetari i PDR Genc Pollo, vlereson se forca politike qe ai drejton ka arritur te ruaje vendin e trete si force politike ne rang vendi, megjithese ka garuar ne kushte mjaft te veshtira, pasi nuk kishte komisionere neper qendrat e votimit, si dhe iu mohua me pa te drejte ne kundershtim flagrant me ligjin anetari i saj ne KQZ, duke qene se ishte forca e trete politike ne Kuvend. "Ne baze te rezultateve paraprake, PDR e ka ruajtur vendin e saj si force e trete ne rang vendi. Kemi siguruar pjesemarrje me keshilltare ne te gjithe keshillat vendore ku kemi garuar. Rezultati yne eshte i perafert me ato te meparshmet", ka nenvizuar Pollo. Sipas tij, PDR ka patur shqetesime shume serioze me listat e zgjedhesve ne Tirane, Durres, por edhe bashki te tjera, pasi aktivistet e kesaj partie nuk kane mundur te gjejne emrat e tyre, nuk kane mundur te votojne dhe kjo i ka sjelle nje dem serioz PDR, por ne rradhe te pare procesit zgjedhor. Pollo nenvizon se PDR do ta ndjeke kete ceshtje. "Kemi patur shume shqetesime lidhur me votat, te cilat jane numeruar pa pranine e perfaqesuesve tane, dhe sipas te dhenave, shpesh here, sidomos ne Tirane, rezultati eshte zeruar. Sidoqofte, edhe pse ne kushte shume te disfavorshme, qe kane lidhje jo vetem me Kodin Zgjedhor, por edhe me fushaten e pabarabarte mediatike, financat krejtesisht te pamjaftueshme, si dhe nje sere anomalish te tjera, PDR ia doli mbane te tregonte se eshte nje force serioze duke konfirmuar perfundimisht pranine dhe keshilltaret e saj ne te gjitha zonat ku ne kemi garuar", ka nenvizuar Pollo. Optimist per rezultatin shprehen edhe legalistet. Sipas krereve te kesaj partie ne raport me zgjedhjet e tetorit te vitit 2000, PLL ka katerfishuar numrin e keshilltareve, dhe tashme PLL perfaqesohet ne te gjitha bashkite dhe komunat e vendit me keshilltaret e saj. "Ne shume bashki dhe komuna, PLL del partia e dyte, si per shembull ne Kavaje, ku kandidati i PLL del me rezultat prej 37 % dhe afirmohet si forca e dyte politike. Nderkaq, ne shume komuna te vendit, kandidatet legaliste kane dale ne vend te dyte, me nje diference minimale votash, qe varion prej 7 deri ne 30 vota me kandidatin fitues", ka nenvizuar Kryetari i PLL, Eqrem Spahiu. Edhe republikanet jane shprehur me tone pozitive per rezultatin e arritur prej kesaj partie ne zgjedhjet vendore. Sipas kryetarit te PR Fatmir Mediu, ky rezultat ishte me i larte krahasuar me zgjedhjet e meparshme. Kreu i republikaneve vlereson se, rezultati do te ishte me i larte, nese nuk do te ishin verejtur ato parregullsi qe shoqeruan zgjedhjet lokale. Demokratianet e Nikolle Lesit jane shprehur gjithashtu te kenaqur me rezultatin e zgjedhjeve te 12 tetorit, duke deklaruar "marrjen" e 4 komunave.

Gjithashtu, rezultate pozitive kane deklaruar edhe partite e vogla te spektrit te majte. Socialdemokratet dhe agrar-ambjentalistet kane shpallur shifrat e tyre, duke i vleresuar si rezultate te mira. Gjinushi eshte shprehur per fitoren ne 1 bashki dhe 9 komuna, ndersa Xhuveli zoterimin e 7 komunave. Demokracia Sociale e Milos ka arritur nderkohe te fitoje ne Bashkine e Rroskovecit, ndersa PBDNJ ka deklaruar fitoren ne Himare e Polican.

A. META

15 Tetor 2003 Shekulli

Disa prej Komisioneve Zgjedhore të Qeverisjes Vendore kanë dërguar kutitë e votimit në KQZ, të tjerat qëndrojnë ende të ngrira

Tiranë-Durrës, bllokohen rezultatet

Olsi Kolami, Llambi Kallço

TIRANE - Zënkat mes komisionerëve kanë bllokuar procesin zgjedhor në mjaft Komisione Zgjedhore të Qeverisjes Vendore të 11 njësive bashkiake në Tiranë. Hapja e kutive të votimit nga militantët ka qenë shkaku kryesor i kësaj pengese. Edhe pse pothuajse nga shumica e KZQV-ve të kryeqytetit, ku është bllokuar procesi, është marrë konsulenca e nevojshme nga ekspertët e Komisionit Qendror Zgjedhor, sërish shumë pak kuti votimi kanë mundur të arrijnë pranë KZQV-së së Tiranës gjatë paradites së djeshme. Hapja e kutive të votimit në disa KZQV, ka detyruar komisionerët që si zgjidhje të vetme të kenë dërgimin e dokumentacionit së bashku me kutitë e votimit pranë KZQV-së Tiranës, ku edhe pritet hapja e kutive, në prani të të dyja komisioneve. Në disa KZQV, emergjenca që kërkon zbatimi i Kodit Zgjedhor për dorëzimin e materialeve zgjedhore, nuk pi ujë fare, pasi konfliktet mes komisionerëve kanë bllokuar gjithë procesin. Kështu në KZQV-në “Tirana 7”, i gjithë dokumentacioni është mbyllur në një prej zyrave dhe nuk dihet nëse do të hapet apo jo, pas një konflikti mes komisionerëve. Nënkryetari i saj Sami Metalia, tha se shkak për bllokimin e procesit zgjedhor në këtë komision, ka qenë hapja e shtatë kutive të votimit, nga ana e një komisionerëve. Menjëherë pas këtij incidenti, është mbyllur dokumentacioni dhe nuk është marrë asnjë masë, të paktën për dorëzimin e materialeve në KQZ. Ndërkohë një tjetër KZQV, “Tirana 4”, ka mbyllur një pjesë të procesit, duke dorëzuar vetëm kutitë ku ishte votuar për kryetarin e bashkisë. “Kemi kontaktuar me KQZ-në dhe morëm një vendim që kutitë e votimit për bashkinë e madhe, të shkojnë në KQZ, ndërsa të gjitha kutitë e tjera ku është votuar për njësitë bashkiake, do të qëndrojnë pranë qendrës sonë”,-tha për gazetën, Liljana Bejleri, kryetare e KZQV-së “Tirana 4”. Pas mesditës në këtë KZQV, një pjesë e kutive u nis drejt KQZ-së, pasi u panë me kujdes nga të gjitha komisionerët, të cilët i kanë dhënë dorën e fundit dorëzimit të materialeve zgjedhore. Ndërkohë që në KQZV “Tirana 1”, ka nisur disa orë pas mesditës, sistemimi i kutive të votimit, duke ndarë ato që i përkasin bashkisë dhe minibashkisë. “Nuk kam qenë dakord me hapjen e kutive të votimit, pasi është në kundërshtim me rregullat që thotë manuali, megjithatë është rënë dakord mes komisionerëve që ato të hapen dhe më pas të dërgohen në KQZ”,-tha kryetari i kësaj KZQV-je, Sadik Domi. Shkaku kryesor i bllokimit të procesit në këtë zonë, ka qenë gjetja e hapur e një kutie votimi, për të cilën është dyshuar se janë futur fletë votimi, pretendim ky që është rrëzuar nga komisionerët socialistë. Ndërkohë që edhe KZQV-ja “Tirana 3”, ka nisur dërgimin e një pjese të konsiderueshme të kutive të votimit, pasditen e djeshme, pasi është rënë dakord mes komisionerëve. Problem shqetësues i vënë re pas hapjes së kutive të votimit, në disa KZQV, ishte moskoordinimi i rezultateve të zgjedhjeve, duke i krahasuar ato me kodet e shënuara në procesverbal të dyllosura këto mbi kapakun e kutive të votimit dhe kjo mendohet ka ndodhur pasi ato janë hapur kur kanë mbërritur në KZQV.

Bllokimi në KZQV

KZQV-ja “Tirana 1”
Një kuti votimi gjendet e hapur, nisi verifikimi i procesverbaleve

KZQV-ja “Tirana 3”
Pasditen e djeshme u nisën drejt KQZ-së, kutitë e fundit të votimit

KZQV-ja “Tirana 4”
Kryetari i KZQV-së dha dorëheqjen, gjendja u normalizua dje

KZQV-ja “Tirana 7”
Ngrin procesi zgjedhor, ishin hapur shtatë prej kutive të votimit

KZQV-ja “Tirana 10”
Mosmarrëveshje mes komisionerëve demokratë dhe atyre socialistë

Durrës: “Mosfirmosja, vendim politik”
Kryetari i KQZV-së së Durrësit, Agron Agalliu, deklaroi në konferencën për shtyp në mesnatë se mosfirmosja e procesverbalit nga përfaqësuesit e PD ishte një vendim politik, i urdhëruar nga lart. “E them këtë pasi ata kanë marrë shpesh thirrje në telefonat celularë nga shefat e tyre të partisë. Agalliu ka theksuar se mosfirmosja e procesverbaleve nga komisionerët demokratë ka ndodhur vetëm në KQZV-në e bashkisë. “Komisionet e qendrave të votimit i kanë firmosur ato pa përjashtim. Edhe përfaqësuesit e PD kanë hedhur firmën e tyre. Bllokimi i rezultateve, siç duket, është lënë për në KQZV”, -tha ai.
Ndërkaq, njëri nga përfaqësuesit demokratë që nuk pranuan të firmosnin procesverbalin përfundimtar të Durrësit, Sabah Jemishta, deklaroi se nuk kishin si të hidhnin firmat përderisa nuk i njihnin rezultatet e votimeve. “Procesi zgjedhor pati shumë manipulime, ndaj ne nuk mund të pranonim rezultatet e tij”, -tha ai.

Në foto: Kryetari i Partisë Demokratike, Sali Berisha

Kreu i PD merr pjesë në byronë politike të Partive Popullore.

Berisha denoncon Tiranën e Durrësin në Bruksel

Nevila Përndoj

TIRANE - Në kulmin e kontestimeve të opozitës për zgjedhjet e zhvilluara në Tiranë dhe Durrës, lideri i opozitës Sali Berisha i ka hipur avionit dhe është nisur për Bruksel. Për dy ditë rresht, kryetari i demokratëve do të marrë pjesë në mbledhjen e radhës së byrosë politike të Partive Popullore Europiane. Zyrtarë të lartë të Partisë Demokratike deklaruan dje për “Shekullin” se gjatë kësaj mbledhjeje Berisha do të shfrytëzojë mundësinë që të evidentojë para pjesëmarrësve edhe manipulimin që, sipas tij, u bë në zgjedhjet e 12 Tetorit në qytetin e Tiranës dhe Durrësit. Evidentimi i parregullsive nga kryetari demokrat kësaj here do të shërbejë edhe për një arsye tjetër jo pak të vlefshme për vetë PD. Pak muaj më parë, Partia Demokratike u anëtarësua në Partitë Popullore Europiane me kushtin që ajo të njihte rezultatin e zgjedhjeve të 12 Tetorit. Për rrjedhojë, Berisha pritet të faktojë arsyet se pse partia që ai kryeson nuk do të njohë rezultatin në qytetin e Tiranës dhe Durrësit. Kreu i PD-së gjatë punimve të byrosë do të njohë aleatët e tij politikë perëndimorë me parregullsitë, sipas tij, që pati në listat e zgjedhësve. Berisha kërkon që të sensibilizojë një pjesë të rëndësishme të tyre, që janë edhe në pushtet në disa shtete evropiane me qëllim që në deklaratat e Komisionit Evropian dhe Parlamentit Evropian të evidentohen parregullsitë e zgjedhjeve në dy qytetet kryesore, Tiranë dhe Durrës. Para largimit të tij për në Bruksel, Berisha ka mbledhur sekretariatin e Partisë Demokratike. Takimi i menjëhershëm i tij u zhvillua pas deklaratës së Misionit të Vëzhguesve Ndërkombëtarë për Zgjedhjet. Mësohet se gjatë takimit, Berisha ka porositur lidershipin demokrat për të bërë gati të gjitha provat dhe për t’ia servirur më pas përfaqësuesve ndërkombëtarë. Madje pak orë para largimit të tij nga Shqipëria, Berisha ka zhvilluar edhe një sërë takimesh me përfaqësues të ndërkombëtarëve dhe e gjitha kjo ka përfshirë një hark kohor prej 60 minutash. Me largimin e tij, stafeta e evidentimit të asaj që ata e cilësojnë parregullsi në zgjedhje, do t’i kalojë zyrtarëve të lartë të PD të cilët pritet të zbardhin “faktet” e tyre jo vetëm në takimet me ndërkombëtarët por edhe në deklaratat që ata do të japin për median.

Mbledhje e KQZ (arkiv)

Faqja 4 - SPECIALE/ZGJEDHJE

Tetor 15, 2003

INTERVISTE/ FLET PREZANTUESJA E NJOHUR

Rudina: E ndjeja fitoren e Edit

Magjistari rrëfen emocionet e ditës së votimit

Rezarta Delisula

TIRANE

Edhe pse ka natyrë të brishtë dhe emocionale, si për çudi nuk ka ndjerë asnjë lloj frike apo ndjenje negative ditën e zgjedhjeve lokale të 12 tetorit. Përplasja mes avokat Ngjelës dhe Edi Ramës, me të cilin ajo bashkëjeton prej disa vitesh, nuk i ka krijuar absolutisht panik, madje e qetë ajo ka pritur fitoren e ditur të kryebashkiakut aktual të cilin e cilëson si njeriun e punës. Dashuria e tyre ka nisur disa vjet më parë, ndërsa para disa kohësh Edi Rama dhe Rudina Magjistari kanë vendosur të jetojnë bashkë. Ata kanë marrë një shtëpi me qira, 1 dhomë e 1 kuzhinë në Rrugën e Elbasanit, pranë ish-trikotazhit. Apartamenti i tyre është i vjetër, megjithatë brenda është sistemuar me shije. Kryebashkiaku Rama e kalon thuajse gjithë ditën, herë-herë edhe disa orë të natës, në tryezën e zyrës së tij që është e mbingarkuar me punët e Tiranës së madhe, ndërsa nga ana tjetër Rudina e mbështet dhe e ndihmon duke e lënë njeriun më të afërt të saj të qetë për të realizuar detyrat që ka marrë përsipër. Me buzëqeshjen e saj që e shoqëron thuajse në çdo moment dhe veshjen kazuale, Rudina ka qëndruar deri rreth orës 3 të mëngjesit të 13 shtatorit në çadrën elektorale të Ramës te Liqeni duke diskutuar mes miqsh. Rudina Magjistari, një nga prezantueset më të njohura të spektakleve, rrëfen për Gazetën Shqiptare momentet e shpalljes së fitores së Tiranës nga Edi Rama.

Gjatë ditës së 12 tetorit kur nisën zgjedhjet lokale ju kishit frikë nga rezultati i votimit?
"Të jem e sinqertë nuk kisha aspak emocion pasi puna që bëhet paguhet dhe në këtë rast paguhet me votë. Unë nuk po i bëj reklamë punës së Edi Ramës, pasi ajo s'ka nevojë për reklamim, por edhe unë, si të gjithë qytetarët e tjerë, i kemi ndjerë ndryshimet që janë bërë në qytetin tonë".

Si ndjeheni pas fitores së dytë të Edi Ramës në garën për Bashkinë së Tiranës?
"Ndjehem shumë e lumtur dhe e kënaqur për dy arsye."

E cilat janë këto arsye?
"Jam shumë e kënaqur, në radhë të parë, për të gjithë qytetin e Tiranës, ndërsa në radhë të dytë për përgjigjen përfundimtare që iu dha opozitës pas gjithë asaj lufte të ulët që bëri për të marrë pushtetin".

Keni qenë pranë tij në momentin kur u dha rezultati i votimit?
"Sigurisht i që kam qëndruar pranë, megjithatë nuk kam qenë e vetme pasi rreth tij ishin jo vetëm shokët e miqtë, por edhe shumë qytetarë që prisnin rezultatin e fitores së Edi Ramës në Tiranë".

Si e shihni Tiranën në tri vitet e ardhshme?
"E shoh më të qytetëruar dhe më pranë ëndrrës për të qenë një qytet europian."

Rama falënderon punonjësit për punën e këtyre tre viteve

TIRANE - Kryebashkiaku Rama ka rifilluar pas mandatiti të tij të parë punën në Bashkinë e Tiranës. Edhe tre vjet të tjera Edi Rama do të drejtojë institucionin qeverisës të kryeqytetit. Puna vazhdoi normalisht në bashki, ndërsa punonjësit e saj nuk ngurronin të uronin kryebashkiakun për fitoren e 12 tetorit. Nga ana tjetër, ishte kryetari Edi Rama ai që falënderoi punëtorët e Bashkisë për punën shumë efikase që kanë bërë në tre vjetët e para të mandatit të tij, ndërsa u ka kërkuar të njëjtin përkushtim për tre vjetët e tjerë në drejtim të qytetit të Tiranës. Shumica e punonjësve të bashkisë në kafet e shkurtra mes punës nuk diskutonin gjë tjetër veçse procesin zgjedhor të 12 tetorit dhe garën, në dukje të vështirë, mes rivalëve Rama-Ngjela, por që sipas rezultatit doli se kishte qenë një "luftë" shumë e lehtë për kryebashkiakun e Tiranës.