16102003kosovo

Fjala e Kryetarit të Kosovës, Ibrahim Rugova në takimin e Vjenës

Vjenë, Austri, më 14 tetor 2003

I nderuari kancelar Schüsel,

I nderuari PSSP Holkeri,

I nderuari sekretar i përgjithshëm lord Robertson,

I nderuari kryesues Scheffer, I nderuari zoti Solana,

I nderuari zoti Patten, I nderuari zoti Rosini,

Të nderuar ambasadorë Ries dhe Montgomeri,

E përshëndes hapjen e këtij takimi në Vjenë, të rëndësishëm për vendin tim dhe për rajonin e Evropës Juglindore si dhe për BEnë, NATO-n dhe SHBA-në.

Në fillim dëshiroj të flas shkurt për progresin që ka arritur Kosova gjatë katër vjetëve pas luftës, në liri. Kosova ka bërë një progres të madh në të gjitha fushat e jetës.

Gjendja e sigurisë publike është më e mirë. Policia e Kosovës është forcuar dhe kemi filluar specializimin e saj. Kështu policia e Kosovës bashkë me policinë e UNMIK-ut dhe me KFOR-in/NATO-n bën sigurinë e vendit. Në të njëjtën kohë është në vendosje e sipër rendi dhe ligji. Gjykatat në të gjitha nivelet po veprojnë deri te Gjykata Supreme e Kosovës.

Do theksuar se Kosova ka pasur progres të mirë edhe në ndërtimin e demokracisë. Gjatë vitit të kaluar u mbajtën zgjedhjet e dyta lokale me mandat katërvjeçar. Qe një vit e gjysmë funksionojnë institucionet qendrore: Parlamenti, Qeveria dhe presidenti i Kosovës, në bazë të zgjedhjeve nacionale të vitit 2001. Parlamenti i Kosovës ka miratuar me dhjetëra ligje në të gjitha fushat e jetës për të gjithë qytetarët e Kosovës.

Një progres të shquar kemi pasur edhe në integrimin e grupeve etnike, apo të minoriteteve. Sot të gjitha minoritetet marrin pjesë aktive në të gjitha institucionet e Kosovës, në nivel qendror dhe atë lokal. Në Parlament dhe në Qeveri kemi vende të rezervuara për minoritetet. Kështu në Parlament, nga 120 vende, 20 janë të rezervuara për minoritetet, plus vendet e fituara me votë. Në Qeveri e cila ka 10 ministri, dy ministra janë nga minoritetet. Ky është një progres në planin e integrimit administrativ. Duhet thënë se përditë e më shumë shoqëria e Kosovës po bëhet më e integruar.

Do të punojmë më shumë në planin e komunikimit midis shumicës shqiptare dhe minoritetet siç janë serbët, boshnjakët, turqit, goranët, romët, ashkalinjtë dhe egjiptianët. Pra, duhet të punojmë më intensivisht në fushën e pajtimit dhe të mirëkuptimit të të gjithë kosovarëve, proces të cilin e kemi filluar.

Po ashtu në planin e kthimit të refugjatëve kemi shënuar progres. Janë kthyer mbi 7.000 njerëz të grupeve minoritare, kryesisht serbë. Të gjitha institucionet e Kosovës janë përcaktuar për një kthim individual të të gjithë atyre që dëshirojnë të jetojnë në Kosovë. Nga shumica shqiptare, qindra mijë njerëz vazhdojnë të qëndrojnë në Evropë dhe në SHBA, sepse nuk mund të kthehen për shkak të gjendjes sociale e ekonomike të Kosovës. Unë e them se pas luftës, tash në Kosovë, të gjithë jemi më pak.

Me këtë rast do thënë se edhe në fushën e ekonomisë kemi pasur progres. Sektori privat është mjaft i fuqishëm e dinamik. Kosovarët janë popull ndërmarrës. Vetëm një fakt, 95 për qind të buxhetit Kosova e ka bërë nga të hyrat e veta.

Objektivat e institucioneve shtetërore të Kosovës janë: zhvillimi ekonomik, tërheqja e investimeve dhe krijimi i vendeve të punës për të rinjtë. Këto ditë kemi filluar privatizimin së bashku me UNMIK-un si proces pozitiv ekonomik. Mund të themi se Kosova po hyn në fazën e një jete normale të një vendi.

Zonja dhe zotërinj,

Është politikë nacionale e Kosovës të ndërtojë marrëdhënie të mira me të gjithë fqinjët e saj. Mund të themi se edhe në këtë fushë kemi pasur progres. Kështu me Shqipërinë kemi marrëdhënie të mira, me Republikën e Maqedonisë kemi filluar një progres si dhe me Malin e Zi. Sot jemi tubuar në Vjenë që të fillojmë një proces të marrëdhënieve pozitive fqinjësore me Serbinë në disa fusha praktike me interes për të dy vendet dhe për rajonin e Evropës Juglindore. Për fillim kemi pranuar të bisedojmë për bashkëpunim në fushën e energjisë, që është problem për gjithë rajonin e Evropës Juglindore, pastaj çështjen e të zhdukurve nga lufta që krijon shqetësime të vazhdueshme, për çështjen e kthimit të refugjatëve në baza individuale të atyre që dëshirojnë të jetojnë në Kosovë, si dhe për çështje të transportit dhe të telekomunikacionit, që është me rëndësi për të dy vendet dhe për rajonin. Me këtë rast do të themelohen grupe punuese, të cilat do të prodhojnë marrëveshje në nivel të dy vendeve.

Sot këtu, në Vjenë jemi takuar për të biseduar për disa çështje praktike midis dy vendeve, Serbisë dhe Kosovës. Dëshiroj të theksoj se është pozitive se të gjitha vendet e rajonit të Evropës Juglindore aspirojnë për integrim në BE dhe në NATO. Këtë e aspiron dhe po përgatitet edhe vendi im Kosova. Pra, një Kosovë demokratike, paqësore e pavarur dhe e integruar në BE e në NATO dhe në miqësi permanente me SHBA-në. Ky aspirim është në të mirë të qytetarëve të Kosovës dhe do ta qetësonte rajonin e Evropës Juglindore. Kosova është e gatshme t’i pranojë obligimet ndërkombëtare.

Zonja dhe zotërinj,

Do të përdor autoritetin tim së bashku me PSSP-në, zotin Holkeri, që në bisedat rreth çështjeve praktike të involvohen strukturat qeveritare të Kosovës.

Ndërsa gjendemi në këtë takim, dëshiroj të theksoj se e kaluara nuk bën të harrohet, sepse mund të përsëritet në forma më të këqija, por duhet të shikojmë kah e ardhmja. Shpresoj se një ditë Serbia do të kërkojë falje për masakrat e luftës në Kosovë, që do t’i lehtësonte marrëdhëniet midis dy vendeve dhe dy popujve.

Nga ky takim i Vjenës, e përshëndesim presidentin Bush, kryeministrin Blair, presidentin Chirac, kancelarin Schröder dhe kryeministrin Berlusconi.

Përshëndetje të veçantë i bëjmë Atit të Shenjtë Papa Gjon Pali II, që gjithmonë lutet për Kosovën dhe paqen e popujve.

Me këtë rast e falënderoj zotin Holkeri që ka punuar shumë për realizimin e këtij takimi. Po ashtu e falënderoj presidentin Klestil, kancelarin Schüsel dhe Qeverinë austriake për mikpritjen, ashtu siç di Vjena ta bëjë këtë.

Ju faleminderit,

Dr. Ibrahim Rugova, president i Kosovës

16.10.2003
Nuk jemi aq të rrezikuar sa të japim dorëheqje, thotë kryeministri

Qeveria pret kërkesën e UNMIK-ut për udhëheqjen e grupeve punuese në bisedimet me Beogradin

FORTUNA HAXHIKADRIA
PRISHTINË, 15 TETOR - Kryeministri i Kosovës, Bajram Rexhepi, një ditë pas takimit të mbajtur në Vjenë, ka thënë se pozita e tij nuk është rrezikuar sa të japë dorëheqje. Rexhepi pas takimit që ka pasur me kabinetin e tij, të mërkurën, deklaroi se fakti i mbajtjes së takimit të rregullt të qeverisë dhe i bisedave të bëra dëshmon se qeveria qëndron prapë në ato baza unike dhe se do të vazhdojë me prioritetet e saj. “Nuk mendoj se jemi aq të rrezikuar që të vijë deri te dorëheqja apo jo. Këtë tregon fakti se sot në mbledhjen e qeverisë, me gjithë opinionet pak të ndryshme në lidhje me takimin e Vjenës, ne qëndruam prapë në ato baza unike. Dua të përsëris edhe njëherë se prioritetet e qeverisë janë diçka tjetër dhe ne do të vazhdojmë me këto prioritete. Asnjëherë nuk e kemi injoruar dialogun, por kemi pasur kërkesat tona. Kam respektuar gjithnjë vijën institucionale dhe do të vazhdojë kësisoj”, tha Rexhepi. Kryeministri i Kosovës do të ketë një takim pune me kryeadminsitratorin e Kosovës, ku pritet të bisedojë për hapat që do të merren në fazat e ardhshme të bisedimeve të hapura në Vjenë. Rexhepi ka thënë se çështja e bisedimeve me Beogradin duhet ndarë në atë, siç e quan ai, pjesë ceremoniale, që tashmë ka përfunduar, si dhe në atë të grupeve punuese për çështje praktike. Kryeministri i Kosovës thotë se e pret kërkesën e UNNMIK-ut për të udhëhequr grupet punuese në punën e tyre. “Së pari të marrim kërkesë nga UNMIK-u dhe pastaj aty janë dy mundësi: roli aktiv i qeverisë që të udhëheq këto grupe apo nëse udhëheqen nga UNMIK-u, atëherë mund të jenë në nivelin e lartë të grupeve punuese siç kanë qenë më parë...”, tha Rexhepi me besimin se në prioritetet e ardhshme të vendit do të ketë përkrahjen edhe të kryeadministratorit. Në takimin e rregullt të Qeverisë sërish është folur për strategjinë e politikës legjislative të qeverisë për periudhën dhjetor 2003\2004. Në mungesë të ministrave përkatës, për shkak të një udhëtimi jashtë vendit, është shtyrë shqyrtimi i materialit mbi strategjinë e zhvillimit ekonomik të Kosovës si dhe projektligji për tregtinë e naftës dhe derivateve të saj. Qeveria ka miratuar projektin “Gjuha dhe kompjuteri”, që kohë më parë është dorëzuar nga disa ekspertë si dhe ka miratuar projektligjin për transportin rrugor që do t’i dorëzohet Kuvendit. Për shkak të disa vërejtjeve të bëra nga Ministri i Ekonomisë dhe i Financave është kthyer në rishqyrtim projektligji për Odën Ekonomike.