18062003pll

Partitë e vogla ankohen tek SHBA

TIRANE- Drejtues të partive të vogla, Spahiu, Shehi dhe Dule u takuan dje me përfaqësues të Ambasadës Amerikane për Kodin Zgjedhor. Pas takimit dy orësh me shefin e politikës së Ambasadës Amerikane, kryelegalisti Eqerem Spahia deklaroi se gjatë takimit u diskutua për mangësitë që partitë e vogla kishin lidhur me projektligjin e përgatitur nga PD dhe PS. “Ne diskutuam nen për nen për të gjitha ato mangësi që kemi vënë re në projektligjin e përgatitur nga PS dhe PD jashtë komisionit të posaçëm parlamentar të posaçëm pozitë –opozitë”, -tha dje Spahia. Takimi i djeshëm ka qenë thjesht konsultativ me përfaqësuesin e lartë të Ambasadës Amerikane. Edhe Spahia pranoi dje se ndërkombëtarët nuk mund të ndërhyjnë në këtë çështje përveçse të vihen në dijeni. “Ata janë në pritje të ambasadorit dhe ne do të marrim kontakte edhe me ambasadorin e OSBE-së. Normalisht ata vetëm sugjerojnë, nuk urdhërojnë, sepse ne jemi një shtet sovran. Të drejtën e kemi ne, pra 9 partitë parlamentare, ndërsa votën e kanë PS dhe PD. Edhe ata janë mjaft të shqetësuar me sensibilizimin publik, mediatik, diplomatik, dhe aq më tepër të gjithë drejtuesit e institucioneve më të larta të shtetit janë vënë në lëvizje e sipër që të gjejnë gjuhën e mirëkuptimit dhe një konsensus më të gjërë”, -tha dje Spahia. Ndërkohë ditën e enjte pritet që të miratohet Kodi Elektoral me shumicën parlamentare pavarësisht kontestimeve të partive të vogla.
N.Perndoj