20062003pll

Kontradiktat për Kodin Zgjedhor në “BF” çojnë drejt shpërbërjes koalicionin opozitar

Rroqi: “Ne dhe legalistët po diskutojmë me strukturat mundësinë e krijimit të një tjetër koalicioni”

Nevila Perndoj
TIRANE- Kontradiktat e ashpra për Kodin e ri Zgjedhor duket se do të çojnë në një shpërbërje të grupimit politik “Bashkimi për Fitore”. Aleatët e kryetarit të demokratëve Berisha priten të rigrupohen në një tjetër koalicion pa praninë e partisë më të madhe opozitare, PD. Kjo iniciativë që pritet të konkretizohet në prag të zgjedhjeve të ardhshme lokale është konfirmuar dje për “Shekullin” nga kryetari i PBK-së, Shpëtim Rroqi. “Ne dhe legalistët po diskutojmë me strukturat bazë mundësinë e krijimit të një tjetër koalicioni me një dokument të përbashkët që do të depozitohet në KQZ në prag të zgjedhjeve të ardhshme lokale”, -tha dje Rroqi.
Një hap i tillë është konfirmuar edhe nga kryelegalisti Eqerem Spahia. Në një prononcim të shkurtër për “Shekullin”, Spahia është shprehur se baza po këmbëngul në krijimin e një koalicioni vetëm me ballistët si të vetmet parti nacionaliste në vend. Arsyeja kryesore e shkëputjes së mundshme të partive të vogla nga koalicioni “BF” lidhet me përjashtimin, sipas tyre, të komisionerëve të tyre nga komisionet zonale dhe ato të qendrave të votimit. Sipas Kodit Zgjedhor, opozita do të ketë tre vende në komisionet e zonave të qendrave të votimit, 2 prej të cilëve janë nga PD dhe një nga PDr, ndërsa në gjysmën e tyre edhe një i katërt do të jetë nga PD. “Nuk mund të bëhet më fjalë për koalicion, kur ai që quhet aleat përpiqet që të ekzekutojë politikisht. Ai nuk mund të quhet më aleat. Pra nuk mund të vihet fare më në diskutim funksionimi i koalicionit dhe kështu është edhe për PLL apo edhe për ndonjë parti tjetër”, -tha Rroqi. Kryetari i ballistëve avancoi me qëndrimin e tij duke shtuar se në momentin që projektkodi do të miratohet nga Kuvendi atëherë koalicioni “Bashkimi për Fitore” do të jetë i prishur. Kryetari i ballistëve u shpreh se ai nuk mund të ndihet i joshur as nga ofertat e liderit të opozitës Sali Berisha për lënien e disa komunave dhe bashkive partive të vogla në zgjedhjet e ardhshme. “Deklaratat e liderit të opozitës, Sali Berisha, për komuna dhe bashki nuk mund të na joshin ne si parti, sepse ky projektkod ne na nxjerr jashtë ligjit, pra ne na nxjerr nga kontrolli i votës, çka do të thotë “varja ujkut mëlçitë në qafë” dhe të kesh shpresa edhe se si të mbijetosh”, -tha ai. Kundërshtitë e partive të vogla pozitë- opozitë erdhën fill pas marrëveshjes së dytë të nënshkruar në zyrat e OSBE-së mes dy ish-bashkëkryetarëve të komisionit bipartizan, Et’hem Ruka dhe Jemin Gjana. Partitë e vogla kundërshtojnë përjashtimin e tyre nga përbërja e komisioneve si dhe e cilësojnë jo të mbyllur çështjen e kandidatëve të pavarur. “Mënyra se si u bë marrëveshja PS-PD sigurisht që nuk lë më shteg për aleanca dhe për sinqeritete”, -shtoi Rroqi. Edhe pas paralajmërimit të partive të vogla, zyrtarë të lartë të PD-së janë shprehur se koalicioni vazhdon të funksionojë pavarësisht se partitë e vogla kanë kohë që nuk mblidhen në zyrën e kryetarit të demokratëve, Sali Berisha.

PD: "Kodi Zgjedhor" nuk do të përçajë opozitën

Drejtuesit e PD-së theksojnë se me "Kodin e ri Zgjedhor" nuk kërkojnë përçarje me partitë e vogla

"Nuk mund të perceptojmë që çështja e "Kodit Zgjedhor" të mund të krijojë përçarje, pasi ky "Kod" nuk cënon në mënyrë absolute interesin e asnjë partie të vogël. Ai mund të ketë cënuar diçka nga interesat e partive të mëdha, por në përgjithësi, i shërben interesave të vendit"

Një ditë më parë, shefi i opozitës ka mohuar çdo mundësi që çështja e "Kodit Zgjedhor" të përçajë koalicionin e djathtë, duke deklaruar se qëndrimi i opozitës në parlament është unik dhe i qëndrueshëm. Ai ka theksuar, se "ju e shihni se opozita në parlament është e bashkuar. Për këtë keni dëgjuar edhe diskutimet e djeshme, që tregojnë se opozita nga ana politike është e bashkuar. Edhe në zgjedhjet e tetorit, opozita do të jetë edhe më e bashkuar, dhe për këtë jam optimist, u shpreh ai. Unë nuk mund të perceptoj se çështja e "Kodit Zgjedhor" të mund të krijojë përçarje, pasi ky "Kod" nuk cënon në mënyrë absolute interesin e asnjë partie të vogël. Ai mund të ketë cënuar diçka nga interesat e partive të mëdha, por në përgjithësi, mendoj se i shërben interesave të vendit", deklaroi Berisha. I pyetur nga gazetarët, kryetari i Partisë Demokratike pohoi se kishte bërë këto ditë edhe një takim me zotin Pollo. "Megjithatë, u shpreh Berisha, ka një ekip të krijuar nga Partia Demokratike të ngarkuar për zhvillimin e negociatave, duke shprehur dëshirën që edhe partia e Pollos të krijonte një ekip të sajin për negociatat e radhës, duke shprehur gatishmërinë e PD‑së për këto negociata". Ndërsa bashkëkryetari demokrat i komisionit dypalësh për Reformën Zgjedhore, z.Gjana, është shprehur per partitë aleate se projektkodi i ri elektoral, i miratuar tashmë dhe nga komisioni parlamentar i Ligjeve, u shërben të gjitha forcave politike pjesëmarrëse në një proces votimi. "Presioni i partive të vogla ka ardhur duke rënë, sa më shumë që ata janë njohur me të gjitha detajet e "Kodit Elektoral" dhe besoj se, gradualisht po krijohet edhe mirëkuptimi i tyre, se asgjë nuk është bërë në fshehtësi dhe asnjë pazar nuk është bërë në kurriz të partive të vogla". Ndërkohë rënia e presionit të të vegjëlve është konstatuar edhe pas takimit që kryetari i PLL, Eqerem Spahiu, dhe kreut të PBDNJ‑së Dule, që patën me përfaqësuesin politik të ambasadës së SHBA-ve në Tiranë. Kreu i PLL pohoi pas këtij takimi se, ndërkombëtarët nuk mund të ndërhyjnë në problemet tona të brendshme, veçse duke bërë sugjerime. Edhe republikanët janë treguar më të përmbajtur lidhur me deklarimet e tyre. Pas miratimit të ndryshimeve të "Kodit Zgjedhor" në komisionin parlamentar të Ligjeve, kryetari i PR‑së është shprehur se shqetësimi i tij është për të djathtën në përgjithësi. Kjo sipas tij, për faktin se sistemi mazhoritar, ose sistemi aktual me një raund do të krijonte premisa për manipulim dhe interferim të njerëzve të krimit të lidhur me struktura shtetërore. Për kryeparlamentarin Mediu, të paktën ky. Tashmë pritet që "Kodi i ri Zgjedhor" të miratohet nga Kuvendi, ku konsensusi i dy partive të mëdha garanton 84 votat e parlamentarëve, të domosdoshme për miratimin e këtij ligji të rëndësishëm.

e.gj

Copyright 1999 Zeri i popullit http://www.zeripopullit.com/

Berisha, në prag të zgjedhjeve i vetëm, s’arrin të krijojë koalicione

TIRANE- Berisha dështon në përpjekjet e tij për një koalicion të gjërë të së djathtës shqiptare. Partitë e vogla të të gjithë spektrit politik shqiptar, janë në zenithin e reagimeve kundër Berishës, duke e akuzuar atë se po denigron të djathtën shqiptare dhe se po përpqet të varrisë partitë e vogla të djathta shqiptare. Akuzat janë formuluar jo vetëm nëpër tryezat e organizuara nga këto parti të djathta, por janë artikuluar edhe në mënyrë nominale. Në këtë mënyrë kryetari i PR, Mediu, Kryetari i PLL, Spahia, kryetari i PBK, Roqi, kanë reaguar ashpër ndaj Berishës duke e cilësuar si shkaktarin kryesor të rrënimit të këtyre partive. Ana formale e akuzave të liderëve të këtyre partive të vogla të djathta ndaj Berishës është fakti se Berisha ka qënë personi që ka kërkuar me këmbëngulje ndryshimin e Kodit Zgjedhor. Por arësyeja e vërtetë është se Berisha që në momentin kur nënshkroi me partitë e vogla memoranduminin e bashkëpunimit, duke i përmbledhur këto parti në koalicionin BF, daljen me lista të përbashkëta zgjedhore me të gjitha këto parti, realizoi faktikisht ëndrën e tij të kahershme të shkrirjes së të gjithë partive të djathta shqiptare. Realisht të gjitha këto parti që përpara zgjedhjeve të vitit 2001 nuk kanë të ngritura në këmbë asnjë strukturë, dhe jeta partiake në të gjithë vendin ka pushuar së ekzistuari. Në këto kushte Berisha hodhi idenë e bashkimit të këtyre partive me PD. Ndërkohë që aleatët e Berishës tashmë po përshpejtojhnë të realizojnë organizimin e strukturave të partive të tyre, duke dalë jashtë koalicionit me Berishën. Ndërkohë që PDr e udhëhequr nga Pollo më se një herë ka shprehur qëndrimine saj për të dalë e vetme në zgjedhje duke refuzuar në këtë mënyrë dorën e shtrirë të Berishës për koalicion me Pollon. Në këtë mënyrë partitë e vogla të djathta të opzozitës jo vetëm që kanë refuzuar koalicionin me Berishën, por njëkohësisht dhe ajo që është më e keqja e kanë degjeneruar liderin e PD në të gjitha ambasadat e vendeve perendimore të akredituara në Shqipëri, duke e paraqitur atë si njeriun që po përpiqet të shkatërrojë të djathtën shqiptare dhe partitë e djathta shqiptare. rasti më flagrant ka qënë takimi më i fundit që kryetari i PLL, Spahija që ka bërë në ambasadën e SHBA në Tiranë. /S.V