20/11/2003 shekulli

Miratohet në parim nga komisioni i Ligjeve dhe Ekonomisë drafti i OSBE-së

Pronat, kompensimi financiar 4 miliardë $

Çeku: Se si do të paguhet një shifër kaq e madhe sa ç’është krejt buxheti i shtetit”

Nevila Përndoj

TIRANE - Kostoja e pronave të pakthyeshme ish-pronarëve të ligjshëm është 4 miliardë dollarë. Kjo është shifra që deklaroi dje deputeti republikan Robert Çeku pas mbledhjes së komisioneve parlamentare të Ekonomisë, Bujqësisë e Ushqimit dhe ai i Ligjeve. Deputetë të tre komisioneve të mbledhur dje në një tryezë të përbashkët, ranë dakord për miratimin në parim të draftit të OSBE-së për kthimin dhe kompensimin e pronave, pronarëve të ligjshëm. Ndërsa deputetët legalistë dhe republikanë e kanë kundërshtuar drafin në fjalë duke kërkuar nga qeveria shqiptare faturën financiare mbi kompensimet e pronarëve për pronat e pakthyeshme. Madje deputeti republikan i komisionit të Ekonomisë, Robert Çeku nuk ka hezituar që të japë edhe shifrën e saktë të faturës financiare që shkon në miliarda dollarë. “Materiali që shoqëron projektligjin, pasqyron edhe kostot financiare që kapin një vlerë të përafërt rreth 4 miliardë dollarë amerikanë. Në këto rrethana unë ngrita çështjen se si do të paguhet një shifër kaq e madhe sa ç’është krejt buxheti i shtetit”, -tha dje Çeku. Të njëjtin qëndrim mbajti dje edhe deputeti tjetër republikan, Fatmir Mediu. Ndërsa kryetari i komisionit të Ekonomisë Ylli Bufi deklaroi se është ende herët për të llogaritur koston e pronave të pakthyeshme. Drafti i hartuar nga grupi i ekspertëve të OSBE-së, parashikon që, "pronat që për arsye të caktuara nuk mund të kthehen, do të kompensohen fizikisht ose me mjete të tjera ekonomike dhe financiare". Për këtë çështje, gjatë mbledhjes, kryetari i komisionit të Ekonomisë Ylli Bufi deklaroi se, "nga disa shifra paraprake të Ministrisë së Bujqësisë dhe Ushqimit del se rreth 60-70 për qind e kërkesave të bëra nga ish-pronarët për kthimin e pronave, janë të mundshme për t'u kompensuar". Ndërsa pika më e rëndësishme dhe më e diskutueshme e këtij projektligji mbetet kompensimi financiar i ish-pronarëve "Në projektligj është parashikuar qartë që zgjidhja financiare do të realizohet me një fond të posaçëm nga buxheti i shtetit dhe nga transaksionet e tjera që do të ndjekin procesin e madh të kthimit të pronave", -tha Bufi. Ai shtoi se "çështja e saktësimit të burimeve që do të përbëjnë kompensimin financiar, do të jetë një nga debatet kryesore në komisionet parlamentare", -tha Bufi.