Gazmend Janku

TIRANE

Sapo kanë dalë nga dera e burgut 313, kanë hipur në një fuoristradë tip BMW, duke shmangur interesimin e mediave. Fuoristrada luksoze përpara derës së burgut ka tërhequr vëmendjen edhe të dhjetëra kalimtarëve të rastit, kurioziteti i të cilëve i ka detyruar të presin, së bashku me gazetarët, daljen e dy krerëve të deklaruar të Armatës Kombëtare Shqiptare (AKSH). Pasi janë takuar dhe përqafuar me dhjetëra familjarë dhe të afërm të tyre, me mirësjellje Gafurr Adili dhe Taip Mustafaj u kanë premtuar gazetarëve një konferencë për shtyp në ditët në vazhdim. Nëpërmjet kësaj deklarate dy të akuzuarit për "nxitje të urrejtjes midis kombësive, racave dhe feve" lanë të kuptohet se të paktën edhe për disa ditë do të qëndrojnë në Tiranë. Kjo ka qenë atmosfera përpara burgut të sigurisë së lartë 313, ndërkohë që pritej vendimi i Gjykatës së Tiranës për lirimin e Adilit dhe Mustafajt. Është fakt që procesi gjyqësor në ngarkim të tyre është për t'u pasur zili, përsa i përket kohëzgjatjes dhe zgjidhjes së shpejtë të çështjes gjyqësore. Ka mjaftuar vetëm një seancë e vetme për të mësuar pretencën e organit të akuzës, konkluzionet përfundimtare të mbrojtjes dhe vendimin përfundimtar të trupit gjykues. Në pretencën e tij prokurori i çështjes kërkoi shpalljen fajtor të dy të pandehurve dhe dënimin e tyre me nga 10 muaj e 15 ditë burgim, ndërsa avokatët mbrojtës kërkuan pafajësi për klientët e tyre. Në vendimin përfundimtar gjyqtari Fehmi Petku shpalli fajtor të pandehurin Gafurr Adili për akuzat e nxitjes së urrejtjes midis kombësive, racave dhe feve dhe falsifikimit të dokumenteve, duke e dënuar me 10 muaj e 15 ditë burgim. Për shkak të aplikimit të gjykimit të shkurtuar, Adilit i është zbritur 1/3 e dënimit, duke u liruar nga salla e gjyqit me kohën e paraburgimit (7 muaj). Ndërsa i pandehuri tjetër Taip Mustafaj u shpall i pafajshëm për akuzën e nxitjes së urrejtjes midis kombeve, racave dhe feve. Ndërkaq, dosja ndaj të pandehurit të tretë të kësaj çështjeje, Idajet Beqirit, është veçuar për t'u gjykuar me vete.

"Truri politik i AKSH-së u themelua te Pallati i Kongreseve"

Fronti për Bashkimin Kombëtar Shqiptar (FBKSH), që njihet si truri politik i formacionit lufatrak AKSH, është themeluar më 12 korrik 2001 te Pallati i Kongreseve në Tiranë, ku Gafurr Adili është zgjedhur kryetar. Fronti në fjalë është krijuar si një grupim forcash politike, shoqatash joqeveritare, intelektualësh atdhetarë etj., që ka si pikësynim bashkimin e trojeve dhe popullit shqiptar në një shtet të vetëm autokton. Sipas fjalës së mbrojtjes së Adilit në Gjykatën e Tiranës, "FBKSH nuk është një organizatë ilegale, siç thuhet nga disa dashakeqës të çështjes kombëtare, por një domosdoshmëri e kohës". Adili deklaron se 60% e platformës së FBKSH-ës është huazuar nga platforma e bashkimit kombëtar të Akademisë së Shkencave të Shqipërisë.