Gazeta55

24/06/2003

http://www.gazeta55.com/ 

PLL: Do t'i kërkojmë presidentit të mos shpallë ligjin për "Kodin Zgjedhor"

PD thekson se, në asnjë nen të "Kodit" nuk është cënuar interesi i partive të vogla dhe se nuk konsiderohen të vogla, por aleatë të çmuar

Partitë e vogla këmbëngulin në idene e tyre se, me kodin e ri elektoral u janë shkelur të drejtat dhe është abuzuar me ta. Pas një sërë deklarimesh të bera në publik dhe mbledhjes së 29 firmave per te ankimuar në Gjykatën Kushtetuese, tashmë nëntë partitë e vogla, duke akuzuar PD-në dhe PS-në kanë vendosur t'i drejtohen presidentit të Republikës. Kryetari legalist Spahia, është shprehur se "kryetari i Kuvendit z.Servet Pëllumbi, nën diktatin e deputetëve të PS-së dhe PD-së, shkeli të gjitha procedurat parlamentare të kalimit të një projektligji në një seancë plenare dhe në mënyrë të dhunshme, u përdorën kartonat e deputetëve për miratimin e "Kodit Zgjedhor". Por ky miratim i dhunshëm, nuk është një përmbushje e kushtit të BE-së për reformën zgjedhore, por është një antireformë dhe shënon fillimin e degradimit të proceseve të ardhshme zgjedhore. Sipas legalistëve, miratimi i "Kodit Zgjedhor" PS‑PD që nuk garanton votën e lirë të shqiptarëve, pikërisht në ditën e fillimit të Samitit të Selanikut, është një ogur jo i mirë për Shqipërinë, për mos me thënë, një goditje për rrugën e integrimit të Shqipërisë në Bashkimin Europian. Prandaj, PLL i kërkon publikisht kreut të shtetit shqiptar z.Alfred Moisiu, të mos e shpallë ligjin për "Kodin Zgjedhor", por ta kthejë atë për rishqyrtim në Kuvend".

Por lidhur me këto deklarata, shefi i opozitës është shprehur se  "desha të përgezoj punën e komisionit dypalësh dhe anëtarët e  komisionit për punen e  bërë. Jam i vetedijshem se disa nga aleatët tanë, shton Berisha, janë ndare zemërthyer, por ne do te  vazhdojme dialogun e hapur, në mënyrë që t'i sqarojme se në asnjë nen te tij nuk ështe cenuar interesi i partive te vogla dhe se une nuk i konsideroj parti te vogla, por aleatë te çmuar dhe ne gjithçka e vlerësojme tek besimi dhe vlerësimi ndaj tyre dhe jo mosbesimi dhe keqkuptimet", përfundon Berisha.

e.gj

"Kodi i ri Zgjedhor" përçan parlamentin

Kuvendi miraton "Kodin Zgjedhor", partitë e vogla "kundër"

Sherre dhe debate të ashpra, kanë shoqëruar dy seancat e djeshme të Kuvendit, në të cilat është diskutuar "Kodi i ri Zgjedhor". Përfaqësuesit e partive të vogla politike, të cilat nuk kanë pranuar mënyrën se si është hartuar ky kod, kanë protestuar duke bërë që disa herë, seancat e djeshme të Kuvendit të ndërpriten. Me ndryshimin e "Kodit të ri Zgjedhor" partitë e vogla politike, kanë dalë kundër vendimeve të dy partive të mëdha, të cilat janë marrë me përmirësimin e këtij kodi. Por, megjithë kontestimet e përfaqësuesve të këtyre partive, Kuvendi ka marrë dje pasdite në seancë plenare, shqyrtimin e projektligjit për ndryshimet në "Kodin Zgjedho"r, i parashikuar për diskutim gjatë seancës së paradites. Pas debateve të gjata në seancën plenare të paradites, ku partitë e vogla parlamentare kërkuan shtyrjen e shqyrtimit të këtij projektligji, u ra dakord që seanca për këtë çështje të shtyhet për pasditen e djeshme. Partitë e vogla shprehën pretendimin, se "nuk ka qenë koha e mjaftueshme" që këto ndryshime të shqyrtoheshin në komisionet parlamentare. Po ashtu, ato u shprehën kundër propozimeve të dy partive e mëdha, Partisë Socialiste dhe Partisë Demokratike për këtë kod, që sipas tyre, "përjashtojnë partitë e vogla". Përfaqësuesit e partive të vogla politike në parlament, kanë kërkuar që të merren parasysh edhe propozimet e tyre. Por kryetari i Kuvendit, Servet Pëllumbi, bëri të ditur se për shqyrtimin e këtij projektligji, komisionet janë njoftuar në kohë dhe diskutimi për të është parashikuar që të bëhet në mbledhjen e pasdites në seancën parlamentare. Ndërsa kryetari i komisionit parlamentar të Ligjeve, Spartak Braho, vuri në dukje se ky komision e ka miratuar tashmë projektligjin, duke theksuar se ai duhet shqyrtuar po gjatë kësaj seance nga Kuvendi. Lidhur me çështjen e propozimeve të partive të vogla, ai sugjeroi që gjatë shqyrtimit në seancë, ata "të propozojnë riformulime në nenet përkatëse, ose propozimet e tyre". Kryetarë të partive të vogla parlamentare të mazhorancës dhe opozitës, kanë shprehur ditët e fundit shqetësimet e tyre rreth disa ndryshimeve në projektligjin e ri për "Kodin Zgjedhor", të propozuara nga Partia Socialiste dhe Partia Demokratike. Partitë e vogla kundërshtojnë zhvillimin e zgjedhjeve me një raund, që sipas tyre "është një mjet manipulimi i idejuar nga PS". Po ashtu, ata nuk janë dakord edhe me propozimin e PS-së dhe PD-së për përbërjen e komisioneve zgjedhore zonale, ku sipas propozimit, partitë e vogla përfaqësohen në komision vetëm me dy anëtarë, nga 5 që kanë PS dhe PD së bashku.

E. Koçi  

 

 

koha.net   http://www.koha.net/default.asp

 

Bota

23.06.2003 Papa fton boshnjakët t’i kapërcejnë ndarjet etnike Papa Gjon Pali II arriti për vizitë njëditore në Banjallukë të Bosnjës BANJALLUKË, 22 QERSHOR - Papa Gjon Pali II të dielën arriti në vendin më të dëshpëruar të Ballkanit, duke ofruar ndjeshmëri për boshnjakët “e djegur nga vuajtjet” dhe përpjekjet e tyre për t’i kapërcyër ndarjet etnike. I dobësuar nga sëmundja e parkinsonit dhe sëmundja e legenëve dhe e gjunjëve, papa 83-vjeçar nxiti rivalët myslimanë, kroatët katolikë dhe serbët ortodoksë që të gjejnë shpirtrat e tyre, t’i lënë dallimet prapa tyre dhe të krijojnë një shoqëri të përhershme multietnike. Papa Gjon Pali II është mirëpritur nga pjesëtarët serbë, kroatë dhe myslimanë të presedencës së përbashkët të Bosnjës në Aeroportin e Banjallukës, para se të vendoset në karrocën e tij të rrethuar me xhama për “të përshëndetur dhe përqafuar të gjitha ju njerëzit e dashur që jetoni në pjesë të ndryshme të Bosnjë-Hercegovinës”. “E di sprovën e rëndë të cilën tashmë e kemi kaluar, barrën e rëndë të vuajtjeve që tashmë është bërë pjesë e përditshme e jetës suaj”, tha Papa Gjon Pali II. “Mos u dorëzoni. Fatkeqësisht, nisja përsëri nga fillimi nuk është e lehtë. Kërkon sakrificë dhe vendosshmëri në rast se shoqëria dëshiron që të shkojë nga e ardhmja me një bindje të thellë”. “Me doemos duhet të bëhet rindërtimi i njeriut nga brendia, me të shërruar plagët dhe arritur çiltërsinë e pastësisë së kujtimeve me anë të faljes së ndërsjellë”, u tha ai njerëzve. “Burim i çdo të mirë - dhe, fatkeqësisht, çdo të keqe, është në thelësitë e zemrës. Aty duhet të bëhen ndryshimet”. Papa po ashtu shprehi optimizëm se në të ardhmen, Bosnja do të kuptojë aspiratat e saj për t’iu bashku Evropës së bashkuar. Tetë vjet pas luftës së përgjakshme të viteve 1992-1995 në Bosnjë, e cila shkaktoi vdekjen e rreth 250.000 njerëzve dhe i bëri refugjatë rreth 1.8 milionë të tjerë, ky kominitet mbetet nën administratën ndërkombëtare, ndërkohë që synon të tejkalojë ndarjet etnike dhe ta zë në hap pjesën tjetër të Evropës. Vizita e Gjon Palit të Dytë ishte “mesazh i fuqishëm për publikun e Bosnjë-Hercegovinës, për rajonin, për Evropën dhe për mbarë botën se tashëm jemi nisur kah një rrugë e re”, theksoi Zoran Gjeriq, ministri serb i Punëve të Brendshme të Bosnjës. “Nuk ka grindje të reja këtu”, tha ai. “Jemi të gatshëm për integrimin që është përpara nesh dhe të arrijmë që në të vërtetë të jemi pjesë e Evropës... Kohët e këqija dhe njerëzit e këqijë janë histori”. Vizita e së dielës ishte e dyta e bërë e Papa Gjon Palit në Bosnjë dhe peligrimazhi i 101-të në karrierën e tij 25-vjeçar si Papë. Vizita erdhi vetëm dy javë pas xhiros pesëditore në Kroacinë fqinje. Papa kishte vizituar kryeqytetin e Bosnjës, Sarajevë, më vitin 1997. Në meshën e tij në manastirin në Petriçeviq, i cili ishte djegur nga ana e serbëvve gjatë luftës, Papa Gjon Pali i Dytë planifikohet të lumnojë Ivan Merzin, teolog katolik, i cili ia kushtoi jetën kishës që në vitet 1900. Lumnimi është hapi i fundit para shenjtërimit të mundshëm, ndërsa Merz do të jetë i shenjti i parë i Bosnjës. Papa më vonë do të takohet me liderët lokalë myslimanë dhe ata të kishave otodokse serbe, si pjesë e përpjekjeve të vazhdueshme të tij për të bashkuar dy linjat e grindura të krishterizmit, para se t’i vijë rendi botës islamike. Gjon Pali po ashtu është paraparë që të vizitojë katedralen e Banjallukës para se të kthehet në Romë në mbrëmje. Edhe pse afro 1 milion refugjatë akoma nuk janë kthyer në shtëpitë e tyre të paraluftës, shumica e boshnjakëve thonë se ndiehen të lirë të jetojnë si minoritet etnik. “Ky është gëzimi më i madh në jetëm time - lumturia ime e vetme”, tha Stefka Topiq (80), njëra prej 25.00 pelegrinëve të kthyer kroatë, të cilët ishin mbledhur për ta dëgjuar meshën e së dieles. “Do të jem pranë të birit të vërtetë të Zotit. Shkoj në shtëpi e lumtur pasi që e di se Banjalluka do të jetë vend i shenjtë pas kësaj”, tha ajo. Në këtë qytet, të banuar kryesisht me serbë ortodoksë, Papa arriti të mbledhë në një vend edhe pakicën kroate të vendit. Para luftës, rreth 30.000 kroatë jetonin në Banjallukë; sot, vetëm rreth 2.000 janë kthyer në shtëpitë që i kanë braktisur. “Jam e sigurt do të jetë më mirë pas kësaj, posaçërisht në Banjallukë dhe Bosnje në tërësi”, tha Zhelka Agatiq, kroate 39-vjeçare. Gazeta e Vatikanit “L’Osservatore Romano”, vizitën e Papës e quajti “udhëtim në zemër të dhembjes”. “Papa po vjen për katolikët e Banjallukës, por aty nuk ka katolikë”, nënvizoi peshkopi rajonal, Franjo Komarica. Masat e sigurisë për vizitën e Papës në Banjallukë janë shumë të ashpra. Mëse 4.000 policë, të përkrahur nga paqeruajtësit e NATO-s dhe forcat evropiane të policisë janë vendosur për të bërë roje kundër çdo lloji të dhunës apo proteste. “Ata që synojnë të shkaktojnë ndonjë problem; As mos mendoni në këtë”, tha shefi i policisë serbo-boshnjake, Radomir Njegus.