25072003leka

Megjithëse duket se janë lanë mënjanë diskutimet e negociatave pas zhvillimeve me te fundit, kjo gjë nuk është e vertete, pasi drejtuesit demokratë i vazhdojnë negociatat me aleatet e tyre dhe përfaqësuesit e tjere të së djathtës, megjithëse nuk janë pjesë e koalicionit të djathtë. Ridvan Bode, sekretari i përgjithshëm i PD-së, është takuar me përfaqësuesin e Ballit Kombëtar, Uran Metko, ku kanë diskutuar për emra dhe zona të veçanta. Drejtuesit e Ballit Kombëtar kanë dorëzuar kërkesat specifike me emrat dhe zonat e veçanta ku ai pretendon të ketë kandidaturat e veta për bashkitë dhe komunat. Së shpejti publikohen hollësitë. PD është angazhuar që të shqyrtojë me kujdes të gjitha propozimet e Ballit Kombëtar dhe pastaj, të jepet një përgjigje përfundimtare. Kjo përgjigje pritet të jepet brenda kësaj jave. Në këtë mënyrë, negociatat me Ballin Kombëtar, jo vetëm që e kanë kapërcyer fazën e parë të miratimit të marrëveshjes-kornizë, por kanë shkuar në fazën tjetër, atë më të rëndësishmen e diskutimeve për zona të veçanta. Përfaqësuesi i PBK‑së Metko, por edhe ai i PD‑së Bode, nuk kanë dhënë hollësi rreth negociatave, duke mos pranuar të bëjnë publike emrat dhe zonat e veçanta mbi të cilat është kërkuar bashkëpunimi nga ana e PBK‑së. Gjithsesi, negociatat mes kampit të djathtë vazhdojnë të jenë në proces, përfshirë edhe partinë e reformatorëve të Pollos, pavarësisht luhatjeve dhe deklaratave të ndryshme gjatë kohëve të fundit. Vetë një nga negociatorët e mandatuar të PD‑së, Fatos Beja, ka pohuar se ka patur konstatime që disa nga partitë të cilat kanë qenë në një fazë miratuese, janë deklaruar ndryshe, pastaj përsëri kanë dhënë shenja për rishikim të gjërave, çka është normale në një proces negociatash. Për sa u takon reformatorëve dhe negociatave me ta, PD sqaron se në bisedimet mes aleatëve, forca kryesore e opozitës ka bërë shumë përpjekje, duke qenë njëkohësisht edhe shumë të hapur. "Kemi patur disa kërkesa ultimative, të cilat kanë qenë vështirë për t'u kapërcyer, por takimet do të vazhdojnë, madje intensive", është shprehur Beja. Në këtë mënyrë konfirmohet se pika më e nxehtë gjatë negociatave, është ajo e takimeve me reformatorët, ndërkohë që është arritur marrëveshja me republikanët dhe ballistët. Dy partitë e tjera që janë Aleanca Demokratike, e drejtuar nga z.Imami dhe PBL, e drejtuar nga Teodor Laço, kanë arritur marrëveshje në parim dhe së shpejti, edhe me to do të ketë marrëveshje konkrete që do të finalizohen me shpalljen zyrtare të aleancave parazgjedhore. Siç dihet, Partia e Legalitetit dhe ajo e Demokratëve të rinovuar të Dashamir Shehit, kanë shpallur dëshirën për të dalë me kandidatura të tyret në zgjedhjet lokale të vjeshtës.

25Korrik 2003 Faqe 7 - Politikë

Kriza në PS

Gjithsesi, Kreu i Shtetit ka dhënë dekretimin për propozimet e Nanos, për vendet e mbetura vakant në qeveri. Kjo dhe pse Berisha ka kërkuar mosdekretimin e Bellos dhe Meksit

Moisiu dekreton ministrat e rinj. Tani e gjithë “lufta” për votat e deputetëve

“Grupi Meta” kohë Nanos deri të hënën

Kryeministri i premton legalistëve Vilën qeveritare të Durrësit

Tiranë

Fatos Nano ka kohë deri të hënën për të bërë ndryshimet e nevojshme në Qeveri. Këtë kërkesë e kanë përsëritur dhe dje një sërë deputetësh të Partisë Socialiste, të cilët kanë theksuar se kjo kërkesë është e mbështetur dhe në Rezolutën e miratuar në Grupin Parlamentar.

“Ne nuk jemi për të kthyer në krizë qeverisjen socialiste, por jemi për një zgjidhje më të mirë për partinë”, thanë dje disa nga përkrahësit e Metës. Ndërsa kanë deklaruar se vendimin për të votuar abstenim pro, apo kundër, do ta marrin pas mbledhjes së Grupit Parlamentar të PS-së, që do të mblidhet pikërisht për këtë çështje. Gjithsesi, në mënyrë të hapur një pjesë e mirë e socialistëve kanë deklaruar se, Nano duhet të reflektojë deri të hënën për ndryshime konkrete. Madje, në këtë është përmendur emri i Dervishit, si dhe ndryshimet në rand zëvendësministrash. Në të kundërt ata kanë thënë se vendimi i Nanos nuk është zgjidhje e debateve, por thellim i tyre. Me këtë është paralajmëruar dhe vota abstenim, që do të thotë dhe një dorëzim i qeverisë në favor të opozitës. Nga ana tjetër, Braho ka shpjeguar se në rast se votimi për Meksin dhe Bellon do të rrëzohen, atëherë Nano duhet të paraqesë emra të tjerë.

Dekretimi
Gjithsesi, Kreu i Shtetit ka dhënë dekretimin për propozimet e Nanos, për vendet e mbetura vakant në qeveri. Kjo dhe pse Berisha ka kërkuar mosdekretimin e Bellos dhe Meksit. Moisiu ka pranuar të japë vendimin e tij pro kandidaturës së Ermelinda Meksit si zëvendëskryeministre dhe ministre e Jashtme dhe Marko Bellos si ministër i Integrimit. Këta vijnë pas dorëheqjes së bërë pak ditë më parë nga Ilir Meta dhe kreu i Integrimit, Sokol Nako. Ndonëse, dekretimi i Moisiut është bërë që në orët e para të ditës, Kuvendi nuk ka votuar mbi emrat e rinj, duke e lënë këtë për seancën e ardhshme të së hënës. Presidenti ka nxituar të dekretojë dy emrat e ministrave të rinj, për vetë faktin se Kuvendi mbyll punimet e tij javën e ardhshme.

Urdhëri
Nano i jep pronat Leka Zogut

Pak ditë para se të zhvillohet mbledhja e Kuvendit për miratimin e dy ministrave, Bello dhe Meksi, Nano ka kërkuar të marrë sa më shumë vota nga opozita. Këtë radhë ka kërkuar dhe votat e Legalistëve, duke i dhënë si shkëmbim pronat Mbretit Zog 1. “Kryeministri Fatos Nano vazhdon të jetë i angazhuar zyrtarisht për zgjidhjen e çështjeve që kanë të bëjnë me plotësimin e detyrimeve ligjore në zbatim të ligjit nr.9063, datë 8.5.2003 ‘Për statusin e trashëgimtarëve të ish-Familjes Mbretërore’. Në këtë kuadër, Kryeministri pas angazhimit të tij personal për zgjidhjen e disa nga kërkesave të ish-familjes mbretërore, si mundësimi i kthimit të saj në atdhe dhe pajisja me pasaporta diplomatike, ngarkon ministrin e Shtetit pranë Kryeministrit të ndjekë me përparësi praktikat administrative të kthimit dhe kompensimit të pronave të ish-Familjes Mbretërore. Me miratimin nga Kuvendi i Shqipërisë të ligjit për kthimin dhe kompensimin e pronave, ish-familjes mbretërore do t’i kthehen pronat e paluajtshme që u takojnë ligjërisht, si Vila e familjes në qytetin e Durrësit dhe pronat e tjera, sipas parashikimeve të ligjit”, thuhet në njoftimin e Këshillit të Ministrave.

Kreu demokrat akuzon Kryeministrin për blerje votash
Berisha: Nuk i kërkova Moisiut qeveri teknike

Kryetari i Partisë Demokratike u shpreh dje se, Kryeministri Nano, po shtyn votimin në Kuvend për të blerë votat e atyre që janë kundër tij. “Shtyrja në seancën e sotme, pavarësisht se Presidenti Moisiu kishte dekretuar ministrat e rinj, u bë për qëllimin e vetëm, sepse Nanos i duhen edhe disa ditë për të ushtruar dhunë, terror dhe presione mbi deputetët, në mënyrë që të kalojë ministrat e tij të pavotueshëm”, u shpreh lideri demokrat. Ai shtoi se, kjo vonesë erdhi pas urdhërit të Nanos drejtuar sekretarit socialist Ruçi, për të mos pranuar votimin të enjten në Kuvend. “Të gjithë deputetët e opozitës ishin të pranishëm, pasi janë njohur me vendimin e Moisiut, por në momentin e fundit, kur Nanon e ka kapur elektroshoti i mungesës së mandateve, ka urdhëruar Gramoz Ruçin që të mos pranojë votim gjatë seancës së sotme. Kam të dhëna të sigurta se po bëhet një presion i jashtëzakonshëm mbi deputetët e të gjitha grupeve në mënyrë që të imponojë votën pro për një qeveri të dështuar”, tha ai. Berisha rikonfirmoi edhe një herë prezencën e deputetëve të PD-së në seancën e së hënës, kur do të zhvillohet edhe votimi për ndryshimet në kabinetin qeveritar. “Jam i sigurt se opozita e bashkuar në bllok, edhe ditën e hënë, do të numërojë votat kundër Kryeministrit Nano, dhe vota jonë është kundër, pikërisht ndaj tij, pasi kemi të bëjmë me një qeveri tërësisht të dështuar. Nano meriton të quhet në këtë kohë nga mistër tendermen në mistër kriza”, tha ai. Duke komentuar vendimin e Moisiut për dekretimin e dy ministrave të rinj, ai tha se kjo është në përputhje të plotë me ligjet dhe Kushtetutën, pavarësisht se vetëm pak ditë më parë po ai vetë kishte kërkuar nga Moisiu mosdekretimin e tyre.

“Nuk them se ka qenë i lumtur dhe i kënaqur të firmosë dy ministrat e rinj, por nuk mund të mohoj se është i detyruar të respekojë Kushtetutën, e cila ndonjëherë edhe kur të vjen e hidhur je i detyruar ta respektosh”, shtoi ai. Berisha ka mohuar të ketë kërkuar nga Presidenti gjatë takimit të fundit nevojën e krijimit të një qeverie teknike. Madje, ai e ka cilësuar si mendim personal deklaratën e nënkryetares Topalli, për krijimin e një qeverie me bazë të gjerë, por pavarësisht se nuk e ka hedhur poshtë. “Unë nuk kam asnjë kundërshtim për diversitetin e mendimeve, por është e vërtetë që zgjidhja e vetme është një qeveri me mbështetje të gjerë”, tha ai.

Falenderimi
Britania: Me Metën ecët përpara

Pas letrës së dërguar nga kryeadministratori i Kosovës, Shtajner, ku puna e Metës është konsideruar një politikë frymëzuese për të, dhe pas raportit të fundit të BE-së dhe SHBA-ve, ku puna e zhvilluar nga Ministria e Jashtme, në lidhje me rajonin është cilësuar pozitive, është sekretari Britanik i Punëve të Jashtme, Stro, që jep argumente të tjera pozitive ndaj Ministrisë së Jashtme shqiptare. “Me keqardhje mora vesh vendimin tuaj për të dhënë dorëheqjen si zëvendëskryeministër dhe ministër i Punëve të Jashtme. Gjatë ushtrimit të detyrës tuaj, Shqipëria ka ecur përpara në mënyrë të dukshme në marrëdhëniet e saj me Bashkimin Evropian. Hapja e negociatave për Marrëveshjen e Stabilizim-Asociimit, ishte një arritje e veçantë. Duke mbajtur një qëndrim të vendosur kundër ekstremizmit dhe, duke ndërtuar lidhje të forta midis Shqipërisë dhe Serbisë e Malit të Zi, Ju keni demonstruar se bashkëpunimi rajonal është një faktor kyç në konsolidimin e stabilitetit dhe zhvillimit në Ballkanin Perëndimor. Jam i bindur se edhe jashtë qeverisë, Ju do të vazhdoni të mbështesni një rol konstruktiv për Shqipërinë në arenën ndërkombëtare”, thuhet në letrën e dërguar nga Stro. “Ju uroj gjithë të mirat për të ardhmen tuaj”, përfundon mesazhi i britanikut.

Nano ngarkon ministrin Klosi te ndjeke kthimin dhe kompesimin e pronave te ish-familjes Mbreterore

Me miratimin nga Kuvendi i Shqipërisë të ligjit për kthimin dhe kompesimin e pronave, ish-familjes mbretërore do t’i kthehen pronat e paluajtshme që i takojnë ligjërisht, si psh.Vila e familjes në qytetine Durrësit

TIRANE- Ministri i Shtetit pranë Kryeministrit, njofton se kryeministri, z.Fatos Nano vazhdon të jetë i angazhuar zyrtarisht për zgjidhjen e çështjeve që kanë të bëjnë me plotësimin e detyrimeve ligjore në zbatim të ligjit nr.9063, datë 8.5.2003 "Për statusin e trashëgimtarëve të ish-familjes Mbretërore". Në këtë kuadër kryeministri pas angazhimit të tij personal për zgjidhjen e disa kërkesave të ish-familjes mbretërore, si mundësimi i kthimit të saj në atdhe dhe pajisja me pasaporta diplomatike, ngarkon ministrin e Shtetit pranë kryeministrit të ndjekë me përparësi praktikat administrative të kthimit dhe kompesimit të pronave të ish-familjes mbretërore. Me miratimin nga Kuvendi i Shqipërisë të ligjit për kthimin dhe kompesimin e pronave, ish-familjes mbretërore do t’i kthehen pronat e paluajtshme që i takojnë ligjërisht, si psh.Vila e familjes në qytetine Durrësit dhe pronat e tjera sipas parashikimeve të ligjit. /S.V

Faqja 5 - POLITIKE

Korrik 25, 2003

Vendimi i Nanos para votimit: T'i kthehet Zogut Vila e Durrësit

Kryeministri Nano vendosi dje që ministri i Shtetit të merret "me përparësi me praktikat administrative të kthimit dhe kompensimit të pronave ish-familjes mbretërore". Fillimisht ai mendon t'i kthejë kësaj familjeje vilën e Durrësit dhe më pas pronat e tjera, por jo të gjitha. Një vendim i tillë merret pikërisht në momentin kur Nanos i duhen vota të mjaftueshme për zëvendësimet e reja në qeverinë e tij. Kështu ai i vë legalistët përballë faktit të kryer, pra që angazhohet institucionalisht për zbatimin e ligjit për "Statusin e trashëgimtarëve të ish-familjes mbretërore". Me këtë vendim ai siguroi votat e katër deputetëve legalistë për seancën parlamentare të së hënës kur do të kalojnë për votim dekrete e presidentit Moisiu për zëvendësimin e dy ministrave të ikur me dy emra të rinj. Në njoftimin për shtyp, radhiten një sërë angazhimesh të kryeministrit për zgjidhjen e kësaj çështje.
"Në këtë kuadër, kryeministri pas angazhimesh të tij personale për zgjidhjen e disa kërkesave të ish-familjes mbretërore, si mundësimi i kthimit të saj në atdhe, pajisja me pasaportat diplomatike, ngrakon ministrin e Shtetit të ndjekë procedurat e duhura", bëhet e ditur në njoftim. Kthimin në atdhe të familjes mbretërore në fakt e mundësoi firma e deputetëve të Parlamentit shqiptar, mes të tjerave edhe socialistë. Ndër socialistët që firmosën ardhjen e ish-familjes mbretërore ishin ata që mbështesin politikën e Metës. Ishte po Meta si ministër i Jashtëm që ndihmoi në pajisjen me pashaporta diplomatike të ish-familjes mbretërore. Nano kështu kërkon siguri në votën pro të qeverisë dhe këtë siguri e kërkon edhe tek partitë e djathta dhe kjo është sfida e dytë që ai i bën koalicionit të djathtë "Bashkimi për Fitore". Sfida e parë ishte votimi pro i projektligjit për "Dytu Free Shop"-et, ku Nanos i duheshin edhe tre vota të tjera për këtë projektligj. Në momentet e fundit, kur ky projektligj kishte rrezik të mos votohej, ai përdori legalistë me kartën e favorizimit të familjes mbretërore dhe në votimin e fundit, dy legalistë Spahia dhe Balla votuan pro këtij projektligji dhe me vete morën edhe republikanin Begejën. Zëdhënësit e familjes Mbretërore atëherë theksuan se marrëveshja e bërë me qeverinë nuk kishte aspak ndërhyrjen e legalistëve, por gjithçka ishte bërë falë negociatave që përfaqësuesit e familjes kishin bërë me qeverinë.

Faqja 4 - POLITIKE

Korrik 25, 2003

DEBATI BRENDA OPOZITES

Berisha në mbrojtje të Moisiut

"Dekretoi i detyruar nga Kushtetuta"

Kryetari i Partisë Demokratike, Sali Berisha, u pozicionua në mbrojtje të presidentit Moisiu lidhur me firmosjen e propozimeve të kryeministrit Nano për zëvendësimin e dy ministrave të larguar. Sipas Berishës, firmosja e këtyre propozimeve është detyrë kushtetuese e presidentit. Madje mbrojtja e tij shkoi edhe më tej kur deklaroi se "gjithashtu mendoj se ai nuk ka qenë i lumtur kur i firmosi propozimet e kryeministrit Nano", tha ai dje në dalje të Parlamentit. Ai bëri të ditur se një qeveri me mbështetje të gjerë politike do ta nxirrte vendin nga kriza ku e ka futur qeveria e Nanos, por, sipas tij, kjo nuk është një detyrë që i takon presidentit, i cili po kryen detyrimet e tij kushtetuese. Kryetari i PD-së bëri të ditur se "në bazë të informacioneve të sigurta që kam, Nano po bën presion, po kërcënon apo po i blen deputetët socialistë në mënyrë që të votojnë pro qeverisë". Ai vuri në dukje se edhe moskalimi i djeshëm në Parlament të dekreteve të presidentit për votim, tregon frikën që ka Nano se ministrat e rinj nuk do t'i votohen. Ai shtoi se edhe nëse ministrat e Nanos do të votohen, kjo qeveri do të vazhdojë të jetë në krizë dhe të shtyjë vendin drejt një krize edhe më të thellë. Kryetari i PD-së shpreson te vota kundër e mbështetësve të Metës, që nuk do të mund të rrëzojnë dot qeverinë, pasi dekretet e rrëzuara të Moisiut mund të zëvendësohen me dekrete të tjera me emra të rinj, ose ndonjë zëvendësim. Ai e ka pranuar se me votat që ka e djathta në Parlament nuk mund ta rrëzojë qeverinë, madje sqaroi se nuk janë të sigurta edhe votat e tjera të socialistëve kundër Nanos.
Vota kundër, apo qoftë edhe abstenimi i mbështetësve të Metës e bën më të fortë PD-në para zgjedhjeve lokale, jo për faktin se janë përzgjedhur kandidaturat më të mira dhe se janë të sigurtë në shumë qytete kryesore, por për faktin se nga vazhdimi i krizës së brendshme të PS-së dobësohet vetëm ajo.
Berisha theksoi më tej se partitë e djathta ishin të gatshme të votonin që dje dekretet e presidentit dhe se këto parti ishin të të përgatitura për votën kundër, të cilën do ta japin bashkarisht të hënën. "Partitë e djathta do të votojnë në unison kundër zëvendësimeve të reja në qeveri dhe kjo është një shenjë e qartë bashkëpunimi", u shpreh më tej kryetari demokrat. Pavarësisht se ai nuk është konsultuar me aleatët e vet, apo me partitë e tjera të djathta jashtë koalicionit, Berisha mori përsipër të fliste me siguri për ta duke u nisur thjeshtë nga pozicionimi i hapur i kryetarëve të këtyre partive në media. Ai mendon se mund ta shfrytëzojë këtë moment votimi për t'i afruar partitë e djathta rreth vetes, përfshi edhe ato që janë jashtë koalicionit. Ky afrim atij i intereson edhe për faktin se po përpiqet të realizojë marrëveshje parazgjedhore me parti me një përqindje të konsiderueshme, por duke iu nënshtruar vetëm ofertave të tij.

Votimi, të majtët ende të paqartë

Aleatët e socialistëve shprehen mendimin e tyre të ndryshëm për votimin që do të bëhet të hënën në Parlament për dekretet e presidentit Moisiu. Socialdemo-kratët e Gjinushit u shprehën të prerë se do të abstenojnë në seancën e së hënës kur pritet të miratohen emrat e rinj të qeverisë, Meksi dhe Bello. Kryetari i Partisë Demokracia Sociale, Paskal Milo u shpreh se ai, si një nga përfaqësuesit e rëndësishëm të kësaj partie, "do të votojmë pro zëvendësimeve në qeveri, pavarësisht nga emrat". Ndërsa kryetari i PBDNJ-së, Vangjel Dule, deklaroi dje se ata do ta hedhin për diskutim në kryesi mënyrën e votimit dhe pas vendimit të strukturave ai do të bëhet i ditur. Por ai shtoi se "ne nuk jemi për kriza", duke lënë të hapur mundësinë që deputetët e PBDNJ-së do të votojnë pro zëvendësimeve të reja në qeverinë e Nanos.

Kërkonin qeveri me bazë të gjerë

Dekretet, liderët e vegjël dalin kundër presidentit
Kryetari i Partisë Republikane, Fatmir Mediu dhe ai i Partisë Ballit Kombëtar, Shpëtim Rroqi sulmuan dje presidentin Moisiu për faktin se kishte kaluar në Parlament dekretet për zëvendësimin e dy ministrave në kabinetin qeveritar. Sipas Mediut, kjo krizë mund të kishte edhe një zgjidhje tjetër, e cila mund të dilte nga këshillimi i të gjitha partive politike në një tryezë të përbashkët të kryesuar nga presidenti Moisiu. Ndërsa Shpëtim Rroqi deklaroi dje se Moisiu nuk po e drejton ashtu siç duhet shtetin këto kohë. Të dy udhëheqësit e partive të djathta i kujtuan presidentit Moisiu se është president konsensual, pra i zgjedhur edhe me votat e këtyre partive, madje i propozuar nga njëra nga ato. Një pjesë e partive të djathta janë shprehur kundër nënshkrimit të propozimeve të Nanos nga ana e Moisiut. Madje ata kanë pritur një reagim të kundërt të tij, i cili, edhe pse i vonoi pak orë firmosjen, ai i dekretoi ndryshimet në qeveri. PDr-ja, partia e dytë, pas PD-së, në këtë rast nuk e kundërshtoi qëndrimin e presidentit Moisiu për paraqitjen e dekreteve, por thjeshtë u shpreh kundër zëvendësimeve në qeverinë e re. Vota e saj të hënën, ashtu si edhe pjesa më e madhe e partive të djathta, do të votojnë kundër qeverisë. Deri tani kjo është e sigurtë, por situata mund të ndryshojë, pasi jeta parlamentare tregoi se më së shumti deputetët e djathtë kanë bashkuar votat me socialistët dhe jo anasjelltas.