25092003thaci

Faqja 19 - RAJON Shtator 25, 2003

DIALOGU/ KREU I PDK KUNDER HOLKERIT

Thaçi: S'ka negociata për pavarësinë e Kosovës

LONDER

Askush nuk mund të negociojë për pavarësinë e Kosovës, e cila do të vendoset vetëm me vullnetin e popullit kosovar. Kështu deklaroi kreu i Partisë Demokratike të Kosovës dhe ish-luftëtari i UÇK-së, Hashim Thaçi, në një intervistë dhënë BBC-së në ditën e marrjes së vendimit për fillimin e dialogut Prishtinë-Beograd nga Grupi i Kontaktit.

Keni deklaruar se Grupi i Kontaktit do ta çojë përpara proçesin e statusit politik të Kosovës. Me-gjithatë dialogu shqiptaro-serb ka të bëjë me çështje teknike...
Për mua ndërmjet Prishtinës dhe Beogradit nuk ka çështje teknike, por vetëm politike. Mund t'i quajmë si të doni proçeset, por gjithçka mes Prishtinës dhe Beogradit është politike. Jam optimist se për të ardhmen e vendit do të vendosë vetë vullneti i qytetarëve të Kosovës përmes një referendumi dhe fundi do të jetë pavarësia e Kosovës.

Pra, ju pohoni se pavarësia e Kosovës do të vendoset me fillimin e bisedimeve shqiptaro-serbe?
Nuk mendoj se pavarësia e Kosovës do të arrihet përmes bisedimeve apo dialogut, por jam optimist se bashkësia ndërkombëtare do ta njohë realitetin demokratik në kohën e duhur. Kjo për faktin se në Kosovë është ndërtuar dhe po ndërtohet çdo ditë realiteti i pavarur i Kosovës.

Sipas jush, pavarësia është diçka për të cilën nuk mund të negociohet?
Sa i përket pavarësisë askush nuk ka të drejtë të bëjë kompromis dhe nëse dikush përpiqet ta bëjë këtë atëherë do të jetë i dështuar, pasi vullneti i qytetarëve të Kosovës është më i fuqishëm se aspirata e çdo politikani në Kosovë.

A e keni përcaktuar platformën e pavarësisë së Kosovës në bisedimet e paralajmëruara?
Mendoj se vullneti i qytetarëve të Kosovës është i qartë për vetë institucionet e Kosovës dhe për botën demokratike. Nuk do të ketë asnjë kompromis përsa i përket statusit politik të Kosovës, i cili nuk duhet të negociohet por duhet të njihet ndërkombëtarisht. Por edhe ne në Kosovë duhet të ndërtojmë realitetin e njohjes së pavarësisë. BBC

Dialogu Prishtinë-Beograd starton në mes të tetorit

NJU JORK - Dialogu mes Beogradit dhe Prishtinës do të nisë në mesin e muajit tetor në Vjenë të Austrisë. Vendimi, që u mor të martën në takimin e Grupit të Kontaktit në Nju Jork, u bë i ditur nga agjencia e lajmeve BETA. Grupi i Kontaktit mbështeti planin e paraqitur nga shefi i UNMIK-ut, Harri Holkeri për dialogun, por njoftoi se është kundër çdo lloj tendence për të diskutuar statusin e Kosovës në këto bisedime. Data e saktë e bisedimeve do të bëhet pas konsultimeve të Holkerit dhe Grupit të Kontaktit.

Moisiu-Anan: Zvarritja për zgjidhjen e çështjes së statusit ndikon negativisht

Lajmi i ores 8:00 PM

PRISHTINE (25 Shtator) - "Është e nevojshme të përcaktohet më mirë se cilat janë objektivat e standardeve të kërkuara, pasi zvarritja e problemeve dhe e zgjidhjes ndikon negativisht," tha presidenti i Shqipërisë, Alfred Moisiu, në takim me sekretarin e përgjithshëm të KB-ve, Kofi Anan. Në ditën e tij të tretë të qëndrimit në kuadër të Sesionit të 58-të të Asamblesë së KB-ve, presidenti i Republikës së Shqipërisë, Alfred Moisiu, u takua të enjten në Nju-Jork me sekretarin e Përgjithshëm të KB-ve, Kofi Anan. Në takim presidenti Moisiu ka theksuar mbështetjen që Shqipëria është duke u dhënë përpjekjeve të përbashkëta për forcimin e paqes, sigurisë dhe kundër terrorizmit ndërkombëtar, si dhe vullnetin e palëkundur për të vazhduar të luajë rolin e saj aktiv. Duke folur për Kosovën, presidenti shqiptar, theksoi se stabiliteti dhe zhvillimi i saj është në interes të Kosovës dhe rajonit, prandaj edhe puna për plotësimin e standardeve duhet të ecë krahas asaj për përcaktimin e statusit përfundimtar dhe se "është e nevojshme të përcaktohet më mirë se cilat janë objektivat e standardeve të kërkuara, pasi zvarritja e problemeve dhe e zgjidhjes mund të ndikojë negativisht". Nga ana e tij, sekretari i KB-ve, Kofi Anan, mbështeti plotësisht mendimet dhe vlerësimet e presidentit Moisiu, si dhe shprehu vlerësimin e lartë për politikën aktive rajonale të Shqipërisë. dxh/dxh (Kosovapress/BalkanWeb)

Faqe 4 - Aktualitet

25Shtator 2003

Reagon prokurori i Gafur Adilit

Qano: Nuk kam frikë nga kërcënimet e AKSH

Një ditë pas publikimit të kërcënimit në adresë të Prokurorisë nga ana e Armatës Kombëtare Shqiptare, hetuesi i dosjes është shprehur i qetë përpara gazetarëve, duke mos u ndikuar nga ky paralajmërim. Prokurori, i cili ka ndjekur hetimet e çështjes në ngarkim të dy drejtuesve të Armatës Kombëtare Shqiptare, Genci Qano, është shprehur dje se nuk e ndjen veten të kërcënuar nga deklaratat e fundit të publikuara në internet nga AKSH-ja. Genci Qano, prokurori, i cili është marrë me hetimet për dosjen në ngarkim të dy ish-drejtuesve të AKSH-së, pohoi sot se, nuk ka patur kërcënime të drejtëpërdreja në lidhje me dosjen e hetuar prej tij. “Kërcënimin e publikuar në faqen zyrtare të AKSH-së në internet, e kam lexuar vetëm në faqet e shtypit të përditshëm, ndërsa përfundimi i hetimeve nuk ka lidhje me të ashtuquajturin kërcënim, pasi për dosjen në ngarkim të Gafur Adilit dhe Taip Mustafës, kam punuar njësoj si me dosjet e tjera dhe hetimet kanë përfunduar para se të lëshohej kërcënimi në internet”, pohon Qano, duke shtuar se ende nuk e di se çfarë thotë me saktësi teksti që media e quan “kërcënues”. “Proku-roria ka provat e duhura, të cilat do të bëhen të ditura gjatë procesit gjyqësor, për të vërtetuar se Gafur Adili dhe Taip Mustafaj i kanë kryer veprat penale për të cilat akuzohen”, sqaron më tej Qano. Gjithsesi, për prokurorin Qano, gjithçka vazhdon të mbetet si më parë, pasi ai as nuk ka marrë dhe as do të marrë truproja për ruajtjen fizike të tij, përsa kohë që nuk ndihet i kërcënuar. Mesditën e djeshme, Prokuroria mbylli hetimet për dy drejtuesit e “Armatës Kombëtare Shqiptare”, Gafur Adili dhe Taip Mustafaj, të akuzuar për veprat penale të “nxitjes së urrejtjes nacionale mes kombësive me rraca dhe fe të ndryshme” dhe “falsifikimit të dokumenteve”.