LONDER

BBC u kërkon ndjesë emigrantëve shqiptarë, nëse u ka fyer himnin në një emision të saj. Në këtë mënyrë emigrantët tanë në Angli kanë arritur të mbrojnë me dinjitet dhe qytetari simbolin e tyre, himnin kombëtar shqiptar. Dy ditë pas reagimeve indinjuese të komunitetit shqiptar në Londër, ka reaguar edhe gjiganti televiziv BBC, në një emision të të cilit u poshtërua himni kombëtar. Ky është rasti i parë gjatë këtyre viteve që emigrantët shqiptarë kërkojnë me insistim respektimin e kombësisë së tyre dhe tregohen kaq të ndjeshëm ndaj ndjenjave të tyre nacionale.

Reagimi
Televizioni BBC dje është detyruar të sqarojë me anë të një komunikate publike teleshikuesit e saj shqiptarë, qëllimin e programit televiziv, ku pretendohet se është fyer himni kombëtar shqiptar. Sipas zëdhënëses së gjigantit televiziv, programi "Eastenders Christmas Party" (ku është konsumuar dialogu fyes) ishte një program argëtues dhe nuk kishte aspak si synim që të shkaktonte ndonjë fyerje të qëllimshme ndaj shqiptarëve. "Ky ishte një program special për Krishtlindje me aktorët e telenovelës së famshme të televizionit të BBC-së, 'Eastenders' ", thuhet në reagimin e Zyrës së Shtypit të BBC-së. Pas këtij sqarimi zëdhënsja e BBC-së, është shprehur se kërkon falje publike në rast se programi në fjalë ka shkaktuar fyerje te shqiptarët.

Fyerja
Protestat e emigran-tëve shqiptarë ndaj televizionit BBC kanë nisur mbrëmjen e së mërku-rës, duke vazhduar deri dje, kur erdhi edhe reagimi. Incidenti ka ndodhur në një nga emisionet më të famshme të BBC1, "Easteanders", një telenovelë që transmetohet katër herë në javë. Mbrëmjen e së mërkurës një nga aktorët kryesorë të telenovelës ishte i ftuar në një mbrëmje të veçantë me rastin e Krishtlindjeve, ku është konsumuar edhe dialogu fyes ndaj himnit kombëtar shqiptar. Gjatë bashkëbisedimit regjisorja dhe njëkohësisht një nga aktoret më të famshme komikë në Angli, Jo Brand, i drejtohet aktorit kryesor Shane Ritchie me fjalët: "An she fart të Albanian anthem", që në shqip përkthehet, "a mund të pjerdhë ajo himnin shqiptar". Të indinjuar nga ky dialog, tek i cili ishte e pakuptimtë logjika që dontë të shprehte batuta, me himnin shqiptar, emigrantët tanë kanë reaguar menjëherë me anë të letrave ndaj stacionit televiziv BBC. Madje një prej emigrantëve është shprehur se "është shumë poshtëruese që kur njerëzit bashkohen pranë familjeve në këtë ditë gëzimi, producentët e kësaj telenovele gjejnë momentin për të abuzuar dhe fyer himnin shqiptar".

Kush është artistja që fyeu himnin shqiptar

Fillimet e Jo Brandit në botën e artit anglez janë tejet të rastësishme. Ajo ka lindur në qytetin Kent në Jug të Anglisë, ku, pasi ka mbaruar shkollën fillore dhe të mesme, filloi të punojë si infermiere, duke ndjekur hapat e nënës së saj. Puna çdo ditë me njerëz të droguar, abuzues alkoli dhe tejet të dëshpëruar, në një ambient tejet të vështirë për të punuar bëri që sensi i saj i humorist të shtohej edhe më shumë. Duke punuar si infermiere Jo kuptoi se ajo kishte ndjesinë për t'i dashur njerëzit, kishte mundësinë të komunikonte me ta. Pas suksesit të saj të parë me pjesë komike, ku vë në lojë politikanët dhe njerëzit e shëndoshë, ajo gjithnjë e më shpesh filloi të ishte e pranishme në programe të ndryshme televizive, madje të prodhojë edhe emisione të saj humoristike. Ajo është fituese e shumë çmimeve si dhe autore e disa librave dhe disa skenareve për telekomedi.

Emigrantët shqiptarë të pakënaqur nga ndjesa e BBC

Duket se reagimi i djeshëm i BBC-së nuk i ka qetësuar emigrantët shqiptarë, të fyer nga tallja me himnin kombëtar. Të kontaktuar nga Gazeta disa prej tyre janë shprehur se ndjesa që kërkoi gjiganti televiziv ishte tepër e zbehtë. "Ne jemi ofenduar dhe nuk ka asnjë mëdyshje për këtë, siç shprehet zëdhënësja e BBC-së", thotë një nga emigrantët. Edhe gjatë ditës së djeshme emigrantë të ndryshëm shqiptarë, që punojnë e jetojnë në Londër por edhe në kryeqytete të tjera të botës, kanë vazhduar të protestojnë nëpërmjet letrave dhe postës elektronike jo vetëm për talljen që iu bë himnit, por edhe për ndjesën aspak serioze të drejtuesve të televizionit BBC. "Duhet t'i kërkojnë falje të vërtetë të gjithë shqiptarëve dhe të pranojnë që kanë gabuar". Ndërkohë protestave ndaj BBC i është bashkuar edhe Forumi Rinor Demokrat Shqiptar.