Koalicioni i ri i krijuar nga Nano nuk është tjetër veçse bashkim i klaneve të kontrabandës, krimit dhe korrupsionit, deklaroi Berisha.

Kryetari i Partisë Demokratike, u shpreh se kabineti i ndërtuar nga Kryeministri nuk duhet të dekretohet nga Presidenti, pasi, ai u themelua mbi bazën e interesave të klaneve më të rrezikshme të vendit. “Kurrë ndonjëherë në historinë e tij, që nga viti 1913, Shqipëria nuk ka patur një kabinet më të korruptuar se ky që u krijua nga Fatos Nano. Ky kabinet vjen si një koalicion i klanit të Zemunit me Baçin dhe Maçin, Mirin e Xhikes dhe Shkëmbin e Pëllumbave”, tha lideri i selisë blu. Sipas tij, ai është kabineti në të cilin financat e vendit i jepen ndërtuesit të katër piramidave, Arben Malajt, Adhamudhit të skemave piramidale, njeriut që vodhi dhe grabiti miliona dollarë. “Është dhjetë herë më e ndershme të vendosësh në krye të Financave, Lefter Cenën, se sa të vendosësh Malajn”, tha ai. Berisha tha se ky kabinet, i cili mund të cilësohet si kabineti i konfrontimit me mbarë shoqërinë shqiptare, po ngrihet me përpjekjet e Nanos për të blerë deputetët. “Rol kryesor në krijimin e këtij kabineti ka luajtur klani i Zemunit, i cili ka vazhduar edhe në mbrëmjen e së premtes të blejë deputetë, apo aleatë të dorës së dytë, që kishin ngelur përreth tij. Ne pa dyshim jemi të vendosur t’i përgjigjemi këtij koalicioni të krimit, babëzisë dhe korrupsionit me të gjitha mjetet demokratike”, tha ai. Sipas tij, pavarësisht se Nano mund të ketë siguruar votat e nevojshme, Presidenti Moisiu duhet të pengojë këtë veprim me mos dekretimin e ministrave. “Shpresoj që Presidenti t’u drejtohet institucioneve për informacion si dhe të mos pranojë të mposhtet nga klanet që po uzurpojnë qeverinë”, tha ai.

PD, akuzon sërish Igli Toskën

Berisha ka deklaruar se përfshirja e Igli Toskës në kabinetin qeveritar si ministër i Rendit, nuk është gjë tjetër veçse një përpjekje e Nanos për të shtënë në dorë klanet e drogës. “Kabineti është përpjekja përfundimtare e Nanos për të shtënë në dorë nëpërmjet Igli Toskës klanet e drogës. Ky i fundit dje mashtroi sërish, duke deklaruar se është i pafajshëm dhe këtë e ka me vendim gjykate, duke u bërë edhe më mëkatar se ç’është”, tha Berisha. Sipas liderit demokrat, çështja e Toskës për abuzim me detyrën, vërtetë është shqyrtuar nga Gjykata Kushtetuese, por ka qenë Gjykata e Lartë, ajo e cila i ka dhënë fajësinë. Çështja Toska është gjykuar në sistemin tre shkallësh dhe ai e ka humbur të drejtën e pafajësisë në Gjykatën e Lartë, e cila e ka nxjerrë fajtor”, tha Berisha. Kreu demokrat shtoi se është në nderin e Toskës që të japë dorëheqjen. “Është më mirë që edhe ky të japë dorëheqjen, pasi nuk është aspak i denjë për administratën shtetërore, sikurse edhe paraardhësi i tij Rama, i cili po ashtu deshi të shtinte në dorë klanin e drogës e të bëhej drejtues i saj”, tha Berisha.

Igli Toska reagon pas akuzave
“Të hënën padis Berishën dhe Palokën”

Igli Toska zv.ministri i Rendit Publik nesër do të ngrejë padi civile ndaj kreut të Partisë Demokratike, Sali Berisha dhe zëdhënësit të kësaj partie Edi Paloka. Sipas Toskës, një akuzë për një dosje korrupsioni në ngarkim të tij, nuk është gjë tjetër veçse shpifja e radhës së bërë nga zyrtarët e lartë të Partisë Demokratike. “Shtetasi Igli Toska nuk është as padibërës dhe nuk ka qenë e nuk është as i paditur që nga krijimi i kësaj Gjykate e deri më sot”. Kështu shkruhet në një njoftim për shtyp të dhënë nga Ministria e Rendit Publik, në lidhje me akuzat e fundit që i janë faturuar zv.ministrit të këtij institucioni. Reagimi i Toskës vjen menjëherë pas deklaratës për shtyp të Berishës, i cili nuk hezitoi të deklaronte se dy nga ministrat e propozuar për qeverinë ishin me dosje penale. Sipas Berishës, një nga ministrat me precedent penal ishte edhe drejtuesi aktual i uniformave blu. Ndërsa ministrit të dytë nuk iu bë publik emri për ruajtje të sekretit shtetëror. Por të gjithë këto deklarata u hodhën poshtë nga Toska dhe ky i fundit e cilësoi si shpifje të radhës së Berishës. Sipas këtij të fundit, Toska ishte larguar nga Këshilli i Lartë i Drejtësisë për korrupsion. Ndërkohë që ky fakt u bë publik nga Berisha, vetëm disa ditë më parë, edhe pse Toska prej disa muajsh është drejtuesi kryesor i uniformave blu. Duket se Toska nuk ka ndërmend t`i kalojë lehtë këto akuza. Ai ka bërë publike se të hënën që vjen do të depozitojë padinë civile si ndaj Berishës ashtu edhe ndaj Palokës. Më pas të gjithë situatën e krijuar do ta gjykojë Gjykata e Faktit të Tiranës. Gjatë seancave të para gjyqësore do të bëhet publike edhe shuma që do të kërkojë Toska për dëmshpërblim moral pas këtyre akuzave që, sipas tij, janë shpifje. Ndërkohë që edhe pala tjetër që do të jetë e paditur do të ketë mundësi të parashtrojë provat për të vërtetuar akuzat e ngritura para disa ditësh në drejtim të zv.ministrit. Më pas do të jetë një nga gjyqtarët që do të gjykojë nëse Toska do të dëmshpërblehet nga Berisha dhe Paloka. Përveç kësaj do të sqarohet edhe nëse Toska ka qenë ndonjëherë i paditur në Gjykatën e Lartë për korrupsion.

Lesi kërkon bashkim me PD

Këshilli Kombëtar i Partisë Demokristiane ka vendosur dje që kryetari Nikollë Lesi të fillojë negociatat me Partinë Demokratike për bashkëpunim. “Ky këshill autorizon kryetarin Lesi të fillojë bisedimet me PD-në, për të lidhur marrëveshje të përbashkët, në mënyrë që vendi të shkojë drejt zgjedhjeve të parakohshme”, theksohet në një deklaratë të dalë pas punimeve të Këshillit Kombëtar. Në këtë mbledhje, drejtuesi demokristian, Lesi, theksoi nevojën e bashkimit të forcave të qendrës së djathtë dhe të partive të djathta, nëse këto të fundit realisht synojnë fitoren në zgjedhjet e ardhshme. Ndonëse kjo parti deklaroi dje se është e hapur për një bashkëpunim me selinë blu apo edhe partitë e tjera të spektrit të djathtë, ende nuk ka ndonjë reagim për pjesëmarrjen e saj në tryezën politike të së djathtës, e iniciuar nga kreu republikan, Mediu. Kjo heshtje lidhet edhe me faktin se iniciativa e mësipërme ende nuk është bërë e njohur për të gjitha partitë, pasi një pjesë e tyre janë njohur me këtë kërkesë nëpërmjet medias. Këshilli Kombëtar i PDK-së ka zgjedhur dje nënkryetar të partisë, Aida Joanidhi dhe Vladimir Bejën, ndërsa sekretar të përgjithshëm, Kolë Tonaj.

Të djathtët kërkojnë një qëndrim për rrëzimin e qeverisë së re
Opozita mbledhje para seancës
Do vendoset për votimin dhe unifikimin e së djathtës

Qëndrimi në parlament ndaj kabinetit të ri qeveritar, i cili pritet të marrë të hënën pasdite votën e deputetëve, do të mbledhë paraditen e po kësaj dite partitë e spektrit të djathë në një tryezë politike. Ideja e këtij takimi, të hedhur nga kryetari i Partisë Republikane, Fatmir Mediu, nuk ka gjetur mbështetjen e të gjitha partive të djathta. “Kjo tryezë është mëse e nevojshme, pasi opozita duhet të përcaktojë një qëndrim të qartë, jo vetëm për votimin në Kuvend, i cili mendoj se do të jetë kundër kabinetit të propozuar nga një kryeministër i dështuar si Fatos Nano, por edhe për hartimin e një platformne përballë kësaj situate politike, e cila e ka çuar vendin në një krizë të thellë”, tha Mediu. Por kësaj ftese deri tani i janë përgjigjur pozitivisht Partia Demokratike dhe Liberal Demokrate, si dhe Ballistët, ndërkohë që Legalistët ende nuk kanë dhënë ndonjë koment. Nga selia blu shprehet një gatishmëri për të marrë pjesë në këtë tryezë, pasi, sipas kësaj partie, askush nuk mund të shmanget përballë betejës me një qeveri të dështuar. Ndërsa Partia Demokrate është shprehur skeptike ndaj një tryeze të tillë, madje e ka refuzuar atë, pasi nuk ka një ide të qartë apo alternativë përse zhvillohet kjo mbledhje. “Ne kemi qenë dhe do të jemi pro të gjitha kërkesave që vijnë nga spektri i djathtë, të cilat i shërbejnë forcimit të saj. Por në këtë kërkesë, unë nuk shoh ide dhe alternativë të qartë se si mund të rrëzohet kjo qeveri. Mazhoranca nuk mund të bjerë me fjalë apo dëshira të shfaqura në tryeza, por me veprime konkrete, të cilat pa dyshim duan një bashkëpunim konkret mes gjithë spektrit të djathtë”, u shpreh kryetari i Grupit parlamentar të PDR-së, Nard Ndoka.

“Koalicioni për Integrimin Euroatlantik”, do të jetë aleanca më e re e PS-së me PSD-në, PBDNJ-në, PAD-në, PAA-në, PDS-në për qeverisje deri në fund të mandatit qeverisës.

Kjo marrëveshje është nënshkruar dje në Pallatin e Kongreseve në një tryzë ku ishin të pranishëm krerët e PS-së dhe pesë partive aleate të saj. Pas disa dështimeve në negociatat me këto parti, Nano ka mundur të mbledhë 11 votat e tyre në parlament, duke rritur shanset për votimin e qeverisë në Kuvend. Në mesditën e djeshme, Nano i shoqëruar nga Ruçi ka nënshkruar marrëveshjen në parim me krerët e këtyre pesë partive, ndërsa faza tjetër do të jetë nënshkrimi i marrëveshjes bilaterale të PS-së me secilën prej pesë partive aleate në “Koalicionin për Integrim”. I pari që ka nënshkruar marrëveshjen bilaterale me PS-në ka qenë PSD-ja. Menjëherë pas përfundimit të tryezës ku u arrit marrëveshja, Nano ka pritur në Vilën 30 kryetarin e PSD-së, Skënder Gjinushi, ku kanë nënshkruar marrëveshjen bilaterale mes dy partive. “Të përbëjnë boshtin politik të koalicionit të ri qeverisës të emëruar ‘Koalicioni për Integrim’. Ky koalicion të shtrihet në të gjitha nivelet nga pushteti qendror deri tek ai vendor në të gjithë territorin e vendit, sipas marrëveshjeve përkatëse”, thuhet në tekstin e marrëveshjes PS-PSD, e nënshkruar dje në mesditë nga kryetarët e këtyre dy partive. Partitë e tjera aleate do të nënshkruajnë marrëveshjen e tyre bilaterale me PS-në në fillim të vitit të ardhshëm, pasi të jenë krijuar kushtet që PS-ja të mund t’i përmbahet marrëveshjes, duke i dhënë postet e premtuara partive aleate.

Marrëveshja
Marrëveshjen e nënshkruar dje prej krerëve të këtyre partive është rënë dakord që të ndërrohet emërtimi i “Aleancës për Shtetin” në “Koalicioni për Integrim”. Është vendosur që koalicioni të mbështetet nga anëtarët e këtij koalicioni për vazhdimin e reformave që i shërbejnë integrimit euroatlatik si dhe për të fituar një mandat të ri në zgjedhjet e 2005-ës. Objektiv kryesor i kësaj marrëveshje është përcaktuar: ”Nënshkrimi i marrëveshjes së Stabilizim-Asociimit të Shqipërisë me Bashkimin Evropian dhe anëtarësimi i saj në NATO” dhe “Objektivi afatgjatë i koalicionit është anëtarësimi i Shqipërisë në Bashkimin Evropian”. Në marrëveshjen e nënshkruar dje mes PS-së dhe pesë partive aleate të saj është rënë dakord që: ”Anëtarët zbatojnë disiplinën politike të vendimmarrjes së përbashkët për çështje prioritare dhe politike të ‘Koalicionit për Integrim’”. Menjëherë pas nënshkrimit të marrëveshjes, krerët e partive të vogla aleate të PS-së janë shprehur optimistë për këtë marrëveshje, megjithë rezervat që kanë shfaqur pak ditë para nënshkrimit të marrëveshjes. “Ishte i nevojshëm, i domosdoshëm për kalimin e situatës”, ka deklaruar nënkryetari i PSD-së, Gaqo Apostoli, i cili ishte i pranishëm në ceremoninë e nënshkrimit të marrëveshjes. Kreu i PBDNJ-së, i cili ka qenë i pari aleat që nuk ka shkaktuar probleme gjatë procesit të negociatave, e shikon këtë marrëveshje si marrëveshje interesash: ”Marrëveshjet dypalëshe janë marrëveshje interesash, në radhë të parë rëndësinë e tyre kanë marrëveshjet në parim”, tha Dule. “Ishim skeptik, sepse ende nuk kishim negociuar me PS-në dhe nuk mund të jepnim pëlqimin tonë për marrëveshjen pa negociuar”, tha kryetari i PDS-së, Paskal Milo, pas nënshkrimit të marrëveshjes për bashkëpunim në aleancën e re “Koalicioni për Integrim”. Kryetari i PAA-së i është shmangur komenteve për nënshkrimin e marrëveshjes, ndërsa kreu i PAD-së, Neritan Ceka, e vlerësoi tryezën e djeshme arritje për koalicionin e ri qeveritar.

Sa fitojnë aleatët

1. PSD
   Një ministri (Ministrinë e Punës dhe Çështjeve Sociale), tre zëvendësministra, një prefekt, një sekretar të përgjithshëm të prefekturave, një drejtor të përgjithshëm funksion politik
   
2. PBDNJ
   Një ministër (ministri i Shëndetësisë) dy zëvendësministra, drejtor drejtorish, prefekt
   
3. PAD
   Tre zëvendësministra, një drejtor të përgjithshëm, i cili do të jetë post politik, drejtor drejtorish dhe prefekt
   
4. PAA
   Tre zëvendësministra, drejtor i përgjithshëm, post politik dhe prefektë
   
5. PDS
   Dy zëvendësministra, drejtor të përgjithshëm, prefekt, poste të tjera në pushtet vendor

Presidenti do të japë OK për emrat e rinj para seancës në Kuvend

Presidenti Moisiu do të dekretojë emrat e rinj të kabinetit qeveritar për t’i dërguar ato mëngjesin e ditës së nesërme në parlament. Dita e hënë kur pritet të shkojnë dekretet e Presidentit në parlament është edhe afati i fundit për mbledhjen e seancës parlamentare të votimit të qeverisë. Që në momentin e mbërritjes në Presidencë të listës me emrat e rinj të qeverisë, kreu i shtetit i është drejtuar organeve kompetente për të verifikuar figurën e ministrave të rinj. Ai nuk ka marrë ende një përgjigje prej tyre dhe është në pritje për të përfunduar kjo procedurë dhe për t’i hapur rrugën procesit konkret të dekretimit të ministrave të rinj të kabinetit qeveritar, që do të drejtohet nga Fatos Nano. Gjatë këtyre ditëve që emrat e kabinetit të ri ndodhen në Presidencë, ka patur edhe konsultime mes institucionit të Presidencës dhe atij të Kryeministrisë në lidhje me figurat e reja që do të drejtojnë Ekzekutivin shqiptar. Kryeministri Nano ka sinjalizuar herë pas here kreun e shtetit, që ky i fundit të përshpejtojë procedurat e dekretimit në mënyrë që qeveria e re të miratohet në parlament para Vitit të Ri. Sekretari i përgjithshëm i PS-së, Gramoz Ruçi, tha dje se nuk pritet ndonjë surprizë nga ana e Presidentit të vendit, pasi nuk ka arsye kushtetuese të ndodhë një gjë e tillë. Ai tha se është detyrë e Presidentit të dekretojë ministrat: ”Nuk kam se ç’të pres ndonjë surprizë për arsye se kam besim te përmbushja e detyrës së Presidentit, që detyra e tij është në përputhje me Kushtetutën dhe, sipas Kushtetutës, Presidenti do të përcjellë dekretet e propozuara nga Kryeministri në seancën e Parlamentit”, tha Ruçi. Presidenti ka në dispozicion të tij shtatë ditë kohë për të dekretuar qeverinë, ndërsa kanë kaluar vetëm tre ditë të këtij afati, pritet që sot ai të dekretojë kabinetin e ri, në mënyrë që të votohet nesër në parlament në një seancë të jashtëzakonshme. Gjithashtu thuhet se Presidenti Moisiu ka kundërshtuar përsëri kërkesën e Nanos që ministrat e dekretuar të fillojnë menjëherë punë, duke bërë betimin nga Presidenti.

Moisiu: Unë, presidenti pa gazetë

Presidenti Alfred Moisiu festoi mbrëmë me gazetarët festat e fundvitit, me pjesëmarrjen e përfaqësuesve të medias së shkruar dhe audiovizive. Në fjalën e tij përshëndetëse, zoti Moisiu theksoi se ai e konsideronte këtë një takim jo zyrtar. Me nota humori ai u shpreh se ai ishte një “president pa gazetë”, duke nënkuptuar se pjesa tjetër e lidershpit kishte median e vet influenciale. Më pas zoti Moisiu tha se median e kishte këshilltarin numër një dhe se ai vlerësonte lart punën që ka bërë media gjatë këtij viti. Më pas zoti Moisiu u takua me gazetarët duke shkëmbyer pikpamje të lira për problemet e medias, rolin e saj në zhvillimet e brendshme politike, ekonomike, sociale dhe për çështjet e sigurisë e integrimit. Presidenti theksoi se ishte shumë e rëndësishme për vendin një media e lirë dhe e pavarur, një media jashtë ndikimeve politike dhe presioneve të ndryshme.