Kreu demokrat, Berisha, është i vendosur që të bllokojë të gjithë seancat parlamentare, nëse Kryeministri Nano nuk do të shkarkohet.

“Kryetari i Parlamentit, Servet Pëllumbi, të ndërhyjë urgjentisht pranë Presidentit të Republikës, që të shkarkojë Kryeministrin, nëpërmjet votëbesimit, ndryshe do të bllokojmë seancat si në rastin e komisionit ‘anti-Rama’”. Kështu ka “kërcënuar” dje gjatë seancës plenare lideri demokrat Sali Berisha, ku nuk ka pritur sa t’ia jepte fjalën Pëllumbi, por direkt i është drejtuar podiumit. Ndërkohë, ai ka uruar disi me ironi edhe anëtarësimin e PS-së në Internacionalen Socialiste, teksa deputetët “rozë” shoqëruan me duartrokitje urimet e Berishës.

Akuzat
Kreu i PD-së, i ka anashkaluar shumë shpejt “komplimentet”, duke u shprehur se, “qeveria ka shkelur nenin 100 dhe 102 të Kushtetutës, duke qenë se po lë dy zëvendësministra të drejtojnë ministritë. Kryeministri Nano të japë dorëheqjen, pasi është rrëzuar tri herë në parlament dhe, kjo mjafton të vërtetojë se ai ka humbur votëbesimin”. Berisha nuk e ka ndërprerë fjalën edhe pas vërejtjeve të njëpasnjëshme të Pëllumbit, derisa ky i fundit deklaroi se, “ne kemi detyrën tonë si institucion dhe nuk përzihemi me institucionet e tjera. Unë kam kontaktuar me Presidentin dhe do të vijoj të kontaktoj, por nuk do t’i kërkoj shkarkimin e Kryeministrit, pasi nuk është e drejtë e tij”. Megjithatë, shefi demokrat, nuk ka pranuar që të ulet dhe teksa ka hedhur sytë drejt deputetëve socialistë, që deklaruan votën kundër dekreteve të Presidentit Moisiu në parlament, tha se, “unë e di se nuk e kishit inatin me Namik Doklen apo me Fatmir Xhafën, por me Nanon, sepse ai është një tiran. Ministria e Jashtme dhe ajo e Rendit, nuk ka më urdhra e udhëzime, sepse nuk ka se kush t’i firmosë ato”.

Debati
Në këtë pikë, kur situata po shkonte gjithnjë e më shumë drejt acarimit, ka qenë sekretari i Përgjithshëm, Gramoz Ruçi, i cili i ka kërkuar Berishës që të hartojë mocionin e mosbesimit, nëse ka dëshirë që të shkarkojë Nanon dhe të mos përzihet me deputetët e PS-së. “Variantin që pozita t’i dhurojë pushtetin opozitës, harrojeni të dashur opozitarë. Keni një rrugë të dytë ta fitoni me mjete demokratike, keni dhe një rrugë tjetër që do ta krihni, siç keni deklaruar ju zoti Berisha në Rinas, me vinç, me top, me mitraloz. Besoj që kanë perënduar këto kohë. Ju ftojmë që të përdorni mjetet institucionale, provoni Kushetutën. Mos i bëni presione politike Presidentit, sepse ai është institucioni i unitetit të vendit”, tha Ruçi. Sipas tij, do të ishte gabimi më i madh i opozitës nëse do të ngatërronte edhe Presidentin e Republikës në këtë mes. Kaq është dashur dhe Berisha nga emra të përgjithshëm, ka kaluar në ato të përveçëm, por duke “sulmuar” tashmë ministrin e Ekonomisë, Arben Malaj, për mashtrim. “Ti gënjen, se nuk ke nënshkruar asnjë lloj marrëveshjeje me FMN-në, sepse për shkak të krizës në qeverinë tuaj, FMN-ja ju ka lënë jashtë investimeve”, deklaroi lideri demokrat, i cili ka hasur ende pa mbaruar akuzën në kundërpërgjigjen e Malajt. Ai ka mohuar ndërprerjen e marrëdhënieve me FMN-në, pasi qeveria është në funksionim normal. Berishës i ka ardhur në ndihmë edhe kryetari i Grupit parlamentar, Bamir Topi, i cili theksoi që, “fillimisht të nxirret qeveria nga kriza, pasi ne jemi të bindur që ajo është në një pozicion të tillë, duke këmbëngulur në dorëheqjen e Nanos”.

Protesta ndaj errësirës në Kuvend
Opozita ndez qirinj për Shkodrën

Qirinjtë e ndezur për Shkodrën “ndriçojnë” edhe sallën e deputetëve në mes të ditës. Krejt ndryshe nga ç’pritej, në një moment kur Kuvendi po “plaste” nga debatet e ashpra mes socialistëve dhe demokratëve për ministrat që mungojnë, ish-kryetari i parlamentit, Pjetër Arbnori, ka devijuar gjithë replikat, duke përqendruar vëmendjen tek energjia e munguar në Shkodër. “Qeveria po mban një qëndrim politik ndaj qytetit të Shkodrës, që në çastin kur në këtë zonë fitoi kandidati demokrat për kryetar bashkie, Artan Haxhi”. Sipas tij, në këtë qytet, mbi 86 për qind e banorëve e paguajnë energjinë elektrike që konsumojnë. Arbnori u shpreh se, “diskriminimi në Shkodër vjen, pasi socialistët nuk mundën që ta marrin dot bastionin e demokratëve. Ndaj edhe protestat që po bëjnë bashkëqytetarët e mi janë krejt të drejta dhe të ligjshme. Shkodra nuk është qyteti i vetëm që nuk paguan 100 për qind energjinë elektrike, e megjithatë është ndëshkuar deri në racizëm”. Ai ka kërkuar marrjen e masave të menjëhershme si dhe furnizimin me energji elektrike njëlloj si kryeqyteti, ose të paktën me kufizime në një masë të konsiderueshme. Arbnori ka premtuar se do ta ndjekë sërish me fanatizëm këtë problem dhe nuk do t’i ndahet parlamentit, derisa të marrë zgjidhjen që dëshiron. “Shkodra ka vetëm 6 orë drita në 24 orë, madje shpeshherë edhe me ditë të tëra mungon energjia elektrike. Nuk duhet harruar se dimri është përpara dhe shkodranët të mos diskriminohen”, ka përfunduar fjalën e tij Arbnori.

Askush nuk përgjigjet
Lesi: Dua interpelancë, por nuk ka ministra

Kryetari i Partisë Demokristiane, deputeti Nikollë Lesi, i ka lënë dje gjatë seancës parlamentare të gjithë deputetët me gisht në gojë, teksa komentoi diçka shumë interesante përsa u përket vendeve bosh në drejtimin e dy ministrive. “Nëse unë dua të bëj interpelancë me ministrin e Rendit Publik apo ministrin e Jashtëm, kujt do t’i drejtohen pyetjet e mia dhe nga kush duhet që të marr përgjigjet që dua?!”, u shpreh Lesi. Sipas tij, çdo deputet mund të ketë vënë re shumë gjëra që nuk po funksionojnë si duhet në këto dy ministri, po nuk kanë se me kë të bëjnë interpelancë, ashtu siç veprohet normalisht. Kjo deklaratë e Lesit, ka bërë që të pushojnë të gjitha debatet gjatë seancës, madje, duke ndryshuar edhe temën e diskutimeve, kurse disa deputetë të tjerë bënë sikur nuk dëgjuan asgjë, por vijuan të “kapen” me Berishën.

Reagon kreu i PLL-së, Spahia
“Afat për dëmshpërblimin e ish-të përndjekurve”

Kreu i Partisë Lëvizja e Legalitetit, Ekrem Spahia, u ka dalë në mbrojtje në parlament ish-të burgosurve dhe të përndjekurve politikë, ndërkohë që këta të fundit ishin në minutat e para të protestave. Ai i ka propozuar kryetarit të parlamentit, Servet Pëllumbi, që të vihet në plan të parë dëmshpërblimi i ish-të përndjekurve dhe burgosurve politikë, pastaj të kalohet në çështje të tjera. “Të përndjekurit kanë filluar sërsish nga protestat. Ju nuk jeni i përgjegjshëm zoti Pëllumbi, sepse ju nuk caktoni një afat konkret për dëmshpërblimin e atyre njerëzve”, u shpreh Spahia, ku menjëherë hasi në reagimin e kryetarit të parlamentit. “Ne e kemi bërë kërkesën institucionale dhe ia kemi drejtuar qeverisë, nga ku dhe jemi në pritje të një përgjigjeje”, u përgjigj Pëllumbi.