Copyright © 2001 Albanian Telegraphic Agency! Inc. All rights reserved.

 

---

 

5 Mars, 2003 Copyright 2002 Shekulli

Kreu i partisë shqiptare, partnere në qeverinë maqedonase, Ali Ahmeti viziton për herë të parë Kosovën

Ahmeti e Shtajner: Të normalizojmë marrëdhëniet

Përfaqësuesi zyrtar i shqiptarëve të Maqedonisë takohet e diskuton me liderët politikë të Kosovës

PRISHTINË – Qëllimi i vizitës dhe i bisedimeve me Mihail Shtajner ishte normalizimi i marrëdhënieve ndërmjet Maqedonisë dhe Kosovës. Kështu u shpreh dje lideri i Bashkimit Demokratik për Integrim Ali Ahmeti, pas takimit me kryeadministratorin e Kosovës, Shtajner në Prishtinë. Sipas Ahmetit, në takim është biseduar për disa çështje konkrete, siç është rasti për lëvizjen e lirë të njerëzve, zhvillimin e ndërsjelltë ekonomik, pastaj për çështjet me të cilat ngarkohen qytetarët, siç janë: taksat, lëvizjet tregtare, transporti. Në vizitën e tij të parë zyrtare në Kosovë, kryetari i BDI-së, Ahmeti, pas konfliktit shtatëmujor dhe pjesëmarrjes në qeverinë e Maqedonisë është takuar edhe me udhëheqësit e institucioneve vendore të Kosovës, dhe liderë partiakë. Kryetari i Kosovës Ibrahim Rugova tha pas takimit me Ahmetin se e çmon lart rolin e tij për forcimin dhe krijimin e stabilitetit, paqes dhe bashkëpunimit me Maqedoninë. Rugova tha se gjithsesi do të ketë një bashkëpunim të ngushtë mes BDI-së, institucioneve maqedonase dhe institucioneve të Kosovës, në mënyrë që të kemi marrëdhënie të mira fqinjësore. Ai tha se ishte kënaqësi dhe gëzim i veçantë, që priti kryetarin e BDI-së, Ali Ahmetin dhe që pas zgjedhjeve të fundit parlamentare në Maqedoni, shqiptarët marrin pjesë në Parlament, qeveri dhe strukturat shtetërore të Maqedonisë.
Rugova tha se e njoftoi Ahmetin me progresin e arritur në Kosovë, me objektivat si zhvillimin ekonomik, privatizimin… Ndërsa në Maqedoni është vendosur një bazë e mirë, në kuadrin e marrëveshjes së Ohrit e cila po realizohet gjithnjë e më shumë, tha ai.
Në Maqedoni me 13 gusht 2001 është nënshkruar një marrëveshje për pajtimin mes dy komuniteteve më të mëdha, në bazë të së cilës shqiptarët dukshëm po përmirësojnë statusin politik brenda vendit. Ndërsa kryetari i BDI-së, Ali Ahmeti tha se BDI-ja është parti që merr pjesë në shtet dhe e shfrytëzoi rastin që Rugovën ta njoftonte së afërmi për marrëveshjen e Ohrit dhe proceset që po zhvillohen në Maqedoni.
Ai tha se me Rugovën ranë dakord që ky bashkëpunim të intensifikohet edhe më shumë, sepse është në të mirë të dy vendeve në të gjitha drejtimet si kulturore, ekonomike si dhe bashkëpunim politik ndërpartiak. "Në një të ardhme të afërt mendojmë që presidentin Rugova ta kemi mysafir në Maqedoni", -tha Ahmeti.
Nexhat Daci, kryetar i Kuvendit të Kosovës tha se Kuvendi, praktikisht, i ka hapur sot dyert për bashkëpunim me parlamentet e vendeve fqinje dhe ato të vendeve të tjera dhe se është kënaqësi e veçantë që kjo hapje bëhet në një mënyrë shumë simbolike me parlamentarët e Maqedonisë. Ai tha se kishin pikëpamje të njëjta mbi çështjet e stabilizimit dhe zhvillimit ekonomik në rajon dhe kontributet që dy palët duhet t'u japin proceseve në zhvillim të demokracisë dhe ekonomisë.
Ali Ahmeti gjatë vizitës së tij u takua edhe me kryetarin e Partisë Demokratike të Kosovës (PDK) Hashim Thaçin. Ai tha se është i gëzuar që pas disa vitesh takohet me shokët e tij dhe të diskutojë, të bashkëbisedojë për hallet, për problemet e përbashkëta që kanë. Kryetari i PDK-së Hashim Thaçi u shpreh se ishte kënaqësi e veçantë që takohet me mikun e tij të vjetër dhe mikun e së ardhmes. "Kemi biseduar për zhvillimet në Kosovë, Maqedoni, për bashkëpunimin ndërpartiak, na gëzon e dhëna se në Maqedoni ka gjithnjë e më tepër stabilitet", -tha ai. Thaçi tha se beson që ka hapësirë të mjaftueshme dhe ligjore, por edhe vullnet nga të dyja palët, që të fillohet bashkëpunimi mes autoriteteve, ku ai është i bindur se një rol të rëndësishëm në këtë bashkëpunim do të luajë BDI-ja.