Ministri shqiptar i Mbrojtjes dhe homologu i tij maqedonas firmosin Memorandumin e Mirëkuptimit.

Ministri shqiptar i Mbrojtjes dhe homologu i tij maqedonas firmosin Memorandumin e Mirëkuptimit.

Majko-Buçkovski: AKSH nuk ekziston

Majko: “Nuk jemi këtu të konfirmojmë emrin e ndonjë armate që del në internet”

TIRANË - Ministrat e Mbrojtjes së Shqipërisë dhe të Maqedonisë nënshkruan dje marrëveshjen e mirëkuptimit dhe të bashkëpunimit ushtarak dypalësh. Të dy homologët, Majko e Buçkovski kanë firmosur Memorandumin e Mirëkuptimit midis dy dikastereve respektive. Në këtë memorandum përfshihen vendosja e sistemit të komunikimit midis dy ministrive e shtabeve për zhvillimin e “Stërvitjeve të përbashkëta, trajnimeve, ngritje ekipeve të eksperteve, bashkëpunimi me njësitë fqinje. Objektivi final i këtij “Memorandumi” është anëtarësimi i Shqipërisë dhe i Maqedonisë në NATO. Në muajin mars të këtij viti parashikohet që trupat shqiptare të hyjnë në Maqedoni, me qëllim zhvillimin e një stërvitjeje të përbashkët ushtrake. Në qendër të takimit Majko-Buçkovksi ishte intesifikimi i mëtejshëm i bashkëpunimit në fushën e mbrojtjes dhe të sigurisë, duke hartuar e zbatuar plane të përbashkëta vepruese sipas angazhimeve dhe rekomandimeve të samitit të Pragës të NATO-s. “Ne sot firmosëm Memorandumin e Mirëkuptimit dhe u rakorduam për një varg veprimtarish të përbashkëta. Ju siguroj se në të ardhmen do të ketë takime shumë të shpeshta, sepse jemi fqinj e do të vemë e do të vijmë shpesh tek njëri-tjetri Në muajin mars do të ketë një stërvitje ushtarake ku do të shkojnë forcat ushtarake shqiptare në Maqedoni dhe siç do të ketë edhe në Shqipëri një stërvitje ku do të marrin pjesë forca ushtarake maqedonase, kjo do t’i shërbejë familjarizimit të strukturave ushtarake. E veçantë do të jetë ftesa e komandantit të KFOR-it dhe Gjeneral Agim Çekun të TMK-së, për të diskutuar edhe problemin e kufirit që do të organizohet nga NATO”,-tha Majko në konferencën e djeshme për shtyp. Ndërsa ministri maqedonas Buçkovksi e cilësoi këtë memorandum si një promovim i një aleance mes dy shteteve. “Së pari shpreh kënaqësinë për takimin e të gjitha këto aktiviteteve me këtë Memorandum që ne firmosëm, se si do të bashkëpunojnë 2 shtetet që të promovojnë një aleancë në këtë pjesë të Europës, e cila do të stabilizojë edhe bashkëpunëtorët tanë, duke zhvilluar stërvitjen e përbashkët ushtarake. Në Krivanllak do të shkëmbejnë informacione kundërzbuluese dhe sekrete dhe mund të them se nuk ka çështje që mund t’i ngarkojë marrëdhëniet tona, madje ne do të jemi model edhe për shtetet e tjera të rajonit”,-tha Buçkovksi.

AKSH-ja
Një nga çështjet më insistuese për median maqedonase ka qenë deklarata e hedhur nga Buçkovksi për stërvitjen e trupave të AKSH-së në Shqipëri. Gazetarët maqedonas kanë këmbëngulur në këtë pikë, duke i kërkuar shpjegime si Buçkovskit, ashtu edhe Majkos. “Në këtë moment nuk mund të pohoj se ka armatë shqiptare në Maqedoni, madje ajo që ndodhi javën e kaluar në Strugë, kurrë nuk duhet mohuar, atë që mund të jetë në kërkim për destabilitet të shtetit. Unë besoj se në këtë moment nuk ka asnjë rrezik për destabilizim të shtetit. Nuk mund të konfirmoj nëse ka trupa të AKSH-së në Shqipëri”,-tha dje Buçkovski. Ndërsa ministri shqiptar i Mbrojtjes ka hedhur poshtë këto hipoteza, duke e cilësuar si një vepër e mediave. “Ne nuk kemi ardhur sot këtu të konfirmojmë ekzistencën e ndonjë armate që del në internet. Ju duhet ta kuptoni se në mars ushtarët shqiptarë do të shkojnë në Maqedoni. Nuk e them as për publicitet e as për reklamë por kjo bëhet nga dy vende që janë të vendosur të shkojnë në NATO. Jam i kënaqur nga përgjigja që mora nga kolegu im dhe kjo është edhe një përgjigje ndaj disa mediave që e trajtojnë ndryshe këtë problem”,-theksoi Majko për këtë çështje. Më pas të dy ministrat Majko e Bushkovski kanë kaluar një drekë pune, për të pritur takimin e orës 16.00 në Drilon me ministrin e Rendit, Luan Rama dhe ministrin e Brendshëm maqedonas Hari Kostov
Bardhyl Berberi

Ministri i Rendit, Luan Rama takon në Strugë homologun maqedonas, Kostov

Rama: Nuk ka baza të AKSH-së në Shqipëri

TIRANË- Në Shqipëri nuk ekzistojnë baza stërvitore të grupeve të Armatës Kombëtare Shqiptare. Ministri i Rendit, Luan Rama ka dhënë këtë deklaratë pas takimit me homologun e tij maqedonas, Hari Kostov. “Unë dua t’i siguroj gazetarët maqedonas se në Shqipëri nuk ka grupe të AKSH-së, as në Tropojë, as në Kukës apo Peshkopi. Kjo është kategorike, në asnjë cep të Shqipërisë nuk përgatiten grup të AKSH-së, sepse në Shqipëri asnjë shqiptar nuk do që në Maqedoni të ketë destabilitet”,-tha ministri Rama për median e pranishme. Ministri maqedonas Kostov ka shprehur kënaqësinë e tij në lidhje me një deklaratë të tillë, duke u shprehur se “ideja e një Shqipërie të madhe që propagandohet tepër është e vjetër dhe se s’ka asnjë bazë”. Të dy ministrat e Rendit të vendeve fqinje kanë ranë dakord për të bashkëpunuar në luftën e të gjitha llojeve të krimit. Për këtë Rama dhe Kostov kanë pranuar idenë e krijimit të një forumi të përbashkët mes ministrave të Rendit të rajonit të Ballkanit, me qëllim për të luftuar krimin e organizuar, si dhe në shkëmbimin e listave të personave të kërkuara për të dy vendet. “Ramë dakord me homologun tim Rama, që së bashku të luftojmë trafiqet dhe të ruajmë të paprekur stabilitetin e rajonit të Ballkanit”,-tha Kostov në konferencën e djeshme dhënë në rezidencës qeveritare “Gorica”. Ministri shqiptar e ka mbështetur këtë deklaratë të tij duke u shprehur se “Do të punojmë së bashku dhe do të këmbejmë të gjitha informacionet për çdo individ që mund të rezultojë si implikuar dhe që mund të tentojë të bëhet pjesë e atyre forcave që tentojnë të bllokojme procesin e stabilizimit”. Ndërsa për vrasjet në kufi, ministri maqedonas ka argumentuar se ato kanë ndodhur për të ulur ndjeshëm numrin e kalimit të paligjshëm të kufirit maqedonas. “Ato vrasje që janë bërë kanë ndikuar në uljen e kalimit të paligjshëm të kufirit. Kështu unë po ju sjell një shifër, në vitin 2001 kishte 1200 kalime të paligjshme të kufirit, ndërsa në vitin 2002 kjo shifër zbriti në 879”,-theksoi Kostov. Rama, fillimisht së bashku me stafin e tij, ka ndaluar në komisiariatin e Policisë së Strugës, për të pritur homologun e tij, Kostov. Të dy ministrat pas takimit paraprak kanë shkuar për një vizitë në Gjykatën e Strugës, ku një javë më parë u krye një shpërthim eksplozivi me telekomandë. Ministri maqedonas ka shprehur vlerësimet e tij për qëndrimin e mbajtur nga qeveria shqiptare, e cila e ka dënuar këtë akt të rëndë. Rama ka takuar më pas kryetarin e Partisë Bashkimi Demokratik për Integrim, Ali Ahmetin. Në të merrte pjesë edhe zv/ministri i Rendit i qeverisë maqedonase, Fatmir Behari, njëkohësisht edhe anëtar i BDI-së. Biseda mes Ramës dhe Ahmetit është përqëndruar në zbatimin e marrëveshjes së Ohrit, në rolin që luajnë partitë politike shqiptare, ku në plan të parë ka dalë konstruktiviteti i tyre.
Bardhyl Berberi

BalkanWeb - http://www.balkanweb.com/

 

Rama pas takimit me Kostov: Nuk ekzistojnë kampe për grupe të AKSH (UPDATE)

Lajmi i ores 3:30 PM

Luan Rama OHER (22 Shkurt) - "Qendrimi ynë i përbashkët është se cfarëdolloj ideje për Serbinë, Shqipërinë apo Maqedoninë e Madhe, i takojnë së kaluarës dhe nuk gjejnë mbështetje as nga zyrtarët e Shkupit dhe as nga ata të Tiranës". Kështu u shpreh sot pas takimit me ministrin e Rendit Publik Luan Rama, ministri maqedon i Mbrojtjes Hari Kostov. Sipas tij rruga e vetme për bashkëpunim mes dy vendeve fqinje është rruga drejt integrimit euroatlanitik. Ndërsa nga ana e tij ministri shqiptar Rama përveç vlerësimeve të integrimit të faktorit politik shqiptar në Maqedoni ka hedhur poshtë njoftimet e fundit se në Shqipëri ekzistojnë kampe ku stërviten grupe të Armatës Kombëtare Shqiptare. " Në vendin tim nuk ka asnjë grup, që punon për të stimuluar destabilitet ose veprimtari kriminele në rajon", u shpreh Rama. Ndërkohë Kostov ka deklaruar se nuk ka gjasa që në këtë vit të ketë një ofensive pranverore, e cila mund ta çonte vendin edhe një herë në konfliktin e vitit 2001. Ministri Rama në vazhdim të deklaratave të përbashkëta tha se mes tyre është arritur një marrëveshje për bashkëpunim mes Shqipërisë dhe Maqedonisë për të ruajtur stabilietetin në rajon. "Do te punojme se bashku dhe do të këmbejmë te gjitha informacionet per cdo individ qe mund te rezultojë si implikuar dhe qe mund te tentoje te bëhet pjese e atyre forcave që tentojnë të bllokojme procesin e stabilizimit", tha Rama. Mësohet se gjatë qëndrimit të të Ministrit të Strugë, ka patur edhe një takim me liderin e Bashkimit Demokratik për Integrim, Ali Ahmeti ku është diskutuar për zhvillimet më të fundit në vend dhe zbatimin e Marrëveshjes së Ohrit. zh/ko (BalkanWeb)

---

GAZETA55 - 23/02/2003 http://www.gazeta55.com/

Ministri maqedonas i Mbrojtjes nuk shprehet zyrtarisht për ekzistencë të AKSH‑së

Ministri maqedonas i Mbrojtjes, Vlado Buçkovski, në një takim zyrtar që zhvilloi sot (e Shtunë) në Pojskë të Pogradecit, nuk pranoi zyrtarisht ekzistencën e të ashtuquajturës Armatë Kombëtare Shqiptare (AKSH) në vendin fqinj.

I pyetur nga gazetarët, ministri maqedonas i Mbrojtjes Buçkovski, tha se "në këtë moment nuk mund të pohoj se në territorin e Maqedonisë egziston një armatë e tillë".

Por, ai la të kuptohet se nuk e mohon plotësisht ekzistencën e ndonjë veprimtarie ilegale ushtarake, kur u shpreh në vazhdim se "duke dëgjuar atë çfarë ndodhi javën e kaluar në Strugë, mund të them se kjo mund të jetë kërcënim për stabilitetin në rajon".

Ai përfundoi përgjigjen e tij duke u shprehur se, "tani për tani nuk ka kurfarë kërcënimi dhe rreziku për stabilitetin në rajon".

Edhe ministri shiptar i Mbrojtjes, Pandeli Majko, mohoi ekzistenën e ndonjë force ushtarake të pakontrolluar në Maqedoni, duke i konsideruar njoftimet e përhapura një ditë më parë "si spekulime të mediave dhe internetit".

Takimi Majko‑Buçkovski në Pogradec u realizua për nënshkrimin e një "Memorandum Mirkuptimi" midis Ministrive të Mbrojtjes së Shqipërisë dhe Maqedonisë.

"Me nënshkrimin e Memorandumit të sotëm, krerët e dikastereve të mbrojtjes të të dy vendeve që i bashkon jo vetëm aspirata e përbashkët, integrimi në strukturat Euroatlantike të sigurisë, por edhe të qënit fqinjë kufitarë, dëshmuan pajtueshmërinë e tyre të plotë për stabilitetin në rajon, pengimin e konflikteve, ruajtjen e paqes të demokracisë dhe të drejtave njerëzore", deklaroi zëdhënësja e Ministrisë së Mbrojtjes, Mariana Zegali.                 

 

---

Faqja 4 - POLITIKE Shkurt 23, 2003 http://www.balkanweb.com/gazeta/gazeta.htm

 

Nënshkruhet memorandumi mes ushtrive shqiptare dhe maqedonase

Majko-Buçkovski: AKSH nuk ekziston

Roland Beqiraj

POGRADEC

Ministrat e Mbrojtjes të Shqipërisë dhe Maqedonisë, Majko dhe Buçkovski, mohuan dje ekzistencën zyrtare të të ashtuquajturës AKSH (Armata Kombëtare Shqiptare). Dy ministrat janë takuar dje në Pojskë, (Pogradec) dhe e kanë diskutuar këtë çëshjtje.

Majko dhe Buçkovski nënshkruan dje një memorandum mirëkuptimi mes ushtrisë shqiptare dhe asaj maqedonase. Palët ranë dakord për vendosjen e sistemit të komunikimit midis dy ministrive dhe dy shtabeve për kryerjen e stërvitjeve të përbashkëta, ngritjen e grupit të ekspertëve si dhe planifi-kimi i aktiviteteve të ndryshme për trainim për luftë të përbashkët kundër trafiqeve të organizuara dhe terrorizmit.

AKSH
Pas nënshkrimit të memorandumit ministrat duket se kanë trajtuar edhe çështjen e AKSH-së. Duket se Majko e ka bindur Buçkovskin se s'ka asnjë ushtarak shqiptar në të ashtuquajturën AKSH dhe se një strukturë e tillë edhe nëse egziston një e tillë s'ka asnjë mbështetje nga Shqipëria. "Kjo strukturë, edhe nëse egziston, është një thikë pas shpine për shqiptarët", tha Majko dje në lidhje me këtë çështje. Ndërsa ministri i Mbrojtjes i Maqedonisë, Vlado Buçkovski, i pyetur për qëndrimin zyrtar të ekzistences së AKSH-së në Maqedoni, u përgjigj: Në këtë moment nuk mund të pohoj se ekzistoin një armatë e tillë në territorin e Maqedonisë, por duke dëgjuar ato çfarë ndodhën në Strugë javën e kaluar, mund tu them se ngjarje të tilla mund të jenë kërcë-nime për stabilitetin në vend. Por momentalisht nuk ka kurrëfarë kër-cënimi dhe rreziku për të destabilizuar Maqedoninë. Pas tij Majko tha se një armatë e të tillë është spekullim i mediave dhe të një lufte vizuale në internet. "Të dy vendet tona janë të vendosur ti bashkojnë forcat kundër të gjithë atyre që mundohen të destabilizojnë rajonin", tha Majko.