4 Prill, 2003

Pas bisedimeve Simitis-Nano, flet kreu i shoqatës “Çamëria”. Pronat në Greqi, 2,5 milionë USD

“Çamëria”: Duam kthimin e pronave, jo kompensim

Kryetari Selman Sheme: Kërkojmë riatdhesimin e çamëve. Kompensimi është tradhti ndaj çështjes

TIRANË – Kryetari i shoqërisë politike-atdhetare “Çamëria”, Selman Sheme deklaroi dje, se çamët kërkojnë kthim fizik të pronave dhe jo kompensim të tyre. I pyetur nga “Shekulli”, lidhur me deklaratën e një dite me parë të kryeministrit grek Kosta Simitis, Sheme e cilësoi si një deklaratë që tregon një lloj evoluzioni të politikës greke drejt njohjes së disa të vërtetave historike. Por, tha ai kryesia e shoqërisë në emër të të gjithë çamëve do të besojë se ka nisur t’i jepet rrugëzgjidhje çështjes çame, vetëm atëherë “kur amendamentet t’i kalojnë Parlamentit dhe ai të abrogojë ligjin e luftës”. “Ne mendojmë që edhe me heqjen e ligjit të luftës nuk realizohet zgjidhja tërësore e problemit çam. Ne kemi deklaruar si kryesi e shoqatës se kërkojmë së pari riatdhesimin dhe riatdhesimi kërkohet për faktin se komuniteti çam, prej 250 mijë vetësh jetojnë si refugjatë dhe është i vetmi rast unik pas Luftës së Dytë Botërore që një komunitet dëbohet me forcë dhe nuk i jepet e drejta të kthehet në pronat e veta”, -sqaroi Sheme. Ai theksoi se “Greqia duhet të kërkojë falje publike”. Megjithatë ata janë të përgatitur t’i drejtohen Gjykatës së Hagës, sepse spastrimi etnik, sipas Shemes, përbën krim kundër njerëzimit. “Greqia është e detyruar të dëmshpërblejë komunitetin çam për humbjet njerëzore dhe materiale që ka shkaktuar në vitet 1944-1945 nëpërmjet këtij spastrimi etnik, këtij genocidi të ushtruar në këto vite”.

Pasuria
Ndërkaq pronat e çamëve llogariten në një shifër mbi 2.5 milionë dollarë, ku futen vreshta, agrume, ullishte, troje, shtëpi, dyqane, kullota, pyje, të cilat kapin një sipërfaqe prej 5000 km2. Sekuestrimi më i madh i pronave të çamëve është bërë gjatë viteve 1944-1945. Kryetari i shoqërisë “Çamëria” tha se në fakt deklarata e Simitis ishte pak evazive. “Nëse është fjala për kompensim, ai është për shfrytëzimin që i është bërë kësaj prone prej 60 vjetësh”, -sqaroi Sheme.
Rrugët
Ndërkohë rrugët që do të ndiqen për t’i dhënë një zgjidhje përfundimtare çështjes çame janë dy, sipas kryetarit të kësaj shoqëria. “Do t’i drejtohemi Gjykatës së Hagës dhe kemi filluar procedurat, e cila të bëjë një zgjidhje përfundimtare ku e paditur është pala greke, që genocidi kundër popullsisë çame përbën krim kundër njerëzimit”, -tha ai. Ndërsa rruga e dytë është gjyqi i Strasburgut. Po kështu çështja do të ndiqet edhe në gjykatat greke. Sipas tij, lajme nga Athina bëjnë të ditur se po përgatiten amendamente nga qeveria greke e cila mendon të zgjidhë çështjen nëpërmjet kompensimit. “Nëse është fjala për kompensim të të gjithë pronave, kjo është e papranueshme. Nëse është fjala për kthim fizik të pronave dhe për kompensim në ato raste kur në pikpamje teknike kthimi është i pamundur , këto zgjidhen me marrëveshje dhe janë të pranueshme”, -nënvizoi Sheme. Ai tha se “nuk pranojmë kompensim, sepse kompensimi do të thotë tradhti ndaj çështjes kombëtare çame”.
Darina Tanushi

Pronat e çamëve
Në shifra: 2.5 milionë dollarë
Sipërfaqe prej 5000 km2vreshta
agrume
ullishte
troje
shtëpi
dyqane
kullota
pyje 

GAZETA55 - 03/04/2003 http://www.gazeta55.com/

Mustafaj: Nano po spekulon me çështjen e "Ligjit të Luftës" me Greqinë

Sekretari i marrëdhënieve me jashtë ne PD z.Besnik Mustafaj, në emër të partisë që përfaqëson, ka reaguar mbi deklarimet pas takimit të nje dite me parë të kryeministrit Nano dhe atij grek Kostas Simitis, mbi heqjen e "Ligjit të Luftës" me Shqipërinë. Më tej, z.Mustafaj është shprehur se "kryeministri Nano po spekulon mbi çështjen në fjalë, gjithashtu ai vuri në dukje se marrëdheniet midis dy vendeve rregullohen me ligjet e parlamentit dhe jo me qeveritë. Ai shtoi, se ne konstatojmë se nuk eshte ekzerkutivi qe vendos për abrogimin e ketij ligji, pra ekzekutivi grek, por është parlamenti dhe ne kete rast, theksojme se spekulimet politike për konsultë të brendshme nga ana e kryeministrit Nano për këtë deklarim të z.Simitis, nuk i sherbejne as zgjidhjes se problemit, as mirekuptimit të nevojshem midis dy vendeve". Lidhur me përgjegjësitë që mund të kete kryeministri Nano në këtë mes, z.Mustafaj është shprehur "kjo  është nje pergjegjesi jo e vogël, nëse z.Nano bën spekulime te tilla nga padija sesi abrogohet nje ligj, kjo është një gjë e kuptueshme, po te kemi parasysh se kemi nje kryeministër, i cili qofte ndërtimin e ligjeve, qoftë respektimin e tyre, nuk e ka princip themelor, nese e ben nga qëllime te këqija, atëhere kjo gje është akoma me e rëndë. Gjithashtu, z.Mustafaj është shprehur se "PD i konsideron prioriare dhe shumë të rëndësishme marrëdhëniet mes dy vendeve", duke shtuar, se "këto marrëdhënie kanë arritur një nivel të mirë zhvillimi". Ai shprehu bindjen se në të ardhmen, këto marrëdhënie do të njohin një prespektivë më të mirë në fushën diplomatike, politike, ekonomike, ushtarake. Sipas z. Mustafaj, "mbyllja juridike përfundimtare i këtij ligji, bëhet përmes një ligji tjetër dhe vendimit të parlamentit të shtetit grek". Ne vlerësojmë vullnetin e mirë të qeverisë greke dhe mazhorancës qeverisëse atje, për të abroguar një ligj absurd", theksoi ai. Kryeministri shqiptar, Fatos Nano dhe ai grek, Kostas Simitis, gjatë një takimi të zhvilluar në Athinë, e konsideruan çështjen e "Ligjit të Luftës" mes dy vendeve, "politikisht dhe juridikisht të mbyllur". Kryeministri grek Simitis u shpreh, se "çështja e këtij ligji, përfundimisht, politikisht dhe juridikisht është e mbyllur, sepse Traktati i Miqësisë dhe i Bashkëpunimit, i ratifikuar nga të dy parlamentet, ai i Greqisë dhe i Shqipërisë, i ka dhënë fund në mënyrë ligjore, duke e mbyllur këtë çështje". Ndërkohë që parlamenti shqiptar nuk e ka hequr nje ligj të tillë, sepse sipas opozitës, heqja e një ligji zëvendësohet me nje ligj tjetër.

e.gj

 

---

 Korrieri - http://www.korrieri.com/ 03/04/2003

Greqia, do te ktheje pronat came
Shefi i qeverise greke Kostas Simitis deklaron se po punohet per korrigjimin e pasojave te ligjit te luftes. I cili sherbeu ne vitin 1944 si baza ligjore per konfiskimin e pronave came ne veri te Greqise. Gjate takimit ne Athine me homologun shqiptar Fatos Nano, kryeministri grek u shpreh se ligji i luftes me Shqiperine eshte "politikisht dhe juridikisht i mbyllur". Sipas tij, pala greke ka gati projektin per korrigjimin e pasojave negative te tij. Por qe lufta ne Irak ka vonuar firmosjen e tij

Nga Athina Elton METAJ

Greqia pergatitet per kthimin e pronave came, te konfiskuara ne vitin 1944. Ky fakt ka dale nga takimi per rreth 45 minuta ne Athine mes kryeministrit shqiptar Fatos Nano me homologun grek Kostas Simitis. Burime prane kryeministrit shqiptar thane per "Korrieri" se Simitis dhe Nano kane disktuar edhe per rregullimin dhe korrigjimin e pasojave negative te sjella nga ligji i luftes. Nje grup pune i pales greke mesohet te kete hartuar nje projekt per kete qellim, qe ndodhet tashme ne tryzen e punes se Presidentit Stefanopulos dhe eshte vonuar per shkak te angazhimive lidhur me krizen ne Irak. Kjo u pohua, ndonese jo drejtperdrejte edhe nga vete Simitis. Ndonese si Nano dhe Simitis jane treguar te kujdesshem para mediave duke mos i permendur pronat came. Levizja e fundit e Athines te ben te mendosh se ligji i luftes qe ajo konservon me Shqiperine prej 60 vjetesh nuk ka qene gje tjeter vecse garanti per moskthimin e pronave te popullsise came te shperngulur ne 1945 nga veriu i Greqise. Zevendesministri i Puneve te Jashtme Ilir Meta deklaroi ne parlament ne dhjetor te vitit te kaluar se sekuestrimi i pronave came ishte pasoje e ligjit te luftes qe Greqia vendosi me Shqiperine me 28 nentor te 1940, kur territoti yne, atehere i pushtuar, u perdor nga Italia fashiste per te sulmuar Greqine sovrane. Me vone, nga ky ligj derivuan edhe nje sere aktesh nenligjore dhe dekretesh, te cilat ligjeruan edhe sekuestrimin e pronave te popullsise came ne veri te Greqise. "Me 10 nentor me dekret mbreteror 2636 u vendos sekuestroja ndaj pasurive armike dhe veprimet juridike mbi to. Ligji eshte pasuruar edhe me dekrete e akte nenligjore, qe kane te bejne me trajtimin civil e juridik te popullise came", tha Meta. Ne 1987 qeveria e Papandreut miratoi vendimin per heqjen e ligjit te luftes. Por qe nuk u ratifikua asnje here nga parlamenti, ndersa ne vitin 1996 u ratikua Traktati i Miqesise mes dy vendve. Ne kete menyre, vendimi i Athines per "te korrigjuar pasojat e ketij ligji" do te thote jo vetem veprime konkrete ligjore per abrogimin e tij, por edhe rregullimin e ceshtjes came. Lidhur me ligjin e luftes te dy kryeministrat pranuan se kjo ceshtje quhet e zgjidhur politikisht dhe juridikisht. Gjate ketij takimi, kryeministri grek mesohet ta kete quajtur si qesharak dhe te pavlere ekzistencen e nje ligji lufte mes dy vendeve, ndersa Tirana dhe Athina kane firmosur edhe Traktatin e Miqesise. Kryeministri Simitis u shpreh se "ceshtja e ketij ligji, perfundimisht, politikisht dhe juridikisht eshte e mbyllur, sepse Traktati i Miqesise dhe i Bashkepunimit, i ratifikuar nga te dy Parlamentet, ai i Greqise dhe i Shqiperise, i ka dhene fund ne menyre ligjore, duke e mbyllur kete ceshtje". Madje Athina zyrtare duket se i ka shkuar ne fund problemit kur deklaron permes shefit te qeverise se saj se "tashme te dy palet po angazhohen dhe do te vazhdojne punen per te zgjidhur ne menyre teknike problemet e krijuara nga ky moment". Megjithase, burimet mohuan faktin qe te dy Kryeministrat te kene folur dje ne menyre te vecante per ceshtjen came, duke preferuar zgjidhjen e saj ne kuader te rregulimit te pasojave qe ka sjelle ligji i luftes, me gjuhe diplomatike ata treguan se ceshtja e pronave came ka hyre ne axhenden e dites ne dialogun mes dy vendeve.

Fundi i luftes 63 vjecare
Kryeministri helen Kostas Simitis, e ka quajtur qesharak dhe te pavlere, ekzistencen e nje ligji lufte mes Greqise dhe Shqiperise, ndersa eshte firmosur Traktati i Miqesise mes dy vendeve. Pavaresisht se ai e cilesoi kete ceshtje, perfundimisht te mbyllur si politikisht ashtu edhe juridikisht, ajo vazhdon te jete nje barriere jo e vogel ne nje marredhenie krejtesisht te sinqerte mes dy fqinjeve, por edhe ne percaktimin e prioriteteve tona ne politiken e jashtme, ne marredheniet me fqinjet. Nje pengese mbi 60 vjecare mes 2 shteteve, i vendosur ne menyre te njeanshme nga nje vend qe eshte anetar i NATO dhe BE.

Edhe pse Greqia u pushtua nga Italia, nepermjet territorit tone, kur ne vete ishim te pushtuar, Parlamenti Grek, me 28 nentor 1940, miratoi ligjin e luftes me Shqiperine. Nje ligj i plotesuar edhe me disa akte nenligjore dhe dekrete, ligjeroi sekuestrimin e pronave te shqiptareve. Pavaresisht se 47 vjet me vone, ne vitin 1987, qeveria e Papandreut miratoi vendimin e heqjes se ligjit te luftes mes dy vendeve, Parlamenti helen nuk e ka votuar kurre rrezimin e tij. Keshtu qe pavaresisht se "de facto" ky ligj, sic deklaroi dje edhe Kryeministri Simitis nuk ekziston, "de jure" ai vazhdon te jete ende ne fuqi.

Kjo gjendje ne dukje absurde per llogjiken e politikes se fillimshekullit te 21, nuk eshte e tille per Athinen zyrtare. E cila nuk ishte dhe nuk duket se eshte plotesisht e gatshme dhe pa asnje ekuivok, te riktheje pronat shqiptare ne pergjithesi dhe ato came ne vecanti, qe u sekuestruan per shkak te miratimit te ligjit te luftes. Nga ana tjeter, politika e Tiranes vetem tani, me rastin e shqyrtimit te kerkeses ne Parlamentin shqiptar per "dhenien" e Bazes se Bisht Palles ushtrise greke, duket se ka nisur te ndergjegjesohet. Duke kutpuar se politika dhe diplomacia, me shume se nenshtrim pa kushte i nje vendi te varfer ndaj nje me te pasuri, eshte nje loje interesash te ndersjellta. Ndaj, pavaresisht se Simitis i deklaroi dje Nanos se ligji i luftes mes dy vendeve, eshte "politikisht dhe juridikisht i mbyllur", askush nuk mund ta besoje kete, per aq kohe sa ai nuk eshte rrezuar nga votimi i shumices se deputeteve greke. Klasa politike shqiptare, eshte aq e pjekur tashme, sa te gjeje rruget, per te mos i besuar plotesisht vetem deklaratave si ajo e djeshme e kryeministrit te Greqise.

 

Parlament: Jo grekeve ne bazen e Bishtit te Palles
Komisioni parlamentar i Mbrojtjes nuk pranon marreveshjen ushtarake me Greqine per financimin e ndertimit tw godines se Komandes, kanalit hyres dhe te basenit te bazes detare te Bisht-Palles. Sipas kryetarit tw komisionit, Dashamir Shehi, "ne 12 vjet shume forca ushtarake te huaja kane hyre dhe dale nga territori i Shqiperise, por ka ardhur koha qe marrwveshje tw tilla te mos te kalojne thjesht me paraqitjen e njw cope letre"

Komisioni parlamentar i Mbrojtjes nuk pranoi marreveshjen ushtarake me Greqine per ndertimin e godines se Komandes, kanalit hyres dhe te basenit te bazes detare te Bisht-Palles. Opozita e argumentoi voten e saj kunder saj me faktin se marreveshja nuk eshte bindese si per nga niveli i investimit dhe e dyshimte ne formulinin e nene te saj. Kryetari i komisioni Dashamir Shehi u shpreh se ne keto 12 vjet shume forca ushtarake te huaja kane hyre dhe dale nga territori i Shqiperise, por ka ardhur koha qe marrwveshje tw tilla te mos te kalojne thjesht me "paraqitjen e disa copave letre". Sipas duhet, duhet nje rregullim i sakte ligjor per pranine e ketyre forcave ne token shqiptare. Nje tjeter argument i perdorur nga opozita kunder marreveshjes ushtarake ishte ekzistenca e ligjit te luftes qe Greqia konservon me Shqiperine prej 60 vjetesh, cka e ben absurde kete dokument. Ne fakt, paralelisht me mbledhjen e komisionit, kryeministri shqiptar Fatos Nano dhe ai grek Kostas Simitis do te deklaronin se kjo ceshtje eshte zgjidhur si politikisht ashtu dhe juridikisht me ratifikimin e Traktatit te Miqesise nga parlamentet e te dy vendeve. Kjo duket se do t'i heqe mundesine opozites per ta perdorur ligjin e luftes si karte per refuzimin e marreveshjes, gjate diskutimit te saj sot ne seance plenare. Ndersa ministrit te Mbrojtjes Pandeli Majko iu desh edhe njehere te shpjegonte modalitetet e saj. "Asnje ushtar grek nuk do te hyje ne baze. Behet fjale vetem per personelin inxhinjero-teknik qe do te drejtoje punimet e punetoreve shqiptare", u shpreh Majko. Qeveria greke do te financoje per 5 vitet e arshme ndertimin e mjediseve te komandes ne nje siperfaqe prej 1600 m2 dhe te kanalit hyres per anijet ushtarake qe do te ankorohen ne baze, me nje vlere prej 5.5 milion euro. Pala greke merr persiper financimin e punimeve, perzgjedhjen e firmes ndertuese dhe pagat mujore te personelit ndertues, grafikun e punimeve, per te cilet do te jape miratimin dhe pala shqiptare, si dhe mirembajtjen e qendres per nje periudhe 15 mujore nga perfundimi i projektit. Ndersa pala shqiptare do te siguroje hyrjen e personelit inxhinjerik grek ne baze, te anijeve ushtarake greke qe do te sjellin pajisjet, si dhe te punetoreve te firmes se ndertimit, furnizimin me uje dhe energji elektrike.

Historia e nje marreveshjeje

Marreveshja per rehabilitimin e bazes ushtarake te Bisht-Palles ka mese nje muaj qe hyn dhe del nga kalendari i punimeve te Kuvendit, pa arritur te marre miratimin e parlamentit. Shkas per mos kalimin e saj per miratim u bene deputetet e opozites, te cilet e lidhen ate me ekzistencen e ligjit te luftes me Greqine. Pas ketyre kudnershtimeve, ministri Majko kerkoi shtyrjen e saj dhe diskutimin nga e para ne komisionet parlamentare. Komisioni i ligjeve ne mbledhjen e tij te para dy javeve pas debateve e miratoi me shumice marreveshjen. E cila u perfshi ne rendin e dites te seances plenare te se enjtes se kaluares. Por ajo serish doli nga rendi i dites, me pretendimin e komisionit te Mbrojtjes kishet nevoje per me shume kohe, si dhe per pranine e ministrit te Mbrojtjes Majko, i cili ato dite ndodhej per nje vizite zyrtare ne Hollande. Kjo beri qe marreveshja te shtyhej per kete jave. Sot ajo kalon per shqyrtim ne parlament.

---

http://www.shekulli.com.al/ 03/04/2003

Kryeministri grek premton dhe miratimin e ligjit për kthimin e kompensimin e pasurive të shqiptarëve në Greqi

Simitis-Nanos: Ligji i luftës, kapitull i mbyllur

“Çështja e këtij ligji, përfundimisht, politikisht dhe juridikisht është mbyllur, që në nënshkrimin e traktatit të miqësisë”

TIRANË-Greqia e cilëson të mbyllur çështjen e ligjit të luftës me Shqipërinë. Kryeministri grek, Kosta Simitis, gjatë një takimi të djeshëm me shefin e qeverisë shqiptare, Fatos Nano, e ka cilësuar si të rrëzuar juridikisht e politikisht. Në këtë takim të zhvilluar dje në mesditë mes Nanos dhe Simitisit, i cili ka zgjatur më tepër se sa ishte parashikuar, një orë e gjysëm, në kryebisedimet ka qenë çështja e ligjit grek të luftës. Sipas burimeve qeveritare, Simitis e ka cilësuar këtë ligj të rrëzuar, që nuk ka vlerë juridike. “Ky ligj është i pavlerë dhe qesharak, pasi unë po pres kryeministrin e një vendi fqinj dhe mik dhe këto gjëra nuk shkojnë bashkë me ligjin e luftës”,-kështu mësohet se i është drejtuar Simitis, Nanos. Kryeministri i Greqisë, e ka argumentuar më tej këtë qëndrim të tij, me faktin se ligji i luftës është rrëzuar juridikisht me nënshkrimin e traktatit të miqësisë dhe të fqinjësisë së mirë mes dy vendeve vite më parë.
“Kjo çështje është vlerësuar nga të dy Kryeministrat me të njëjtën optikë. Kryeministri Simitis është shprehur se çështja e këtij ligji, përfundimisht, politikisht dhe juridikisht është mbyllur, sepse Traktati i Miqësisë dhe i Bashkëpunimit, i ratifikuar nga të dy Parlamentet, ai i Greqisë dhe i Shqipërisë, i ka dhënë fund në mënyrë ligjore, duke e mbyllur këtë çështje dhe tashmë të dy palët po angazhohen dhe do të vazhdojnë punën për të zgjidhur në mënyrë teknike problemet e krijuara nga ky moment”,-theksohet në njoftimin për shtyp të Këshillit të Ministrave të Shqipërisë. Por edhe pse “de fakto” për kryeministrin grek nuk ekziston, de jure, ai është në fuqi prej mëse 60 vitesh. Burimeve pranë stafit të kryeministrit, mësohet se Simitis ka bërë të ditur ekzistencën e një grupi pune të qeverisë greke, i cili është duke studiuar dhe hartuar amendamentet e nevojshme për heqjen e ligjit të luftës. Pas këtij takimi, të dy kryeministrat, Nano dhe Simitis, nuk kanë dhënë një konferencë të përbashkët për shtyp. Kreu i qeverisë shqiptare ka dhënë prononcime për median e pranishme. Ligji i luftës i Greqisë me Shqipërinë mban peng kthimin të një pjese të konsiderueshme të pronave dhe të pasurive të popullsisë etnike, të krahinës së Çamërisë. Një ligj i tillë bëri të mundur konfiskimin e të gjithë pasurive dhe të pronave të popullsisë çame, duke sjellë njëkohësisht shpërnguljen masive nga vendbanimet e tyre të mijëra familjeve.
Çështja çame
Në lidhje me këtë çështje, sipas burimeve të ndryshme, mësohet se kryeministri grek i ka bërë të ditur homologut të tij shqiptar Nano, për hartimin e një projektligji për kthimin e kompensimin e pasurive të shqiptarëve në Greqi. Një draft i tillë, sipas burimeve, “ndodhet në tavolinën e presidentit grek”. Autoritetet shqiptare e kanë cilësuar si absurde lënien e ligjit të luftës në fuqi nga shteti grek, në një kohë kur mes dy vendeve fqinje, ekzistojnë dhjetëra marrëveshje, të firmosura mbi bazën e traktatit të fqinjësisë së mirë dhe bashkëpunimit reciprok (nënshkruar në vitin 1992). Për shumë kohë, një ligj i tillë, ka qenë tabu për politikën shqiptare, por që vetëm në vitet e fundit është futur në axhendën e diskutimeve mes dy vendeve dhe është bërë objekt i gjërë trajtimi nga ana e medias vizive dhe të shkruar. Kjo për faktin se pala greke prej kohësh nuk ka pranuar të bisedohej në rrugë diplomatike për ligjin e luftës, për shkak se ai pengon ligjërisht edhe kthimin e pronave të popullsisë çame.
Investimet
Investimet greke në Shqipëri do të jenë në kuadër të planit për rindërtimin e Ballkanit, me një shumë prej 50 milionë eurosh. Në të përfshihen linja e tensionit të lartë 400 KW, segmentet rrugore Pogradec-Korçë dhe Konispol - Sarandë, si dhe lëvrimin e kredisë për strehimin, maternitetin dhe qendrat shëndetësore në jug të Shqipërisë. Nano në këtë takim ka kërkuar që Kosova të jetë prezent si një njësi më vete në samitin e Selanikun, i cili do të mbahet në qershor të këtij viti. Simitis ka shprehur angazhimin e qeverisë për të mbështetur Shqiëprinë në procesin e reformave dhe të integrimit europian. Kryeministri Nano ka ftuar zyrtarisht homologun e tij, Simitis për një vizitë në Tiranë.
Bledar Hoti