http://www.spekter.com.al/

 14.3.2003

 

Një princeshë për princin Leka

Nga Violeta Ruspi

Trashëgimtari i fronit mbretëror tregon se ditën e të dashuruarve e ka kaluar në vetmi por pret në “këshjellën” e izoluar, vajzën e ëndrrave të tij

Leka, 21- vjeçar, trashëgimtari i fronit mbretëror të shqiptarëve, i lindur dhe rritur në Johanesburg të Afrikës së Jugut, gjithmonë ka bërë një jetë Princi, me të gjitha privilegjet që i përkasin një pinjolli të familjes mbretërore. Këtë rrjedhë jete bën edhe në Shqipëri, në një vilë të bukur, buzë autostradës, Tiranë – Durrës. Nuk dihet dhe për sa kohë kjo vilë do të jetë rezidenca e tyre, ndërsa Princi vetë shprehet se do t’i pëlqente më shumë “ të ishte në shtëpinë e të parëve të tij” por pa iu larguar Kryeqytetit. Gjithashtu, një dëshirë e tij është të ketë sa më shumë kontakte me jetën kryeqytetase si dhe me shumë bashkëmoshatarë, por kjo gjë është e pamundur për shkak të një jete nën masa të larta sigurie. Lëvizja e tij jashtë ambientit të vilës bëhet gjithmonë nën shoqërimin e eskortës mbretërore. Sikur të mos mjaftonte kjo, një eskortë më vete përbëjnë katër qen të mëdhenj, të cilët nuk i ndahen për asnjë çast Princit. Xhelozia e tyre arrin kulmin kur Princi është në shoqërinë e kujtdo tjetër përveç personave të Familjes. Me miqtë e tij më të afërt mban kontakte nëpërmjet internetit, ndërsa që të quhesh një mik i vërtetë i tij, Princi tregon se duhet të kalojë një kohë e gjatë. Por duket se nuk është aspak e lehtë për të zënë miqësi dhe shoqëri me të, për shkak të “vetizolimit” dhe “privimit” të të qenit Princ. Gjithsesi, dashuria dhe qetësia që i dhuron jeta me familjen e tij, impenjimet lidhur me studimet si dhe karrierën, hobet e tij, sportet e ndryshme si dhe bota kompjuterike, janë mëse të mjaftueshme për kohën e tij, ndaj dhe mosfrekuentimi i lirë i ambienteve publike ( merr pjesë vetëm në ceremoni zyrtare), gjen justifikim mëse të arsyeshëm. Në shtëpinë mbretërore është rreptësisht e ndaluar të flitet në gjuhë të tjera përveçse shqip. Përjashtim bën vetëm pedagogu anglez Stjuart që e parapërgatit nga ana profesionale njëzetenjë vjeçarin për në “Akademinë Mbretërore” të Londrës. Mësimi i gjuhës shqipe është një nga synimet kryesore që Princi i ka vënë vetes dhe në një periudhë kohe relativisht të shkurtër ia ka dalë mbanë.

Për revistën “Spektër”, gjithnjë në masa ta larta sigurie, Princi tregon jo vetëm dëshirat e tij por edhe pritjen e heshtur të princeshës në “këshjellën” e izoluar në buzë të autostradës.

Cilat janë ëndrrat e një Princi?
Që i vogël kam patur shumë ëndrra dhe shpresa për të ardhmen, veçanërisht për atdheun e të parëve të mi dhe tani që jam këtu, më jepet mundësia që të njoh dhe të mendoj më konkretisht për shumë gjëra. Të studioja ka qënë dhe mbetet një nga prioritetet e mia. Kam mbaruar “Saint Peter College” ku kam qënë një nxënës i mirë. Momentalisht, të mësoj sa më mirë gjuhën shqipe është gjëja parësore, ( në familjen mbretërore është e ndaluar të flitet në prani të Princit, në cdo gjuhë tjetër, pervecse në gjuhën shqipe) por ndërkohë po pregatitem për të vazhduar studimet në Akademinë Mbretërore në Londër. Pas studimeve, do t’i përkushtohem Atdheut tim. Tani nuk më mungon asgjë, pasi Shqipëria është Atdheu im, (ajo që më mungonte), ndaj jam I lumtur dhe I kënaqur që ndodhem këtu.
Keni vizituar disa qytete të Shqipërisë. Cilat janë përshtypjet dhe mbresat tuaja nga këto vizita?
Deri më tani kam vizituar disa qytete të Shqipërisë të cilët më kanë mahnitur me bukurinë e tyre, gjithashtu një kënaqësi e veçantë për mua, ishin vizitat në ato vende për të cilat më kishte folur Babai dhe Gjyshja ime. Jemi me fat që kemi lindur në një vend kaq të bukur. Mikpritja e ngrohtë e popullit shqiptar në momentin që për herë të parë shkela në Atdheun tim, më ka lënë mbresa të pashlyeshme.
Keni vendosur të studioni në Akademinë Mbretërore të Londrës. Është zgjedhja juaj?
Akademia Mbretërore e Londrës, është një zgjedhje e imja dhe një shkollë ku njëkohësisht mëson shumë gjëra, jo vetëm strategji mbretërore. Më pas, duhet të studioj edhe në Shqipëri, Juridik, Shkenca politike, pasi kontaktet e drejtpërdrejta këtu, influencojnë më realisht.
Keni miqësi me bashkëmoshatarët tuaj shqiptarë?
Kam filluar të krijoj shoqëri me shumë të rinj nga e gjithë Shqipëria. Tek ata shoh shpresë për të ardhmen dhe dëshirën për të ndryshuar çdo gjë për mirë. Mund të kemi shumë shokë, por vetëm pas një kohe të gjatë mund të njohim shokun e vërtetë.
Ç’ kuptim pati Shën Valentini për Princin?
Dita e Shën Valentinit është një ditë plot dashuri. Një ditë që të jep mundësinë për të bërë një vajzë të lumtur. Unë jam ende në pritje të asaj vajze.
Ç’ju tërheq më shumë tek një femër?
Si fillim më tërheq bukuria dhe hijeshia e saj, por ajo që është më e rëndësishme, është personaliteti i saj.
Si janë marrëdhëniet tuaja në familje?
Unë jam me fat se kam shumë dashuri dhe përkujdesje nga prindërit e mi, me të cilët kam raporte shumë të afërta dhe diskutojmë për çdo problem. Unë gjithnjë jam i interesuar për të gjitha problemet dhe si Familje përballohemi me çdo gjë. Në këtë moment, unë jam këtu që të njihem me të gjitha problemet që e shqetësojnë vendin.
Cilat janë synimet tuaja lidhur me të ardhmen tuaj?
Edhe nëse nuk do të isha Princ do të merresha me politikë si e vetmja mënyrë për të ndihmuar Shqipërinë dhe shqiptarët.
Si e organizoni ditën tuaj?
Një ditë e imja fillon me stërvitjen, më pas me mësimin e gjuhës. Pasditeve bisedoj me Prindërit dhe kohën që më mbetet, lexoj. Në rastet kur më jepet mundësia, kur kam kohë të lirë, të paprogramuar, marr pjesë në aktivitete kulturore, sportive. Hobyy im janë bilardo, artet marciale, shumica e sporteve, hipizmi, ku kam fituar disa trofe. Më pëlqen të kaloj një pjesë të kohës në kompjuter, por jo shumë kohë pasi është e lodhshme.
Këtu ku jeni vendosur aktualisht ndiheni më mirë ?
Akoma nuk kemi vendosur, pasi kemi shumë probleme nga gjëra të lëna pezull, por në këtë vilë më pëlqen ambienti dhe mjedisi përreth. Është terreni i përshtatshëm për stërvitje. Vila 4 ishte më shumë qetësi por ishte tepër zyrtare. Nuk mund të flas me saktësi dhe për sa kohë do të qëndrojmë këtu, aktualisht nuk mund të zhvendosemi apo të projektojmë se ku do të zhvendosemi, por ajo që dëshiroj është të kemi një rezidencë në Burgajet ( vendlindja e të parëve).
Cila ka qënë dita më e lumtur dhe e trishtuar e jetës tuaj?
Dita më e bukur e jetës sime dhe që më është ngulitur në mendje është dita kur për herë të parë vura këmbën në tokë shqiptare, ndërsa dita më e trishtuar, kur Gjyshja ime, aq e dashur për mua, ndërroi jetë.
Nëse do të kishit mundësi, cili do të ishte ndryshimi i parë që do të bënit për Shqipërinë dhe shqiptarët ?
Sigurisht, parësore do të ishte evitimi i problemeve kryesore të shqiptarëve, sigurimi i të gjitha familjeve me energji elektrike dhe ujë, si dhe rregullimi i rrugëve dhe mjedisit, por ka shumë e shumë probleme të tjera që duhet të gjejnë zgjidhje.

Odiseja e udhëtimeve të familjes mbretërore