01/02/2004 KORRIERI http://www.korrieri.com/

PLL: Kuvendi ndodhet në krizë të thellë

Legalistët vlerësojnë se Kuvendi i Shqipërisë ndodhet tashmë i ngërthyer në
darën e një krize të thellë politike. Kryetari i PLL, Eqerem Spahiu,
deklaroi dje se në kalendarin e punimeve të Kuvendit për periudhën 3-12
shkurt 2004, nuk janë përfshirë interpelanca, projekt-ligje, rezoluta e
komisione hetimore, të kërkuara nga PLL dhe opozita, gjë që, sipas tij,
përbën një shkelje flagrante të parlamentarizmit. Sipas tij, Qeveria dhe
disa institucione shtetërore janë prej muajsh e vitesh në krizë, por tani
është përfshirë në një krizë të thellë edhe Kuvendi. "Prej kohësh nuk
zhvillohen seanca normale. Këtë e shohin të gjithë shqiptarët dhe
institucionet ndërkombëtare në Tiranë. Kuvendi i Shqipërisë është bërë edhe
objekt i Parlamentit Europian. Të gjithë jemi dëshmitarë të skenave absurde
në Kuvend", ka nënvizuar Spahiu. Sipas tij, një grup prej 35 deputetësh,
kanë hartuar një projektrezolutë për problemin e popullsisë çame, dhe e ka
depozituar atë në sekretarinë e Kuvendit më date 2 shtator 2003. Spahiu
vlerëson se të hënën mbushen katër muaj dhe Kuvendi, jo vetëm që nuk e ka
shqyrtuar, por nuk e ka përfshirë atë në kalendarin e punimeve të dyjavorit
të ardhshëm. "Çështja çame është ngritur në Senatin Amerikan, në kanceleritë
dhe institucionet europiane, çka do të thotë ndërkombëtarizim i kësaj
çështjeje shumë të rëndësishme. Ndërsa Kuvendi i Shqipërisë, jo vetëm që nuk
merret me këtë çështje, por fyen edhe deputetët firmëtarë, duke mos zbatuar
rregulloren e Kuvendit", ka theksuar Spahiu. Sipas tij, po kështu, edhe
projekt-ligji për ish të burgosurit dhe të përndjekurit politik, është
depozituar në sekretarinë e Kuvendit që më datë 23 janar 2002, dhe ndonëse
kanë kaluar dy vjet, ky projekt akoma nuk është shqyrtuar, madje as nuk
është përfshirë në kalendarin dyjavor, me arsyetimin se "qeveria nuk është
shprehur për faturën financiare të tij".

A. M
----------------------------------------------------------------------------

http://www.panorama.com.al

Faqe 5 - Politikë
2Shkurt 2004

Lufta në PS

"Gomonia e dytë jam i bindur se kishte pikërisht atë artikull të cilin e
përmendin vazhdimisht krerët e policisë që po e luftojnë, por natyrisht nuk
kishte miellin që ka rritur çmimin e bukës"


Ish kryeministri i kthen përgjigje akuzave të Bardhyl Agasit dhe Ministrisë
së Rendit

"Droga në linjën Tiranë-Athinë"
Meta: Për të mbuluar drogën, u la të vdisnin 30 shqiptarë


Luljeta Progni

Me kundërakuza mjaft të ashpra dhe konkrete, i është përgjigjur dje, Ilir
Meta akuzave të sekretarit socialist Agasi dhe zëdhënësit të ministrisë së
Rendit Publik.

"Me akuzat e tyre ata sot jo vetëm që nuk hedhin dot asnjë fije dyshimi për
mua por përkundrazi ata kërkojnë të mbulojnë 2 miliardë dollarë drogë që ka
qarkulluar sipas vetë agjencive më serioze perëndimore në një vit përgjatë
Shqipërisë" tha Meta. Duke akuzuar direkt të afërm të krerëve të shtetit
aktual, Meta ka deklaruar dje, të gjithë rrugët që sipas tij, të çojnë në
zbulimin e trafikut të drogës. Duke konkretizuar akuzat e tij ai tha se në
se duan të zbulojnë trafikun le të kontrollojnë linjat Tiranë-Athinë: "Në
qoftë se duam të gjejmë se kush janë ata që bashkëpunojnë me trafikantët e
drogës të shikojnë vëllezërit, nipërit, dhe kushërinjtë e kujt qeveritarëve,
janë ata që janë ndaluar nga policitë italiane dhe ajo shqiptare. Po të duan
të gjurmojnë edhe më tej le të kontrollojnë linjat e autobusëve Tiranë -
Athinë, le të kontrollojnë bizneset që shërbejnë si koperturë për të lëvizur
sasi të mëdha droge nëpërmjet Shqipërisë". Meta vlerësoi të pabesueshme ato
që janë quajtur rezultate të kapjes së trafikut të drogës duke deklaruar se
pushtetarët e sotëm janë përgjegjësit kryesorë për pengesën e integrimit të
Shqipërisë: "Aritmetikën e tyre të kapjes së drogës nuk e beson njeri sepse
gjithkush e di që policitë evropiane gjatë këtij viti kanë kapur sasi droge
që kalon nëpërmjet Shqipërisë shumë më tepër se sa ka kapur gjatë gjithë
periudhës së tranzicionit. Pra, unë do t´i ftoja të mos mendojnë dhe të mos
ëndërrojnë se do të mbulojnë mjerimin e shqiptarëve me përralla të tilla dhe
me tablo të tilla sinoptike. Le ta kuptojnë se janë përgjegjësit kryesorë
për varfërimin e shqiptarëve për mjerimin që po u sjellin atyre për çmimet
skandaloze dhe katastrofike që po rrisin çdo ditë jo për shkak të reformave,
por për shkak të monopoleve të tyre që kanë ngushtuar çdo frymëmarrje të
ekonomisë dhe të demokracisë në këtë vend.

Lëvizjet e reja të Metës
"Sot jam më i lirë se asnjëherë tjetër për të provuar moralin tim dhe fakti
që flas në këtë mënyrë, prej kohësh dhe denoncoj pa kompromis këtë klikë,
tregon shumë qartë se akuzat e tyre janë të rëndomta", deklaroi dje,
ish-kryeministri Meta i bindur në luftën politike të tij ndaj kryeministrit
Nano dhe mbështetësve të tij në qeveri e parti. Në ditën e festës së Kurban
Bajramit ai ka fajësuar sërish, qeverinë shqiptare të drejtuar prej Nanos,
duke e cilësuar si qeveri e pashpirt që po varfëron përditë e më tepër
shqiptarët: "Kjo qeveri e pashpirt që në ditën e Kurban Bajramit rriti
çmimin e bukës, që nuk është çmimi që duhet të paguajnë qytetarët e
Shqipërisë për pseudoreformat e tyre, është çmimi i varfërimit të përditshëm
që duhet të paguajnë shumica dërrmuese e qytetarëve të Shqipërisë për
monopolet e tyre", tha Meta. Ai ka deklaruar se lëvizja e tij në të ardhmen
do të ketë si qëllim të qartësojë opinionin publik, qytetarët e ndershëm që
të mos pranojnë të qeverisen, e cila duhet të mbajë përgjegjësi penale për
30 shqiptarët e mbytur në Karaburun: "Lëvizja ime është tashmë, shumë e
qartë. Ajo është një lëvizje që shkon drejt opinionit publik, drejt
socialistëve të ndershëm që nuk mund të pranojnë të turpërohen më nga kjo
klikë, e cila përpara se të shpifë dhe të akuzojë ish kryeministrin e tyre,
duhet të mbajë përgjegjësi penale për 30 shqiptarë që mbyti në Karaburun.
Sepse duke dashur të fshehë trafiqet e saj dhe implikimet e veta për 15 orë,
la dhjetëra shqiptarë të pafajshëm në mëshirë të detit, në mëshirë të një
dite dhe të një nate të tmerrshme, vetëm e vetëm për të fshehur trafiqet e
tyre. Le të gjejnë gomonen e dytë dhe se çfarë kishte ajo, këta të
papërgjegjshëm, të cilët kanë ardhur në krye të policisë për shkak të
personalitetit të tyre të dyshimtë dhe të panjohur ende, nga publiku por që
padyshim, do të njihet, moral, politik, profesional dhe familjar", tha Meta.
Duke u përqendruar tek ngjarja e 9 janarit, Meta akuzoi sërish qeverinë
shqiptare dhe kërkoi prej tyre të pranojnë se me gomonen e dytë të kësaj
nate është bërë trafik droge me dijeni të autoriteteve të policisë
shqiptare: "Gomonia e dytë jam i bindur se kishte pikërisht atë artikull të
cilin e përmendin vazhdimisht krerët e policisë që po e luftojnë, por
natyrisht nuk kishte miellin që ka rritur çmimin e bukës".

Akuzat e Metës

2 miliardë dollarë drogë që ka qarkulluar sipas vetë agjencive më serioze
perëndimore në një vit, përgjatë Shqipërisë
bashkëpunojnë me trafikantët e drogës vëllezërit, nipërit, dhe kushërinjtë e
qeveritarëve
Linja e autobusëve Tiranë - Athinë, koperturë për të lëvizur sasi të mëdha
droge nëpërmjet Shqipërisë.
Policitë evropiane gjatë këtij viti kapi sasi droge në Shqipëri shumë më
tepër se ka kapur gjatë periudhës së tranzicionit
Qeveritarët e sotëm duhet të mbajnë përgjegjësi penale për 30 shqiptarë që u
mbytën në Karaburun