02/07/2004 http://www.shekulli.com.al/

Pa humbur asnjë sekondë PS e PD e kanë kaluar në Kuvend marrëveshjen për
zgjedhjet

Pakti PS-PD, partitë e vogla deklarojnë bojkotin


A.Rama

TIRANE- Partitë e vogla parlamentare deklaruan dje në Kuvend mospjesëmarrjen
në komisionin dypalësh për reformën zgjedhore. Por pavarësisht nga qëndrimi
tyre kundër ngritjes së këtij komisioni pa marrë mendimin e tyre, Parlamenti
mbështeti në parim me shumicë votash ( 76) projektvendimin e paraqitur nga
dy forcat politike, duke i hapur rrugë ngritjes së komisionit dypalësh për
reformën zgjedhore. Ndërsa përfaqësuesit e grupeve parlamentare të PSD-së,
PR-së, PBDNJ-së, PLL-së, PBK-së dhe PDR-së votuan kundër projektvendimit në
fjalë i paraqitur në seancë plenare nga PS dhe PD, pas konsensusit të
arritur mes tyre për ngritjen e një komisioni të dytë bipartizan. Ata e
konsideruan të papranueshëm faktin që po shmangeshin në këtë mënyrë ato
forca politike që të gjitha së bashku kishin mbështetjen e 1/3 së
elektoratit shqiptar duke kërkuar që miratimi i projektvendimit për ngritjen
e komisionit dypalësh të shtyhej për ditën e hënë me qëllim që të
konsultoheshin të gjitha grupet parlamentare. Ndërkaq kryetari i opozitës
Sali Berisha tha se konsensusi i arritur mes dy partive kryesore, ishte
transparent duke ftuar edhe forcat e tjera parlamentare që të bashkëpunonin
në ngritjen e kësaj strukture të posaçme për vazhdimin e reformës zgjedhore.
Kryetari i PSD-së Skënder Gjinushi, e konsideroi shkelje të rregullores,
përfshirjen e projektvendimit në rendin e ditës, pa u shqyrtuar më parë nga
komisioni i Ligjeve. Ai tha se miratimi i këtij komisioni në mënyrë
arbitrare ishte zbatimi i një urdhri politik dhe vazhdim i metodave të
dështuara, siç u veprua me komisionin e mëparshëm bipartizan. Nga ana tjetër
deputeti republikan Neritan Alibali shtoi se duhet të mblidheshin të gjitha
grupet parlamentare për të diskutuar. Ndërsa kryetari i komisionit të
Ligjeve Spartak Braho sqaroi se asnjë vendim i Parlamentit, nuk mund të
miratohet pa u shqyrtuar më parë nga komisioni i Ligjeve. Sipas tij,
projektvendimi i paraqitur në seancë, nuk mund të quhet as nismë ligjore,
pasi nuk ka numrin e nevojshëm të firmave të deputetëve, pasi është firmosur
vetëm nga dy kryetarët e grupeve parlamentare. Por kryetari i seancës Servet
Pëllumbi, tha se për përfshirjen e këtij vendimi në rendin e ditës kishte
vendosur byroja parlamentare. Ai kërkoi që të mblidhej komisioni i Ligjeve
duke ndërprerë seancën, por as kjo nuk shërbeu për të arritur ndonjë
konkluzion dhe kompromis mes palëve.