02102004

“Mbreti Leka i Parë nuk pranon postin e Kryeministrit, kështu që paralelizmi me Mbretin Simeon i Dytë të Bullgarisë nuk mund të jetë i përshtatshëm”. Kështu deklaroi dje kreu i grupit parlamentar Lëvizja për Zhvillim Kombëtar, Maksim Begeja, në një intervistë për gazetën “Ballkan”. Duke folur për lëvizjet e reja brenda Oborrit Mbretëror dhe brenda grupit të ri parlamentar, Begeja tha gjithashtu se Leka i Parë nuk do të kandidojë me emër në zgjedhjet e ardhshme parlamentare dhe as ministrat e Oborrit nuk do të marrin poste ministrore në rast të një krijimit të një kabineti të ardhshëm mbretëror. Këtë gjë ai e theksoi edhe për princin Leka dhe deklaroi se “në postin kryeministror do të zgjidhet ndonjë prej intelektualëve të njohur që kanë përqafuar lëvizjen mbarëkombëtare”.

Zoti Begeja, cilët janë ministrat e kabinetit të ardhshëm mbretëror?
Dua t’ju them që në fillim se kjo është një pyetje abuzuese, sepse Mbreti Leka i Parë asnjëherë nuk ka ndërtuar dhe as nuk ka paracaktuar një qeveri të tillë të ashtuquajtur “qeveri hije”. Ndërsa dua t’ju them me këtë rast se emrat e të ashtuquajturit “kabinet mbretëror” përbëjnë një diversion. Ne kurrë nuk kemi deklaruar emra të tillë.

A është e vërtetë se ju ose Mbreti Leka i Parë do të synoni postin e Kryeministrit, në rast se formohet një kabinet i tillë?
E para që dua t’ju sqaroj këtu ka të bëjë me faktin se Mbreti Leka i Parë ka deklaruar disa herë se nuk do të marrë pjesë si individ në asnjë qeveri, qoftë edhe duke marrë postin kryeministror. Këtë gjë ma ka thënë disa herë edhe mua personalisht, por e ka bërë edhe publike në disa raste të ndryshme. E dyta është se unë vetë asnjëherë nuk kam kërkuar postin e kryeministrit dhe kurrë nuk kemi biseduar për këto probleme. Në kuadrin e Lëvizjes për Zhvillim Kombëtar ne kemi ndërtuar një strategji për nxjerrjen e vendit nga kriza, por jo për të ndarë poste. Aq e vërtetë është kjo, saqë Mbreti Leka i Parë ka deklaruar se asnjëri prej pjesëtarëve të Oborrit Mbretëror nuk do të marrë pjesë në ndonjë kabinet të ardhshëm qeveritar. Dhe për të sqaruar të gjithë opinionin publik, unë po ju përsëris deklaratën e Mbretit Leka i Parë, i cili ka thënë që nuk do të kandidojë as si emër në zgjedhjet e ardhshme. Dhe kjo vlen edhe për pjesëtarët e Oborrit Mbretëror.

Çfarë roli do të ketë Çembërleni në rast të një kabineti mbretëror?
Çembërleni nuk do të ketë asnjë rol të veçantë në kabinetin e ardhshëm mbretëror. Sepse të gjithë punojnë për një qëllim të vetëm: të nxjerrin vendin nga kriza ekonomike dhe politike.
Po ministrat e tjerë të Oborrit Mbretëror në çfarë postesh do të caktohen në rast fitoreje?
Ministrat e Oborrit Mbretëror janë ministra që bëjnë punë të ndryshme sot, për komunikimin e familjes mbretërore dhe lëvizjes që ajo përfaqëson me botën e gjerë. Disa merren me detyra të caktuara, disa me aktivitetin dhe politikën e jashtme e kështu me radhë. Mirëpo në rast të një qeverie të mundshme, ministrat e Oborrit gjithashtu nuk do të inkuadrohen në listën e ministrave të qeverisë. Ata që do të vendosen në postet qeveritare do të jenë njerëz të tjerë.

Po në postin e kryeministrit cilin parashikoni të vini?
Duhet të kuptohemi që e gjithë kjo bisedë po zhvillohet vetëm për të kundërshtuar një listë që ka dalë dje në gazetë. Pra, unë nuk mund ta kundërshtoj këtë listë, duke ju paraqitur juve një listë tjetër, që në fakt nuk ekziston. Mirëpo duke iu përgjigjur pyetjes suaj, unë do të thosha se edhe kryeministri i ardhshëm do të dalë nga radhët e këtyre intelektualëve që përmenda më sipër.

A mund të jenë përfaqësuesit e Partisë së Lëvizjes së Legalitetit disa nga drejtuesit e nesërm të qeverisë mbretërore?
Lëvizja jonë për Zhvillimin Kombëtar është shumë më e gjerë se sa një parti e vetme, prandaj emrat e përveçëm të partive nuk kanë lidhje për t’i përmendur si drejtues të qeverisë së ardhshme.

A ka arsye shëndetësore në refuzimin e Mbretit Leka i Parë?
Jo. Mbreti Leka i Parë gëzon shëndet të plotë. Si nga ana shëndetësore, ashtu edhe nga ana psikologjike ai ka një formë të shkëlqyer. Pas aksidentit në këmbë tani gjithçka ka shkuar mirë. Në refuzimin e tij këto arsye që përmendët nuk kanë asnjë ndikim apo lidhje. Refuzimi i Lekës për pjesëmarrjen në ekzekutiv është i prerë dhe absolut. Jua sqarova edhe më sipër se ai më shumë se një herë më ka thënë mua personalisht se nuk pranon të bëhet kryeministër.

Kur parashikon Mbreti Leka i Parë një referendum të mundshëm për zgjedhjen midis republikës dhe monarkisë?
Kjo lëvizje që kemi nisur së bashku nuk pretendon për rikthimin e monarkisë. E thashë edhe njëherë se para mbretërisë është kombi. Mirëpo, kur shteti shqiptar që do të dalë nga këto zgjedhje të konsolidohet, atëherë mund të jetë edhe momenti i përshtatshëm për një referendum të tillë. Vetëm pas një konsolidimi të institucioneve populli mund të dalë në një referendum për të zgjedhur me vullnetin e lirë midis monarkisë dhe republikës.

Kur e parashikoni kohën për të kërkuar këtë referendum?
Kjo kërkesë ka të bëjë me strategjinë tonë afatgjatë. Nuk bëhet fjalë për periudhën e zgjedhjeve të tanishme parlamentare. Më vonë do të shohim e do të vendosim.

A është përmendur emri i tij në mjediset e brendshme të Oborrit Mbretëror?
Jo. Emri i Neritan Cekës nuk është përmendur asnjëherë aty. Në listë kishte edhe shumë emra të tjerë që nuk janë përmendur ndonjëherë në Oborrin Mbretëror ose në mjediset përreth Lëvizjes për Zhvillimin Kombëtar. Kjo ndodh se konceptet tona politike ndryshojnë dhe secili ka të drejtë të zgjedhë kahun e vet në politikë.

Çfarë konceptesh kishte Mbretëresha Suzanë për të ardhmen e politikës shqiptare?
Ajo ishte një grua e shkëlqyer me koncepte bashkëkohore dhe me një vizion të qartë për politikën. Ajo e dashuronte tmerrësisht Shqipërinë dhe donte që ta shihte mirë e më mirë. Suzana i donte shqiptarët dhe uronte që vështirësitë ekonomike të njerëzve të mbaronin sa më shpejt. Ajo thoshte gjithmonë: “Shqiptarët meritojnë një fat shumë më të mirë”.

Si përfundim, kur mund ta njohin shqiptarët emrin e kryeministrit të kabinetit mbretëror?
Kur të vijë koha. Nuk ka rëndësi emri i kryeministrit, por platformat drejtuese të shtetit për të dalë nga errësira. Dhe ju e dini se ne këto platforma i kemi bërë publike çdo ditë.

Pretendenti për fronin mbretëror, Leka Zogu, si dhe pjesëtarët e Oborrit Mbretëror nuk kanë të drejtë të kandidojnë për zgjedhje elektorale. Këtë e bëri të ditur dje kryetari i grupit parlamentar të Lëvizjes për Zhvillim Kombëtar, Maksim Begeja. Ai u shpreh se në statutin e Lëvizjes është e sanksionuar se jo vetëm Leka I, por edhe pjesëtarët e tjerë të Oborrit, ku futen ministrat e këshilltarët e pretendentit të fronit, Leka I, nuk kanë të drejtën e të qenit kandidat për deputet. Ndërkohë, javën e ardhshme do të shpallet programi që do të ndiqet nga LZHK-ja. Zëdhënësi i Oborrit Mbretëror, Fluturak Gërmenji, u shpreh për Gazetën se tashmë ka përfunduar përpunimi i plotë të gjithë programit të Lëvizjes, i cili u hartua nga një sërë komisionesh të ngritura në funksion të lëvizjes dhe javën që vjen ai do të shpallet nga vetë Leka I. Gërmenji u shpreh se ky program do të shpallet në të gjitha rrethet e vendit, në të cilat janë ngritur tashmë strukturat e LZHK-së. Gjatë kësaj periudhe Leka I ka zhvilluar një sërë takimesh me përfaqësues ndërkombëtarë. Dje takimi u zhvillua me Grupin Ndërkombëtar të Krizave.