Është miratuar në seancën e djeshme parlamentare qeveria e re me Kryeministër Fatos Nanon.

Të gjitha dekretet e Presidentit Moisiu për tetë shkarkime ministrash dhe për emërimin e 12 të tjerëve, janë miratuar nga votat e deputetëve socialistë dhe aleatëve të tyre në “Koalicionin për Integrim”. Seanca ka filluar me akuzat mjaft të ashpra të liderit të opozitës ndaj Kryeministrit Fatos Nano dhe anëtarëve të rinj të kabinetit qeveritar. Berisha ka akuzuar edhe Presidentin e Republikës, Alfred Moisiu, se është i implikuar në krimet e qeverisë së re, pasi ai ka legjitimuar atë me dekretimin e ministrave të rinj të këtij kabineti. Berisha i ka kujtuar Nanos akuzat e ashpra që ky i fundit ka bërë për ministrat që do të votoheshin vetëm pas pak çastesh. Në mbështetje të Berishës, nënkryetarja e parlamentit ka deklaruar se ndjehet e turpëruar se ka votuar Presidentin Moisiu për të mbajtur postin e kreut të shtetit. Topalli është mbështetur edhe nga deputetë të tjerë të opozitës.

Metistët pro Nanos
Në seancën e djeshme kanë qenë të pranishëm dhe kanë votuar pro kabinetit të ri qeveritar katër deputetë, anëtarë të grupit të mbështetësve të ish-kryeministrit Meta. Ilir Zela, Ardit Kaja, Eduard Alushi, Gjergji Koja kanë votuar dje pro dekreteve të Presidentit për emërimin e ministrave të rinj në kabinetin qeveritar, ndryshe nga 9 deputetët e tjerë të këtij grupimi, të cilët kanë bojkotuar seancën për miratimin e qeverisë. Ish-ministrja e Kulturës, Arta Dade dhe ish-ministrja e Punës, Valentina Leskaj, kanë qëndruar gjatë procesit të votimit në sallën e deputetëve. Me 64 vota pro është miratuar dekreti për shkarkimin e Dades, duke shënuar numrin më të vogël të votave për shkarkime, në seancën e djeshme për dekretet e Presidentit. Numri më i vogël i votave pro ka qenë për ministrin e Mjedisit, Ethem Ruka, i cili ka mundur të marrë vetëm 73 vota pro.

Kundërshtimet e opozitës
Deputetët e opozitës kanë kundërshtuar që në fillim të seancës procedurën e votimit të dekreteve të Presidentit. Brenda një dekreti të Presidentit ishin të paraqitura tre nene, ku i pari shkarkonte një ministër, i dyti emëronte një tjetër. Kjo procedurë është vlerësuar jo e rregullt nga opozita, pasi, sipas pretendimeve të tyre, mund të ishin pro me nenin e parë dhe kundër me të dytin dhe brenda një vote nuk mund të diferencoheshin qëndrimet e tyre ndaj neneve të dekretit të Presidentit. Pretendimi i opozitës është kundërshtuar nga kryetari i Kuvendit dhe pas një pushimi të seancës ka filluar votimi, megjithë zhurmën e opozitës para podiumit të kryetarit të parlamentit. Ka mbetur në sallën e parlamentit vetëm grupi parlamentar i PDR-së, pasi pjesa tjetër e opozitës ka bojkotuar seancën. Deputetët e PDR-së kanë qëndruar në sallën e Kuvendit, megjithëse kanë dhënë votën e tyre kundër qeverisë, kanë marrë falenderimet e Kryeministrit Nano për prezencën në sallë dhe ftesën e tij për bashkëpunim në fushën e legjislativit në të ardhmen.

Grupi Meta, deklaratë kundër qeverisë

Siç ishte paralajmëruar, dje kanë munguar në seancën plenare të votimit të qeverisë pjesa më e madhe e grupit të kundërshtarëve të Nanos në PS. Ish-kryeministri Ilir Meta, deputetët Dizdari, Brokaj, Kryemadhi, Prifti, Braho, Legisi, kanë munguar dje në sallën e Kuvendit, por kanë reaguar nëpërmjet një deklarate për shtyp ndaj zhvillimeve të fundit: ”Ne një grup deputetësh të Partisë Socialiste të Shqipërisë, në vazhdën e qëndrimeve të njohura tashmë për organet drejtuese të PSSH-së dhe për opinionin publik deklarojmë: Se rikompozimi i qeverisë ofruar nga z.Nano si zgjidhje për krizën e qeverisjes, në të cilën është përfshirë vendi muajt e fundit, nuk përbën një zgjidhje reale dhe të plotë të kësaj krize. Kjo lloj zgjidhje e sforcuar dhe pa moral politik, vjen si produkt i kongresit të gjashtë të PSSH, i cili shënoi regres jo vetëm në jetën politike të PSSH, por edhe për pluralizmin politik shqiptar. Ky kongres siç është vlerëuar tashmë nga disa prej përfaqësuesve më në zë të opinionit intelektual shqiptar, ishte në frymën e zhvillimeve të njohura totalitariste të majta apo të djathta, të cilat sundonin në Evropën e fillimshekullit të kaluar. Ata kanë bërë sërish publike të gjitha arsyet për të cilat nuk do të mbështesin qeverinë e re të kryesuar prej Nanos.

Opozita qëndrim unik në Kuvend
Berisha: Jo votë për baronët e drogës në Qeverinë Nano

Seanca e djeshme parlamentare për votëbesim të qeverisë Nano, e dekretuar nga presidenti Moisiu, ka nisur me akuza të shumta të opozitës ndaj emrave të kabinetit të ri qeveritar. Kryetari i Partisë Demokratike, Sali Berisha, ka akuzuar ashpër kryeministrin Nano dhe disa nga ministrat e rinj, si të lidhur me krimin e organizuar, korrupsionin dhe trafiqet e drogës. “Dita e sotme është një ditë turpi për parlamentin dhe ngjarje e zezë në historinë kombëtare. Qeveria e re është turpi i Shqipërisë. Ju përfaqësoni klanet më të rrezikshme të Europës. Kabineti i sotëm është më i korruptuari e i inkriminuari i vendit që nga viti 1913. Të mbledhësh në qeveri gjithë përfaqësuesit e krimit ekonomik dhe trafiqeve e t’i vësh në qeveri, të forcosh pushtetin me lidhjet e krimit, do të thotë që kjo të jetë qeveria më afatshkurtër”, u shpreh ai. Berisha akuzoi Anastas Angjelin dhe Bashkim Finon per korrupsion, duke i quajtur “baronë të drogës e krimit”. Akuza i jane drejtuar edhe Arben Malajt, të cilin Berisha e quajti “hajdutin më të madh të financave shqiptare, dhe themeluaes të firmave piramidale, ndërsa për ministrin e Rendit, Igli Toska, ai tha se si gjyqtar në vitin 1994 është dënuar për mbrojtje të një vepre për mitmarrje dhe se akoma nuk ka marrë pafajësinë”. Po ashtu, edhe kryetarët e grupeve te tjera parlamentare kanë deklaruar votën kundër ministrave të propozuar nga Nano dhe të dekretuar nga Presidenti Moisiu.

1. Namik Dokle
   pro 75
   kundër 10
   astenim 3
   
2. Arben Malaj
   pro 77
   kundër 4
   astenim 2
   
3. Kastriot Islami
   pro 77
   kundër 4
   astenim 3
   
4. Anastas Angjeli
   pro 76
   kundër 5
   astenim 5
   
5. Fatmir Xhafa
   pro 76
   kundër 6
   astenim 3
   
6. Bashkim Fino
   pro 76
   kundër 8
   astenim 3
   
7. Leonard Solis
   pro 76
   kundër 7
   astenim 2
   
8. Engjëll Bejtaj
   pro 75
   kundër 10
   astenim 3
   
9. Blendi Klosi
   pro 74
   kundër 10
   astenim 4
   
10. Et’hem Ruka
    pro 73
    kundër 10
    astenim 4
    
11. Marko Bello
    pro 77
    kundër 4
    astenim 2
    
12. Igli Toska
    pro 76
    kundër 8
    astenim 6