04022004leka

Faqe 14 - Aktualitet

5Shkurt 2004

Pas operacionit, pretendeti për fron mban në këmbë një shufër

Leka Zogu, lë spitalin e rikthehet në vilën mbretërore

Pretendenti për fronin mbretëror në Shqipëri, Leka Zogu, ka lënë dje spitalin për t’u kthyer në vilën e tij. Ai ishte shtruar në repartin e traumatologjisë, ndërsa ishte operuar në një nga sallat komode, ku dhe kushtet kanë qenë më të mira. Një javë më parë, Leka Zogu ishte shtruar në spital, pasi pësoi fraktura të rënda në këmbë. Incidenti ka ndodhur në oborrin e vilës së tij. Ndërsa kishte qenë duke ecur, 63- vjeçari ka rrëshqitur mbi akull dhe është rrëzuar. Fillimisht është kujtuar se bëhej fjalë për një ndrydhje të lehtë. Por, kur ka mbërritur te mjeku është mësuar se kishte pësuar dëmtime të rënda. Menjëherë me ambulancë është përcjellë për në Spitalin Ushtarak, ku dhe ka marrë ndihmën e parë mjekësore. Nga grafia e bërë ka rezultuar se bëhej fjalë për një thyerje të shkallës së rëndë. Sipas mjekëve, ishin vënë re krisje të theksuara, që kishin nevojë për një operim dhe vendosje të një shufre speciale çelik dhe titanium. Pa kaluar shumë ditë, pretendenti për fronin mbretëror është operuar dhe në këmbën e tij është shtuar një pjesë tjetër e përbërë nga çeliku dhe titaniumi. Këtë shufër, Leka Zogu do ta mbajë edhe në të ardhmen, pasi dëmtimi është i rëndë. Atij i është rekomanduar konsultim i përhershëm me mjekët edhe në shtëpi. Duket se këshillat e mjekut në ditët në vazhdim, 63-vjeçari do t‘i duhet t‘i zbatojë me përpikmëri. Shufra që u përdor për Leka Zogun ishte e një cilësie të veçantë dhe ka kushtuar jo pak. Mjeku, që bëri edhe operacionin, është shprehur se ndërhyrja kirurgjikale ka qenë me sukses.

Faqe 9 - Politikë

5Shkurt 2004

Pronat

Komisioni i Ekonomisë vendosi krijimin e një strukture të re për inventarizimin e tokave dhe pronarëve

Pronat, shkrihet Komiteti Shtetëror

Struktura e re do të ketë degë në të gjithë rrethet e vendit

Elisabeta Ilnica

Komitetit Shtetëror për kthimin dhe kompensimin e pro-nave do të shpërbëhet. Në vend të tij, do të ngrihet një strukturë e re në varësi të Qeverisë.

Komisioni i Ekonomisë ka propozuar dje shkrirjen e Komitetit Shtetëror, i cili ka mbi 10 vjet që funksionon. Komiteti i ri, që do të zëvendësojë të parin, do të jetë vetëm për një mandat të përcaktuar 3-vjeçar. Ky ndryshim mendohet që të përshpejtojë ritmin e kthimit dhe kompensimit të pronave, menjëherë pas miratimit të projektligjit. Pas ristrukturimit, Komiteti do të mundë të hapë zyrat e tij në nivel Qarku. Që këtu një numër punonjësish do të merret me identifikimin e pronarëve, numrin e sipërfaqeve të lira dhe të zëna të tokës. Komisionerët kanë kërkuar dhe regjistrimin në kadastër të të gjithë pronarëve, që kanë përfituar tokë nga ligji 7501, në vitin 1991 dhe nuk janë regjistruar si pronarë të ligjshëm.

Problemet dhe prioritetet
Një komisioni i ri për kthimin dhe kompensimin e pronave, nuk do të thotë se do ta përfundojë këtë proces sa hap e mbyll sytë. Edhe pse është propozuar ngritja e tij, problemet fillojnë që nga marrja e “ok”-it përfundimtar për të, drejtuesit, administrata etj. Madje, ende nuk është rënë dakord se në varësi të kujt do të menaxhohet komiteti i ri. Po kështu, nuk është përcaktuar edhe përbërja e tij. Deri tani dihet se do të jenë përfaqësues të opozitës dhe mazhorancës që do të marrin “timonin” e Komitetit Shtetëror, por te kryetari çështja sërish ka ngelur pezull. Të gjitha këto “përkthehen”, pengesa të tjera që prona të bjerë në duart e pronarit të vërtetë. Megjithatë, një Komitet me strukturë të posaçme për të ndihmuar në kthimin dhe kompensimin e pronave, do të krijonte lehtësira në këtë proces. Komiteti ekzistues prej kohësh është marrë me evidentimin e sipërfaqeve të lira të tokave, por jo me regjistrimin direkt të pronarëve pas vitit 1991 dhe detaje për shpronësimet publike. Zyrat rajonale do të koordinojnë punën me Komitetin Shtetëror të Tiranës, duke evidentuar brenda një periudhe të shkurtër numrin e sipërfaqeve disponibël në raport me pronarët.

Pezullimi i ligjit 7501
Nga ana tjetër, shqetësim ngelet “masakra” e tokave. Vetë zëvendëskryeministri Dokle ka pranuar se një pjesë e tokave më të mira janë zënë. Gjatë analizës për vitin 2003 të Komitetit për kthimin dhe kompensimin e pronave, ai “tokat e lira që do të përdoreshin për kompensim të ish-pronarëve, tashmë janë të pakta, pasi pjesa më e madhe e tyre janë përvetësuar në mënyrë të paligjshme”. Komiteti për kthimin dhe kompensimin e pronave ish-pronarëve i kërkoi qeverisë pezullimin e Ligjit 7501, deri në përfundim të studimit që po bëhet për kompensimin fizik të ish-pronarëve, në tokat e lira në vend. Kryetari i këtij Komiteti, u shpreh se në 10 vjet krijim të këtij institucioni, është shkelur ligji nga vetë drejtuesit e Komitetit dhe prefektë e pushtetarë të tjerë lokalë në qarqe të ndryshme, duke përvetësuar toka të lira. Sipas tij, ky pezullim duhet të zbatohet deri në momentin e miratimit të ligjit të ri për pronat në Kuvend. Por, kjo kërkesë jo vetëm u rrëzua përfundimisht nëpërmjet Komisionit të Ekonomisë, por tashmë është vënë në dyshim edhe vetë ekzistenca e këtij komiteti.

Begeja: Po shtyhet çështja në pafundësi
PR kërkon afat për kthimin e pronave

Deputeti republikan, Maksim Begeja, ka protestuar dje në Byro për vonesat e komisioneve që po diskutojnë çështjen e kthimit dhe kompensimit të pronës. Ai ka ngritur zërin për mungesën e detajeve që përcaktojnë saktë mundësinë e kthimit të tokës. “Afatet duhen vendosur, sepse, kështu siç e kemi nisur, kjo çështje do të shtyhet në pafundësi”, deklaroi Begeja. Këto argumente nuk kanë qenë të mjaftueshme për Kryetarin e Kuvendit, Servet Pëllumbi. Sipas tij, puna në komisione ka ecur dhe së shpejti ky projektligj do të mund të diskutohet dhe t’i nënshtrohet procesit të votimit në Kuvend. Begeja ka këmbëngulur prapë në kërkesën për një faturë të saktë nga qeveria për kompensimin e pronarëve. Por, zëvendëskryeministri Dokle kërkoi më shumë kohë në dispozicion për faturën, duke u fshehur pas saktësisë së saj. “Ne po punojmë dhe po mbledhim çdo detaj për të dhënë faturën sa më të plotë, por realizimi i mirë kërkon edhe më shumë kohë në dispozicion”, u shpreh Dokle. Në këtë kuadër, diskutimi i çështjes së kthimit dhe kompensimit të pronës, do të vazhdojë diskutimet në komisionet parlamentare pa kufi kohor dhe vetëm pas përfundimit në to, do të mund të bëhet pjesë e diskutimeve dhe votimit në seancë.

Debat në Byronë e Kuvendit. Topi: Qeveria s‘ka skemë për dëmshpërblimin
Dokle: Për një muaj përcaktojmë faturën financiare për ish-të përndjekurit

Qeveria përcakton afat për faturën financiare të ish të përndjekurve politikë. Në fund të shkurtit, do të zbardhet shpërblimi që do t’i takojë këtij komuniteti. Zëvendëskryeministri Namik Dokle, ka theksuar se brenda një muaji faturës do t’i vihet vula. Megjithatë, si problematikë ai ka nxjerrë në dukje ndarjen e ish të burgosurve politikë nga ato ordinerë. Në cilësinë e përfaqësuesit të qeverisë në këtë mbledhje, Dokle rikonfirmoi vullnetin e plotë politik të qeverisë për t’i dhënë fund kësaj maratone disavjeçare. Por, kreu i Grupit të PD-së, Bamir Topi, duket se nuk ishte i një mendimi me të. Sipas tij, “qeverisë i mungon vullneti politik dhe aftësia për realizimin e këtij procesi, pasi ajo ende nuk ka hartuar skemën, faturën financiare për kompensimin e shtresës së ish-të përndjekurve”. Ndërsa zv.kryeministri Dokle bëri të ditur se, së shpejti në buxhetin e shtetit do të bëhen amendimet e nevojshme, ku do të përfshihen fonde shtesë, të siguruara nga shitja e objekteve strategjike. Një pjesë e këtyre fondeve do të kalojnë për fillimin e procesit të dëmshpërblimit të ish-të përndjekurve, shtoi ai. “Aktualisht, qeveria, në bashkëpunim me Institutin e të Përndjekurve Politikë, po punon për përllogaritjen e një fature sa më reale, pasi në ndonjë rast shifrat e paraqitura për këtë proces kanë qenë abuzive”, theksoi Dokle. Ndërkohë, gjatë mbledhjes së djeshme të Byrosë u ra dakord që në ditët në vazhdim, në punimet e Kuvendit të futet dhe projektrezoluta për çështjen “çame”, një iniciativë kjo e deputetëve të Partisë së Ballit Kombëtar. Por, kjo çështje nuk do të jetë objekt diskutimi në Kuvend edhe për dy javët e ardhshme. Komisioni i Jashtëm e ka hedhur poshtë projektrezolutën e paraqitur disa ditë më parë. Edhe sipas Pëllumbit, një projektrezolutë e tillë, është e papranueshme për parlamentin shqiptar, ndaj nismëtarëve u mbeten vetëm dy mundësi, nëse duan vërtet ta shtrojnë çështjen për diskutim: ose ta riformulojnë projektrezolutën, ose të diskutojnë me anëtarët e Komisionit të Jashtëm për të bërë disa ndryshime në dokumentin aktual.

Byroja e Kuvendit harron komisionet

Byroja Parlamentare harron të diskutojë çështjen e komisioneve hetimore, atë tragjedisë së 9 janarit dhe të Shkallnuerit. Edhe pse ishte planifikuar që të përfundoheshin dje debatet disajavore, anëtarët e Byrosë e kanë anashkaluar, duke u marrë me problematikat e tjera.

TIRANE - Kompensimi në lekë i ish -pronarëve, për të cilët është i pamundur kompensimi fizik, do të përfundojë pas 10 vjetësh. Vendosja e këtij afati kohor, prej një dekade, u përcaktua dje në komisionin e Ekonomisë dhe Financave, gjatë shqyrtimit përfundimtar të draftit për kthimin dhe kompensimin e pronave. Kështu sipas projektligjit të hartuar me ndihmën e ekspertëve të OSBE-së, si dhe me ndryshimin e bërë në komision, që nga 2005 buxheti i shtetit do të ketë një zë më vete fondin për kompensimin e ish-pronarëve. Sipas draftit, fondi që do të përcaktohet nga qeveria, do të administrohet nga Komiteti Shtetëror për Kthimin dhe Kompensimin e Pronave, i cili do të fillojë shpërndarjen e parave sipas një renditjeje të përcaktuar nga ai vetë. Në këtë mënyrë komisioni i Ekonomisë i ka dhënë kompetencë të plotë strukturës së re për kthimin e pronave për të menaxhuar paratë që do të vihen në dispozicion nga buxheti i shtetit për kompensimin në lekë. Sipas ndryshimit të bërë dje në komisionin e Ekonomisë në nenin 21 të draftit, Komiteti Shtetëror, do të përcaktojë radhën dhe proporcionin e kompensimit të pronarëve, bazuar në vendimet që do të merren nga Komisionet Vendore. Pra teorikisht pronarët e parë do të marrin kompensim në lekë brenda vitit të ardhshëm nëse kjo është e mundur, ndërsa të fundit në 2015, duke mbyllur të gjithë procesin problematik për çështjen e kthimit të pronave. Por ndërsa u përcaktuan afatet përfundimtare ligjore si për kompensimin fizik, ashtu edhe për atë në të holla, ende nuk ekziston një faturë e qartë financiare, mbi bazën e të cilës të ketë edhe një shpërndarje në vite për fondin që duhet të vendosë qeveria në buxhet për këtë çështje. Deputeti republikan Robert Çeku, tha dje për gazetën “Shekulli” se Komiteti Shtetëror që do të ngrihet pas hyrjes në fuqi të ligjit, do të punonte për përcaktimin e kësaj fature, të cilën do të vijë ta raportojë në Parlament. Ndërkaq në ligjin e miratuar dje nga komisioni i Ekonomisë, është përcaktuar që vonesat në kohë për marrjen e lekëve, pas vendimit për njohjen e pronësisë për subjektin e shpronësuar, personi në fjalë do të përfitojë edhe përqindjen bankare për shumën në fjalë. Sipas draftit të miratuar nga komisioni i Ekonomisë, i gjithë aktiviteti ekonomik dhe financiar i Komitetit Shtetëror për Kthimin e Pronave, do të kontrollohet nga Kontrolli i Lartë i Shtetit, çdo 8 muaj, duke bërë publike të gjitha të dhënat që do të dalin nga ky kontroll. Në këtë mënyrë komisioni parlamentar i Ekonomisë përfundoi dje shqyrtimin dhe përmirësimin e një prej projektligjeve më të rëndësishme të Kuvendit të kësaj periudhe. Ndërkohë para se ligji të përcillet për miratim në seancë plenare, komisioni do të mblidhet edhe një herë për të diskutuar rreth vërejtjeve që do të paraqesin grupet parlamentare.

TIRANË – Komiteti Shtetëror për Kthimin dhe Kompensimin e Pronave pritet të deklarojë e të publikojë deri në fund të këtij muaji sipërfaqen e tokave të lira shtetërore. Këtë e ka bërë të ditur dje, gjatë seminarit “Kategorizimi i tokës dhe trojeve domosdoshmëri për në kompensim objektiv”, kryetari i këtij komiteti Sokrat Sinaj. Deklarimi i sipërfaqes së lirë të tokave shtetërore pritet të bëhet pas përfundimit të studimit që ka disa kohë që ka nisur. Por lidhur me këtë, Sinaj i ka kërkuar në këtë seminar zv/ministrit të Rregullimit të Territorit dhe Turizmit Artan Lame që brenda dy muajsh të pezulloheshin nga kjo ministri dhënia e titujve për persona të stimuluar në tokat bregdetare. Kjo do të thotë që në zonat bregdetare apo fshatrat turistikë për këto dy muaj të mos ketë tolerime për persona të veçantë. Këtu është përmendur sidomos Golemi që ka patur ndërtime të shumta pa kriter. Edhe në mbledhjen e fundit të KRRTRSH-së kryeministri Nano kërkoi që deri në 1 mars të paguhen të gjitha detyrimet e prapambetura nga personat e stimuluar që kanë ndërtuar fshatra turistikë në këtë zonë. Sipas Sinajt, në një fazë të parë ky komitet mbështetur edhe në metodikën shkencore të plotë do të evidentojë sipërfaqet e lira, të cilat janë pronë e shtetit dhe që do të shërbejnë për kompensimin fizik të ish-pronarëve. Kjo pjesë sipas tij, është duke u kryer nga grupet vendore në bazë qarku dhe informacioni në nivel kombëtar do të bëhet i disponueshëm në fund të muajit shkurt të këtij viti. Ndërsa në një fazë të dytë do të përcaktohen kriteret dhe parametrat shkencorë për një vlerësim sa më objektiv të sipërfaqeve të tokave të natyrave të ndryshme të ish-pronarëve apo ato të lira të shtetit të evidentuara në fazën e parë që do të shërbejnë për efekt kompensimi në natyrë ose të holla. Në seminarin e djeshëm ku kanë marrë pjesë drejtues të ndryshëm, por edhe deputetë të Kuvendit janë dhënë mendime për përllogaritjen e vlerës së këtyre trojeve, për të bërë të mundur më pas llogaritjen hap pas hapi të vlerës së kompensimeve. Zv/ministri i Turizmit Artan Lame ka bërë me faj strukturat lokale për keqpërdorim të trojeve sidomos në fshatrat turistike.