Akuza: Muldaka nuk akuzohet për vrasjen e Hajdarit

Ai është konsideruar nga prokuroria si bashkëpunëtor dhe asnjë herë nuk është marrë i pandehur

Ened Janina

TIRANË- Astrit Muldaka është arrestuar vetëm për përdorimin e një pasaporte të falsifikuar. Ndaj tij Prokuroria e Rrethit Durrës ka filluar procedimin penal për këtë vepër dhe nuk po e heton për asgjë tjetër. Personazhi i bërë i njohur në media tre vjet më parë kur jepte dëshminë e tij me anë të videokonferencës për procesin “Hajdari” nuk ka asnjë akuzë tjetër mbi vete. Ai nuk është akuzuar asnjë herë për vrasjen e deputetit Azem Hajdari më 12 shtator të vitit 1998. Madje Muldaka është konsideruar nga prokuroria shqiptare në lidhje me këtë çështje si një bashkëpunëtor i drejtësisë që ka zbardhur shumë detaje nga vrasja më e bujshme e shekullit të kaluar. Lajmi është pohuar dje nga burimet zyrtare të prokurorisë shqiptare. Sipas tyre, Muldaka i ka larë duart me drejtësinë për çështjen “Hajdari” kur ka dëshmuar kundër ish -shokëve të tij.
Astrit Muldaka është arrestuar nga policia e Portit të Durrësit sapo ai ka shkelur territorin e Shqipërisë. Muldaka po kthehej nga Italia, i shoqëruar nga policia e atij vendi, dhe i është dorëzuar policisë shqiptare. Gjatë kontrollit fizik, tropojanit 31- vjeçar i është gjetur një pasaportë shqiptare me vizë për të dalë jashtë shtetit. Efektivat e policisë kanë parë pasaportën por kanë pikasur se në të ndodhej fotografia dhe të gjitha të dhënat e personit që kishin përballë por emri ishte i rremë. Për këtë arsye është kryer edhe arrestimi i Muldakës. “Më datën 02.12.2004, ora 19.00, u arrestua shtetasi Astrit Zog Muldaka, 31 vjeç, banues në Tropojë, me arsim tetëvjeçar, sepse është kthyer nga policia italiane në VKK, me dokumenta të falsifikuara”,- thoshte dje njoftimi i Ministrisë së Rendit Publik në lidhje me këtë çështje. Ndërkohë, burimet zyrtare të Prokurorisë së Durrësit të pyetura për këtë çështje kanë pohuar se Muldaka akuzohet vetëm për përdorim dokumentesh të falsifikuara. “Ai u arrestua nga policia sepse u kap me një pasaportë dhe vizë false. Materialet na kaluan ne në prokurori dhe ngritëm akuzën. Kjo është e vetmja akuzë që ne kemi ngritur ndaj tij”,- pohuan dje burimet zyrtare të Prokurorisë së rrethit Durrës. Sipas tyre, Astrit Muldakën e ktheu policia italiane dhe gjatë kontrollit iu gjet pasaporta me vizë por jo me emrin e tij. Gjatë marrjes në pyetje nga polia pas arrestimit, Astrit Muldaka ka thënë se është kthyer në Shqipëri për vëllanë dhe babanë që kishte këtu. Ai e ka justifikuar përdorimin e dokumenteve false duke thënë se nuk kishte dokumente të tjera me emrin e tij dhe kështu që e kishte pasur më të lehtë t’i bënte nga e para me emër tjetër. Ky argumentim i Muldakës është vënë disi në dyshim nga policia shqiptare pasi i arrestuari është deportuar nga shteti italian. Në Itali Muldaka ka kryer dënimin e dhënë nga gjykata për veprën penale të shfrytëzimit të prostitucionit. Ky dënim ka mbaruar vetëm pak kohë më parë dhe menjëherë ai është deportuar në drejtim të Shqipërisë.

Tropojani ka qenë ndër njerëzit që ka marrë pjesë në vrasje dhe ka pranuar të bashkëpunojë me drejtësinë

Dëshmia e Muldakës në dosjen “Hajdari”

E.Janina

Emri i Astrit Muldakës është përmendur shumë gjatë hetimit dhe gjykimit të dosjes për vrasjen e deputetit Azem Hajdari. Tropojani 31- vjeçar ka qenë një ndër njerëzit që ka marrë pjesë në vrasjen e deputetit por që nuk është ndjekur penalisht nga prokuroria shqiptare. Kur grupi i prokurorëve shkoi që ta merrte në pyetje në Itali, Muldaka pranoi menjëherë që të bashkëpunonte me drejtësinë dhe të tregonte gjithçka që dinte për vrasjen e Hajdarit. Në këtë mënyrë emri i tij nuk u përmend në dosje si i implikuar dhe i akuzuar por si një person që kishte qenë i pranishëm në ngjarje dhe kishte bashkëpunuar me drejtësinë. Ai u morr në pyetje nga gjykata me anë të një videokonference nga Roma dhe tregoi deri në detajet më të vogla të organizimit të vrasjes. Në dëshminë e tij Astrit Muldaka ishte shumë i paqartë dhe ngatërronte shpesh oraret. Për këtë arsye gjykata vendosi që ta merrte me rezerva dëshminë e tij. Gjithsesi kjo dëshmi ndihmoi gjykatën në punën e saj dhe prokurorinë që të tregonte se vrasja e Azem Hajdarit nuk kishte qenë si pasojë e një gjaknxehtësie të momentin por e planifikuar deri në detajin më të vogël. Muldaka u tregoi gjyqtarëve se në vrajse kishin marrë pjesë rreth 100 njerëz dhe gjashtë makina. Me dëshminë e tij Muldaka pothuajse shfajësoi Fatmir Metën nga implikimi në vrasje por “fundosi” dy nga vëllezërit Haxhia. Ai ka treguar të gjitha lëvizjet e kryera nga ekzekutorët e Azem Hajdarit të drejtuar nga Fatmir Haklaj. Në dëshminë e tij Muldaka ka folur për mënyrën se si janë gjetur makinat e krimit si dhe vendet ku ka qendruar grupi i ekzekutorëve. Madje edhe makinën me të cilën është bërë vrasja e kishte siguruar Astrit Muldaka. Dëshmia e Muldakës pritej që të ishte edhe pikënisja e dosjes hetimore “Hajdari 2” në të cilën do të akuzoheshin personat e tjerë që nuk kishin marrë pjesë direkt në vrasje. Kohë më pas kjo dosje u harrua dhe nuk u hap kurrë.