05/02/2004 http://www.korrieri.com/

Pronat, Leka falenderon Nanon
Ish-familja mbreterore vlereson qendrimin e qeverise per kthimin e pronave te ish-mbretit Zog. Reagojne legalistet: "Nuk ndikohemi ne vendimin tone per te votuar kunder ministrave te rinj te Nanos". Historia e viles se Durresit dhe shpresa per ringjalljen e saj

Ish-familja mbreterore shqiptare, nepermjet zedhenesit te saj, Fluturak Germenji, ka pershendetur angazhimin e qeverise shqiptare per kthimin e pronave te saj. Por, krahu politik i pretendentit per fronin mbreteror Leka I, Partia "Levizja e Legalitetit", eshte shprehur se kjo levizje e Kryeministrit Fatos Nano, nuk do te ndikoje ne qendrimin e saj ne votimin e dy dekreteve presidenciale per zevendesimin e dy posteve ministrore. Votim qe do te zhvillohet ne seancen plenare te dites se hene. Kryetari i PLL-se, Ekrem Spahia, vlereson se qeveria shqiptare, eshte e obliguar te zbatoje ligjin per kthimin dhe kompensimin e pronave pe familjen mbreterore. Spahia ka theksuar se "vete Mbreti Leka I, eshte shprehur se kthimi i pronave te familjes mbreterore, te behet ne kuadrin e kthimit te prones tek pronari legjitim per te gjithe pronaret". Gjithsesi, kreu i PLL-se, vlereson angazhimin e kreut te ekzekutivit shqiptar. Por, veren se "kjo nuk ka te beje aspak me nje koncension te votave te deputeteve te PLL per te mbajtur qeverine "Nano" ne kembe".

Nderkohe, Kryeministri Nano ka premtuar dy dite me pare se do t'i ktheje ish-familjes mbreterore vilen ne qytetin e Durresit dhe disa prona te tjera. Ne kete aspekt, ministri i Shtetit prane Kryeministrit, Blendi Klosi, i cili eshte ngarkuar nga Nano per te ndjekur me perparesi praktikat administrative te kthimit dhe kompensimit te pronave te familjes mbreterore, ka bere te ditur se shefi i qeverise mbetet i angazhuar per zgjidhjen e ceshtjeve, qe kane te bejne me plotesimin e detyrimeve ligjore. Ndersa kreu i opozites, Sali Berisha, ka nenvizuar se kthimi i pronave familjes mbreterore eshte nje akt legjitim.

E.GJ

Thane:

EKREM SPAHIA, Kryetar i PLL:

"Kuvendi i Shqiperise ka miratuar ligjin per statusin e familjes mbreterore, ku ne te perfshihet edhe kthimi i pronave te familjes mbreterore dhe vete Mbreti Leka I, eshte shprehur se kthimi i pronave te familjes mbreterore do te behet ne kuadrin e kthimit te prones tek pronari legjitim per te gjithe pronaret. Ne kete kontekst, themi qe qeveria shqiptare eshte e obliguar te zbatoje ligjin e dale nga Kuvendi. Ndersa hapat qe hedh zoti Nano tani, qe te merret qeveria me kthimin e pronave familjes mbreterore duhet pershendetur, por kjo nuk ka te beje aspak me ato, sikurse keto jane koncesion te votave te deputeteve te PLL per te mbajtur qeverine "Nano" ne kembe. Keshtu qe vota e deputeteve te PLL do te jete kunder qeverise 'Nano 6'".

BLENDI KLOSI, Minister Shteti prane Kryeministrit:

"Problemi i pronave te ish-familjes mbreterore, ashtu si dhe vete familja mbreterore eshte deklaruar disa here, do te zgjidhet ne kuadrin te ligjit per kthimin dhe kompensimin e pronave, ligj te cilin Parlamenti shqiptar tashme e ka ne shqyrtim dhe ne perfundim te tij. Nepermjet ketij ligji do te kete mundesi qe familja mbretorore te perfitoje pronat, te cilat jepen nga ky ligj, duke filluar nga vila e Durresit dhe me radhe ne disa nga momentet e tjera, te cilat do te jene te gjitha fryme e nje diskutimi te vazhdueshem. Ne jemi ne procesin e fillimit te ketij diskutimi. Per momentin nuk kemi asnje evidence te sakte te ketij realiteti".

SALI BERISHA, Kryetar i PD:

"Zoti Nano, ne paskrupullsine e tij, nuk do te ngurronte per te perdorur cdo lloj mjeti per mbijetese, ndonese eshte me kohera te numeruara. Rikthimi i pronave te mbretit eshte nje akt legjitim, eshte pjese e programit tone. Qe ne Kongresin e parafundit te PD-se egziston nje pike e platformes sone, rikthimi i pronave te mbretit per te rivendosur nje padrejtesi te madhe qe regjimi komunist kishte bere. E lidhur kjo me perpjekje tjera qe do te jene te deshtuara, jam i bindur se asgje nuk do te mund te detyroje perfaqesuesit e legalisteve shqiptare, te cilet jane nje tradite mirfilltas kunder Nano, te hutohen ne voten e tyre te kthjellet kunder Nanos dhe ministrave te tij".

 

Gazeta Shqiptare Faqja 7 - SPECIALE

Shkurt 4, 2004

http://www.balkanweb.com/gazeta/gazeta.htm

INTERVISTA/ LEKA ZOGU: DITET NE NEUROKIRUGJI

"Mungoi një shtrat për këmbët e mia"

Leka: Më mori malli për shtëpinë e Mbretëreshën

Odeta Halili TIRANE Më në fund "home sweet home". Një javë, që megjithatë mbretit Leka nuk i është dukur kushedi sa e gjatë, meqenëse nuk kanë munguar vizitat e të dashurve, qetësia fisnike dhe doktorët zëulët të Neurokirurgjisë që e kanë rrethuar veça-nërisht me përkujdesje. Dje qe dita e fundit në spital dhe dhoma e ngrohtë e gjithë dritë e reanimacionit ruante në heshtje atmosferën e paqtë në gjithçka brenda. Një tufë lulesh të bardha lis, dhuratë me shije mbretërore aty pranë me një pusullë elegante, oborrtari pak më tutje i pagojë, siç janë në tekefundja ushtarët e mbretit, dhe vetë Mbreti që shplodhet në orët e fundit pranë mjekëve. Ulur përgjysmë mbi shtrat, pozicion që s'mund ta fshehë prapëseprapë fizikun e gjatë, këmbët që nuk mbështeten tërësisht, duke sfiduar krevatin "e shkurtër", kallëp i standarteve të spitalit. Dhe nuk ngurron ta pohojë rehatinë e prishur. Se për mbretërit dhe princeshat që gjumin ua trazon një kokërr bizele nën dyshekë puplash, kjo është e pritshme. E megjithatë, i qetë dhe i çlirët pas mëngjesit të vonë Mbreti ynë pranoi t'i ndajë me ne përshtypjet e gjithë këtyre ditëve larg shtëpisë dhe bashkëshortes që i ka munguar veçanërisht, gjë që ai s'mundohet ta fshehë. Si ndiheni sot dhe çfarë ju ka munguar gjatë gjithë këtyre ditëve në spital? Mrekullisht mirë. Gjithçka ka qenë perfekte, shërbimi, mjekët, të cilët unë i falenderoj me gjithë zemër. Ç'më ka munguar? (vë buzën në gaz) Më ka munguar shtëpia, familja. Më ka munguar shtrati im. Ky ku jam shtrirë nuk është i përshtatshëm për gjatësinë time. Këmbët s'i kam ndjerë rehat në ndonjë rast (hedh sytë në fund të shtratit). Çfarë do të bëni sapo të mbërrini në shtëpi? Do të përqafoj Mbretë-reshën, më ka munguar. Më ka marrë malli gjithashtu për qenin tim dhe për gjithçka tjetër prej nga jam shkëputur një javë. Ndërsa im bir ka ardhur pothuaj çdo pasdite. Pastaj do të filloj me fizioterapinë. Duhet të stërvitem nga pak, e ndjej që shumë shpejt do të eci. Oborrtarët janë shprehur se ka qenë dëshira juaj për t'u operuar në Tiranë, megjithë mundësitë për t'u kuruar në Francë. Do t'i zgjidhnit mjekët tanë edhe nëse ndërhyrja do të kishte qenë e planifikuar? Padyshim që po. Në asnjë moment nuk kam menduar të shkoj jashtë shtetit. Dhe as nuk jam penduar për këtë gjë, megjithëse nuk jam shëruar plotësisht. Ne kemi mjekë të shkëlqyer, që nuk e kanë zhgënjyer vlerësimin dhe besimin tim. Nuk besoj se do të ndihesha më mirë kudo që të isha në këto momente. Përkundrazi. Si kanë qenë për ju ditët e spitalit? Si i keni kaluar momentet përtej konsultave të doktorëve? Jam çlodhur. Kam lexuar nga pak dhe kam menduar. E rëndësishme është që nuk jam mërzitur. Jeni ndjerë në ndonjë moment vetëm? A kanë ardhur t'ju vizitojnë? Po ka pasur shumë vizita. Politikanë? Kanë ardhur politikanë dhe njerëz të tjerë të dashur. Ditën që u operuat kishit planifikuar një takim me intelektualët shqiptarë dhe mediat. Do t'i ftoni sërish për të dhënë mesazhin tuaj kur të merrni veten? Mesazhi im tashmë është bërë i ditur. Por unë do të kem një takim të dytë për të thënë fjalën time, sapo ta ndjej veten mirë. Ndoshta pas dy javësh. Përshëndetemi pa e humbur ndjesinë e një atmosfere ndryshe në një dhomë të zakonshme spitali edhe pasi shkelim pragun e derës. Se përcillemi në heshtje nga vështrime të buzëqeshura oborrtarësh të pafjalë… Pak më vonë reanimacioni i Neurokirurgjisë do zhurmonte si asnjëherë nga kamerat dhe gazetarët… Ja VIP-at që vizituan Mbretin Leka në Neurokirurgji Mbreti nuk pranoi t'i diferencojë vizitat, të gjithave iu është përgjigjur me mirënjohje dhe mesazhin dhe reflektimin që ka marrë prej secilës e di vetëm Ai. Personeli i shërbimit na e shuajti kureshtjen duke na pohuar emrat e njohur që kishin kapërcyer pragun e spitalit këtë javë. Ambasadorë, politikanë, pushtetarë… Ka qenë ambasadori anglez, vizita e të cilit ka pasuar me atë zëvendëskryeministrit Namik Dokle dhe ministrit të Shëndetësisë, Leonard Solis. Nuk ka munguar gjithashtu dhe prezenca pranë tij e liderit të Partisë Demokrate të Shqiptarëve të Maqedonisë, Arbën Xhaferri. Njerëz të tjerë të dashur, princi Leka që ka mbërritur zakonisht pasditeve, prania e tij ka zëvendësuar dhe mbretëreshën e munguar për arsye shëndetësore, njerëz të tjerë të afërt dhe natyrisht politikanë legalistë… Por dhe të tjerë, më pak të ekspozuar, që iu kanë shpëtuar syve kureshtarë. Mbretërorët, foto zyrtare në publik Nuk mund të mos pohojmë që pamja zyrtare e Leka Zogut para kamerave dy orë pas mesdite, mund ta kishte thyer spontanitetin nëse do të ishte e tillë dhe gjatë intervistës sonë. Me bluzë të pambuktë dhe mbështetur mbi jastëkë, por gjithnjë i kujdesshëm për syzet hijerënda mbi sy, ne s'mund ta fiksonim në celuloid këtë prezantim. Se në të gjitha daljet publike mbretërorët nuk mund të jenë ndryshe veçse zyrtarë… E në këtë rast për ne mjaftonte njerëzorja e një interviste, larg komenteve për politikën dhe situatën në vend, pa u konkretizuar me foto. Tri orë me vonë fotoreporterët dhe kameramanët kishin para tyre Mbretin me këmishë e e pantallona të hekurosura, që s'mund t'i rrëfente më emocionet e tij të vërteta. Petrela: Këtu janë kuruar Qosja e Hamiti Mbreti i kaloi me sukses të dyja ndërhyrjet dhe ne jemi para jush për t'jua konfirmuar këtë meritë të doktor Pëllumb Karagjozit dhe të gjithë mjekëve që asistuan", u shpreh në një takim me gazetarët shefi i shërbimit të Neurokirurgjisë, doktor Mentor Petrela. "E rëndësishme është, vijoi më tej ai, të transmetohet besimi i Mbretit ndaj specialistëve shqiptarë, vlerësim i merituar që nuk u takon vetëm mjekëve që asistuan konkretisht në këtë rast, po gjithë specialistëve tanë". Doktor Petrela përmendi se në ambientet e Neurokirugjisë janë trajtuar gjithashtu akademiku Rexhep Qosja dhe profesori i njohur Sabri Hamiti, por dhe emra të tjerë të njohur. Ndërsa ne të gjithë jemi dëshmitarë të zgjedhjeve të pushtetarëve dhe politikanëve tanë në kësi rastesh, klinikat e përtej kufijve, ashtu siç kanë rendur dhe shumë të tjerë, por për trajtime me të vërtetë të pamundura. E, kjo e fundit, siç ka deklaruar një herë një nga profesorët e nderuar të Kirurgjisë dëshmon dështimin e mjekësisë shqiptare…

http://www.shekulli.com.al/

Operacioni, mbreti Leka në këmbë

Bruna Prifti

Pas operacionit të kryer në këmbë, mbreti Leka Zogu e ka marrë plotësisht veten. Madje si për të treguar se tashmë është në formë të mirë shëndetësore është ngritur në këmbë e ka mundur të ecë. Në një konferencë për shtyp zhvilluar pasditen e djeshme në ambientet e klinikës së mjekut të njohur Mentor Petrela, mbreti Leka ka falenderuar mjekun që u përkujdes për të. Ndërsa vetë doktor Petrela, nën kujdesin e të cilit u zhvillua ndërhyrja kirurgjikale, ka falenderuar mbretin i cili pati besim të plotë tek ai duke i besuar shëndetin. Gjithçka ndodhi në ditët e ftohta në Tiranë, kur mbreti gjatë një shëtitjeje në oborrin e shtëpisë së tij rrëshqiti në akull dhe pësoi frakturë në këmbë. Ndërhyrja e parë u shoqërua me një të dytë, e cila sipas mjekut pati efikasitet të plotë. Sa i përket aktiviteteve të tij, të lëna në mes pas aksidentit që pësoi, mbreti ka theksuar se do t’i zhvillojë pas dy javësh.

04/02/2004
----------------

Komisioni i Ekonomisë miraton afatin e dorëzimit të tapive dhe kompensimit për ish-pronarët

Pronat, kthimi pas dy vjetësh

“Dy vjet kohë për ish- pronarët për të dorëzuar dokumentet. Ja format e kompensimit”

Anila Rama

TIRANE - Pronarët e ligjshëm brenda dy viteve të ardhshëm do të kenë mundësi të dorëzojnë të gjitha dokumentet që vërtetojnë pronësinë për tokat apo trojet që dikur ua shpronësoi shteti komunist. Komisioni parlamentar i Ekonomisë vendosi dje të përcaktojë si afat limit 2 vjet kohë për njohjen dhe kompensimin e pronave ish-pronarëve, që nga koha e hyrjes në fuqi të ligjit të ri. Afati i përcaktuar në nenin 20 të draftit të hartuar me ndihmën e ekspertëve të OSBE-së, krijon mundësi që për 2 vitet e ardhshme të gjithë pronarët të dorëzojnë pranë Komitetit Shtetëror për Kthimin dhe Kompensimin e Pronave dokumentet e trashëguara nga zyrat e kadastrës apo nga të afërmit e tyre. Deputeti Ridvan Bode kërkoi që këto dy vjet të mos përcaktohen si periudhë për të njohur pronat, por edhe për kompensimin e tyre. Nga deputeti Mezan Malaj u kërkua që të mos përcaktohej afati për kthimin e pronave për dy vjet, por të ishte më i shkurtër. Sipas tij, pronarët që janë të interesuar për të marrë pronën i kanë gati dokumentet dhe nuk do të zvarrisnin dorëzimin e tyre për dy vjet. Por nga ekspertët e Ministrisë së Bujqësisë, u arsyetua se kjo kohë ishte përcaktuar duke pasur parasysh edhe faktin që një pjesë e pronarëve të ligjshëm mund të jenë në emigracion. Ndërkaq vendimin për të njohur pronën e pretenduar nga një ish-pronar, do ta japin Komisionet Vendore për Kthimin dhe Kompensimin e Pronave,(strukturë e re që do të ngrihet pas miratimit të ligjit), brenda 3 muajve nga paraqitja e kërkesës nga i interesuari. Por ligji përcakton që në rast se brenda kësaj kohe, komisioni nuk arrin të kryejë të gjitha veprimet, afati shtyhet edhe për një muaj tjetër. Nga ana tjetër, kur çështja nuk zgjidhet as gjatë kësaj periudhe, Komiteti Shtetëror merr në shqyrtim çështjen duke shpallur vendimin brenda 30 ditësh. Ndërsa hallka e fundit që mund t’i japë zgjidhje ngërçit, në projektligj përcaktohet gjykata. Por edhe për ato raste që lidhen me anën proceduriale të përcaktuar në nenin 16, subjekti i shpronësuar ka të drejtë të bëjë ankimin në gjykatë ndaj vendimit të marrë në Komisionin Vendor.

Fomat e kompensimit
Si mënyrë kompesimi për subjektet e shpronësuara në komision janë përcaktuar: me tjetër pronë të paluajtshme të të njëjtit lloj në pronësi të shtetit, me pronë tjetër të paluajtshme të çdo lloji me vlerë të barabartë në pronësi të shtetit, me aksione në shoqëri me kapital shtetëror që kanë vlerë të barabartë me pronën e paluajtshme, me vlerën e objekteve në privatizim, me lehtësi të detyrimeve fiskale ose me të holla. Sipas draftit, subjekti i shpronësuar duhet të paraqesë me shkrim në Komisionin Vendor për Kthimin e Pronave formën me të cilën kërkon të realizohet kompensimi. Kjo kërkesë mund të pranohet ose rrëzohet brenda 30 ditëve.

----

Komisioni i Ekonomisë vendos krijimin e Komitetit për Kthimin dhe Kompensimin e Pronave

Shkrihet Komisioni i Kthimit të Pronave, tani në varësi të Kuvendit

Anila Rama

TIRANE - Komisioni i Ekonomisë miraton kalimin në varësi të Parlamentit të Komitetit për Kthimin dhe Kompensimin e Pronave ish-Pronarëve. Ndërkaq Komisioni aktual shtetëror për Kthimin dhe Kompensimin e Pronave, i cili ka qenë në varësi të Këshillit të Ministrave, nuk do të funksionojë më. Dispozitat e reja të përcaktuara në projektligjin e ri për kthimin e pronave, parashikojnë ngritjen e një strukture të re me 5 vetë, 2 përfaqësues të pozitës, 2 të opozitës dhe i propozuar nga presidenti. Përbërja e kësaj strukture do të miratohet në Parlament, ndërsa kryetari do të zgjidhet sipas propozimit të bërë dje, nga Këshilli i Ministrave, për të kaluar më pas për miratim në Parlament. Ndërkohë drafti parashikonte që anëtari i propozuar nga presidenti duhet të marrë edhe detyrën e kryetarit të KSHKKP-së. Por kjo është lënë për t’u diskutuar edhe nga komisionet e tjera të Kuvendit. Deputetja Valentina Leskaj, propozoi dje që në ligj të përcaktohej mosemërimi i anëtarëve që kanë konflikte interesash për çështje pronash apo edhe për ata që kanë biznese të ndryshme. Komisioni vendosi që Komiteti Shtetëror apo edhe komisionet vendore, nuk do të marrin asnjë vendim me dokumente të mangëta, për t’i mbyllur rrugë abuzimeve dhe thellimit të mëtejshëm të problemit të pronave në raste të caktuara. Në rast se kjo dispozitë shkelet vendimet do të kalojnë për shqyrtim në gjykatë. Por debati kryesor dje në komisionin e Ekonomisë, ishte për ngritjen e strukturave të komisioneve vendore për kthimin e pronave, të cilat do të jenë në varësi të Komitetit Shtetëror. Deputetët propozuan dy variante për ngritjen e strukturave vendore, duke kërkuar që të ketë komisione vendore vetëm në 12 qendrat e qarqeve si dhe variantin tjetër, i cili krijon mundësinë për të ngritur agjenci në një rreth ku kërkesat nga subjektet e interesuara janë të shumta. Deputeti i PR-së Maksim Begeja propozoi që të zgjidheshin me konkurs, të gjithë anëtarët e komisioneve vendore, për të shmangur abuzimet e mundshme, në rast se do të bëhen me emërim. Por propozimi i tij u kundërshtua thuajse nga i gjithë komisioni, duke vendosur që propozimet për anëtarët e komisionit vendor të bëhen nga Këshilli i Qarkut dhe më pas të kalojnë për miratim në Komitetin Shtetëror në qendër. Por ekspertët e kundërshtuan këtë amendim, duke pohuar se ishte në kundërshtim me ligjin. Ndërkaq deputeti Begeja, tha që nuk komisionet vendore nuk duhet të ngriheshin pranë Zyrave të Regjistrimit të Pasurive, pasi kjo do të shërbente si bazë e mirëfilltë për shpërdorime dhe abuzime, ashtu si kanë vepruar këto struktura përgjatë këtyre viteve. Si kriter kryesor për të gjithë anëtarët e Komisionit Shtetëror është përcaktuar përvoja 10-vjeçare në profesin si ekonomist, jurist apo në fushën inxhinierike që ka lidhje me procesin e kthimit të pronave. Anëtari nuk duhet të jetë i përfshirë në ndonjë aktivitet tjetër politik dhe shtetëror.

-----

Ish-të përndjekurit, Dokle: Një fond nga shitja e BK-së për kompensimin

Anila Rama

TIRANE - Zv/kryeministri Namik Dokle deklaroi dje në byronë parlamentare se një fond i posaçëm nga shitja e Bankës së Kursimeve do të vihet në dispozicion për zgjidhjen e kompensimit financiar për ish -të përndjekurve politikë. Numri dy i qeverisë, i vendosur në krye të grupit të punës për zgjidhjen e problemit të ish -përndjekurve, sqaroi dje se tashmë ishte përcaktuar fatura financiare të cilën shteti do ta shlyente gjatë një periudhë të caktuar kohore. Për herë të parë ai tha se ishin gjetur edhe mekanizmat për të zgjidhur një nga problemet kryesore të kësaj periudhe i trashëguar i pazgjidhur nga qeveritë e pas viteve ‘90. “Qeveria po i kushton vëmendjen e duhur zgjidhjes së këtij problemi. Jemi të vendosur ta bëjmë këtë. Unë jam vetë një nga deputetët që kanë firmosur projektligjin për këtë çështje”, -tha Dokle gjatë diskutimit për kalendarin e ri të punimeve të Kuvendit. Por sipas tij, duhej ende kohë për të filluar zbatimin konkret të pikave që janë përcaktuar për t’u zgjidhur, pas miratimit të një ligji të posaçëm. Dokle tha se qeveria e kishte përcaktuar zgjidhjen e këtij problemi si një nga prioritetet kryesore në programin e saj qeverisës gjatë këtij viti. Ndërsa deputeti republikan Maksim Begeja, tha se qeveria vetëm sa po bënte demagogji me ligjin për të përndjekurit politikë. Ai tha se në rast se ishte përcaktuar fondi i posaçëm pas shitjes së Bankës së Kursimeve, nuk kishte pse të zvarritej pafundësisht në një kohë të pacaktuar.