07022004pll

Cani: "Referendum për kthimin e pronave"

Lajmi i ores 9:30 AM

TIRANE (7 Shkurt) - Guvernatori i Bankës së Shqipërisë, Shkëlqim Cani, ka kundërshtuar projektligjin për kompensimin e pronave, i cili po diskutohet në komisionet parlamentare, duke e konsideruar këtë variant jo të saktë. "Si ekonomist, kam një këndvështrim të tillë se nuk është normale që me tatim-taksat që paguajmë të gjithë ne, të paguhen ish-pronarët apo pronarët e rinj", theksoi Cani. Projektligji "Për kthimin dhe kompensimin e pronave" parashikon që deri në vitin 2014 ata ish-pronarë që nuk do të mund të kompensohen me prona të drejtëpërdrejta, do të kompensohen me vlerën e tregut. Sipas guvernatorit të Bankës së Shqipërisë, një referendum kombëtar do të ishte mënyra më e mirë për të zgjidhur këtë problem, i cili direkt apo indirekt i prek të gjithë shqiptarët. "Për të zgjidhur këtë çështje do të sugjeroja referendumin, ku populli mund të ndajë mes tre katër pyetjeve gjykimin për variantin më të mirë. Referendumi i vë vulën çdo lloj gjykimi, vendimi apo kuvendi. Sigurisht që nuk është e lehtë, por ky është mendimi im personal si një shtetas", u shpreh Cani, gjatë një konference për shtyp. Sipas tij, kjo do të ishte rruga më e qartë, më e pastër dhe më e qetë e zgjidhjes së çështjes së pronave, pasi publiku do të vendosë me votën e vet për këtë çështje. Ndërkohë, për ekonominë shqiptare do të jetë tepër e vështirë për të përballuar koston e kompensimit të pronave. Për këtë çështje Cani është shprehur se kjo është një kosto e papërballueshme dhe tepër e vështirë për t'u përballuar nga buxheti i shtetit shqiptar. Projektiligji "Për kthimin dhe kompensimin e pronave" parashikon që duke filluar nga viti 2005 në buxhetin e qeverisë do të parashikohet një fond më vete për të realizuar kompensimin e ish-pronarëve. Fondi parashkohet të jetë i pranishëm në buxhetin e shtetit deri në vitin 2014 dhe më pas do të fillojë kompensimi financiar i ish-pronarëve të ligjshëm.Gjatë një konference për shtyp, guvernatori i Bankës së Shqipërisë, Shkëlqim Cani, ka kundërshtuar përdorimin e fondit të mbledhur nga shitja e Bankës së Kursimeve për kompensimin e ish të përndjekurve. Sipas tij, disa kohë më parë midis ministrit të Financave, guvernatorit të Bankës së Shqipërisë dhe Fondit Monetar Ndërkombëtar është nënshkruar një marrëveshje, sipas të cilës, të ardhurat që do të realizoheshin nga shitja e Bankës së Kursimeve do të përdoren për shlyerje borxhi dhe investime të brendshme. Cani ka kërkuar që kjo marrëveshje të zbatohet, megjithëse do të jetë parlamenti ai që do të vendosë për paratë e arkëtuara nga shitja e Bankës së Kursimeve. Sipas Canit, Kuvendi ka të drejtë të miratojë buxhetin, ta rishikojë atë dhe të rishpërndajë të ardhurat. bm/bm (GazetaShqiptare/BalkanWeb) http://www.balkanweb.com/

Shekulli http://www.shekulli.com.al/

"Mënyra më e mirë është referendumi, ku populli mund të zgjedhë vetë variantin më të mirë"

"Nuk është normale që me tatim-taksat që paguajmë të gjithë ne, të paguajmë ish-pronarët"

Bledjana Beqiri

Deklarata

Kthimi dhe kompensimi i pronave ish-pronarëve duhet të bëhet me referendum popullor. Kështu ka deklaruar dje guvernatori i Bankës së Shqipërisë, Shkëlqim Cani. Sipas tij, mënyra më e mirë për kompensimin e pronave ish-pronarëve është referendumi, ku populli mund të gjykojë dhe të zgjedhë variantin më të mirë. “Kompensimi i pronave ish-pronarëve është një kosto e papërballueshme dhe nuk e di se si mund ta përballojë buxheti i shtetit shqiptar”, -pohon Cani. Ai deklaron se nuk është normale që me tatim-taksat që paguajnë të gjithë qytetarët të paguhen ish-pronarët apo pronarët e rinj. Kështu, guvernatori i Bankës së Shqipërisë ka deklaruar hapur se për kompensimin e pronave ish-pronarëve, nuk duhet të paguajë e gjithë shoqëria. Sipas informacioneve të mia, sqaron Cani, mendohet që deri në vitin 2014 ata ish-pronarë që nuk do të mund të kompensohen me prona të drejtpërdrejta, nga viti 2005 deri në vitin 2014 të kompensohen me vlerën e tregut. “Nëse mendohet kështu, mua më duket një kosto e papërballueshme dhe nuk e di se si mund ta përballojë buxheti i shtetit shqiptar", -pohon Cani. Prandaj, kreu i Bankës së Shqipërisë ka hedhur si opsion thirrjen e një referendumi, duke hedhur poshtë kështu ligjin që po diskutohet në Parlamentin shqiptar "Për kthimin dhe kompensimin e pronave ish-pronarëve". Ky ligj parashikon tre opsione për kthimin dhe kompensimin e pronave ish-pronarëve. Kthimi fizik ose siç quhet ndryshe kompensimi pronë me pronë; nëpërmjet privatizimit të pronës shtetërore (dhënia e një pjesë të aksioneve të pronës shtetërore) ose kompensimi financiar nga buxheti i shtetit. Por, Cani e ka quajtur si një zgjidhje anormale kompensimin financiar të pronave, sepse sipas tij, buxheti i shtetit nuk e përballon dot këtë kosto. “Kompensimi financiar është një kosto e papërballueshme nga buxheti i shtetit”, -pohon Cani. Edhe pse drafti që po diskutohet në Parlament parashikon krijimin e një fondi për kompensimin e pronave. “Nuk mundet që nga taksat që paguan çdo qytetar, të kompensohet vetëm një kategori e caktuar, ky është një proces jo i saktë", -pohon kreu i bankës qendrore. "Referendumi i vë vulën çdo lloj gjykimi, vendimi apo Kuvendi. Kjo do të ishte rruga më e qartë, më e pastër dhe më e qetë e zgjidhjes së çështjes së pronave dhe publiku të vendosë me votën e vet për këtë çështje",-tha Cani. Ai sqaron se "sigurisht që ky proces nuk është i lehtë, por ky është mendimi im personal si një shtetas".

Edmond Spaho

Qeveria nuk e ka marrë seriozisht kompensimin e pronave ish-pronarëve. Deri tani ka bërë vetëm lojë fajlësh

“Kompensimi i pronave, jo me referendum”

“Qeveria nuk e ka marrë seriozisht kthimin dhe kompensimin e pronave ish-pronarëve”, -pohon për gazetën “Shekulli” Edmond Spaho, sekretar i Marrëdhënieve Ekonomike në Partinë Demokratike. Sipas tij, qeveria nuk e ka marrë seriozisht këtë çështje, sepse në buxhetin e vitit 2004 nuk ka parashikuar një fond për kompensimin financiar të pronarëve, duke bërë vetëm lojëra fjalësh. “Kjo është një mungesë serioziteti”, -sqaron Spaho. Ai sqaron se ligji “Për kthimin dhe kompensimin e pronave ish-pronarëve” parashikon disa forma për kthimin e këtyre pasurive. “Kompensimi i drejtpërdrejtë me pronë, kompensimi nga shitja e pronës shtetërore dhe kompensimi i fundit është ai financiar”, -pohon Sapaho. Kështu, me miratimin e këtij ligji qeveria shqiptare duhet që të fillojë nga puna. “Sa më shumë që të zgjasë në kohë fillimi i procesit të kompensimit dhe sa më i ulët që të jetë ritmi, aq më e madhe do të jetë fatura që do të paguajë shoqëria”,-tha Spaho. Prandaj, sqaron ai më tej, shteti duhet që të fillojë sa më shpejt këtë proces, si dhe të shikojë mundësi të tjera alternative për kompensimin e pronave. Por, më parë duhet që të kryhet një inventarizim i tokave të lira, sepse pa u kryer ky proces nuk ka kompensim, sqaron Spaho. Ndërkohë për opsionin e hedhur nga guvernatori i Bankës së Shqipërisë, Shkëlqim Cani, për thirrjen e një referendumi për përcaktimin e formës më të mirë, Spaho është shprehur: “ligji i ka marrë parasysh të gjitha format”. Ai sqaron se ligji që po diskutohet preferon kompensimin fizik të pronave dhe referendumi nuk do të nxirrte ndonjë rezultat të ndryshëm. “Referendumi nuk është i nevojshëm, sepse në ligj ka disa alternativa”, -sqaron ekonomisti Spaho, duke shtuar se referendumi nuk do të sillte ndonjë gjë të re. “Ligji ka marrë parasysh vullnetin popullor, që në këtë rast është kompensimi fizik i pronave”,-tha Spaho. Ndërkohë që ai sqaron se ligji parashikon edhe krijimin e një fondi për kompensimin e pronave, ku çdo vit mund të depozitohen para, për të kryer më pas kompensimin financiar. Guvernatori Cani ka pohuar dje se “s’është normale që me tatim-taksat që paguajmë që të gjithë ne, të paguajmë ish-pronarët apo pronarët e rinj”. Ndërkohë që Spaho deklaron se “gjithçka që përdoret për kompensimin është e gjithë shoqërisë, por a do të përdoret kompensimi fizik apo financiar, unë nuk shikoj ndonjë ndryshim. Ndërkohë që guvernatori i Bankës së Shqipërisë ka deklaruar se nga paratë e siguruara nga privatizimi i Bankës së Kursimeve nuk do të përfitojnë as të përndjekurit politikë dhe as ish-pronarët e tokave, sepse ky është një kusht i marrëveshjes së nënshkruar me Fondin Monetar Ndërkombëtar.

B.Beqiri

Privatizimi

Cani: “Ja si duhet t’i shpenzojë qeveria paratë e Bankës së Kursimeve”

Paratë e siguruara nga privatizimi i Bankës së Kursimeve nuk duhet të shkojnë as për dëmshpërblimin e të përndjekurve politikë dhe as për kompensimin e pronave. Kështu ka pohuar guvernatori i Bankës së Shqipërisë, Shkëlqim Cani. Sipas tij, paratë e siguruara nga privatizimi i Bankës së Kursimeve duhet të përdoren për shlyerje borxhesh dhe për investime në ekonominë shqiptare. “Shumë kohë më parë, në marrëveshjen me Fondin Monetar Ndërkombëtar, dokument ky i firmosur nga kryeministri, guvernatori i Bankës së Shqipërisë dhe ministri i Financave, është rënë dakord edhe mbi mënyrën e përdorimit të fondeve të siguruara nga privatizimi”, -pohon Cani. Ai sqaron se për këtë çështje tashmë janë shprehur shumë deputetë apo krerë të qeverisë, por mirë është që qeveria shqiptare ti përmbahet kësaj marrëveshjeje. “Kuvendi ka të drejtë që të miratojë buxhetin, ta rishikojë buxhetin dhe të rishpërndajë të ardhurat”, -shprehet Cani, duke shtuar se opinioni i tij mbetet respektimi i marrëveshjes. “Fondet nga privatizimi i Bankës së Kursimeve duhet që të përdoren për shlyerje borxhesh dhe për investime në ekonominë shqiptare”, -përfundoi Cani.

Parashikimet

Cani: “Ja zhvillimet e pritshme për vitin 2004”

Banka e Shqipërisë garanton stabilitet çmimesh. “Të arrish stabilitetin e çmimeve do të thotë të arrish norma të ulëta pozitive të inflacionit ose të ndryshimit të çmimeve të konsumit. Të ruash stabilitetin e çmimeve do të thotë të sigurosh norma të ulëta pozitive inflacioni për periudha relativisht të gjata kohe”, -pohon Cani. Sipas tij, objektivi strategjik i Bankës së Shqipërisë është mbajtja e inflacionit në nivele të ulëta pozitive, të cilat sigurojnë qëndrueshmëri në tregje dhe mbështesin rritjen ekonomike. Kështu, Banka e Shqipërisë është e angazhuar në mbajtjen e inflacionit vjetor në nivelin rreth 3 për qind. Në funksion të këtij objektivi, programi monetar synon kontrollin e rritjes së ofertës monetare në mënyrë që niveli i mjeteve monetare reale t'i përgjigjet nevojave reale të ekonomisë për një rritje ekonomike prej 6 për qind. Programi monetar garanton respektimin e objektivave sasiorë të Bankës së Shqipërisë, si dhe kontrollin e huamarrjes së brendshme të qeverisë në nivelin 2.8 për qind të Prodhimit të Brendshëm Bruto. Ndërkohë që depozitat në valutë pritet të kenë një rritje të konsiderueshme vjetore, prej rreth 18.2 për qind, ose 17.7 miliardë lekë, në fund të vitit 2004. Sistemi bankar parashikohet të plotësojë totalisht nevojat e sektorit privat për kredi në lekë si dhe kërkesën e qeverisë për financimin e deficitit. Banka e Shqipërisë mund të financojë deri në 5 për qind të mesatares së të ardhurave të qeverisë në tre vitet e fundit, ose rreth 7.5 miliardë lekë.

----------------------------------------

Gazeta 55 http://www.gazeta55.com/

Legalistët, një dorë që shtyn Nanon drejt rrëpirës

Marilda Bejleri

Protesta e sotme mbarëkombëtare, e organizuar nga Partia Demokratike, ka gjetur mbështetjen e mjaft forcave të tjera opozitare. Qëllimi i vetëm i lëvizjes "Nano, ik!" tashmë është i qartë, rrëzimi i kryeministrit socialist Fatos Nano dhe çuarja e vendit në zgjedhje të parakohshme. Ndërkohë që strategjia e liderit Berisha për të rrezuar qeverinë "Nano", do të bëhet publike ditën e sotme, në sheshin "Skenderbej", gjatë zhvillimit të protestave mbarëkombëtare.

Unifikimi i forcave opozitare do ta bënte më të përshtatshëm ardhjen e demokratëve në pushtet. Kështu, thirrjes të kreut demokrat i janë përgjigjur dhe krerët e partive të tjera opozitare, për të rrëzuar regjimin e kryeministrit Nano. Legalistët kanë konfirmuar pjesëmarrjen e tyre në protestat masive të ditës të sotme. Sistemi antihuman që ka instaluar klika e socialistëve, me në krye kryeministrin Fatos Nano, reflektohet në të gjitha rrafshet e jetës sonë, siç janë gjendja e mjerueshme ekonomike, mungesa e sigurisë për jetën, mungesa e të drejtave elementare njerëzore, apo dhe thjesht, zhdukja e mundësisë për të ndërtuar jetën në këtë vend. Treguesit negativë të këtij sistemi qeverisës shihen në rritjen abuzive të çmimeve në treg, taksat shkatërruese për biznesin, tarifat çnjerëzore të energjisë e telefonisë, për të vazhduar me rritjen e kriminalitetit të organizuar, ku po bëjnë emër bijtë e pushtetarëve, apo të afërmit e tyre, si dhe shtimi i dukshëm i kontrabandës, trafiqeve të drogës e qenieve njerëzore.

Në këto kushte, Partia Lëvizja e Legalitetit u bën thirrje aktivistëve dhe simpatizantëve të saj, t'i bashkohen protestës së ditës të sotme, si e vetmja rrugë dhe e vetmja mundësi që qytetarët shqiptarë të synojnë të marrin në dorë fatin e së ardhmes së tyre. Kjo parti ka marrë të gjitha masat që sot të jenë në shesh të gjithë legalistët, simpatizantët e Legalitetit e monarkisë, të gjithë nacionalistët, antikomunistët, të përndjekurit dhe çdo qytetar i Tiranës, i cili nuk e duron më këtë qeveri mbi kurriz. Ndërkohë sheh si zgjidhje të vetme, krijimin e një qeverie teknike, që do të përgatisë infrastrukturën e zgjedhjeve të reja të parakohshme, të cilat do t'u japin mundësinë shqiptarëve, të jetojnë një jetë normale.

Neritan Alibali

"Kryesia e PR-së i ka bërë thirrje anëtarëve dhe simpatizantëve të saj, të marrin pjesë në mitingun e 7 shkurtit. Ne përshëndesim faktin që, për herë të parë organizohet një aktivitet i tillë, posaçërisht për probleme ekonomike, sociale, të qytetarëve shqiptare dhe si rrjedhim, dhe ndaj krimit të organizuar dhe korrupsionit shtetëror që po gjunjëzon vendin".

Preç Zogaj

"Ftoj anëtarët dhe simpatizantët e Partise Aleanca Demokratike, sikurse të gjithë qytetarët e Tiranës, që të jene tek sheshi "Skenderbej", për t'i dhënë një dorë çlirimit të Shqipërisë nga zgjedha e monopoleve dhe e korrupsionit, si dhe për t'i dhenë një dorë zhbllokimit të procesit të integrimit për në BE.