© 2003 Gazeta Panorama http://www.panorama.com.al/

Faqe 6 - Politikë
7Korrik 2004

Pretendenti për Fronin Mbretëror i shton ritmet e takimeve me politikanët
dhe intelektualët
  ligji i pronave
Leka I, kandidat për Polin e Tretë

Shkrimtarët, letër: Gati, ta mbështesim Lëvizjen Tuaj

Elisabeta Ilnica

Pretendenti për Fronit Mbretëror, Leka I, i shton ritmet e hapave drejt
politikës.

Ai ka shfrytëzuar situatën e tensionuar politike, sidomos pas deklarimit të
PS-së për zgjedhje të parakohshme, për të startuar realisht Lëvizjen e tij
të iniciuar disa javë më parë. Ashtu siç kish premtuar, pretendenti i Fronit
Mbretëror ka zhvilluar takime me përfaqësues të forcave politike të të
gjitha spektreve, duke i ftuar ata në krijimin e një koalicioni të ri. Edhe
pse nuk zbulohen emrat e politikanëve që kanë kontaktuar me Zogun, zyrtarët
e Oborrit të tij, bëjnë të ditur se "këto ditë NMT Leka I, është takuar me
përfaqësues të disa partive politike, me personalitete publike, profesorë të
Universitetit të Tiranës, të Magjistraturës, ekonomistë, specialistë të
agrobiznesit, të financave, gazetarë, shkrimtarë, nga të gjitha krahinat e
trojet shqiptare". Sipas tyre, kryefjala e takimeve kanë qenë drejtimet dhe
synimet e Lëvizjes për Zhvillim Kombëtar, hap i cili është vlerësuar si i
domosdoshëm në situatën aktuale politike, ku kompromiset dhe marrëveshjet po
vazhdojnë në dëm të kombit shqiptar. Si shembuj për këtë, Leka I ka
përmendur rezultatet e Samitit të Stambollit, raportet nga SHBA-ja dhe
BE-ja, veprimet dhe qëndrimet e papërgjegjshme për Ligjin e Pronave dhe për
kompensimin e të përndjekurve politikë, me votimin ku u vodh hapur vota e
deputetëve; marrëveshja për Komisionin Parlamentar për korrigjimin e Kodit
Elektoral dhe votimi i përshpejtuar, pa zbatuar procedurat parlamentare.

Shkrimtarët e mbështesin mbretin
Njerëzit e letrave i kthejnë sytë nga politika. Me anë të një letre, ata
kanë reaguar publikisht, duke deklaruar se "ne, si shkrimtarë të një vendi
të bukur, por fatkeq, dimë ta shohim realitetin me tri palë sy: me sytë e
ballit, me sytë e zemrës dhe me sytë e mendjes. Duke e parë me këto tri palë
sy këtë politikë të keqe ekonomike, që ia bën më të rëndë jetën shqiptarit,
jo vetëm sot, por edhe për të nesërmen, e mbështesim Lëvizjen Tuaj". Sipas
tyre, ky qëndrim vjen pasi për më shumë se dhjetë vjet tranzicion, politika
nuk ka sjellë veç varfëri për popullin dhe pasurime marramendëse për një
grup pushtetarësh të pandërgjegjshëm për detyrën.



12 shkrimtarët, që i shkruan Lekës I

Janë 12 figura të njohura të letrave shqipe, që shpëtimin e vendit e kanë
parë te familja mbretërore. Hysen Sinani, Sadik Bejko, Ibrahim Gani, Izet
Shehu, Kastriot Mahilaj, Koçi Petriti, Mexhit Premçi, Pano Taçi, Perikli
Jorgoni, Qazim Sheme, Shpëtim Kelmendi, Zimo Krutaj, janë 12 firmëtarët e
parë që i janë bashkuar publikisht Lëvizjes për Zhvillim Kombëtar, të
inicuar nga Leka I.



Iniciativa
Leka I i kapërcen kufijtë

Lëvizja e Lekës po fillon shtrirjen edhe jashtë kufijve të Shqipërisë. Zyra
e Shtypit pranë tij, ka njoftuar dje se "NMT Leka I ka marrë shumë letra dhe
mesazhe nga subjekte të ndryshme përfaqësimi nga e gjithë Shqipëria, nga
Prizreni, Ferizaj, Peja, Mitrovica, Tetova, Dibra, nga përfaqësues të
emigrantëve shqiptarë në Greqi, në Svicër, në Francë, në Belgjikë, në Suedi,
në SHBA, në Britaninë e Madhe, në Itali etj.". Sipas njoftimit, ata
mbështesin Lëvizjen për Zhvillim Kombëtar dhe angazhohen për të dhënë
ndihmesë aktive për të sjellë ndryshimet që kërkon populli shqiptar dhe që
ka marrë përsipër ky orientim i ri i familjes mbretërore.

---------------

Faqe 11 - Politikë
7Korrik 2004
 ligji i pronave
Kërkesa e Moisiut për konsensus mes partive, bie "në vesh të shurdhër"

PS: Nuk ka negociata për ligjin e pronave

Juli Prifti
Socialistët do ta kalojnë të hënën në Parlament projektligjin e pronave, pa
i bërë atij asnjë ndryshim.

Burime pranë Grupit Parlamentar të Partisë Socialiste, pohuan dje për
"Panorama" se kjo parti nuk ka ndërmend të ndryshojë diçka në variantin e
miratuar, një herë nga Kuvendi. Pas kthimit për rishqyrtim në Kuvend, të
projektligjit nga ana e presidentit Moisiu, u hodh ideja e rihapjes së
bisedimeve për gjetjen e konsesusit mes partive politike, për ta votuar
unanimisht këtë projektligj. Mirëpo, duket se negociatat e zhvilluara për
këtë qëllim nga ana e presidentit të Republikës, kanë kaluar pa lënë ndonjë
gjurmë te socialistët. Sipas të njëjtave burime, nuk pritet të zhvillohet
ndonjë tryezë për të arritur konsesusin, në lidhje me Nenin 15 të
projektligjit, në të cilin parashikohet drejtimi dhe përbërja e Komitetit
Kombëtar të Kthimit të Pronave. Kjo pikë e draftit u bë shkak për prishjen e
konsesusit që ishte arritur mes PS-së dhe PD-së, me ndërmjetësinë e
Prezencës së OSBE-së në Shqipëri, për hartimin e draftit. Sipas kreut të
Grupit Parlamentar të Partisë Socialiste, Gramoz Ruçi, kthimi i
projektligjit të pronave në Parlament, nga ana e presidentit Moisiu, ishte
thjesht një vendim politik dhe nuk bazohej në argumente kushtetuese. Kështu
që, socialistët duket se kanë vendosur të mos i kushtojnë rëndësi dekretit
të presidentit për rikthimin e projektligjit për rishqyrtim, por do ta
kalojnë draftin, ashtu siç është aktualisht, për miratim në seancën
parlamentare të ditës së hënë.

Debati
Gjatë votimit të parë në Parlament, të draftit të pronave, socialistët e
miratuan atë pa votat e opozitës. Në momentin që projektligji nuk do të
rishikohet për të marrë konsesusin e forcave të djathta, atëherë sërish vota
e këtyre të fundit do të jetë kundër projektligjit. Mirëpo, në kushtet e
reja të krijuara pas distancimit të aleatëve nga Partia Socialiste, duket se
PS-ja ka pak gjasa ta miratojë sërish këtë projektligj. Socialistët, ashtu
siç edhe ka deklaruar vetë Ruçi, nuk arrijnë të kenë kuorumin e nevojshëm
prej 71 votash, për të kaluar projektligje të rëndësishme, siç konsiderohet
se është ai i pronave. Në këtë rast, atyre u nevojiten aleatë që, tashmë,
nuk i kanë mes forcave të majta.



PD-ja: Nuk e votojmë variantin e PS-së

Demokratët do ta rishikojnë Ligjin e Pronave, me ardhjen në pushtet, në rast
se pas kthimit të dekretit nga presidenti Moisiu, maxhoranca nuk do të
pranojë amendamentet shtesë. Kështu është shprehur dje nënkryetari i
Komisionit të Ligjeve, Fatos Beja, duke konfirmuar se PD-ja nuk do ta votojë
ligjin e pronave, nëse nuk do të merren parasysh kërkesat e Moisiut. "Këto
dy ligje janë shumë të rëndësishëm dhe i takojnë shumë legjislaturave, ndaj
në rast se nuk do të kenë edhe konsensusin tonë, atëherë ne do t´i bëjmë
korrigjimet, me ardhjen në pushtet", tha Beja. Sipas tij, është absurde që
për çështjet që lidhen direkt me fatin e vendit, të vendosë forca e
kartonit. Duke u paraqitur socialistëve, kushtet e PD-së në këmbim të votës
pro të ligjit të pronave, Beja thekson se "bëhet fjalë për ato nene që
maxhoranca i miratoi pas largimit të opozitarëve nga salla, për shkak të
debatit të kreut të Komitetit Shtetëror për Kthimin dhe Kompensimin e
pronave". Ai kundërshton hapur amendamentin e socialistëve, ku u jepet e
drejta atyre që kanë pronat me qira apo në përdorim, që të kenë privilegjin
e parablerjes.